Makatarunganon si Jehova!

“Ang kaalam nga gikan sa hitaas . . . makatarunganon.”​—⁠SANTIAGO 3:⁠17.

1. Paano ginlaragway sang iban ang Dios subong dimakatarunganon, kag ano ang ginabatyag mo sa amo nga pagtamod sa Dios?

ANO nga sahi sang Dios ang imo ginasimba? Nagatuo ka bala nga sia isa ka Dios nga dimapasibusibuon, estrikto sa katarungan, maid-id kag matig-a sing buot? Para sa Protestante nga Repormador nga si John Calvin, mahimo nga amo gid sina ang Dios. Ginasiling ni Calvin nga ang Dios may yara “dayon kag wala nagabag-o nga plano” para sa tagsa ka indibiduwal, nagatalana sa kada isa kon bala magakabuhi sia sing dayon sa kalipay ukon paantuson sing dayon sa impierno. Handurawa: Kon matuod ini, wala na ikaw sing mahimo, ano man ang imo pagtinguha, nga mapabag-o ang madugay na, matigdas nga plano sang Dios para sa imo kag sa imo palaabuton. Magapalapit ka ayhan sa sinang dimakatarunganon nga Dios?​—⁠Ipaanggid ang Santiago 4:⁠8.

2, 3. (a) Paano naton malaragway ang pagkadimakatarunganon sang tawhanon nga mga institusyon kag mga organisasyon? (b) Paano ginapadayag sang palanan-awon ni Ezequiel sa langitnon nga kangga ni Jehova ang Iya pagkamapasibusibuon?

² Daw ano ang aton kalipay nga mahibaluan nga ang Dios sang Biblia matuod nga makatarunganon! Indi ang Dios kundi ang mga tawo ang may huyog nga mangin matigdas kag dimapasibuon, nalatiran sang ila mga dikahimpitan. Ang tawhanon nga mga organisasyon mabudlay kontrolon kasubong sang de-karga nga mga tren. Kon ang isa ka daku nga de-karga nga tren nagadalagan sugata sa isa ka butang nga nagabalabag sa riles, imposible gid ini nga makaliso, kag mabudlay ini padulugon. Ang iban nga mga tren may tuman kabaskog nga buwelo sa amo nagadalagan pa ini sing kapin sa isa ka kilometro agod magdulog pagkatapos nga nakapreno! Sing kaanggid, ang isa ka supertanker nga barko mahimo nga magaabante pa sing mga 8 kilomentros pagkatapos nga ginpatay ang iya mga makina. Bisan pa nga ikambyo ini sing paatras, padayon ini nga magautaw-utaw sing mga 3 kilometros! Apang tan-awa karon ang isa ka salakyan nga mas makadalayaw sangsa sini nga duha, ang isa nga nagarepresentar sang organisasyon sang Dios.

³ Kapin sa 2,600 ka tuig na ang nagligad, ginhatagan ni Jehova si manalagna Ezequiel sing isa ka palanan-awon nga naglaragway sang Iya langitnon nga organisasyon sang espiritu nga mga tinuga. Isa yadto ka kangga nga may makahalawhaw nga pagkatimbang, ang kaugalingon nga “salakyan” ni Jehova nga yara pirme sa idalom sang iya paggahom. Ang labi ka talalupangdon amo ang paagi sang paghulag sini. Ang apat ka dalagku nga mga ruweda sini may apat ka kilid kag puno sing mga mata, sa amo makita sini ang bisan diin kag makasaylo sang direksion sa gilayon, nga wala nagakinahanglan nga magdulog ukon magliso. Kag ining daku nga salakyan wala nagakinahanglan nga maghinayhinay kaangay sang isa ka supertanker ukon de-karga nga tren. Makadalagan ini kaangay sa kadasigon sang kilat, nagaliso pa gani sa eksakto gid nga angulo! (Ezequiel 1:​1, 14-28) Kon paano nga si Jehova tuhay gid gikan sa Dios nga ginsiling ni Calvin amo man ang Iya kangga gikan sa sikwawi himo-tawo nga mga makina. Himpit sia nga mapasibusibuon. Ang pag-apresyar sa sining bahin sang personalidad ni Jehova makabulig sa aton nga makapabilin nga mapasibusibuon kag malikawan ang siod sang pagkadimakatarunganon.

