“Gikan sa Baba sang mga Kabataan”
SANG bata pa si Samuel, malig-on niya nga ginsunod ang husto nga mga prinsipio walay sapayan sang kalautan sang mga anak nga lalaki sang Mataas nga Saserdote nga si Eli. (1 Samuel 2:22; 3:1) Sang mga adlaw ni Eliseo, ang isa ka Israelinhon nga bata nga babayi nga bihag sa Siria maisugon nga nagpanaksi sa iya agalon nga babayi. (2 Hari 5:2-4) Sang si Jesus nagaedad sing 12-anyos, maisugon sia nga nakighambal sa mga manunudlo sang Israel, nagpakiana sing mga pamangkot kag naghatag sing mga sabat nga nagpakibot sa mga nagatan-aw. (Lucas 2:46-48) Sa bug-os nga maragtas si Jehova matutom nga gin-alagad sang iya lanubo nga mga sumilimba.
Ginapakita man bala sang mga pamatan-on karon ang kaanggid matutom nga espiritu? Huo, sa pagkamatuod! Ginapakita sang mga report sa mga sanga talatapan sang Watch Tower Society nga madamo, madamo sing nagatuo nga mga pamatan-on ang “nagahalad sang ila kaugalingon sing kinabubut-on” sa pag-alagad kay Jehova. (Salmo 110:3) Ang maayo nga mga resulta sang ila mga panikasog nagapalig-on sa tanan nga Cristiano, pamatan-on kag tigulang, nga “indi magpakaluya [sa] paghimo sing maayo.”—Galacia 6:9.
Ang isa ka maayo nga halimbawa amo si Ayumi, isa ka bata nga Haponesa nga nangin isa ka manugbantala sang anom sia ka tuig kag ginhimo niya nga tulumuron ang magpanaksi sa tanan sa iya klase. Nakatigayon sia sing permiso nga magbutang sing pila ka publikasyon sa librarya sang hulot-klasehan, nagahanda sa pagsabat sa bisan anong mga pakiana nga mahimo ipamangkot sang iya mga kabutho. Nabasahan sang halos tanan niya nga kabutho subong man sang manunudlo ang mga publikasyon. Sa sulod sang anom ka tuig nga pag-eskwela niya sa elementarya, nakapatigayon si Ayumi sing 13 ka pagtuon sa Biblia. Ginbawtismuhan sia sadtong ikaapat nga grado niya, kag ang isa sang iya mga abyan nga ginatun-an niya nabawtismuhan sang ikaanom nga grado. Dugang pa, ang iloy kag ang duha ka utod nga babayi sining estudyante sa Biblia nagtuon man kag nabawtismuhan.
Ang Maayo nga Pagginawi Isa ka Pagpanaksi
“Maggawi kamo sing nagakaigo sa tunga sang mga pungsod,” siling ni apostol Pedro, kag serioso nga ginasunod sang mga Cristianong pamatan-on ini nga sugo. (1 Pedro 2:12) Subong resulta, ang ila maayo nga pagginawi masami nga nagahatag sing maayo nga pagpanaksi. Sa Aprikanong pungsod sang Cameroon, isa ka lalaki ang nagtambong sa ikaduha nga tion sa miting sang kongregasyon sang mga Saksi ni Jehova kag naglingkod sa tupad sang isa ka bata nga babayi. Sang gin-agda sang manugpamulongpulong ang mga tumalambong nga tan-awon ang isa ka dinalan sa Biblia, natalupangdan sang lalaki nga madasig nga nakit-an sang bata nga babayi ang bersikulo sa iya kaugalingon nga Biblia kag maukod nga ginsundan niya ang pagbasa. Nakadayaw gid sia sa iya panimuot amo nga pagkatapos sang miting, ginpalapitan niya ang manugpamulongpulong kag nagsiling: “Luyag ko magtuon sang Biblia upod sa imo bangod sining bata nga babayi.”
