Mga Pamangkot Gikan sa mga Bumalasa
Sanglit naghalin si Jesus kanday Jesse kag David, ngaa gintawag sia nga “gamot” sang iya mga katigulangan nga sanday Jesse kag David?
Kinaandan na nga mahunahuna mo ang gamot sang kahoy ukon tanom subong nagauna sa puno ukon sa mga sanga. Gani si Jesse (ukon ang iya anak nga si David) mahimo kuntani patuhuyan subong gamot nga gikan sini si Jesus natawo sang ulihi. Apang, gintagna sang Isaias 11:10 nga ang nagapakari nga Mesias mangin “gamot ni Jesse,” kag gin-aplikar sang Roma 15:12 ini nga tagna kay Jesucristo. Sang ulihi gintawag sia sang Bugna 5:5 nga “ang Leon sang kabikahan sang Juda, ang gamot ni David.” May mga rason para sa sini nga mga ngalan.
Masunson ginagamit sang Biblia ang tanom, subong sang isa ka kahoy, sing malaragwayon. Kon kaisa nagahalin ini sa katunayan nga subong nga ang isa ka binhi nagapanugdo kag nagapamuhi, ang mga gamot una nga nagatubo sa hugpong sang mga dahon sang kahoy, sa iban pa nga mga sanga, ukon sa bunga kay ini tanan ginasupurtahan sang mga gamot. Halimbawa, ang Isaias 37:31 mabasa: “Yadtong nakapalagyo sa balay ni Juda, yadtong nagkalabilin, pat-od nga magapanggamot liwat paidalom kag magapamunga paibabaw.”—Job 14:8, 9; Isaias 14:29.
Kon ang samad nagahalin sa gamot, mabatyagan sang bug-os nga kahoy ang epekto. (Ipaanggid ang Mateo 3:10; 13:6.) Sing nahisuno, si Malaquias nagsulat: “ ‘Ang adlaw nga nagaabot magasunog sa ila,’ siling ni Jehova sang mga kasuldadusan, ‘agod nga indi ini magbilin sa ila sing gamot ukon sanga.’ ” (Malaquias 4:1) Ang kahulugan maathag—bug-os nga kalaglagan. Ang mga ginikanan (mga gamot) pagalaglagon, subong man ang ila mga anak (mga sanga).a Ginapadaku sini ang responsabilidad sang mga ginikanan sa ila menor-de-edad nga mga anak; ang walay katubtuban nga palaabuton sang menor-de-edad nga kabataan mahimo mapat-od paagi sa tindog sang ila mga ginikanan sa atubangan sang Dios.—1 Corinto 7:14.
Ginagamit sang pamulong sa Isaias 37:31 kag Malaquias 4:1 ang katunayan nga ang mga sanga (kag ang bunga sang ikaduha nga mga sanga) nagakuha sang ila kabuhi gikan sa gamot. Amo ini ang yabi sa paghangop kon paano si Jesus amo ang “gamot ni Jesse” ukon ang “gamot ni David.”
Sa undanon nga kahulugan, sanday Jesse kag David mga katigulangan ni Jesus; sila ang mga gamot, sia ang salingsing ukon sanga. Ang Isaias 11:1 nagsiling nahanungod sa nagapakari nga Mesias: “May magaguwa nga salingsing gikan sa tuod ni Jesse; kag gikan sa iya mga gamot ang isa ka sanga magapamunga.” Sa kaanggid, sa Bugna 22:16, gintawag ni Jesus ang iya kaugalingon nga “ang kaliwat ni David.” Apang gintawag man niya ang iya kaugalingon nga “gamot ni David.” Ngaa?
Ang isa ka paagi nga si Jesus ang “gamot” nanday Jesse kag David amo nga paagi sa iya ang ila kaliwat nagapabilin nga buhi. Wala sing tawo sa karon ang makapamatuod nga naghalin sia sa tribo ni Levi, ni Dan, ukon bisan ni Juda, apang makapat-od kita nga ang linya nanday Jesse kag David nagapadayon bangod si Jesus nagakabuhi karon sa langit.—Mateo 1:1-16; Roma 6:9.
Nabaton man ni Jesus ang posisyon sang langitnon nga Hari. (Lucas 1:32, 33; 19:12, 15; 1 Corinto 15:25) May kahilabtanan ini sa iya kaangtanan bisan sa iya mga katigulangan. Sing matagnaon, gintawag ni David si Jesus nga iya Ginuo.—Salmo 110:1; Binuhatan 2:34-36.
Sa katapusan, si Jesucristo gintangdo subong Hukom. Sa nagapakari nga Milenio, ang mga kapuslanan sang gawad ni Jesus ipadapat man kanday Jesse kag David. Nian ang ila kabuhi sa duta nasandig kay Jesus, nga magaalagad subong ang ila “Dayon nga Amay.”—Isaias 9:6.
Gani, bisan nga si Jesus naghalin sa kaliwat nanday Jesse kag David, kon nangin ano sia kag kon ano pa ang pagahimuon niya nagakalipikar sa iya nga tawgon “ang gamot ni Jesse” kag “ang gamot ni David.”
[Footnote]
a Gingamit sang inskripsion sa lubong sa dumaan nga Fenicia ang kaanggid nga pamulong. Ini nagsiling tuhoy kay bisan sin-o nga nagbukas sang lulubngan: “Kabay nga wala ini manggamot sa idalom ukon mamunga sa ibabaw!”—Vetus Testamentum, Abril 1961.
[Credit Line sa pahina 31]
Pictorial Archive (Near Eastern History (Est.)