Si Jehova​—⁠Ang Labing Mapasibusibuon nga Persona sa Uniberso

4. (a) Sa anong paagi nga ang ngalan mismo ni Jehova nagapadayag sa iya subong mapasibusibuon nga Dios? (b) Ano ang pila sang mga titulo nga naaplikar kay Jehova nga Dios, kag ngaa nagakaigo ang mga ini?

⁴ Ang ngalan mismo ni Jehova nagapahangop sang iya pagkamapasibuon. Ang “Jehova” literal nga nagakahulugan sing “Sia ang Nagapahanabo.” Nagakahulugan ini sing maathag nga ginapahanabo ni Jehova nga sia ang mangin Manugtuman sang tanan niya nga mga saad. Sang ginpamangkot ni Moises ang ngalan sang Dios, ginpaathag ni Jehova ang kahulugan sini sa sining paagi: “Ako mangin amo Ako.” (Exodo 3:14) Amo sini ang pagbadbad ni Rotherham: “Mangin Amo Ako kon ano ang buot ko.” Si Jehova mangin amo, ukon pilion niya nga mangin amo sia, kon ano ang ginakinahanglan sa pagtuman sang iya matarong nga mga katuyuan kag mga saad. Sa amo, madamo sia sing makadalayaw nga mga titulo, subong sang Manunuga, Amay, Soberanong Ginuo, Manugbantay, Jehova sang mga kasoldadusan, Manugpamati sing pangamuyo, Hukom, Dakung Instruktor, Manunubos. Ginpahanabo niya nga mangin amo sia sining tanan kag sing kapin pa agod ipatuman ang iya mahigugmaon nga mga katuyuan.​—⁠Isaias 8:13; 30:20; 40:28; 41:14; Salmo 23:1; 65:2; 73:28; 89:26; Hukom 11:27; tan-awa man ang New World Translation, Appendix 1J.

5. Ngaa indi kita dapat maghinakop nga ang pagkamapasibusibuon ni Jehova nagapahangop nga ang iya kinaugali ukon mga talaksan nagbag-o?

⁵ Nagakahulugan bala ini, kon amo, nga nagbalhin ang kinaugali ukon ang mga talaksan sang Dios? Wala; subong sang ginasiling sang Santiago 1:​17, “sa iya walay pagliwanliwan ukon landong sang pagbalhin.” May pagsumpakilay bala sa sini? Wala gid. Halimbawa, ano nga mga papel ang wala ginabag-o sang mahigumaon nga mga ginikanan para sa kaayuhan sang mga kabataan? Sa bilog nga adlaw, ang isa ka ginikanan mahimo nga mangin isa ka manuglaygay, isa ka manugluto, isa ka manug-atipan sing puluy-an, isa ka manunudlo, isa ka manugdisiplina, isa ka abyan, isa ka mekaniko, isa ka ­nurse​—⁠madamo pa sing iban nga katungdanan. Ang ginikanan wala nagabag-o sing personalidad kon ginatungdan niya ini nga mga papel; nagapauyon lamang sia sa presente nga mga kinahanglanon. Amo man sini kay Jehova apang sa mas daku nga kasangkaron. Wala sing latid sa kon ano ang buot nga himuon niya nga mangin amo sia sa kaayuhan sang iya mga tinuga. Makadalayaw gid ang kadalumon sang iya kaalam!​—⁠Roma 11:⁠33.

Ang Pagkamakatarunganon Isa ka Tanda sang Diosnon nga Kaalam

6. Ano ang literal nga kahulugan kag mga ginapahangop sang Griegong tinaga nga gingamit ni Santiago sa paglaragway sa diosnon nga kaalam?

