Nalipay Bala Kamo sa Pagtuon sing Personal?

ANG bisan sin-o nga hanuot nga alagad sang Dios malipay sa paghinguyang sing madamo nga tion sa personal nga pagtuon sa Biblia. (Salmo 1:​1, 2) Bisan pa ang malipayon nga balatyagon nagakinahanglan sang ila tion kag kusog, madamo ang nakasapo nga mabudlay maghinguyang sing madamo nga tion kag enerhiya sa personal nga pagtuon subong sang luyag nila.

Apang, agod makapadayon subong aktibo nga mga alagad sang Dios, dapat bag-uhon sang tanan ang ila kalipay kag kusog sa adlaw-adlaw paagi sa pagpangita sing bag-o ukon mas madalom nga mga bahin sang kamatuoran sang Pulong sang Dios. Ang mga kamatuoran sang Biblia nga nagpahulag sing tudok sa inyo sang nagligad nga mga tinuig mahimo nga wala na karon nagapahulag sa inyo. Busa, maayo, kag kinahanglanon pa gani, nga maghimo kita sing mahunahunaon kag dalayon nga panikasog nga matigayon ang bag-o nga paghangop sa kamatuoran agod huptan ang aton kaugalingon nga mapagsik sa kamatuoran.

Paano ginpabakod sang dumaan nga mga tawo sang pagtuo ang ila kaugalingon sa espirituwal paagi sa personal nga pagtuon sa Pulong sang Dios? Paano ginahimo sang pila sa modernong-adlaw nga mga alagad ni Jehova ang ila pagtuon nga mas makalilipay subong man mabungahon? Paano sila ginpadyaan tungod sang ila mga panikasog?

Nakatigayon Sila sing Bag-o nga Kusog Paagi sa Personal nga Pagtuon

Ginhimo ni Hari Josias sang Juda ang iya kampanya batok sa idolatriya sing labi pa kasidla pagkatapos ginbasa ‘ang tulun-an sang kasuguan ni Jehova nga ginhatag paagi sa kamot ni Moises’ sa iya. Walay duhaduha nga indi ini ang nahauna nga tion nga ginbinagbinag niya ini nga bahin sang Pulong sang Dios; apang ang pagpamati sa mensahe sing direkta sa orihinal nga manuskrito nagpapagsik sa iya sa iya pagpakig-away para sa putli nga pagsimba.​—⁠2 Cronica 34:​14-19.

Nahantop ni manalagna Daniel ‘ang kadamuon sang mga tuig sa pagtuman sa mga pagpamingaw sang Jerusalem’ kag ang kapat-uran sini indi lamang gikan sa tulun-an ni Jeremias kundi subong man gikan sa “mga tulun-an.” Ayhan naglakip ini sang mga tulun-an subong sang Levitico (26:​34, 35), Isaias (44:​26-28), Oseas (14:​4-7), kag Amos (9:​13-15). Ang napat-od niya paagi sa iya makugi nga pagtuon sa mga tulun-an sang Biblia nagdul-ong sa sining debotado nga tawo nga pangitaon ang Dios sa hanuot nga pangamuyo. Ang iya hanuot nga pangabay ginsabat paagi sa dugang nga pagpahayag kag liwat nga pagpasalig may kaangtanan sa siudad sang Jerusalem subong man sa iya katawhan.​—⁠Daniel, kapitulo 9.

Si Josias, nga naghimo sang “matarong sa mga mata ni Jehova,” kag si Daniel, nga “ginapakamahal sing daku” sa itululok sang Dios, indi gid man tuhay sa aton sa karon. (2 Hari 22:2; Daniel 9:23) Ang ila personal nga mga panikasog nga ginhinguyang sa ginpahulag sing daku nga pagtuon sa Kasulatan nga matigayon sadto nga tion nagdul-ong sa ila sa daku pa nga espirituwalidad kag nagbulig sa ila sa pagtigayon sing mas mabakod nga kaangtanan sa Dios. Amo man sini ang masiling tuhoy sa madamong iban pa nga mga alagad sang una ni Jehova, subong ni Jefte, sang isa ka salmista sa balay ni Asap, ni Nehemias, kag ni Esteban. Sila tanan naghatag sing pamatuod sang mahalungon nga personal nga pagtuon sang bahin sang Biblia nga matigayon sadtong panahon nila.​—⁠Hukom 11:​14-27; Salmo 79, 80; Nehemias 1:​8-10; 8:​9-12; 13:​29-31; Binuhatan 6:15–7:⁠53.

