Ginpain Agod Mangin Malipayon nga mga Dumalayaw sa Bug-os nga Kalibutan
“Dayawa ninyo si Jah, kamo nga katawhan! Magdayaw, O kamo nga mga alagad ni Jehova, dayawa ninyo ang ngalan ni Jehova.”—SALMO 113:1.
1, 2. (a) Nahisuno sa Salmo 113:1-3, sin-o ang takus sang aton mainit nga pagdayaw? (b) Anong pamangkot ang nagakaigo nga ipakiana?
SI Jehova nga Dios amo ang Dakung Manunuga sang langit kag duta, ang aton Bug-os Uniberso nga Soberano sa walay katubtuban. Takus gid sia sang aton mainit nga pagdayaw. Amo sini kon ngaa ginasugo kita sang Salmo 113:1-3: “Dayawa ninyo si Jah, kamo nga katawhan! Magdayaw, O kamo nga mga alagad ni Jehova, dayawa ninyo ang ngalan ni Jehova. Pakamaayuhon ang ngalan ni Jehova kutob karon tubtob sa walay katubtuban. Kutob sa pagbutlak sang adlaw tubtob sa pagtunod sini dayawon ang ngalan ni Jehova.”
2 Subong mga Saksi sang Dios, ginahimo naton ini sing malipayon. Daw ano ka makalilipay nga sa indi madugay pahanabuon ni Jehova nga Dios nga mabatian sa bug-os nga duta ining malipayon nga ambahanon sang pagdayaw nga aton ginaamba! (Salmo 22:27) Ang imo bala tingog mabatian sa sining daku bug-os duta nga koro? Kon huo, malipayon gid ikaw nga mapain gikan sa sining nabahinbahin, walay kalipay nga kalibutan!
3. (a) Ano ang nagahimo sa katawhan ni Jehova nga tuhay kag pinasahi? (b) Sa anong mga paagi ginpain kita?
3 Ang aton nahiusa nga pagdayaw kay Jehova nagahimo gid sa aton nga tuhay kag pinasahi. Nagahambal kita kag nagapanudlo sing nahiusa kag nagagamit sing pareho nga paagi sa pagpahayag sing ‘bugana nga kaayo ni Jehova.’ (Salmo 145:7) Huo, subong nadedikar nga katawhan ni Jehova, ginpain kita sa pag-alagad sa aton Dios, si Jehova. Ginsilingan sang Dios ang iya nadedikar anay nga katawhan, ang Israel, nga magpabilin nga napain gikan sa mga pungsod sa palibot nila kag mangin walay dagta sa mga buhat sadtong mga pungsod. (Exodo 34:12-16) Ginhatagan niya ang iya katawhan sing kasuguan agod buligan sila nga mahimo ini. Sa karon man, ginhatag sa aton ni Jehova ang iya Balaan nga Pulong, ang Biblia. Ginapakita sang mga panudlo sini kon paano kita makapabilin nga napain sa sining kalibutan. (2 Corinto 6:17; 2 Timoteo 3:16, 17) Wala kita napain paagi sa pagpain sang aton kaugalingon sa mga monasteryo kag mga kombento, kaangay sa mga monghe kag mga madre sang Babilonia nga Daku. Subong pagsunod sa huwaran ni Jesucristo, dayag kita nga mga dumalayaw ni Jehova.
Iluga ang Punong Dumalayaw ni Jehova
4. Paano nagpahamtang sing huwaran si Jesus sa pagdayaw kay Jehova?
4 Si Jesus wala gid magtalikod sa iya katuyuan nga dayawon si Jehova. Kag amo ini ang nagpain sa iya gikan sa kalibutan. Sa mga sinagoga kag sa templo sa Jerusalem, gindayaw niya ang balaan nga ngalan sang Dios. Sa kabukiran man ukon sa baybayon, bisan diin nagatipon ang mga tawo, dayag nga ginbantala ni Jesus ang kamatuoran ni Jehova. Sia nagsiling: “Gindayaw ko ikaw sing dayag, Amay, Ginuo sang langit kag duta.” (Mateo 11:25) Bisan sa tion sang kasaba sa atubangan ni Poncio Pilato, si Jesus nagpanaksi: “Kay sa sini natawo ako, kag sa sini nagkari ako sa kalibutan, agod makapanaksi ako sa kamatuoran.” (Juan 18:37) Gin-apresyar ni Jesus ang importansia sang iya hilikuton. Bisan diin man sia, nagpanaksi si Jesus tuhoy kay Jehova kag gindayaw sia sing dayag.
