“Natuman Ko ang Pagtuo”

PANUGIRON SANG MGA ABYAN NI BRUNELLA INCONDITTI

“ISA yadto ka mahinay gid kag masubo nga Sabado. Isahanon lamang ako sa sulod sang hulot, nga wala sing ginabatyag nga paglaum. Daw subong bala nga nagalakat ako sa isa ka pasilyo. Maayo ang tanan, kag sa hinali lang, may nagpasigabong sing ganhaan sa guya ko gid, kag wala sing alagyan paguwa, bisan ano man ang himuon ko.”

Daku gid nga kapaslawan ang ginbatyag sang 15-anyos nga si Bru­nella In­con­dit­ti. Ang labing importante nga adlaw sa iya lamharon nga kabuhi nagaligad. Sang maaga nga bahin sadto nga tuig ang iya nagadaku nga gugma para kay Jehova kag sa Biblia nagpahulag sa iya nga idedikar ang iya kabuhi sa iya. Sang Hulyo 1990 balawtismuhan sia sa “Putli nga Hambal” nga Distrito nga Kombension sang mga Saksi ni Jehova sa Mon­treal, Can­ada. Sa baylo, maatubang sa indi madugay ni Bru­nella ang isa ka pagtilaw sa iya pagtuo nga magadugay tubtob sa nabilin nga bahin sang iya kabuhi.

Duha ka adlaw antes sang ginpaabot niya nga simbuluhan ang iya dedikasyon paagi sa bawtismo sa tubig, nahibal-an ni Bru­nella nga may leukemia sia. Luyag sang mga doktor sa lokal nga ospital sang kabataan nga sugdan sa gilayon ang pagbulong, gani nagpabilin si Bru­nella sa ospital.

Ang Iya Kaugalingon nga mga Pulong Nagpahulag sa mga Doktor

Nahibaluan ni Bru­nella nga ang dugo sagrado kay Jehova nga Dios. (Levitico 17:11) Nagpasidaan ang iya mga ginikanan, sanday Edmondo kag Nicoletta, nga indi dapat tughungan sing dugo ang ila anak. “Luyag ni Bru­nella nga mabatian man ini sang mga doktor gikan sa iya mismo, bisan pa menor-de-edad lang sia,” hinumdom sang iya amay. “Malig-on nga ginsilingan niya sila nga indi niya luyag ang pagbulong nga magasupak sa sugo sang Biblia nga ‘maglihi sa dugo.’ ”​—⁠Binuhatan 15:⁠20.

Sang Hulyo 10, 1990, tatlo ka doktor kag isa ka so­cial work­er ang nakigkita sa mga ginikanan ni Bru­nella kag sa duha ka ministro gikan sa lokal nga kongregasyon sang mga Saksi ni Jehova. Ginpamatud-an sang mga pag-usisa nga si Bru­nella may ­acute lym­pho­blastic leu­kemia. Ginpaathag sang mga doktor ang ila plano nga awayon ang balatian. Mataktikanhon nga ginlaragway nila nga mabudlay gid ini bulngon. “Natandog ang mga doktor kag ang so­cial work­er sa paggawi kag determinasyon ni Bru­nella sa pagtuman sa Dios. Nagdayaw sila sa gugma sang iya mga ginikanan kag sa pagsakdag sang mga abyan gikan sa Cristianong kongregasyon. Gin-apresyar man nila ang aton paghangop kag pagtahod sa ila posisyon,” hinumdom sang isa sang mga gulang sa kongregasyon.

Gintuyo sang mga doktor nga likawan ang pagtughong sing dugo. Si Bru­nella magabaton sing ex­ten­sive che­mo­ther­apy, apang mangin kubos ini ka agresibo sangsa kinaandan. Buhinan sini ang halit sa mga selula sang iya dugo nga tugahon sang pagbulong. “Ginbinagbinag sang mga doktor ang pisikal, emosyonal, kag espirituwal nga mga kinahanglanon ni Bru­nella,” paathag ni Nicoletta. “Sang ginpangabay namon sila nga magkonsulta sa isa ka espesyalista nga eks­periensiado sa pagbulong sa leukemia sang bata nga wala nagagamit sing dugo, nagsugot sila.” Si Bru­nella kag ang mga tinawo sang ospital nagporma sing isa ka mainit nga higot sang paghigugmaanay.

Espirituwal nga mga Tulumuron

Bisan pa may pila ka maayong mga resulta ang una nga pagbulong, ang kabudlayan ni Bru­nella nagasugod pa lang. Sang Nobiembre 1990 ang iya balatian nagkanay, gani sa walay pagpalantang ginbawtismuhan sia. Sa paghinumdom sa nagligad nga pila ka binulan, si Bru­nella nagbaton: “Indi gid yadto mahapos. Nagakinahanglan ikaw sing daku nga kusog, kag dapat ikaw maghunahuna sing positibo. . . . Gintilawan ang akon pagtuo, apang nagpabilin ako nga malig-on, kag nagaplano gihapon ako nga himuon ang pagregular payunir [bug-os tion nga ministro] subong akon karera.”