Sa Bagatnan nga Aprika may isa ka eskwelahan nga may 25 ka estudyante nga kabataan sang mga Saksi ni Jehova. Ang ila maayo nga pagginawi nagresulta sa isa ka maayo nga reputasyon para sa mga Saksi ni Jehova. Isa ka manunudlo ang nagsugid sa isa ka Saksi nga ginikanan nga indi niya mahangpan kon paano ginahanas sang mga Saksi ang ila mga kabataan sing maayo, ilabi na kay ang iya iglesia napaslawan sa pagbulig sa mga pamatan-on. Isa ka bag-o nga manunudlo ang nag-abot agod sa pagbulig sa eskwelahan kag natalupangdan niya sa gilayon ang maayo nga pagginawi sang mga Saksi nga kabataan. Ginpamangkot niya ang isa sang Saksi nga mga bata nga lalaki kon ano ang iya himuon agod mangin isa sang mga Saksi ni Jehova. Ginpaathag niya nga dapat sia magtuon sa Biblia, kag ginpangabay niya ang iya mga ginikanan sa pag-atipan sa interesado.
Sa Costa Rica, nakilala ni Rigoberto ang kamatuoran sang gingamit sang duha niya ka kabutho ang Biblia sa pagsabat sang iya mga pamangkot tuhoy sa Trinidad, kalag, kag kalayuhon nga impierno. Ang ila ginpanghambal nakaimpluwensia sa iya sing positibo indi lamang bangod sang ila ikasarang sa paggamit sa mga Kasulatan kundi bangod man nga ang ila ekselente nga pagginawi tuhay katama sangsa iya nasaksihan sa mga iglesia sang Cristiandad. Walay sapayan sang pagpamatok sang pamilya, si Rigoberto nagauswag sing maayo sa iya pagtuon sang Biblia.
Sa Espanya duha ka Saksi ni Jehova—ang isa sa ila nuebe anyos—nagduaw sa isa ka lalaki nga si Onofre. Walay sapayan nga ang hamtong nga Saksi amo ang laban nga naghambal, mahipos nga ginasundan sang pamatan-on nga Saksi ang pagbasa sang mga Kasulatan, kag ginakutlo sing saulado ang pila ka mga teksto sa Biblia. Nakadayaw si Onofre. Namat-od sia nga magtuon sang Biblia sa amo man nga duog diin natun-an sing maayo sadtong bata nga lalaki ang paggamit sang Biblia. Busa, temprano pa sang masunod nga Domingo sang aga, nagkadto sia sa Kingdom Hall. Naghulat sia sa guwa tubtob sang udto, sang nag-abot ang mga Saksi para sa ila miting. Kutob sadto, nag-uswag sia sing maayo kag ginsimbuluhan ang iya dedikasyon paagi sa pagpabawtismo sa tubig sining karon lang.
Epektibo nga Pamatan-on nga mga Saksi
Huo, ginagamit ni Jehova ang mga pamatan-on subong man ang mga adulto agod lab-uton ang mga mahagop sing tagipusuon. Makita ini sing dugang pa sa isa ka eksperiensia gikan sa Hungary. Didto, natalupangdan sang isa ka nurse sa ospital nga sa tagsa ka tion nga may nagaabot nga bisita agod duawon ang napulo ka tuig nga pasyente, ginadalhan nila sia sing balasahon kag subong man sing pagkaon. Nagpalibog sia kon ano ang ginabasa sang bata nga babayi kag nasapwan niya nga Biblia gali ini. Ginsugilanon sia sang nurse kag nagsiling sang ulihi: “Sa una gid nga tion, gintudluan na niya ako.” Sang nakaguwa na sa ospital ang bata nga babayi, gin-agda niya ang nurse nga magtambong sa isa ka kombension, apang ginbalibaran sia sang nurse. Apang, sang ulihi, nagpasugot sia nga magtambong sa “Putli nga Hambal” Distrito nga Kombension. Wala madugay sang ulihi, nagtuon sia sang Biblia, kag isa ka tuig sang ulihi ginbawtismuhan sia—ang tanan resulta sang paggamit sang bata nga babayi sang iya tion sa ospital sa pagbasa sang literatura sa Biblia.