5. Kay sin-o naaplikar ang Salmo 22:22, kag ano dapat ang aton panimuot?
5 Sa Salmo 22:22, masapwan naton ining matagnaon nga pinamulong tuhoy sa Punong Dumalayaw ni Jehova: “Ipahayag ko ang imo ngalan sa akon mga utod; sa tunga sang kongregasyon dayawon ko ikaw.” Kag sa Hebreo 2:11, 12, gin-aplikar ni apostol Pablo ini nga mga bersikulo kay Ginuong Jesus kag sa mga ginpakabalaan ni Jehova nga Dios para sa langitnon nga himaya. Kaangay niya, wala sila nahuya sa pagdayaw sa ngalan ni Jehova sa tunga sang kongregasyon. Amo man bala sina ang aton panimuot kon nagatambong sa aton mga miting sa kongregasyon? Ang aton mapagsik nga pagpakigbahin sa mga miting, sa pagpamati kag sa pagkomento kag sa pag-amba, nagadayaw kay Jehova. Apang tubtob sa miting lamang bala ang aton malipayon nga pagdayaw?
6. Anong komisyon ang ginhatag ni Jesus sa iya mga disipulo, kag paano ang mga mahigugmaon sa kapawa nagahimaya sa Dios?
6 Suno sa Mateo 5:14-16, ginsugo man ni Ginuong Jesus ang iya mga sumulunod nga paiwagon ang ila kapawa agod ang iban magadayaw kay Jehova. Sia nagsiling: “Kamo ang kapawa sang kalibutan. . . . Paiwaga ang inyo kapawa sa mga tawo, agod makita nila ang inyo maayong mga buhat kag maghimaya sa inyo amay nga yara sa mga langit.” Ang mga mahigugmaon sa kapawa nagahimaya sa Dios. Ginahimo bala nila ini paagi lamang sa paghambal kag paghimo sing maayo, maluluy-on sa tawo nga mga butang? Indi, sa baylo ginahimo nila ini paagi sa paghimaya kay Jehova sing nahiusa. Huo, ginadedikar sang mga mahigugmaon sa kapawa ang ila kaugalingon sa Dios kag nangin malipayon niya nga mga dumalayaw. Nahimo mo na bala ining malipayon nga tikang?
Kalipay sa Pagdayaw kay Jehova
7. Ngaa malipayon gid ang mga dumalayaw ni Jehova, kag ano ang nagpahalipay sa ila sadtong Pentecostes 33 C.E.?
7 Ngaa malipayon gid ang mga dumalayaw ni Jehova? Bangod ang kalipay isa ka bunga sang balaan nga espiritu sang Dios. Sa Galacia 5:22, ginlista ini sunod sa gugma. Ginpakita sang mga disipulo ni Jesus sang unang siglo ini nga bunga sang espiritu ni Jehova. Ti, sang adlaw sang Pentecostes 33 C.E., sang ginbubo sang Dios ang iya espiritu sa mga 120 ka disipulo ni Jesus, tanan sila nagdayaw kay Jehova sa nanuhaytuhay nga mga hambal. Ang mahinadlukon sa Dios nga mga Judiyo nga nagkadto sa Jerusalem gikan sa madamong pungsod ‘nakibot kag natingala.’ Nagtuaw sila: “Nabatian namon sila nga nagahambal sa amon mga hambal tuhoy sa makadalayaw nga mga butang sang Dios”! (Binuhatan 2:1-11) Ano ang resulta sining makadalayaw nga pagdayaw kay Jehova sa nanuhaytuhay nga hambal? Mga 3,000 ka Judiyo kag Judiyong mga proselita ang nagbaton sing maayong balita sang Ginharian tuhoy sa Mesias. Nagpabawtismo sila, nakabaton sing balaan nga espiritu, kag malipayon nga gindugang ang ila mga tingog subong malipayon nga mga dumalayaw ni Jehova. (Binuhatan 2:37-42) Daw ano nga pagpakamaayo!