⁶ Gingamit ni disipulo Santiago ang talalupangdon nga tinaga agod ilaragway ang kaalam sining labing mapasibusibuon nga Dios. Sia nagsulat: “Ang kaalam nga gikan sa hitaas . . . makatarunganon.” (Santiago 3:17) Ang Griegong tinaga nga gingamit niya diri (e·pi·ei·kesʹ) mabudlay badbaron. Gingamit sang mga manugbadbad ang mga tinaga subong sang “malum-ok,” “matinuguton,” “mapailubon,” kag “mapatugsilingon.” Ang New World Translation nagbadbad sini subong “makatarunganon” nga may footnote nga nagapakita nga ang literal nga kahulugan amo ang “masinulugton.”⁠a Ginapahangop man sang tinaga ang kahulugan nga wala nagapilit sang tagsa ka diutay nga detalye sang kasuguan, apang ginasikway ang espiritu sa likod sini, indi estrikto sing dinagakaigo ukon mapiguson. Ang eskolar nga si Wil­liam Bar­clay nagkomento sa New Testament Words: “Ang sadsaran kag panguna nga butang tuhoy sa epieikeia amo nga naghalin ini sa Dios. Kon ginpilit sang Dios ang iya mga kinamatarong, kon ginpatuman sang Dios sa aton ang matigdas nga mga talaksan sang kasuguan, diin na ayhan kita? Ang Dios amo ang supremo nga halimbawa sang isa nga epeikẽs kag nagapakig-angot sa iban nga may epieikeia.”

7. Paano nagpakita sing pagkamakatarunganon si Jehova sa hardin sang Eden?

⁷ Binagbinaga ang tion sang magrebelde ang katawhan batok sa pagkasoberano ni Jehova. Daw ano kahapos para sa Dios nga laglagon yadtong tatlo ka dimapasalamaton nga mga rebelde​—⁠sanday Adan, Eva, kag Satanas! Nalikawan niya kuntani ang iya daku nga kasakit sang buot! Kag sin-o ang makasiling nga wala sia sing kinamatarong sa pagpatuman sang amo ka sibu nga katarungan? Walay sapayan, wala gid ginlatiran ni Jehova ang iya langitnon kaangay-kangga nga organisasyon sa pila ka matigdas, dimapasibuon nga talaksan sang katarungan. Gani wala gindugmok sinang “kangga” ang tawhanon nga pamilya kag ang tanan nga paglaum para sa malipayon nga palaabuton sang katawhan. Sa kabaliskaran, ginmaniobra ni Jehova ang iya kangga sa kaangay kilat nga kadasigon. Sa gilayon pagkatapos sang pagrebelde, nagpahamtang si Jehova nga Dios sing malawig nga katuyuan nga naghatag sing kaluoy kag paglaum sa tanan nga mga kaliwatan ni Adan.​—⁠Genesis 3:⁠15.

8. (a) Paano ang sayop nga pagtamod sang Cristiandad sa pagkamakatarunganon baliskad sa tunay nga pagkamakatarunganon ni Jehova? (b) Ngaa makasiling kita nga ang pagkamakatarunganon ni Jehova wala nagapahangop nga ikompromiso niya ang diosnon nga mga prinsipio?

⁸ Apang, ang pagkamakatarunganon ni Jehova wala nagapahangop nga ikompromiso niya ang diosnon nga mga prinsipio. Mahimo nga ginahunahuna sang mga iglesia karon sa Cristiandad nga makatarunganon sila kon indi nila pagsapakon ang imoralidad agod matigayon lamang ang kahamuot sang ila malinapason nga panong. (Ipaanggid ang 2 Timoteo 4:⁠3.) Wala gid ginlapas ni Jehova ang iya kaugalingon nga mga kasuguan, ukon ginkompromiso ang iya mga prinsipio. Sa baylo, nagapakita sia sing kahanda nga magpasugot, agod makigbagay sa mga kahimtangan, agod inang mga prinsipio maaplikar sing makatarunganon kag sing maluluy-on. Mahunahunaon gid nga ginatimbangan niya ang iya paggamit sang katarungan kag gahom sang iya gugma kag makatarunganon nga kaalam. Binagbinagon naton ang tatlo ka paagi kon paano ginapasundayag ni Jehova ang pagkamakatarunganon.