Si Ana Ruth, sa El Salvador, yara sa segunda anyo sa hayskul. Batasan niya ang magbilin sang literatura sa Biblia sa iya pulungkuan agod mabasa ini sang iban kon luyag nila. Natalupangdan niya nga nagakadula kag nagabalik man sa ulihi ang libro, nasapwan ni Ana Ruth nga ginabasa ini sang isa niya ka masigkabumulutho, si Evelyn. Wala madugay pagkatapos, ginbaton ni Evelyn ang isa ka pagtuon kag nagsugod sa pagtambong sa mga miting sa kongregasyon. Sang ulihi, ginbawtismuhan sia, kag nagaalagad sia karon subong regular nga auxiliary payunir. Si Ana Ruth isa ka regular payunir.
Sa Panama isa ka utod nga babayi ang nagsugod sang isa ka pagtuon upod sa isa ka babayi nga ginapamatukan sang iya bana tubtob sa punto nga halos mauntat na ang pagtuon. Apang, amat-amat nga naghumok ang panimuot sang bana. Wala madugay sang ulihi, ginpangabay sia sang iya magulang nga lalaki, nga isa ka Saksi, nga magtakod sang isa ka alarma sa iya balay. Samtang ginatakod niya ang alarma, ang iya siam ka tuig nga hinablos nga babayi nagpauli nga tuman ka masinulub-on. Ginpamangkot niya sia kon ano ang problema, kag nagsiling sia nga naglakat sila sang iya magulang nga babayi sa pagdumala sang isa ka pagtuon sa Biblia apang wala ang tawo sa iya balay, gani wala sia sing may nahimo nga butang para kay Jehova sa amo nga adlaw. Ang iya tiyo nagsabat: “Ngaa indi ako ang imo bantalaan? Nian may mahimo ka para kay Jehova.” Malipayon nga nagdalidali ang iya hinablos agod kuhaon ang iya Biblia, kag isa ka pagtuon ang nasugdan.
Ang iya iloy (ang bayaw nga babayi sang lalaki) nagapamati. Abi niya nga lahuglahog lamang ang tanan, apang sa tagsa ka tion nga magkadto ang lalaki sa ila puluy-an, ginapangabay niya ang iya hinablos sa pagtuon sa Biblia. Sang matalupangdan sang iloy sang bata nga serioso ang iya bayaw nga lalaki kag nagapakiana sing mabudlay nga mga pamangkot, namat-od sia nga sia ang magdumala sa pagtuon upod sa iya bata nga babayi. Nagsugod sia sa pagtuon sing duha ka beses sa kada semana kag naghimo sing madasig nga pag-uswag. Sang ulihi, nakadangat sia sa punto sang pagdedikar kag ginbawtismuhan sia sa pareho nga asambleya dungan sa iya asawa—ini bangod sang maayo nga pagginawi sang iya lanubo nga hinablos nga babayi.
Ang Kaisog sang Pamatan-on Nagahatag sing Maayo nga Panaksi
Ang Biblia nagasiling: “Magpakabakod kag magpakaisog ang imo tagipusuon. Huo, maghulat kay Jehova.” (Salmo 27:14) Ining pinamulong naaplikar sa tanan nga alagad sang Dios, kag gin-aplikar ini sang mga pamatan-on kag sang mga adulto sang nagligad nga tuig. Sa Australia, sang magsugod sa pagbutho ang lima ka tuig nga bata nga babayi sa bag-o nga eskwelahan, ginkadtuan sang iya iloy ang manunudlo agod ipaathag ang mga pagtuluuhan sang mga Saksi ni Jehova. Ang manunudlo nagsiling: “Nahibaluan ko na ang inyo ginapatihan. Ginpaathag ini tanan sa akon sang imo bata.” Wala magkahuya ining bata nga babayi sa pagpalapit sa iya manunudlo agod ipaathag ang iya relihioso nga mga pagtuluuhan.
