Palambua ang Pagkamakatarunganon

“Ipakilala ang inyo pagkamakatarunganon sa tanan nga tawo. Malapit na ang Ginuo.”​—⁠FILIPOS 4:⁠5.

1. Ngaa isa ka hangkat ang mangin makatarunganon sa karon nga kalibutan?

“ANG makatarunganon nga tawo”​—⁠Ginakabig sia ni Sir Alan Patrick Herbert nga isa ka persona sang mito. Huo, kon kaisa daw matuod nga wala na gid sing ­nabilin nga makatarunganon nga mga tawo sa sining magamo nga kalibutan. Ginatagna sang Biblia nga sa sining makahalanguyos nga “katapusan nga mga adlaw,” ang mga tawo mangin “mabangis,” “dasudaso,” kag “dimalugpayan”​—⁠sa iban nga hambal, indi gid makatarunganon. (2 Timoteo 3:​1-5) Walay sapayan, ginapadaku sang matuod nga mga Cristiano ang pagkamakatarunganon, nakahibalo nga isa ini ka tanda sang Diosnon nga kaalam. (Santiago 3:17) Wala kita nagapati nga imposible ang mangin makatarunganon sa isa ka dimakatarunganon nga kalibutan. Sa baylo, ginabaton naton sing bug-os ang hangkat sa inspirado nga laygay ni apostol Pablo nga masapwan sa Filipos 4:5: “Ipakita ang inyo pagkamakatarunganon sa tanan nga tawo.”

2. Paano kita ginabuligan sang mga pinamulong ni apostol Pablo sa Filipos 4:5 nga mahibaluan kon bala makatarunganon kita?

² Talupangda kon paano kita ginabuligan sang pinamulong ni Pablo agod tilawan kon bala makatarunganon kita. Indi ini tuhoy sa kon paano naton tan-awon ang aton kaugalingon; tuhoy ini sa kon paano kita ginatan-aw sang iban, kon paano ang pagkakilala sa aton. Ang pagbadbad ni Philip sa sini nga bersikulo nagasiling: “Magtigayon sing reputasyon subong makatarunganon.” Maayo nga mamangkot kita tanan, ‘Ano ang pagkakilala sa akon? May reputasyon bala ako subong makatarunganon, masinulugton, kag malum-ok? Ukon kilala bala ako subong isa nga matigdas, maparas, ukon dasudaso?’

3. (a) Ano ang kahulugan sang Griegong tinaga nga ginbadbad “makatarunganon,” kag ngaa makagalanyat ini nga kinaiya? (b) Paano mahimo makatuon ang isa ka Cristiano nga mangin labi ka makatarunganon?

³ Ang aton reputasyon sa sini nga bahin magapabanaag sang kasangkaron sang aton pag-ilog kay Jesucristo. (1 Corinto 11:⁠1) Sang yari sa duta, himpit nga ginpabanaag ni Jesus ang supremo nga halimbawa sang pagkamakatarunganon sang iya Amay. (Juan 14:⁠9) Sa pagkamatuod, sang ginsulat ni Pablo ang tuhoy sa “pagkalulo kag pagkamaluluy-on ni Cristo,” ang Griegong tinaga nga gingamit niya para sa pagkamaluluy-on (e·pi·ei·kiʹas) nagakahulugan man sing “pagkamakatarunganon” ukon, sing literal, “pagkamasinulugton.” (2 Corinto 10:⁠1) Ginatawag ini sang The Expositor’s Bible Commentary nga “isa sang dakung mga tinaga sang paglaragway sa panimuot sa Bag-o nga Testamento.” Ginalaragway sini ang isa ka makagalanyat nga kinaiya sa amo ginbadbad sang isa ka eskolar ang tinaga subong “matam-is nga pagkamakatarunganon.” Busa, hambalan naton ang tatlo ka paagi diin si Jesus, kaangay sang iya Amay, si Jehova, nagpasundayag sing pagkamakatarunganon. Sa amo mahimo naton matun-an kon paano kita mismo mangin labi ka makatarunganon.​—⁠1 Pedro 2:⁠21.

