Dayawon Mo Bala si Jehova?
“KAANGAY sang imo ngalan, O Dios, amo man ang kadayawan mo tubtob sa mga dulunan sang duta.” Amo ining mga pulong gikan sa matagnaon nga ambahanon sang mga anak nga lalaki ni Core. (Salmo 48:10) Karon, ang mabaskog nga koro sang minilyon ka Saksi ni Jehova nagadayaw sa Dios kag nagapakilala sang iya ngalan paagi sa pagbantala sang maayong balita sang iya Ginharian. Paagi sa paghimo sini sa 232 ka kadutaan kag kapuluan sang dagat kag sa kapin sa 300 ka hambal, literal nila nga nalab-ot ang “mga dulunan sang duta.”
Ano ang nagapahulag sa mga tawo nga may lainlain nga ginhalinan sa kultura, sosyal, kag hambal agod dayawon si Jehova? Ang ila pagpasalamat sa sibu nga ihibalo sang Pulong sang Dios, ang Biblia, amo ang pangunang rason. Ang espirituwal nga kamatuoran naghilway sa ila gikan sa mga disparatis kag gikan sa nagaulipon nga relihiosong mga pagpati subong sang dayon nga pag-antos. (Juan 8:32) Ang kamatuoran nagbulig man sa ila nga maapresyar ang makatilingala nga mga kinaiya sang Dios, subong sang iya gugma, gahom, kaalam, kag katarungan, nga ginaupdan sang kaluoy. Ang paghangop sa paghatag sang Dios sa iya bugtong nga Anak, si Jesucristo, subong halad-gawad para sa katawhan nagapahulag sa matarong nga mga tawo nga dayawon kag alagdon si Jehova.
Suno sa tulun-an sang Bugna sa Biblia, ang langitnon nga koro nagatu-aw: “Takus ka, Jehova, nga Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagaluntad kag gintuga sila.” (Bugna 4:11) Inang pagdayaw indi lamang resulta sang pagbatyag sing obligasyon. Sa baylo, nagahalin ini sa pagtahod kay Jehova.
Dayawa ang Dios Paagi sa Pagbantala sang Maayong Balita
Sa pagdayaw kay Jehova, ginailog sang isa ka tawo ang dalayawon nga halimbawa ni Jesucristo, ang pangunang dumalayaw sang Dios. Ang pagsunod sa mga tikang ni Jesus nagalakip sang pagpakigbahin sa hilikuton nga pagbantala sang maayong balita sang Ginharian sang Dios. (Mateo 4:17, 23; 24:14) Ining hilikuton nga pagbantala nangin ang pinakadaku nga bug-os kalibutan nga panikasog sa pagdayaw kay Jehova.
Ining hilikuton nga pagbantala tuman gid ka importante amo nga maathag ini nga ginaangot sang Biblia sa kaluwasan. Ang Roma 10:13-15 mabasa: “ ‘Ang bisan sin-o nga magtawag sa ngalan ni Jehova maluwas.’ Apang, paano bala ang pagpanawag nila sa iya nga wala nila matuuhi? Kag, paano bala ang pagtuo nila sa iya nga wala nila mabatii? Kag, paano bala ang pagkabati nila kon walay manugwali? Kag, paano bala ang pagwali nila kon indi sila pag-ipadala? Subong sang nasulat na: ‘Daw ano katahom sang mga tiil sang mga nagabantala sang maayong balita!’ ”
Sang nagligad lamang nga tuig, ang mga Saksi ni Jehova naghinguyang sing kapin sa isa ka bilyon ka oras sa hilikuton nga pagbantala. Kag daw ano kaayo ang mga resulta bangod sining pagdayaw sa Dios! Mga 314,000 ang nagbuylog sa koro sang mga dumalayaw paagi sa pagsimbulo sang ila dedikasyon kay Jehova sa kalalangan sang bawtismo sa tubig.