8. Pagkatapos sang Pentecostes, ano ang ginhimo sang mga Cristiano agod madugangan ang ila kalipay?
8 Ang report nagapadayon: “Sa adlaw-adlaw padayon sila nga nagtambong sing nahiusa sa templo, kag nagkaon sila sa pribado nga mga puluy-an nga may dakung kalipay kag kabunayag sing tagipusuon, nagadayaw sa Dios kag ginakahamut-an sang mga tawo. Sa amo man nga tion padayon nga gindugang sa ila ni Jehova sa adlaw-adlaw yadtong mga naluwas.” (Binuhatan 2:46, 47) Ang ila lamang bala pagtililipon kag pagkinaon ang nagpahalipay sa ila? Indi, ang ila pangunang kalipay naghalin sa pagdayaw kay Jehova nga Dios sa adlaw-adlaw. Kag nagdugang ang ila kalipay sang makita nila ang linibo nga nagbaton sa mensahe sang kaluwasan. Kaanggid man ini sa aton karon.
Malipayon nga mga Dumalayaw sa Tanan nga Pungsod
9. (a) San-o kag paano ginhatagan sang Dios ang mga tawo sang tanan nga kapungsuran sing kahigayunan nga mabatian ang iya maayong balita? (b) Ngaa ginbubo ang balaan nga espiritu kay Cornelio kag sa iya mga kaupdanan antes sila ginbawtismuhan?
9 Indi luyag ni Jehova nga malimitahan sa isa ka pungsod ang nagapaiwag nga hilikuton sang iya mga alagad. Busa, kutob sang 36 C.E., ginhatagan niya ang mga tawo sang tanan nga pungsod sing kahigayunan nga makapamati sang iya maayong balita. Sa pagtuytoy sang Dios, si Pedro nagkadto sa balay sang Gentil nga opisyal sang hangaway sa Cesaria. Didto nakit-an niya si Cornelio nga nagatipon upod sa iya pinakasuod nga mga abyan kag pamilya. Samtang nagapamati sila sing maayo sa mga ginahambal ni Pedro, tinagipusuon sila nga nagtuo kay Jesus. Paano naton mahibaluan? Bangod ang balaan nga espiritu sang Dios nagkunsad sa sadtong Gentil nga mga tumuluo. Sa kinaandan, ang dulot sang espiritu sang Dios ginahatag lamang pagkatapos sang bawtismo, apang sadtong okasyon ginpakita ni Jehova ang iya kahamuot sa sining mga di-Judiyo antes sila ginbawtismuhan. Kon wala yadto ginhimo ni Jehova, wala kuntani mapat-od ni Pedro nga ginbaton na sang Dios ang mga Gentil subong Iya mga alagad kag kalipikado na sila para sa bawtismo sa tubig.—Binuhatan 10:34, 35, 47, 48.
10. Paano gintagna kutob sang dumaan nga mga tion nga ang mga tawo sang tanan nga kapungsuran magadayaw kay Jehova?
10 Kutob sang dumaan nga mga tion, gintagna ni Jehova nga ang katawhan sang tanan nga kapungsuran magadayaw sa iya. Makatigayon sia sing malipayon nga mga dumalayaw sa tanan nga pungsod. Agod pamatud-an ini, ginkutlo ni apostol Pablo ang mga tagna gikan sa Hebreong Kasulatan. Ginsugiran niya ang internasyonal nga kongregasyon sang mga Cristiano sa Roma: “Magbinatunay kamo subong nga si Cristo man nagbaton sa aton, sa himaya sang Dios. Kay ginasiling ko sa inyo nga si Cristo nag-alagad sa mga nasirkunsidar sa pagpakita sing pagkamaminatud-on sang Dios, agod mapamatud-an niya ang Iya mga saad sa ila mga katigulangan, kag agod nga ang mga pungsod magahimaya sa Dios tungod sang iya kaluoy. Subong sang nasulat na [sa Salmo 18:49]: ‘Busa dayawon ko ikaw sa tunga sang mga pungsod kag magaamba ako sa imo ngalan.’ Kag liwat nagasiling sia [sa Deuteronomio 32:43]: ‘Magkalipay kamo mga pungsod; kaupod sang iya katawhan.’ Kag liwat [sa Salmo 117:1]: ‘Dayawa ninyo si Jehova, kamo tanan nga mga pungsod, kag magdayaw ang tanan nga katawhan sa iya.’ ”—Roma 15:7-11.