“Handa sa Pagpatawad”

4. Paano ginpakita ni Jesus nga sia “handa sa pagpatawad”?

⁴ Kaangay sa iya Amay, nagpakita si Jesus sing pagkamakatarunganon paagi sa ‘kahanda sa pagpatawad’ sa liwat kag liwat. (Salmo 86:⁠5) Binagbinaga ang tion sang si Pedro, isa ka suod nga kaupod, nagpanghiwala kay Jesus sing tatlo ka beses sang gab-i nga gindakop kag ginkasaba si Jesus. Antes sini si Jesus mismo nagsiling: “Ang bisan sin-o nga magpanghiwala sa akon sa atubangan sang mga tawo, ipanghiwala ko man sia sa atubangan sang akon Amay.” (Mateo 10:33) Matigdas bala kag walay kaluoy nga ginpadapat ni Jesus kay Pedro ini nga pagsulundan? Wala; pagkatapos sang Iya pagkabanhaw, ginduaw sing personal ni Jesus si Pedro, walay duhaduha agod paumpawan kag palig-unon ining mahinulsulon, ginsubuan nga apostol. (Lucas 24:34; 1 Corinto 15:⁠5) Wala madugay sang ulihi, gintugutan ni Jesus si Pedro nga makatigayon sing daku nga responsabilidad. (Binuhatan 2:​1-41) Diri ginpasundayag sing lubos ang matam-is nga pagkamakatarunganon! Indi bala makapaumpaw hunahunaon nga gintangdo ni Jehova si Jesus subong isa ka Hukom sa tanan nga katawhan?​—⁠Isaias 11:​1-4; Juan 5:⁠22.

5. (a) Ano nga reputasyon ang dapat tigayunon sang mga gulang sa tunga sang mga karnero? (b) Ano nga materyal ang dapat repasuhon sang mga gulang antes uyatan ang hudisyal nga mga kaso, kag ngaa?

⁵ Kon ang mga gulang nagapanghikot subong mga hukom sa kongregasyon, ginatinguhaan nila nga sundon ang makatarunganon nga halimbawa ni Jesus. Indi nila luyag nga kahadlukan sila sang karnero subong mga manugsilot. Sa baylo, ginatinguhaan nila nga ilugon si Jesus agod nga ang karnero magabatyag nga hilway upod sa ila subong mahigugmaon nga mga manugbantay. Sa hudisyal nga mga kaso, ginahimo nila ang tanan nga panikasog nga mangin makatarunganon, handa sa pagpatawad. Antes uyatan ang kasubong sini nga butang, nasapwan sang pila ka gulang nga mabuligon nga repasuhon ang Hulyo 1, 1992, nga mga artikulo sang Lalantawan “Si Jehova, ang Walay Ginadampigan nga ‘Hukom sang Bug-os nga Duta’ ” kag “Mga Gulang, Maghukom Upod ang Pagkamatarong.” Busa ginadumdom nila ang kabug-usan sang paagi ni Jehova sa paghukom: “Kalig-on kon kinahanglanon, kaluoy kon posible.” Indi sayop nga mahuyog sa pagkaluoy sa paghukom kon may yara makatarunganon nga sadsaran nga himuon ini. (Mateo 12:⁠7) Isa ka daku nga sayop ang mangin dasudaso kag walay kaluoy. (Ezequiel 34:⁠4) Busa malikawan sang mga gulang nga magsayop paagi sa aktibo nga pagkuha sang posible labing mahigugmaon, maluluy-on nga dalanon sa sulod sang dulunan sang katarungan.​—⁠Ipaanggid ang Mateo 23:23; Santiago 2:⁠13.

Pagkamapasibusibuon Kon Ginaatubang sing Nagabulubag-o nga mga Kahimtangan

6. Paano ginpakita ni Jesus ang pagkamakatarunganon sa iya pagpakig-angot sa isa ka Gentil nga babayi nga ang iya bata nga babayi ginsuuban sang demonyo?