Himua ang Ministeryo nga Isa ka Pangpapagsik

Ang kalabanan nga mga alagad ni Jehova karon nga nag-alagad sa iya sa madamong tinuig may yara iskedyul sang personal nga pagtuon sa Biblia. Nasapwan nila ini nga kinahanglanon agod magpabilin nga nagabugtaw kag matuman sing bug-os ang ila Cristianong mga responsabilidad. Bisan pa amo sina, madamo sa ila ang nagabaton nga indi pirme mahapos timbangon ang paggamit sang ila tion kag enerhiya sa ulot sang pagtuon kag sang iban pa nga mga butang nga indi dapat pagpatumbayaan.

Sa gihapon, ang pagpabilin nga nagabugtaw sa espirituwal paagi sa makugi nga personal nga pagtuon kinahanglanon sa pag-atubang sa mga kinahanglanon sa Cristianong ministeryo sa sining abanse nga hut-ong sang bug-os kalibutan nga pagbantala sang Ginharian nga hilikuton. Ang mga nalipay sa bag-o kag mas madalom nga mga paghangop sa Pulong sang Dios mahimo nga makalubad sa hangkat sang pagtandog sa ginagutom nga mga tagipusuon. Matuod ini bisan pa nga ang isa gintangdo sa kon diin ang dalagku nga mga kuha paagi sa espirituwal nga pagpangisda sarang mapaabot ukon ang isa nagabatas sa pagpanghikot sa pirme ginabantalaan nga mga teritoryo diin kinaandan ang dipagsapak.

Tayuyon nga Magkaon sa Pulong sang Dios

Ang ginahimo sang iban mahimo nga magahatag sa inyo sing ideya sa kon paano kamo magakalipay sing labi sa inyo rutina sa pagtuon ukon sa kon paano kamo kag ang inyo pamilya mas makapaladya nga makagamit sang inyo tion sa pagtuon. Lakip sa mga butang nga indi luyag sang isa ka alagad sang Dios nga mawasi amo ang pagbasa mismo sa Pulong sang Dios sing tayuyon. Ginhimo sang madamo nga tulumuron ang pagbasa sa tatlo ukon apat ka kapitulo sang Biblia kada semana. Luyag bala ninyo mabasa ang bug-os nga Biblia sa isa ka tuig? Nian malipay kamo sa paghinguyang sing dugang pa nga tion sa pagbasa sini, ayhan sa tunga sa oras sa isa ka adlaw.

Nabasa na bala ninyo ang Biblia sing kapin sa isa ka bes? Ngaa indi magtalana sing isa ka bag-o nga tulumuron sa masunod nga tion? Para mangin lain naman, ginbasa sang isa ka Cristianong babayi ang mga tulun-an sang Biblia suno sa pasunod nga pagsulat sa sini. Nakuha niya ang madamong detalye, pasad sa kronolohiya, nga nawasi niya sadto anay. Ginbasa sang isa pa ka Cristianong babayi ang bug-os nga Biblia sing lima ka bes sa sulod sang nagligad nga lima ka tuig, ang tagsa gikan sa lain nga pagtamod. Sang una nga bes, ginbasa niya ini sing diretso halin sa Genesis tubtob Bugna. Sang ikaduha nga pagbasa, ginsumaryo niya ang kaundan sang tagsa ka kapitulo sa isa ukon duha ka linya sa kuwaderno. Sugod sang ikatlo, nagsaylo sia sa daku nga edisyon nga may reperensia, una mapilion nga gin-usisa ang mga cross-reference sa marhin kag sang ulihi ginhatagan sing daku pa nga igtalupangod ang mga foot­note subong man ang impormasyon sa apendise. Sang ikalima nga bes, gingamit niya ang mga mapa sa Biblia sa pagpauswag sang paghangop sa geograpiko nga bahin. Sia nagsiling: “Para sa akon, ang pagbasa sa Biblia nangin makalilipay subong sang pagkaon.”