Ang lima ka tuig nga si Andrea sa Romania nagpakita man sing kaisog. Sang magbiya ang iya iloy sa relihion nga Orthodox agod mangin isa ka Saksi, ang iya mga kaingod nagdumili sa pagpamati sa iya. Isa ka adlaw sa Pagtinuon sa Libro sang Kongregasyon, nabatian ni Andrea nga ginapadaku sang manugtatap sa pag-alagad ang kinahanglanon nga magbantala sa mga kaingod. Ginpamensar niya ini sing serioso, kag sang pagpauli niya ginsilingan niya ang iya iloy: “Mommy, kon makalakat ka na agod magtrabaho, mabangon ako, himuson ang akon bag nga may literatura kaangay sang ginahimo mo, kag mangamuyo ako kay Jehova nga buligan ako nga masugilanon ang aton mga kaingod tuhoy sa kamatuoran.”
Sang masunod nga adlaw ginhimo ni Andrea ang iya ginpangako. Nian, gintipon ang iya kaisog, ginpislit niya ang doorbell sang isa ka kaingod. Sang ginbuksan sang kaingod ang ganhaan, ining bata nga babayi nagsiling: “Nahibaluan ko nga sugod sang nangin isa ka Saksi ang akon iloy, wala mo na sia maluyagi. Gintinguhaan niya nga sugilanunon ka sing pila ka beses, apang indi mo luyag mamati sa iya. Naglain ang iya buot sa sini, apang luyag ko mahibaluan mo nga ginahigugma ka namon.” Nian, nagsugod si Andrea sa paghatag sing maayo nga panaksi. Sa sulod sang isa ka adlaw, nakapahamtang sia sing anom ka libro, anom ka magasin, apat ka pulyeto, kag apat ka tract. Kutob sadto, regular na sia nga nagaalagad sa latagon.
Kinahanglan ipakita sang aton mga kauturan sa Rwanda ang daku nga kaisog bangod sang kinagubot didto. Isa ka tion ginpasulod sa isa ka hulot ang isa ka pamilya sang mga Saksi diin ang mga soldado naghanda sa pagpatay sa ila. Nangabay ang pamilya nga mangamuyo anay. Ginpasugtan ini, kag ang tanan nangamuyo sing mahipos magluwas sa anom ka tuig nga bata nga babayi nga si Deborah. Suno sa report, matunog nga nangamuyo si Deborah: “Jehova, nakapahamtang kami ni Papa sang lima ka magasin sa sini nga semana. Paano namon mabalikan ining mga tawo agod tudluan sila sing kamatuoran kag buligan sila nga makatigayon sing kabuhi? Luwas pa, paano ako karon mangin isa ka manugbantala? Luyag ko magpabawtismo agod makaalagad sa imo.” Sang mabatian ini, isa ka soldado ang nagsiling: “Indi namon kamo mapatay bangod sining bata nga babayi.” Nagsabat si Deborah: “Salamat gid.” Naluwas ang pamilya.
Sang magsulod sing madinalag-on si Jesus sa Jerusalem sang hingapusan sang iya dutan-on nga kabuhi, ginsugata sia sang isa ka daku, nagahinugyaw nga mga kadam-an. Ang kadam-an ginahuman sing mga kabataan subong man sing mga adulto. Suno sa rekord, ang kabataan nga lalaki “nagahinugyaw sa templo nga nagasiling: ‘Luwasa kami, Anak ni David!’ ” Sang ginpamatukan ini sang mga saserdote kag mga escriba, si Jesus nagsabat: “Wala bala ninyo mabasahi, ‘Gikan sa baba sang kabataan kag sang mga nagasuso ginaaman mo ang himpit nga pagdayaw’?”—Mateo 21:15, 16.
Indi bala makapapagsik makit-an nga bisan sa karon ang mga pinamulong ni Jesus nangin matuod? “Gikan sa baba sang kabataan kag sang mga nagasuso”—kag, ayhan madugang naton, ang mga tin-edyer kag pamatan-on nga mga lalaki kag mga babayi—si Jehova nagaaman sing pagdayaw. Sa pagkamatuod, kon tuhoy sa pagdayaw kay Jehova, wala sing ginapili nga pang-idaron.—Joel 2:28, 29.