⁶ Kaangay ni Jehova, ginpamatu-ad ni Jesus nga maabtik sia sa pagbag-o sang dalanon ukon sa pagpasibu kon may yara nagautwas nga bag-o nga mga kahimtangan. Sa isa ka okasyon isa ka Gentil nga babayi ang nakiluoy sa iya nga ayuhon ang iya ginsuuban sing demonyo nga anak nga babayi. Sa tatlo ka nanuhaytuhay nga paagi, ginpakita na ni Jesus nga indi niya sia pagbuligan​—⁠una, paagi sa paglikaw sa pagsabat sa iya; ikaduha, paagi sa pagsiling sing direkta nga ginpadala sia, indi para sa mga Gentil, kundi sa mga Judiyo; kag ikatlo, paagi sa paghatag sing ilustrasyon nga nagapahangop sang pareho nga butang. Apang, nagpadayon ang babayi walay sapayan sining tanan, nagapakita sing pamatuod sang pinasahi nga pagtuo. Nagabinagbinag sining talalupangdon nga kahimtangan, nakita ni Jesus nga indi ini tion sa pagpatuman sing isa ka kabilugan nga pagsulundan; tion ini nga mangin mapasibusibuon subong pagsunod sa mataas nga mga prinsipio.⁠a Busa, ginhimo ni Jesus ang amo gid nga butang nga tatlo ka beses nga ginsiling niya nga indi niya paghimuon. Gin-ayo niya ang anak sang babayi!​—⁠Mateo 15:​21-28.

7. Sa anong mga paagi mahimo mapakita sang mga ginikanan ang pagkamakatarunganon, kag ngaa?

⁷ Kilala man bala kita bangod sang aton kahanda sa pagpasibu kon nagakaigo? Kinahanglan nga masami ipakita sang mga ginikanan ang amo nga sahi sang pagkamakatarunganon. Bangod nga tuhay ang tagsa ka bata, ang mga paagi nga madinalag-on sa isa ka bata mahimo nga indi nagakaigo sa isa. Dugang pa, samtang nagadaku ang mga kabataan, nagabag-o ang ila mga kinahanglanon. Dapat bala bag-uhon ang ginapatuman nga tion sang pagpauli sang bata? Mangin mapuslanon ayhan ang pamilya nga pagtuon kon himuon ini nga mas mapagsik? Kon maakig ang ginikanan bangod sang pila ka diutay nga mga kakulangan, handa bala sia nga magpaubos kag tadlungon ang mga butang? Malikawan sang mga ginikanan nga nagasunod sa sinang mga dalanon nga mapaakig sing dikinahanglanon ang ila kabataan kag magpahilayo sa ila kay Jehova.​—⁠Efeso 6:⁠4.

8. Paano mahimo makapanguna ang mga gulang sa kongregasyon sa pagpasibu sa mga kinahanglanon sa teritoryo?

⁸ Ang mga gulang subong man kinahanglan nga magpasibu kon may bag-o nga mga kahimtangan nga mag-utwas, samtang wala gid nagakompromiso sang espesipiko nga mga kasuguan sang Dios. Kon nagatatap sa pagbantala nga hilikuton, alisto ka bala sa mga pagbag-o sa teritoryo? Bangod nagabag-o ang mga paagi sang pagkabuhi sang mga tawo sa palibot, mahimo nga palig-unon bisan ang pagpanaksi kon gab-i, pagpanaksi sa dalan ukon pagpanaksi sa telepono. Ang pagpasibu sa sinang mga paagi makabulig sa aton nga matuman ang aton komisyon sa pagbantala sing labi ka epektibo. (Mateo 28:​19, 20; 1 Corinto 9:26) Ginpadaku man ni Pablo ang pagpasibu sa tanan nga sahi sang tawo sa ministeryo. Ginahimo man bala naton ini, halimbawa, paagi sa pagtuon sing maayo tuhoy sa lokal nga mga relihion kag kultura agod mabuligan ang mga tawo?​—⁠1 Corinto 9:​19-23.