Apang, ano ang masiling nahanungod sa 12,288,917 nga nagtambong sa 1994 nga Memoryal sang kamatayon ni Cristo? Nalakip sa ila amo ang kapin sa 7,000,000 nga wala pa nagadayaw kay Jehova subong mga manugbantala sang maayong balita. Apang ang ila pagtambong sa sining importante nga okasyon magaresulta sa ulihi sa pagdugang sang minilyon pa sa koro sang mga dumalayaw. Ano ang sarang mahimo agod mabuligan ining mga interesado nga mangin mga dumalayaw ni Jehova?
Matigayon nga Bulig
Madamong interesado ang mahimo nga maluyag sa pagdayaw kay Jehova apang nagabatyag nga indi nila matuman ang mga kinahanglanon. Maayo nga dumdumon nila ang mga pinamulong sang salmista: “Bayawon ko ang akon mga mata sa mga bukid. Diin bala magagikan ang akon panabang? Ang akon bulig nagagikan kay Jehova, ang Magbubuhat sang langit kag duta.” (Salmo 121:1, 2) Sing maathag, ginbayaw sang salmista ang iya mga mata sa mga bukid sang Jerusalem diin nahamtang ang templo ni Jehova kag ang dutan-on nga duog sang teokratikong panguluhan. Gikan sa sini makahinakop kita sing husto nga ang bulig nga ginakinahanglan agod madayaw ang Dios kag mabantala ang mensahe sang Ginharian nagahalin lamang kay Jehova kag sa iya organisasyon.—Salmo 3:4; Daniel 6:10.
Karon, yadtong nagahandum nga madayaw si Jehova makapaabot sing mahigugmaon nga bulig gikan sa iya dutan-on nga organisasyon. Halimbawa, ang mga Saksi ni Jehova nagatanyag sing bulig paagi sa pagdumala sing libre nga mga pagtuon sang Biblia sa balay upod sa mga interesado. Indi lamang ang pagtuon sa mga doktrina sang Biblia ang ginalakip sa sining programa sa pagtudlo. Nagabulig ini sa estudyante nga mapalambo ang apresasyon sa kon ano ang iya ginatun-an kag sa organisasyon nga ginagamit ni Jehova.
Nahisuno sa sini, ang Saksi nga nagahiwat sing pagtuon sa Biblia nagatinguha sa pagpat-od nga ang bag-ong nasapwan nga mga kamatuoran makalab-ot indi lamang sa hunahuna kundi sa tagipusuon man. Kag ang manunudlo indi dapat mag-untat sa pagpakita sa estudyante kon paano ginagamit ni Jehova ang Iya organisasyon sa pagtuman sang Iya katuyuan sa duta. Ang brosyur nga Mga Saksi ni Jehova—Nahiusa nga Nagahimo sang Kabubut-on sang Dios sa Bug-os nga Kalibutan kag ang videotape nga Jehovah’s Witnesses—The Organization Behind the Name masunson napamatud-an nga mabuligon sa paghimo sini.
Ang Cristianong mga miting may importante man nga papel sa pagbulig sa palaabuton nga mga dumalayaw ni Jehova. Sa una gid nga mga bahin sang pagtuon sa Biblia, ang estudyante mahimo agdahon sa pagtambong sa Cristianong mga miting. Sa ulihi, mahibaluan niya ang pagkaimportante sang tayuyon nga pagtambong kag ang pagpakigbahin sa tanan nga mga miting sa kongregasyon. (Hebreo 10:24, 25) Ang mga manugtatap mahimo makahatag sing hamili nga bulig para sa mga masigkadumalayaw kag palaabuton nga mga dumalayaw ni Jehova paagi sa paghanda sing mga miting nga makapalig-on sa espirituwal kag praktikal.