11. Paano ginbuligan sang Dios ang mga tawo sang tanan nga kapungsuran nga matun-an ang iya kamatuoran, kag ano ang nangin resulta?
11 Indi madayaw sang katawhan si Jehova sing nahiusa kon wala nila ginapasad ang ila paglaum kay Jesucristo, ang isa nga gintangdo sang Dios nga maggahom sa mga tawo sang tanan nga kapungsuran. Agod mabuligan sila nga mahangpan ang Iya kamatuoran nga nagadul-ong sa kabuhi nga dayon, ang Dios nagtukod sing internasyonal nga programa sa pagtudlo. Nagahatag sia sing panuytoy paagi sa iya matutom nga ulipon nga klase. (Mateo 24:45-47) Ang resulta? Kapin sa lima ka milyon sang malipayon nga tingog ang nagaamba sing pagdayaw kay Jehova sa kapin sa 230 ka kadutaan. Kag minilyon pa ang interesado nga himuon man ini. Tan-awa kon daw ano kadamo ang nagtambong sa Memoryal sang 1996: 12,921,933. Makadalayaw gid!
Gintagna ang Isa ka Dakung Kadam-an sang Malipayon nga mga Dumalayaw
12. Anong makapapagsik nga palanan-awon ang naeksperiensiahan ni apostol Juan, kag ano ang buhi nga katunayan sini?
12 Sa palanan-awon, nakit-an ni apostol Juan ang “isa ka dakung kadam-an” gikan sa tanan nga kapungsuran. (Bugna 7:9) Ano ang tema sang mga pagdayaw nga ginakanta sining dakung kadam-an upod sa hinaplas nga nagkalabilin sang Dios? Ginasugiran kita ni Juan: “Ang kaluwasan namon nagagikan sa amon Dios, nga nagalingkod sa trono, kag gikan sa Kordero.” (Bugna 7:10) Masidla ini nga ginpahayag sa tanan nga bahin sang duta. Nagawagayway sing mga paklang sang palma, kon sa aton pa, ginadayaw naton sing nahiusa ang Dios subong ang Bug-os Uniberso nga Soberano kag malipayon nga nagasiling sa langit kag duta nga ‘utang naton’ ang aton kaluwasan sa iya kag sa iya Anak, ang Kordero, si Jesucristo. Daw ano ang kakunyag ni apostol Juan sang makita niya ining makapapagsik nga palanan-awon tuhoy sa dakung kadam-an! Kag daw ano ang aton kakunyag karon nga makita, kag mangin bahin pa gani sang dakung kadam-an nga nakit-an ni Juan sa palanan-awon!
13. Ano ang nagapain sa katawhan ni Jehova gikan sa kalibutan?
13 Subong mga alagad ni Jehova, ginapabugal naton ang iya ngalan. (Isaias 43:10, 12) Subong mga Saksi ni Jehova nangin tuhay kita sa sining kalibutan. Daw ano ka makalilipay nga dalhon ang pinasahi nga ngalan sang Dios kag himuon ang iya diosnon nga hilikuton subong aton tulumuron sa kabuhi! Ang dakung katuyuan ni Jehova sa pagpakabalaan sang iya balaan nga ngalan kag pagbindikar sang iya bug-os uniberso nga pagkasoberano paagi sa Ginharian naghatag sing kahulugan sa aton kabuhi. Kag ginbuligan niya kita nga makatigayon sing duog sa iya balaan nga katuyuan tuhoy sa iya ngalan kag Ginharian. Ginhimo niya ini sa tatlo ka paagi.