9. Ngaa indi dapat pag-ipilit sang isa ka gulang nga uyatan pirme ang isa ka problema sa paagi nga ginhimo niya sang nagligad?

⁹ Samtang labi nga nagabudlay ining katapusan nga mga adlaw, ang mga manugbantay nagakinahanglan man nga magpasibu sa makapagumon nga karikot kag kabudlay sang pila ka problema nga ginaatubang karon sang ila panong. (2 Timoteo 3:1) Mga gulang, indi ini tion sang katigdas! Pat-od nga indi pag-ipilit sang isa ka gulang nga uyatan ang mga problema kaangay sang iya nauyatan anay kon ang iya mga paagi indi nangin epektibo ukon kon nakita sang “matutom kag mainandamon nga ulipon” nga nagakaigo ang magbalhag sing bag-o nga materyal tuhoy sa sinang mga butang. (Mateo 24:45; ipaanggid ang Manugwali 7:10; 1 Corinto 7:31) Sinsero nga gintinguhaan sang isa ka gulang nga buligan ang isa ka napung-awan nga utod nga babayi nga nagakinahanglan gid sang isa nga maayo mamati. Apang, wala niya gintamod ang iya kapung-aw nga serioso kag nagtanyag sing simple nga mga solusyon. Nian nagbalhag ang Watch Tower Society sing pila ka pasad sa Biblia nga impormasyon nga nagapaathag sang iya mismo problema. Ginpat-od sang gulang nga masugilanon sia liwat, sa sini nga tion ginaaplikar ang bag-o nga materyal kag nagapakita sing kahanuklog sa iya kahimtangan. (Ipaanggid ang 1 Tesalonica 5:​14, 15.) Daw ano kaayo nga halimbawa sang pagkamakatarunganon!

10. (a) Paano dapat ipakita sang mga gulang ang masinulugton nga panimuot sa isa kag isa kag sa hubon sang mga gulang sa kabilugan? (b) Paano dapat tamdon sang hubon sang mga gulang yadtong mga gulang nga nagapakita sing pagkadimakatarunganon?

¹⁰ Ang mga gulang nagakinahanglan nga magpakita sing masinulugton nga panimuot sa isa kag isa sa ila. Kon nagatipon ang hubon sang mga gulang, importante gid nga wala sing isa ka gulang nga magadominar sang paghambalanay! (Lucas 9:48) Ang isa nga nagadumala nagakinahanglan gid sing pagpugong sa sini nga bahin. Kag kon ang isa ukon duha ka gulang wala nagaugyon sa desisyon sang kabilugan nga hubon sang mga gulang, indi sila magapamilit nga himuon ang mga butang suno sa ila luyag. Sa baylo, tubtob nga wala sing may ginalapas nga Makasulatanhon nga prinsipio, magapasugot sila, nagadumdom nga ang pagkamakatarunganon ginakinahanglan sa mga gulang. (1 Timoteo 3:​2, 3) Sa pihak nga bahin, dapat tandaan sang hubon sang mga gulang nga ginsabdong ni Pablo ang kongregasyon sang Corinto bangod sa ‘pagbatas sa dimakatarunganon nga mga tawo’ nga nagapakilala sang ila mga kaugalingon subong “lutaw nga mga pinadala.” (2 Corinto 11:​5, 19, 20) Gani dapat nga mangin handa sila sa paglaygay sa isa ka masigkagulang nga nagagawi sing bat-ulan, dimakatarunganon nga paagi, apang dapat sila mangin malum-ok kag maluluy-on sa paghimo sing amo.​—⁠Galacia 6:⁠1.

Pagkamakatarunganon sa Paggamit sang Awtoridad

11. Ano ang kinatuhayan sa paggamit sang ila awtoridad sa ulot sang relihiosong lider nga mga Judiyo sang adlaw ni Jesus kag sang paggamit sini ni Jesus?

