Ano ang Kahulugan sa Imo sang Paskuwa?

Ano ang imo sabat? Ang Paskuwa

(1) isa ka tion nga mangin kaupod ang imo pamilya; (2) isa ka tion para sa mga tinipuntipon; (3) isa ka relihioso nga tion; (4) isa ka mahuol nga tion; (5) isa ka tion sa paghinumdom sang makalilipay nga mga hitabo sang nagligad; (6) isa ka tion sang dayag nga komersialismo.

BISAN pa daw makapakibot, sa kapin sa 1,000 ka tawo nga ginsurbe sa Britania, 6 porsiento lamang ang nagkabig sa Paskuwa nga isa gid ka relihioso nga okasyon. Sa kabaliskaran, 48 porsiento ang naghunahuna sa Paskuwa subong isa gid ka tion nga mangin kaupod ang ila pamilya. Sa pagkamatuod, madamo ang nagasiling nga isa ini ka pinasahi nga tion para sa mga kabataan. Halimbawa, sang ginpamangkot kon ano gid ang iya naluyagan sa Paskuwa, ang isa ka 11-anyos nga babayi nagsabat: “Ang kakunyag, kalipay, [kag] paghatag sing mga regalo.” Ang The Making of the Modern Christmas nagaugyon nga “ang pinakamabakod nga pagpadaku sa . . . ‘tradisyunal’ nga Paskuwa walay duhaduha nga yara sa puluy-an, sa pamilya kag ilabi na sa kabataan.”

Apang ilabi na sa nakatundan nga Cristiandad nga ang Paskuwa isa ka pangpamilya nga okasyon, kon ang mga himata nagatilipon agod magbayluhanay sing mga regalo. Sa mga pungsod nga impluwensiado sang East­ern Or­tho­dox ­Church, ginapadaku sing labi sang mga tawo ang Easter; apang, ang panahon sang Paskuwa ­masunson nga isa ka panag-on sang pagbakasyon.

Isa ka “Negosyo”

Ang Paskuwa “nakaagom sing isa ka proseso sang talalupangdon . . . nga komersialisasyon,” siling sang The New Encyclopædia Britannica. Matuod ini ilabi na sa Japan.

“Gintalikdan sang mga Hapon ang tanan nga pakunokuno sang relihion kag ginhimo ang Paskuwa nga isa lamang ka negosyo,” report sang Daily Record sa Washington. Ang Paskuwa sa Japan, ginadugang sini, “isa ka daku nga selebrasyon nga nagahatag sing labi nga pagpadaku sa komersialismo kag diutay lamang sa relihioso nga bahin.”

Bisan sa madamong ginatawag nga Cris­tianong mga pungsod, ining “relihioso nga ­bahin” masunson nga mabudlay mamutikan. Sang ­nagligad nga mga 40 ka tuig, ang isa ka batok-​sa-Paskuwa nga polyeto nanganduhoy: “Ang Pas­kuwa ginapasanyog sang kalibutan sang komersio. Amo ini ang panag-on sang tuig nga may pinakadaku nga kuwarta nga maganar. Luyag sang nagapangangkon nga Cristianong mga negosyante nga magaabot na ang panag-on sang Paskuwa, indi bangod kay Cristo, kundi bangod sa pinansial nga ganansia.” Matuod gid ina nga mga pinamulong sa karon! Sa madamo nga kadutaan, halos wala pa magsugod ang Oktubre mabatian na naton ang mga pahanumdom kon pila ka adlaw na lang ang nabilin sa pagbakal sing mga regalo para sa masunod nga Paskuwa. Ang negosyo nangin mas mapagsik samtang nagahingapos ang tuig, kag 25% sang tuigan nga benta sang mga balaligyaan ang matigayon sa panahon sang Paskuwa.

Ano man ang kahulugan sa imo sang Paskuwa sa karon, ayhan ginapaligban mo kon paano ini nagsugod. Sa katunayan, ginasakdag bala sang Biblia ang paghatag sing regalo sa Paskuwa? Cristiano gid bala ang karon nga pagsaulog sang Paskuwa? Tan-awon naton.

[Picture Credit Line sa pahina 2]

Cover: Thomas Nast/Dover Publications, Inc., 1978