Sang maaga nga bahin sang 1991, naglukmat ang balatian ni Bru­nella. Diutayan lang sia mapatay samtang ginapaidalom sa che­mo­ther­apy, apang sa kakibot kag kalipay sang tanan, nakapasag-uli sia. Pag-abot sang Agosto, nag-ayuayo ang iya lawas amo kon ngaa nahinguyang niya ang bug-os nga bulan sa pagministeryo sa publiko subong isa ka aux­il­iary payunir. Ang iya balatian nagrabe liwat, kag sang Nobiembre 1991 ang iya lawas ginsalakay sang kanser sa pila ka bahin. Ginsugdan sia nga bulngon paagi sa radia­tion ther­apy sang isa naman ka grupo sang mga doktor sa lain nga ospital.

Bisan sa idalom sadtong mabudlay nga mga kahimtangan, nagpabilin si Bru­nella nga malig-on kag nagpahamtang sing espirituwal nga mga tulumuron para sa iya kaugalingon. Sang una niya mahibal-an ang nahanungod sa leukemia, ginsilingan sia nga basi anom ka bulan na lang ang ikabuhi niya. Karon, halos isa ka tuig kag tunga sang ulihi, si Bru­nella nagahimo gihapon sing mga plano para sa palaabuton. “Wala sia mag-uyang sing tion para sa iya mga tulumuron,” siling sang isa ka gulang sa kongregasyon. “Ang pagtuo ni Bru­nella sa ginsaad nga Paraiso sang Dios nagpabaskog sa iya sa bug-os niya nga kabudlayan. Nagtubo sia sa Cristianong pagkahamtong bisan bata pa sia. Ang iya paggawi kag panimuot nag-inspirar sa kongregasyon kag natandog niya ang tagipusuon sang mga nakakilala sa iya, lakip ang mga tinawo sang ospital.” Ang iya iloy naghinumdom: “Wala gid sia magreklamo. Kon ginapamangkot sia kon kamusta ang pamatyag niya, nagasabat sia, ‘Maayo,’ ukon, ‘Indi malain, kag ikaw naman?’ ”

Isa ka Sigurado nga Palaabuton

Nagplano si Bru­nella sa pagtambong sa “Mga Manugdala sing Kapawa” nga Distrito nga Kombension sang mga Saksi ni Jehova sang Hulyo 1992. Apang, sang mag-abot ang tion sang kombension, naospital si Bru­nella, kag ang iya kabuhi amat-amat nga nagalipas. Walay sapayan, nagtambong sia sa kombension nga nagasakay sa wheel­chair, kay luyag gid niya makita ang drama nga Paghimo sing Matarong sa mga Mata ni Jehova.

Nagpauli sia sa iya pamilya para sa hingapusan nga pila ka inadlaw sang iya kabuhi. “Tubtob sa katapusan, mas nabalaka sia sa iban sangsa iya kaugalingon,” siling ni Nicoletta. “Ginapalig-on niya sila nga magtuon sing Biblia, ginasilingan sila nga, ‘Magaupdanay kita sa Paraiso.’ ”

Napatay si Bru­nella sang Hulyo 27, 1992, malig-on sa iya ginalauman nga pagkabanhaw padulong sa kabuhi sa Paraiso sa duta. Wala pa lamang madugay nga nasugdan niya ang pagpanghikot para sa iya mga tulumuron, apang nagplano sia nga padayunon ang iya dedikado nga dalanon pagkatapos sang iya pagkabanhaw. Pila lamang ka mga adlaw antes sia mapatay, ginsulat ni Bru­nella ang masunod nga sulat, nga ginbasa sa iya lubong.

“Mahal nga mga Abyan:

“Salamat sa inyo pagkari. Ang inyo presensia isa gid ka daku nga butang sa akon pamilya.

“Para sa mga tawo nga malapit sa akon​—⁠madamo kita sing inagihan. Madamo kita sing malain nga mga tion, apang may yara man kaladlawan nga mga tion. Isa yadto ka mabudlay kag malawig nga pagpakig-away, apang wala ko ginabatyag nga napaslawan ako. Subong sang ginasiling sa Kasulatan, ‘Nakapakig-away ako sing maayong pag-away, nadalagan ko ang dalaganon tubtob sa katapusan, natuman ko ang pagtuo.’​—⁠2 Timoteo 4:⁠7.

“Madamo man ako sing natun-an, kag naghamtong ako sing daku, kag nakita sang akon mga abyan kag sang mga tawo sa palibot ko ang akon pagbag-o. Luyag ko pasalamatan ang tanan nga mga tawo nga nagsakdag sa akon.

“Kamo nga nagapati sa bag-ong sistema kag kay Jehova nakahibalo nga may yara pagkabanhaw, subong sang ginasiling sang Juan 5:​28, 29. Gani magpabilin kamo nga malig-on sa kamatuoran, kag magakit-anay kita liwat.

“Luyag ko pasalamatan ang mga tawo nga nakahibalo sang akon gin-agihan. Ginahatagan ko ang tagsatagsa sa inyo sing malawig nga hakos kag halok. Ginapalangga ko kamo tanan.”

Wala gintugutan ni Bru­nella ang iya pagkapamatan-on ukon ang iya balatian nga paisulon ang iya dedikasyon sa Dios. Ang iya huwaran sa pagtuo kag determinasyon nagapalig-on sa bata kag tigulang nga isikway ang bisan anong butang nga mahimo nagaupang sa ila sa pagdalagan sang dalaganon para sa kabuhi.​—⁠Hebreo 12:⁠1.