¹¹ Sang diri si Jesus sa duta, ang iya pagkamakatarunganon tunay nga makita sa paagi sang iya paggamit sang iya hatag-Dios nga awtoridad. Tuhay gid sia sa relihioso nga mga lider sang iya adlaw! Binagbinaga ang isa ka halimbawa. Ginapatuman sang kasuguan sang Dios nga wala sing pagpangabudlay, bisan sing pagpanipon sing kahoy, ang pagahimuon sa tion sang Adlaw nga Inugpahuway. (Exodo 20:10; Numeros 15:​32-36) Luyag gamhan sang relihioso nga mga lider kon paano ginatuman sang mga tawo ina nga kasuguan. Gani sila mismo ang nagpatuman kon ano gid ang mahimo nga pas-anon sang isa ka tawo sa tion sang Adlaw nga Inugpahuway. Ginsugo nila: wala sing may magbug-at sangsa duha ka mamala nga igos. Ginpatuman pa gani nila ang pagdumili sing paggamit sing may lansang nga sandalyas, nagasiling nga ang paghakwat sa dugang nga kabug-aton sang mga lansang mahimo tamdon subong pagpangabudlay! Ginasiling, nga sa kabilugan, gindugangan sang mga manunudlo sang 39 ka pagsulundan ang kasuguan sang Dios tuhoy sa Adlaw nga Inugpahuway kag nian naghimo sing walay untat nga pagdugang sa sadtong mga pagsulundan. Si Jesus, sa pihak nga bahin, wala magtinguha nga gamhan ang mga tawo sa kahuya paagi sa pagpatuman sing walay katapusan madumilion nga mga pagsulundan ukon paagi sa pagpahamtang sing matigdas, indi malab-ot nga mga talaksan.​—⁠Mateo 23:​2-4; Juan 7:​47-49.

12. Ngaa makasiling kita nga si Jesus wala nagbag-o kon tuhoy sa matarong nga mga talaksan ni Jehova?

¹² Dapat bala kita, nian, maghunahuna nga wala ginsakdag sing malig-on ni Jesus ang matarong nga mga talaksan sang Dios. Ginsakdag gid niya ini! Nahangpan niya nga ang mga kasuguan epektibo gid kon dumdumon sing maayo sang mga tawo ang mga prinsipio sa likod sinang mga kasuguan. Samtang ang mga Fariseo nabalaka tuhoy sa paggahom sa katawhan paagi sa ila dimaisip nga mga pagsulundan, gintinguhaan ni Jesus nga lab-uton ang mga tagipusuon. Halimbawa, nahibaluan gid niya nga indi kinahanglan nga magmasinulugton kon tuhoy sa diosnon nga kasuguan subong sang “magpalayo sa pagpakighilawas.” (1 Corinto 6:18) Gani ginpaandaman ni Jesus ang mga tawo tuhoy sa mga panghunahuna nga mahimo makadul-ong sa imoralidad. (Mateo 5:28) Ina nga panudlo nagakinahanglan sing dugang nga kaalaman kag paghangop sangsa pagpatuman lamang sing matigdas, himu-himo nga mga pagsulundan.

13. (a) Ngaa dapat likawan sang mga gulang nga maghimo sing dimapasibuon nga mga kasuguan kag mga pagsulundan? (b) Ano ang iban nga bahin diin importante nga tahuron ang konsiensia sang isa ka indibiduwal?

¹³ Ang responsable nga mga kauturan sa karon interesado man sa paglab-ot sa mga tagipusuon. Busa, ginalikawan nila ang magpatuman sing mapiguson, dimapasibuon nga mga pagsulundan ukon ang paghimo sang ila personal nga mga pagtamod ukon opinyon nga mga kasuguan. (Ipaanggid ang Daniel 6:​7-16) Sa tion kag tion, ang maluluy-on nga mga pahanumdom sa mga bagay kaangay sang pagpanapot kag pamustura mahimo nga nagakaigo kag sibu sa tion, apang mahimo mahalitan sang isa ka gulang ang iya reputasyon subong isa ka makatarunganon nga tawo kon sulitsuliton niya ining mga butang ukon ipamilit nga ipatuman kon ano ang iya personal nga naluyagan. Sa pagkamatuod, dapat likawan sang tanan sa kongregasyon nga magtinguha nga kontrolon ang iban.​—⁠Ipaanggid ang 2 Corinto 1:24; Filipos 2:⁠12.