Gintugyanan sing Kamatuoran
14, 15. (a) Ano ang isa ka paagi nga ginabuligan kita sang Dios nga makatigayon sing duog sa iya balaan nga katuyuan may kahilabtanan sa iya ngalan kag Ginharian? (b) Paano nga ang Ginharian nga gintukod sang 1914 C.E. tuhay sa napukan sadtong 607 B.C.E.?
14 Una, gintugyan ni Jehova sa iya katawhan ang kamatuoran. Ang labing makakulunyag nga mensahe amo nga ang iya Ginharian naggahom na sang 1914. (Bugna 12:10) Ining langitnon nga panguluhan tuhay sangsa tipiko nga ginharian sa Jerusalem, diin naglingkod ang mga hari gikan sa linya ni David. Napukan yadtong ginharian, kag kutob sang 607 B.C.E., ang Jerusalem bug-os nga napaidalom sa bug-os kalibutan nga paggahom sang mga Gentil. Ang bag-ong Ginharian nga gintukod ni Jehova sang 1914 isa ka langitnon nga pagginahom nga indi mapaidalom kay bisan sin-o luwas kay Jehova, kag indi man ini mapukan. (Daniel 2:44) Subong man, tuhay ang pagginahom sini. Paano? Ang Bugna 11:15 nagasabat: “May mabaskog nga mga tingog sa langit, nga nagasiling: ‘Ang ginharian sang kalibutan nangin iya sang aton Ginuo kag sang iya Cristo, kag magahari sia tubtob sa wala sing katubtuban.’ ”
15 “Ang ginharian sang aton Ginuo kag sang iya Cristo” nagagahom sa bug-os nga kalibutan sang katawhan. Ining bag-o nga kahimusan sang soberanya ni Jehova, nga nagalakip sa iya Mesianiko nga Anak, kag sa 144,000 ka kauturan ni Jesus, kalabanan sa ila ginbanhaw na karon sa langitnon nga himaya, indi lamang isa ka akademiko nga butang—isa ka teoriya nga luyag hambalan sang mga estudyante. Indi, ining langitnon nga Ginharian isa ka matuod nga panguluhan. Kag ang aton malipayon nga paglaum sa pagpuyo sa kahimpitan subong resulta sang paggahom sini nagahatag sa aton sing maayo nga rason nga padayon nga magmalipayon. Bangod ginsaligan sang mga kamatuoran sang Pulong ni Jehova napahulag kita sa paghambal pirme sing maayo tuhoy sini. (Salmo 56:10) Regular mo bala nga ginahimo ini paagi sa pagsugid sa tanan nga ang Mesianiko nga Ginharian sang Dios nagagahom na karon sa mga langit?
Ginabuligan sang Balaan nga Espiritu kag sang Bug-os Kalibutan nga Paghiliutod
16, 17. Ano ang ikaduha kag ikatlo nga paagi nga ginabuligan kita sang Dios nga makatigayon sing duog sa iya balaan nga katuyuan?
16 Ang ikaduha nga paagi nga ginabuligan kita sang Dios agod makatigayon sing duog sa iya balaan nga katuyuan amo ang paghatag niya sa aton sang iya balaan nga espiritu, nga nagabulig sa aton nga mapatubas ang matahom nga mga bunga sini sa aton kabuhi kag mahamut-an niya. (Galacia 5:22, 23) Dugang pa, si Pablo nagsulat sa hinaplas nga mga Cristiano: “Nabaton naton . . . ang espiritu nga gikan sa Dios, agod nga mahangpan ta ang mga hiyas nga ginhatag sa aton sang Dios.” (1 Corinto 2:12) Paagi sa aton pagsunod sa espiritu ni Jehova, sarang na naton tanan mahibaluan kag mahangpan ang maayong mga butang nga ginhatag niya sa aton—ang iya mga saad, mga kasuguan, mga prinsipio, kag iban pa.—Ipaanggid ang Mateo 13:11.