“Handa sa Pagpatawad”

9, 10. (a) Ano ang kaangtanan sang ‘kahanda sa pagpatawad’ sa pagkamakatarunganon? (b) Paano nakabenepisyo si David sa kahanda ni Jehova sa pagpatawad, kag ngaa?

⁹ Si David nagsulat: “Kay ikaw, O Jehova, maayo kag handa sa pagpatawad; bugana sa mahigugmaon nga kaluoy sa tanan nga nagatawag sa imo.” (Salmo 86:⁠5) Sang ang Hebreong Kasulatan ginbadbad sa Griego, ang tinaga para sa “handa sa pagpatawad” ginbadbad subong e·pi·ei·kesʹ, ukon “makatarunganon.” Sa pagkamatuod, ang kahanda sa pagpatawad kag pagpakita sing kaluoy mahimo nga amo ang sekreto nga paagi sa pagpasundayag sing pagkamakatarunganon.

¹⁰ Nahibaluan gid mismo ni David kon daw ano ka makatarunganon si Jehova sa sini nga bahin. Sang nakahimo si David sing panghilahi upod kay Batseba kag ginpapatay ang iya bana, sia kag si Batseba nagakabagay gid nga magbaton sing silot nga kamatayon. (Deuteronomio 22:22; 2 Samuel 11:​2-27) Kon ang nag-uyat sadto nga kaso amo ang matigdas tawhanon nga mga hukom, mahimo gid nga nawasi nila nga duha ang ila kabuhi. Apang si Jehova nagpakita sing pagkamakatarunganon (e·pi·ei·kesʹ), diin, subong sang pagbadbad sa sini sang Vine Expository Dictionary of Biblical Words, “nagpakita sing pagkamapatugsilingon nga nagatulok sing ‘maluluy-on kag makatarunganon sa mga katunayan sang isa ka kaso.’ ” Ang mga katunayan nga nag-impluwensia sa maluluy-on nga desisyon ni Jehova mahimo naglakip sang sinsero nga paghinulsol sang mga nakasala kag sang kaluoy nga ginpakita anay mismo ni David sa iban. (1 Samuel 24:​4-6; 25:​32-35; 26:​7-11; Mateo 5:7; Santiago 2:13) Apang, nahisuno sa paglaragway ni Jehova sa iya kaugalingon sa Exodo 34:​4-7, makatarunganon nga badlungon ni Jehova si David. Ginpadala niya si manalagna Natan kay David upod ang makusog nga mensahe, ginpadaku kay David ang katunayan nga gintamay niya ang pulong ni Jehova. Naghinulsol si David kag busa wala mapatay bangod sang iya kasal-anan.​—⁠2 Samuel 12:​1-14.

11. Paano nagpakita si Jehova sing kahanda sa pagpatawad sa kaso ni Manases?

¹¹ Ang halimbawa ni Hari Manases sang Juda labi ka talalupangdon sa sini nga bahin, sanglit si Manases, indi kaangay ni David, tuman ka malauton sa sulod sang malawig nga tion. Ginsakdag ni Manases ang mahigko nga mga relihiosong buhat sa pungsod, lakip na ang paghalad sing tawo. Mahimo nga sia man ang may salabton sa “pagpalagari” sa matutom nga manalagna nga si Isaias. (Hebreo 11:37) Agod silutan si Manases, gintugutan ni Jehova nga dalhon sia subong bihag sa Babilonia. Apang, naghinulsol si Manases sa sulod sang bilangguan kag nagpakiluoy. Subong sabat sa sining sinsero nga paghinulsol, si Jehova nangin “handa sa pagpatawad”​—⁠bisan sa sining pinasahi nga kaso.​—⁠2 Cronica 33:​9-13.

Pagbag-o sing Dalanon Bangod sang Pag-utwas sing Bag-o nga mga Kahimtangan

12, 13. (a) Sa kaso sang Ninive, ano nga pagbag-o sang kahimtangan ang nagtiklod kay Jehova nga magbag-o sing dalanon? (b) Paano napamatud-an si Jonas nga kubos ka makatarunganon sangsa kay Jehova nga Dios?