14. Paano ginpakita ni Jesus nga makatarunganon sia sa kon ano ang iya ginapaabot sa iban?

¹⁴ Mahimo nga luyag usisaon sang mga gulang ang ila kaugalingon sa iban nga butang: ‘Makatarunganon bala ako sa kon ano ang ginapaabot ko sa iban?’ Amo gid sina si Jesus. Ginpakita niya sing mapinadayunon sa iya mga sumulunod nga wala sia nagapaabot sing kapin kundi ang ila bug-os kalag nga mga pagtinguha kag nga ginapabilihan niya ini sing daku. Gindayaw niya ang imol nga balo bangod sang paghatag niya sang iya manubo sing balor nga mga sensilyo. (Marcos 12:​42, 43) Ginsaway niya ang iya mga disipulo sang ginhikayan nila ang malahalon nga amot ni Maria, nga nagasiling: “Pabayai ninyo sia. . . Naghimo sia sang iya masarangan.” (Marcos 14:​6, 8) Makatarunganon sia bisan ginpaslaw sia sang iya mga sumulunod. Halimbawa, bisan nga ginsugo niya ang iya tatlo ka pinakasuod nga mga apostol nga magpulaw kag padayon nga magbantay upod sa iya sang gab-i nga gindakop sia, ginpaslaw nila sia paagi sa sulitsulit nila nga pagkatulog. Apang, naghambal sia sing mahinuklugon: “Sa pagkamatuod ang espiritu buot, apang ang unod maluya.”​—⁠Marcos 14:​34-38.

15, 16. (a) Ngaa dapat maghalong ang mga gulang nga indi pag-ipton ukon pahugon ang panong? (b) Paano ang isa ka matutom nga utod nga babayi nakapasibu sa kon ano ang iya ginapaabot sa iban?

¹⁵ Matuod, ginpalig-on ni Jesus ang iya mga sumulunod nga ‘magpangabudlay sing lakas.’ (Lucas 13:24) Apang wala gid niya sila ginpilit nga himuon ini! Ginpapagsik niya sila, nagpakita sing halimbawa, nagpanguna, kag gintinguhaan nga lab-uton ang ila mga tagipusuon. Nagsalig sia sa gahom sang espiritu ni Jehova nga himuon ang iban pa nga butang. Dapat man karon palig-unon sang mga gulang ang panong nga mag-alagad kay Jehova sing bug-os tagipusuon apang likawan nga pahugon sila paagi sa pagkonsiensia kag pagpahuya, nagapabatibati nga ang ila ulihi nga nahimuan sa pag-alagad kay Jehova daw indi bastante ukon dikalahamut-an. Ang matigdas nga pagsiling nga “sige pa, sige pa, sige pa!” mahimo nga magpaluya sa sadtong nagahimo sang ila bug-os nga masarangan. Makapasubo gid kon ang isa ka gulang makatigayon sing reputasyon subong “mabudlay pahamut-an”​—⁠tuhay gid sa pagkamakatarunganon!​—⁠1 Pedro 2:⁠18.

¹⁶ Dapat kita tanan mangin makatarunganon sa kon ano ang aton ginapaabot sa iban! Ang isa ka utod nga babayi, pagkatapos nga ginbiyaan nila sang iya bana ang ila misyonero nga asaynment agod atipanon ang iya nagabalatian nga iloy nagsulat: “Mabudlay gid ini nga mga tion para sa amon subong mga manugbantala diri sa mga kongregasyon. Bangod naghalin kami sa sirkito kag distrito nga hilikuton, nga wala makaagi sang amo nga mga pag-ipit, narealisar namon ini sing hinali kag sing makapasubo. Halimbawa, pirme ko sadto ginahunahuna, ‘Ngaa wala nagatanyag ini nga utod nga babayi sing husto nga literatura sa sini nga bulan? Wala bala niya ginabasa ang Ministeryo sa Ginharian?’ Nahibaluan ko na karon kon ngaa. Para sa iban amo gid lamang sini ang ila mahimo agod makaguwa sa pag-alagad.” Daw ano kaayo nga dayawon ang aton mga kauturan bangod sang ila nahimo sangsa hukman sila bangod sang wala nila mahimo!

