Report sang mga Manugbantala sang Ginharian
“Isa ka Monumento sa Espiritu sang Pagbinuligay”
MALAPIT sa punta sang pinakabagatnan sang Espanya nagatindog ang isa ka daku nga bato nga ginatawag Bato sang Gibraltar. Sa sulod sang ginatos ka tuig, ini nga bato nangin mahipos nga saksi sa politikal nga binais kag internasyonal nga dipagsugtanay. Sa kabaliskaran, ang Bato sang Gibraltar sining karon lang amo ang sa likod sang isa ka napadayag nga pagbinuligay kag paghiusa nga malaka makita sa kalibutan karon.
Mga tatlo ka kilometro gikan sa Bato nahamtang ang banwa sang La Línea, Espanya. Didto ang pagtukod sing isa ka Kingdom Hall sang mga Saksi ni Jehova nagtipon sing ginatos ka boluntaryo nga mga manugpangabudlay nga nalangkag sa pag-amot sang ila tion kag kusog. Samtang nagatrabaho sila sa pagpatindog sing isa ka nagakabagay nga duog para sa pagsimba sa Manunuga, si Jehova nga Dios, nangin wala sa kamalingking bisan ang matahom nga danyag sang Bato sang Gibraltar kon ipaanggid sa ginahimo nga pagpatindog nga proyekto.
Ang mga manugbantala sang Ginharian sa sina nga bahin sang kalibutan nagpadala sing masunod nga report:
“Siam ka gatos ka mapagsik nga mga boluntaryo ang nagtrabaho adlaw kag gab-i, sugod sang Biernes sang hapon, Septiembre 24, 1993. Sang alas siete sang gab-i sang Domingo, ginpatindog ang isa ka bag-o nga karatula nga nagapakilala sa tinukod subong isa ka Kingdom Hall sang mga Saksi ni Jehova, kag ang makagalanyat nga bag-o nga tinukod gingamit para sa una nga miting publiko.
“Madamo nga mga Saksi nga malapit sa Gibraltar ang nagtabok sa dulunan agod buligan ang ila Espanyol nga mga kauturan. ‘Ang politikal nga mga pagbinahinbahin wala makapatahaw sa espiritu sang amon internasyonal nga paghiliutod,’ paathag sang isa sang boluntaryo nga mga manugpangabudlay, nga tumandok sang Gibraltar. Sia nagdugang: ‘Sang nagligad nga pila ka tuig, ang mga Saksi sa La Línea nagbulig sa amon sa pagpatindog sang amon Kingdom Hall sa Gibraltar, gani karon malipayon kami nga balusan ang ila kaayo.’
“Agod dugangan ang dimapunggan nga mga pagpangabudlay sang duha ka kongregasyon sang mga Saksi ni Jehova kag sang ginatos ka lantip nga mga manugpangabudlay gikan sa rehiyon sang Andalusia, namat-od ang siudad sang La Línea nga iamot ang ginakinahanglan nga lote. ‘Subong kinabatasan, ang lokal nga mga pamunuan sa Espanya masunson nga nagaaman sing duta para patindugan sing Katoliko nga mga simbahan,’ paathag sang alkalde sang La Línea sa tion sang isa ka pagduaw sa duog sang konstruksion. ‘Ngaa indi man ini himuon sa iban relihioso nga denominasyon? Nagdayaw gid ako sa kaalwan sang mga boluntaryo, kag nabatyagan ko nga takus sila sang aton pagsakdag. Kinahanglan naton sing dugang ini nga sahi sang espiritu sa karon nabahinbahin nga kalibutan.
“Ginkabig niya ang Kingdom Hall subong ‘isa ka monumento sa espiritu sang pagbinuligay.’ Sa pagkamatuod, ang labing makadalayaw nga bahin indi ang pagkadesinyo ni ang kadakuon sang tinukod. Sa baylo, ang nagpadayaw sa madamo sa komunidad amo ang kamatuoran nga gintukod ini sing bug-os sang mga boluntaryo kag ginpatindog sa sulod lamang sang 48 ka oras!”
Maathag nga ang mga Saksi ni Jehova sa La Línea kag sa palibot nga mga duog sini matuod nga matutom sa mga tinaga sa Galacia 6:10. Ginpalig-on diri ni apostol Pablo ang mga masigkatumuluo: “Gani nian, sa may kahigayunan kita, magbuhat kita sing maayo ayon sa tanan nga tawo, kag labi na gid sa mga tagapanimalay sang pagtuo.”