¹² Ang pagkamakatarunganon ni Jehova makita sa iya kahanda sa pagbag-o sang iya nahunahuna na nga dalanon bangod sang pag-utwas sing bag-o nga mga kahimtangan. Halimbawa, sang nagkadto ang manalagna nga si Jonas sa mga dalanon sang dumaan nga Ninive, ang iya inspirado nga mensahe daw kasimple lamang: Ang daku nga siudad pagalaglagon sa sulod sang 40 ka adlaw. Apang, nagbag-o ang kahimtangan​—⁠sing dramatiko! Naghinulsol ang mga taga-Ninive.​—⁠Jonas, kapitulo 3.

¹³ May matun-an kita kon ipaanggid naton ang reaksion ni Jehova kag ni Jonas sa sining pagbag-o sang mga kahimtangan. Subong resulta ginbag-o ni Jehova ang dalanon sang iya langitnon nga kangga. Sa sini nga kahigayunan nagpasibu sia, ginhimo ang iya kaugalingon nga isa ka manugpatawad sang mga kasal-anan sa baylo nga isa ka “makusog nga tawo sang inaway.” (Exodo 15:⁠3) Si Jonas, sa pihak nga bahin, nangin dimapasibusibuon. Sa baylo nga makigdungan sa kangga ni Jehova, nagpanghikot sia kaangay sang de-karga nga tren ukon sang supertanker nga ginsambit sa panugod. Nagpahibalo sia sing kalalat-an, gani dapat nga mangin kalalat-an ang matabo! Ayhan ginbatyag niya nga ang pagbag-o sing kahimtangan magapakahuya sa iya sa atubangan sang mga taga-Ninive. Apang, sing mapinaumuron, gintudluan ni Jehova ang iya tingkuyan nga manalagna sing isa ka indi malipatan nga leksion sang pagkamakatarunganon kag kaluoy.​—⁠Jonas, kapitulo 4.

14. Ngaa nagbag-o sang iya dalanon si Jehova may kahilabtanan sa iya manalagna nga si Ezequiel?

¹⁴ Si Jehova nagbag-o sang dalanon sa iban pa nga mga okasyon​—⁠bisan sa daw magagmay lamang nga mga butang. Halimbawa, isa ka bes sang ginsugo niya si manalagna Ezequiel agod magpasundayag sang isa ka matagnaon nga drama, ang mga instruksion ni Jehova naglakip sing isa ka sugo nga si Ezequiel magaluto sang iya pagkaon sa kalayo nga ginapasiga sang higko sang tawo. Indi gid yadto mahimo sang manalagna, nga nakasiling, “Ah, O Ginuong Jehova!” kag nangabay nga indi sia pagsuguon sa paghimo sing isa ka butang nga tuman kahigko para sa iya. Wala ginkabig ni Jehova ang balatyagon sang manalagna subong dimakatarunganon; sa baylo, gintugutan Niya si Ezequiel sa paggamit sang ipot sang baka, isa ka kinaandan nga inuggatong sa madamo nga kadutaan tubtob sa karon.​—⁠Ezequiel 4:​12-15.

15. (a) Ano nga mga halimbawa ang nagapakita nga si Jehova nangin handa sa pagpamati kag sa pagpauyon sa mga tawo? (b) Ano nga leksion ang mahimo nga matudlo sini sa aton?