Buligi ang Kabataan sa Pagdayaw kay Jehova
Ang kabataan ginalakip sa madamo nga mahimo mangin mga manugbantala sang maayong balita sa malapit nga palaabuton. Ang mga amay ilabi na nga amo ang may Biblikanhon nga responsabilidad nga padakuon ang ila kabataan sa “disiplina kag hunahuna ni Jehova.” (Efeso 6:4) Kon nahanas sing maayo sang diosnon nga mga ginikanan, bisan ang mga bata pa katama mahimo makapalambo sing handum nga dayawon si Jehova.
Isa ka diutay nga bata nga babayi sa Argentina ang liwat kag liwat nga nagpalapit sa mga gulang sang kongregasyon sa sulod sang pila ka bulan, nga nagapangayo sing bulig sa ila agod makalipikar sia subong isa ka manugbantala sang Ginharian. Sang ulihi, ang iya mga ginikanan kag ang mga gulang nagpasugot nga tugutan sia nga mangin isa ka dibawtismado nga manugbantala. Masugid na niya sing epektibo ang mensahe sang Ginharian sa mga ganhaan. Bisan pa nga ining diutay nga bata nga babayi lima ka tuig lamang ang edad kag indi pa makahibalo magbasa, ginsaulo niya ang lokasyon sang pila ka teksto sa Biblia. Sa tapos makita ang kasulatan, ginapangabay niya ang tagbalay nga basahon ini, kag nian ginapaathag niya ini.
Maathag nga ang mga gulang kag mga ginikanan lunsay daku ang mahimo paagi sa pagpalig-on kag sa pagbulig sadtong nagauswag agod mangin mga dumalayaw ni Jehova.—Hulubaton 3:27.
Isa ka Dayon nga Kaangtanan kay Jehova
Apang, ano kon ikaw mismo nakig-upod sa mga Saksi ni Jehova sa pila ka tion apang wala pa magbuylog sa ila sa ila hilikuton nga pagbantala? Ayhan mapuslanon nga pamangkuton mo ang imo kaugalingon sang masunod nga mga pamangkot, ‘Nagapati bala ako nga nasapwan ko ang kamatuoran kag nga si Jehova amo lamang ang matuod nga Dios? Kombinsido bala ako nga ang Ginharian sang Dios amo lamang ang solusyon sa mga problema sang tawo? Ginbayaan ko bala ang tanan nga butig nga relihion kag kalibutanon nga mga kinabatasan kag mga buhat nga nagapaakig kay Jehova? May madalom bala ako nga gugma kay Jehova kag sa iya matarong nga mga talaksan?’ (Salmo 97:10) Kon masabat mo sing bunayag sing huo ining mga pamangkot, ano ang nagapugong sa imo sa pagdayaw kay Jehova?—Ipaanggid ang Binuhatan 8:36.
Ang pagdayaw kay Jehova nagalakip sing labi pa sa pagbantala sang maayong balita. Kon nakakuha ka na sing sibu nga ihibalo, may matuod nga pagtuo, kag nagapahisanto sang imo kabuhi sa diosnon nga mga talaksan, dapat mo lig-unon ang imo personal nga kaangtanan sa Dios. Paano? Paagi sa paghimo sing dedikasyon sa iya sa pangamuyo kag nian sa pagsimbulo sini sa kalalangan sang bawtismo sa tubig. Ang kabuhi nga walay katapusan nadalahig. Busa, magpanghikot karon sa laygay ni Jesus: “Sulod kamo sa gawang nga makitid; kay masangkad ang gawang kag malapad ang dalan nga nagapadulong sa kalaglagan, kag madamo ang mga nagasulod sa sini; samtang makitid ang gawang kag masiput ang dalan nga nagapadulong sa kabuhi, kag pila lamang ang nakatultol sa sini.”—Mateo 7:13, 14.
Bangod ang karon nga sistema sang mga butang nagahilapit na sa iya malaglagon nga katapusan, indi ini ang tion nga magpangalag-ag. Maghimo sing gilayon nga mga tikang padulong sa dayon nga kaangtanan kay Jehova. Sa pagkamatuod, karon na ang tion sa pagsabat sing positibo sa pamangkot, Dayawon mo bala si Jehova?