17. Paano kita ginhatagan sing halimbawa ni Jesus tuhoy sa pagkamakatarunganon?

¹⁷ Binagbinaga ang katapusan nga halimbawa kon paano gingamit ni Jesus ang iya awtoridad sa makatarunganon nga paagi. Kaangay sa iya Amay, wala ginabantayan ni Jesus sing mahisaon ang iya awtoridad. Isa man sia ka sampaton nga manugtangdo, ginatangduan ang iya matutom nga ulipon nga klase sa pag-atipan sang “tanan niya nga pagkabutang” diri sa duta. (Mateo 24:​45-47) Kag wala sia nahadlok nga pamatian ang mga ideya sang iban. Pirme niya ginapamangkot ang iya mga tagpalamati: “Ano sa banta ninyo?” (Mateo 17:25; 18:12; 21:28; 22:42) Gani dapat mangin amo man sini sa tanan nga sumulunod ni Cristo sa karon. Wala sing awtoridad nga magahimo sa ila nga indi magpamati. Mga ginikanan, magpamati! Mga bana, magpamati! Mga gulang, magpamati!

18. (a) Paano naton mahibaluan kon bala may reputasyon kita subong makatarunganon? (b) Ano ang mahimo naton tanan agod makapamat-od?

¹⁸ Sing pat-od, luyag naton tanan nga “makatigayon sing reputasyon subong makatarunganon.” (Filipos 4:​5, Phillips) Apang paano naton mahibaluan nga may subong kita sina nga reputasyon? Bueno, sang luyag mahibaluan ni Jesus kon ano ang ginasiling sang mga tawo tuhoy sa iya, ginpamangkot niya ang iya ginasaligan nga mga kaupod. (Mateo 16:13) Ngaa indi pagsundon ang iya halimbawa? Sarang ninyo mapamangkot ang isa nga ginasaligan ninyo nga matinuuron kon bala may yara kamo reputasyon subong makatarunganon, masinulugton nga tawo. Sa pagkamatuod madamo kita tanan sing mahimo agod ilugon sing maayo ang himpit nga halimbawa ni Jesus sing pagkamakatarunganon! Ilabi na kon nagagamit kita sing pila ka awtoridad sa iban, ilugon naton pirme ang halimbawa ni Jehova kag ni Jesus, himuon ini pirme sa makatarunganon nga paagi, pirme nga handa sa pagpatawad, pagpauyon, ukon sa pagpasugot kon nagakaigo. Sa pagkamatuod, kabay nga magtinguha kita tanan nga mangin “makatarunganon”!​—⁠Tito 3:⁠2.

[Footnote]

Paano Mo Sabton?

◻ Ngaa luyag sang mga Cristiano nga mangin makatarunganon?

◻ Paano mailog sang mga gulang si Jesus tuhoy sa iya kahanda sa pagpatawad?

◻ Ngaa dapat kita magtinguha nga mangin mapasibusibuon kaangay ni Jesus?

◻ Paano naton mapakita ang pagkamakatarunganon sa paagi sang paggamit naton sing awtoridad?

◻ Paano naton mausisa ang aton kaugalingon kon bala matuod nga makatarunganon kita?

[Piktyur sa pahina 15]

May kahanda nga ginpatawad ni Jesus si Pedro

[Piktyur sa pahina 16]

Sang ang isa ka babayi nagpakita sing tumalagsahon nga pagtuo, nakita ni Jesus nga indi yadto ang tion nga ipatuman ang isa ka kabilugan nga pagsulundan

[Piktyur sa pahina 18]

Mga ginikanan magpamati!

[Piktyur sa pahina 18]

Mga bana magpamati!

[Piktyur sa pahina 18]

Mga gulang magpamati!