¹⁵ Indi bala makalilipay hunahunaon ang pagkamapainubuson sang aton Dios nga si Jehova? (Salmo 18:35) Tuman gid sa iya kataas sangsa aton; apang mapainubuson sia nga nagapamati sa dihimpit nga mga tawo kag kon kaisa nagabag-o pa gani sang iya dalanon sing nagakaigo. Gintugutan niya si Abraham nga makiluoy sa iya sing malawig tuhoy sa paglaglag sa Sodoma kag Gomorra. (Genesis 18:​23-33) Kag gintugutan niya si Moises nga mamatok sa iya tuhoy sa Iya tuyo nga laglagon ang rebelyuso nga mga Israelinhon kag sa baylo maghimo sing isa ka daku nga pungsod sa kalalangan ni Moises. (Exodo 32:​7-14; Deuteronomio 9:​14, 19; ipaanggid ang Amos 7:​1-6) Sa amo nagpahamtang sia sing himpit nga halimbawa para sa iya tawhanon nga mga alagad, nga dapat magpakita sing kaanggid nga kahanda sa pagpamati sa iban kon makatarunganon kag posible nga himuon ini.​—⁠Ipaanggid ang Santiago 1:⁠19.

Pagkamakatarunganon sa Pagpatuman sing Awtoridad

16. Paano tuhay si Jehova sa madamo nga tawo sa paagi sang iya paggamit sang iya awtoridad?

¹⁶ Natalupangdan bala ninyo nga sa tion nga ang mga indibiduwal makatigayon sing dugang nga awtoridad, madamo ang nahuyog nga mangin dimakatarunganon? Si Jehova, sa kabaliskaran, amo ang may pinakamataas nga posisyon sang awtoridad sa uniberso, apang sa gihapon sia ang labing maayong halimbawa sang pagkamakatarunganon. Ginapakita niya ang iya awtoridad sa mapinadayunon makatarunganon nga paagi. Indi kaangay sa madamo nga tawo, si Jehova wala nagabatyag nga dimalig-on sa iya awtoridad, gani wala sia nagabatyag nga kinahanglan bantayan niya ini sing mahisaon​—⁠subong bala nga ang pagtugyan sing pila ka awtoridad sa iban mahimo nga magbutang sa katalagman sang iya kaugalingon nga awtoridad. Sa katunayan, sadtong tion nga may yara lamang isa ka tuhay nga persona sa uniberso, gintugyan sa iya ni Jehova ang daku gid nga awtoridad. Ginhimo niya ang Logos nga iya “batid nga manugpangabudlay,” kutob sadto gintuga ang tanan nga butang paagi sining hinigugma nga Anak. (Hulubaton 8:​22, 29-31; Juan 1:​1-3, 14; Colosas 1:​15-17) Sang ulihi gintugyan Niya sa iya ang “tanan nga awtoridad . . . sa langit kag sa duta.”​—⁠Mateo 28:18; Juan 5:⁠22.

17, 18. (a) Ngaa nagpadala si Jehova sing mga anghel sa Sodoma kag Gomorra? (b) Ngaa nangayo si Jehova sing panugda sa mga anghel kon paano hayluhon si Ahab?

¹⁷ Sing kaanggid, gintugyanan ni Jehova ang madamo sang iya mga tinuga sing mga hilikuton nga sarang niya mahimo sing mas maayo sing kinaugalingon. Halimbawa, sang ginhambalan niya si Abraham nga, “magakunsad ako [sa Sodoma kag Gomorra] kag tan-awon kon nahimo nila sing bug-os suno sa singgit nga nag-abot sa akon,” wala niya ginapahangop nga personal sia nga magakunsad didto. Sa baylo, ginpakamaayo ni Jehova nga hatagan sing awtoridad kag tangduan ang mga anghel sa pagkuha sing amo nga impormasyon para sa iya. Ginhatagan niya sila sing awtoridad sa pagpanguna sa sining misyon nga pagkuha sing matuod nga impormasyon kag sa pagreport sa iya.​—⁠Genesis 18:​1-3, 20-22.

¹⁸ Sa isa pa ka okasyon, sang mamat-od si Jehova nga sentensiahan ang malauton nga si Hari Ahab, gin-agda niya ang mga anghel sa isa ka langitnon nga pagtinipon agod maghatag sing mga panugda kon paano “hayluhon” yadtong apostata nga hari sa pagdamhag sa inaway nga makadul-ong sa iya kamatayon. Sa pagkamatuod, si Jehova, ang Tuburan sang tanan nga kaalam, wala nagakinahanglan sing bulig agod himuon ang pinakamaayo nga dalanon! Apang, ginhatagan niya ang mga anghel sing pribilehiyo nga makatanyag sing mga solusyon kag sing awtoridad sa pagpanghikot sa isa nga iya napili.​—⁠1 Hari 22:​19-22.