Nakita sang pila ka hanuot nga mga estudyante sang Biblia nga mapuslanon ang pagtigayon sing isa ka kopya sang Biblia nga ginagamit lamang para sa personal nga pagtuon, nagasulat sing malip-ot sa mga marhin sini sang makawiwili nga mga komento, nagapahunahuna nga mga ilustrasyon, ukon mga numero sang pahina sang iban pa nga mga publikasyon nga sarang nila matan-aw sa ulihi. Ang isa ka bug-os tion nga ministro nalipay sa pagsulat sa iya kopya nga ginatun-an sa katapusan sang kada bulan sang pila ka punto nga natun-an niya sa sina nga bulan. “Ang pagpaabot sa sining hamili ko nga mga oras,” siling niya, “nagbulig sa akon sa pagtigayon sang iban pa nga mga tulumuron para sa bulan sing mas temprano.”

Ang Pila ka Lantip nga mga Ideya

Nagabatyag bala kamo nga ang inyo iskedyul puno sang adlaw-adlaw kag semanal nga mga kinahanglanon kag nga nagakinahanglan kamo sing pila ka panugda para sa maayo pa nga paggamit sang inyo limitado nga tion? Kon amo, dalha ang inyo ginatuyo nga basahon, kag gamita ang inyo mga tion sa pagpahunayhunay. Sa balay ukon sa kon diin kamo kinaandan nga nagatuon, kon mahimo areglaha sing maayo ang mga libro kag ang iban pa nga mga kagamitan sa pagtuon agod mahapos mo ini makuha. Himua nga masulhay ang inyo lugar nga ginatun-an apang indi tuman kasulhay nga tuyhon kamo. May asaynment bala kamo sa pagpamulongpulong? Basaha sing abanse ang materyal, nian hunahunaa ang mga ideya samtang nagapahuway ukon nagahimo ka sing lainlain nga mga hilikuton.

Ang iban mahimo nga magakooperar sa inyo nga magamit sing labing maayo ang tion para sa inyo lunsay nga kaayuhan. Halimbawa, mahimo ninyo ipabasa sing mabaskog sa iban ang mahapos hangpon nga mga artikulo samtang ginahimo ninyo ang inyo kinaandan nga hilikuton ukon ginaserbehan sing tsa ang inyo malulo nga manugbasa. Ano ayhan kon magaugyon ang tanan sa balay sa oras sang paghipos para sa personal nga pagtuon? “Ano ang nanamian mo nga basahon sining karon?” Kon kaisa ayhan magamit ninyo ang natun-an sang inyo mga abyan paagi sa pag-umpisa sang sugilanon sa sining paagi.

Interesado bala kamo sa pagpakilala sang pila ka bag-o nga mga ideya sa inyo programa sa pagtuon? Makatalana kamo sing tulumuron nga oras para sa pagtuon kaangay sang gintalana nga tulumuron nga oras sang iban para sa pagsugid sa iban nahanungod sa Biblia. Ang isa ka bug-os tion (payunir) nga manugbantala nagtalana sing binulan nga pinakamanubo nga lalab-uton nga oras sa pagtuon kag samtang ginasulat niya sa isa ka tsart ang oras nga ginhinguyang niya sa pagtuon nalipay sia nga makita nga malapit na niya malab-ot ang iya lalab-uton. Ginalatiran sang iban ang oras sa pagtan-aw sing telebisyon kag sa sina nga paagi nakatigayon sing oras sa pagtuon. Madamo ang nagapili sang isa ka tema sa pagtuon nga matun-an nila sa pila ka tion, subong sang mga bunga sang espiritu, impormasyon tuhoy sa mga tulun-an sang Biblia, ukon arte sang pagpanudlo. Ang iban naluyag sa paghimo sing mga tsart sang kronolohiya, subong sang tsart nga nagapakita sang kaangtanan sang mga hari kag mga manalagna sang Israel⁠a ukon Mga Binuhatan sang mga Apostoles kag mga sulat ni Pablo.

Mga pamatan-on, luyag bala ninyo ang mas mabakod nga pagtuo? Ngaa indi magpili sing isa ka publikasyon para tun-an ninyo sing maayo sa inyo masunod nga bakasyon sa eskwelahan? Ginpili sang isa ka bawtismado nga estudyante sa hayskul ang Mankind’s Search for God, ang libro nga ginbalhag sang Watch Tower Society. Kapitulo por kapitulo, ginsumaryo niya sing malip-ot sa isa ka kuwaderno ang iya natun-an. Makahalangkat ini kag nagkinahanglan sing mas madamo nga tion sangsa ginhunahuna niya. Apang, sang natapos niya ang bug-os nga libro, nahamuot gid sia sa pagkamaminatud-on sang mensahe sang Biblia.