17 Tuhoy sa ikatlong paagi nga ginabuligan kita sang Dios, may bug-os kalibutan kita nga paghiliutod kag matahom organisasyonal nga kahimusan sang pagsimba kay Jehova. Ginpatuhuyan ini ni apostol Pedro sang ginsugo niya kita nga “higugmaon ang bug-os nga paghiliupod sang mga kauturan.” (1 Pedro 2:17) Ang aton mahigugmaon, internasyonal nga pamilya sang kauturan nga mga lalaki kag babayi nagabulig sa aton nga maalagad si Jehova nga may dakung kalipay sa tagipusuon, subong sang ginasugo sang Salmo 100:2: “Alagda si Jehova nga may kasadya. Magkara sa iya atubangan nga may pag-amba.” Ang bersikulo 4 dugang nga nagasiling: “Magsulod sa iya mga gawang nga may pagpasalamat, kag sa iya mga luwang nga may pagdayaw! Magpasalamat sa iya, pakamaayuha ang iya ngalan.” Gani nagabantala man kita sing dayag ukon nagatambong sa aton mga miting, mangin malipayon kita. Daw ano nga paghidait kag kalig-unan ang aton nasapwan sa matahom nga luwang sang espirituwal nga templo ni Jehova!
Dayawa sing Malipayon si Jehova!
18. Ngaa mahimo kita malipay sa pagdayaw kay Jehova walay sapayan sang paghingabot ukon sang iban pa nga mga problema nga nagatublag sa aton?
18 Walay sapayan sang mabudlay nga mga kahimtangan, paghingabot, ukon iban pa nga problema nga mahimo magtublag sa aton, magkalipay kita nga yari kita sa balay sang pagsimba ni Jehova. (Isaias 2:2, 3) Dumduma nga ang gugma isa ka kinaiya sang tagipusuon. Ang aton unang Cristianong mga kauturan nga lalaki kag babayi malipayon nga mga dumalayaw ni Jehova walay sapayan sang madamo nga kabudlayan kag kadulaan nga ila naeksperiensiahan. (Hebreo 10:34) Ang aton mga masigkatumuluo karon kaangay gid sa ila.—Mateo 5:10-12.
19. (a) Anong sulit-sulit nga sugo ang nagapapagsik sa aton nga dayawon si Jehova? (b) Nasandig sa ano ang aton kabuhi nga walay katapusan, kag determinado kita nga himuon ang ano?
19 Tanan kita nga nagaalagad kay Jehova nalipay sa pagsunod sa sugo sang Biblia nga dayawon sia. Sa liwat kag liwat ginapadaku sang tulun-an sang Bugna ang mga pagdayaw kay Jehova paagi sa ekspresyon “Dayawa si Jah!” (Bugna 19:1-6) Sa anom ka bersikulo sang Salmo 150, ginasugo kita sing 13 ka beses nga dayawon si Jehova. Bug-os kalibutan ini nga pangabay sa tanan nga tinuga nga magbuylog sa malipayon nga pag-amba sing pagdayaw kay Jehova. Ang aton walay katapusan nga kabuhi nasandig sa aton pagbuylog sa sining daku nga pag-amba sing Hallelujah! Huo, ang lamang nga mga tawo nga mabuhi sing walay katapusan amo yadtong walay untat nga nagadayaw kay Jehova. Busa, determinado kita nga magpabilin sing suod sa iya mainunungon nga kongregasyon sa bug-os nga kalibutan samtang nagahilapit ang katapusan. Nian, makalaum kita nga makita ang bug-os nga katumanan sang nagahinakop nga mga pulong sang Salmo 150: “Ang tagsa ka nagaginhawa nga butang—magdayaw kay Jah. Dayawa ninyo si Jah, kamo nga katawhan!”
Paano Mo Sabton?
◻ Ano ang nagahimo sa katawhan ni Jehova nga tuhay kag pinasahi?
◻ Ngaa malipayon gid ang mga alagad ni Jehova?
◻ Ano ang nagapain sa aton gikan sa kalibutan?
◻ Sa anong tatlo ka paagi ginabuligan kita ni Jehova nga makatigayon sing duog sa iya balaan nga katuyuan?
[Kapsion sa pahina 17]
Bisan diin man sia, si Jesus nagpanaksi tuhoy kay Jehova kag gindayaw sia sing dayag