19. (a) Ngaa ginalimitehan ni Jehova ang kadamuon sang mga kasuguan nga iya ginahimo? (b) Paano ginapakita ni Jehova nga makatarunganon sia may kahilabtanan sa kon ano ang iya ginapaabot sa aton?

¹⁹ Wala ginagamit ni Jehova ang iya awtoridad agod kontrolon sing dinagakaigo ang iban. Sa sini man nga paagi nagapakita sia sing walay kaanggid nga pagkamakatarunganon. Mahalungon nga ginalimitihan niya ang kadamuon sang mga kasuguan nga iya ginahimo kag ginadumilian ang iya mga alagad gikan ‘sa pagpasobra sa mga butang nga nasulat’ paagi sa pagdugang sing makapabug-at nga mga kasuguan nga ila ginhimohimo. (1 Corinto 4:6; Binuhatan 15:28; ipaanggid ang Mateo 23:⁠4.) Wala gid sia nagapangayo sing bulag nga pagkamasinulundon sa iya mga tinuga, kundi pirme niya sila ginaamanan sing bastante nga impormasyon agod tuytuyan sila kag ginapadesisyon sila, ginatugutan sila nga mahibaluan ang mga kaayuhan sang pagsunod kag ang mga resulta sang paglapas. (Deuteronomio 30:​19, 20) Sa baylo nga piliton ang mga tawo paagi sa konsiensia, pagkahuya, ukon kahadlok, ginatinguhaan niya nga lab-uton ang mga tagipusuon; luyag niya nga alagaron sia sang mga tawo bangod sang matuod nga gugma sa baylo sang pagpilit. (2 Corinto 9:⁠7) Inang tanan nga sahi sang bug-os kalag nga pag-alagad nagapahalipay sa tagipusuon sang Dios, gani indi sia dimakatarunganon nga “mabudlay pahamut-an.”​—⁠1 Pedro 2:18; Hulubaton 27:11; ipaanggid ang Miqueas 6:⁠8.

20. Paano ang pagkamakatarunganon ni Jehova nakaapektar sa imo?

²⁰ Indi bala talalupangdon nga si Jehova nga Dios, nga may daku nga gahom sangsa kay bisan sin-o nga tinuga nga persona, wala nagagamit sing amo nga gahom sing dimakatarunganon, wala nagagamit sini sa pagpilit ukon pagpahog sa iban? Apang, ang mga tawo nga tuman ka diutay kon ipaanggid, may yara maragtas sang paggahom sa kahalitan sang isa kag isa. (Manugwali 8:⁠9) Sing maathag, ang pagkamakatarunganon isa ka hamili nga kinaiya, isa nga nagapahulag sa aton nga higugmaon si Jehova sing dugang pa. Kag subong resulta, mahimo makapahulag sa aton nga magpalambo sining kinaiya sa aton kaugalingon. Paano naton mahimo ini? Ipaathag ini sang masunod nga artikulo.

[Footnote]

Paano Mo Sabton?

◻ Paano ang ngalan ni Jehova kag ang palanan-awon tuhoy sa iya langitnon nga kangga nagapadaku sang iya pagkamapasibusibuon?

◻ Ano ang pagkamakatarunganon, kag ngaa isa ini ka tanda sang diosnon nga kaalam?

◻ Sa anong mga paagi ginpakita ni Jehova nga “handa sia sa pagpatawad”?

◻ Ngaa ginpakamaayo ni Jehova nga bag-uhon ang naplano na nga dalanon sa pila ka kahimtangan?

◻ Paano ginpasundayag ni Jehova ang pagkamakatarunganon sa paagi sang iya pagpatuman sing awtoridad?

[Piktyur sa pahina 10]

Ngaa ginpatawad ni Jehova ang malauton nga si Hari Manases?