Malangkag Pirme sa Pagtuon

Madamong modernong-adlaw nga matutom nga mga alagad ni Jehova ang “madamo [na] nga hilimuon sa buluhaton sang Ginuo.” (1 Corinto 15:58) Bisan paagi sa ginrepaso nga iskedyul kag hanuot nga mga panikasog, ang rutina nga inyo ginasunod sa isa ka kinaandan nga semana mahimo nga indi magbalhin sing daku. Apang, ang inyo padayon nga kalangkag sa pagtigayon sing mas madalom nga paghangop sa kamatuoran kag sa paghupot sa inyo kaugalingon nga nagahisanto sing bug-os sa katumanan sang mga katuyuan ni Jehova magabulig sa inyo nga magmadinalag-on sa pagpauswag sang inyo mga batasan sa pagtuon.

Makapalig-on pamatian ang mga padya sadtong nagpauswag sang ila batasan sa pagtuon. Sa pagkahibalo nga nadula niya ang positibo nga pagtamod sa pagpangita sing mas madalom nga paghangop sa kamatuoran, gin-organisar sang isa ka Cristianong lalaki ang iya kabuhi agod mahinguyang niya ang madamo sang iya oras sa pagliwaliwa sa personal nga pagtuon. “Naghatag ini sa akon sing kalipay nga wala ko anay mahibalui,” siling niya. “Bangod sang nagadaku nga pagsalig sa pagsulat sang Dios sa Biblia, nasapwan ko nga mahimo ko masugilanon ang iban nahanungod sa akon pagtuo nga may daku nga kapagsik. Ang pamatyag ko ginapakaon ako sing maayo, mapagros sa espirituwal, kag kontento sa katapusan sang tagsa ka adlaw.”

Ang isa ka nagalakbay nga manugtatap sang mga Saksi ni Jehova, nga nagaduaw sa madamo nga kongregasyon, naglaragway sang iban nga mga benepisyo sa sining paagi: “Ang mga makugi sa personal nga pagtuon kinaandan na nga buhi kag mapagsik sa ila mga panghambal. Maayo ang ila kaangtanan sa iban, kag indi sila madali madala sang negatibo nga mga komento sang iban. Kon nagaalagad sa latagon, mapasibusibuon sila subong man alisto sa mga kinahanglanon sang mga tawo nga masugilanon nila.”

Ginadugang niya ang isa ka punto nga ayhan luyag huptan sang iban sa hunahuna kon nagausisa sang ila kaugalingon nga batasan sa pagtuon. “Sa mga miting para sa Makasulatanhon nga mga paghinun-anon, madamo ang nahuyog sa pagbasa sang ila mga komento gikan mismo sa naimprinta nga pahina. Makapanginpulos sila sing labi kon pamalandungan nila kon ano ang kahilabtanan sang materyal sa ila anay natun-an ukon sa ila kaugalingon nga kabuhi.” Sa banta ninyo, magauswag bala kamo sa sini nga bahin?

Si manalagna Daniel, sa edad nga kapin sa 90 ka tuig, wala nagbatyag nga nahangpan niya ang mga dalanon ni Jehova. Sa iya katapusan nga mga tinuig, namangkot sia nahanungod sa isa ka butang nga indi niya bug-os nga mahangpan: “O ginuo ko, ano bala ang katapusan nga bahin sining mga butang?” (Daniel 12:⁠8) Walay duhaduha nga ining wala nagabalhin nga kalangkag sa pagtuon sing dugang sa kamatuoran sang Dios amo ang sekreto sang iya dalayawon nga integridad sa dimalipatan nga dalanon sang iya kabuhi.​—⁠Daniel 7:​8, 16, 19, 20.

Ang kada isa sang mga alagad ni Jehova may kaanggid man kabug-at nga responsabilidad subong kay Daniel sa pagtindog nga malig-on subong isa sang Iya mga Saksi. Magkalangkag pirme sa pagtuon agod huptan ang inyo kaugalingon nga mabakod sa espirituwal. Tinguhai nga idugang ang isa ukon duha ka bag-o nga bahin sa inyo semanal, binulan, ukon tuigan nga iskedyul sang personal nga pagtuon. Tan-awa kon paano ginapakamaayo sang Dios ang bisan anong diutay nga panikasog nga ginahimo ninyo. Huo, magkalipay sa inyo personal nga pagtuon sa Biblia kag sa resulta nga ginadala sini.​—⁠Salmo 107:⁠43.

[Footnote]