Batuna ang Biblia sa kon Ano Gid Ini
“Kami man nagapasalamat sa Dios sa walay langan, kay sang pagbaton ninyo sang pulong sang Dios nga inyo nabatian sa amon, ginbaton ninyo ini, indi subong pulong sang mga tawo, kundi, nga sa pagkamatuod amo gid ini, ang pulong sang Dios, nga nagapanghikot man sa inyo nga mga nagatuo.”—1 TESALONICA 2:13.
1. Ano nga sahi sang impormasyon sa Biblia ang nagahimo sina nga libro nga talalupangdon gid?
ANG Balaan nga Biblia amo ang may pinakamadamo nga badbad kag pinakalapnag nga libro sa kalibutan. Ginakilala ini sa gilayon subong amo ang isa sang daku nga mga sinulatan sang literatura. Apang, kapin ka importante, ang Biblia nagaaman sing panuytoy nga kinahanglanon gid sang katawhan gikan sa tanan nga rasa kag pungsod, walay sapayan sang ila trabaho ukon kahimtangan sa kabuhi. (Bugna 14:6, 7) Sa isa ka paagi nga makapakontento sa hunahuna kag sa tagipusuon, ginasabat sang Biblia ang mga pamangkot subong sang: Ano ang katuyuan sang tawhanon nga kabuhi? (Genesis 1:28; Bugna 4:11) Ngaa ang mga panguluhan sang katawhan wala makapaluntad sing dayon nga paghidait kag kalig-unan? (Jeremias 10:23; Bugna 13:1, 2) Ngaa nagakapatay ang mga tawo? (Genesis 2:15-17; 3:1-6; Roma 5:12) Sa tunga sining magamo nga kalibutan, paano naton malandas sing madinalag-on ang mga problema sang kabuhi? (Salmo 119:105; Hulubaton 3:5, 6) Ano ang ginatigana sa aton sang palaabuton?—Daniel 2:44; Bugna 21:3-5.
2. Ngaa ang Biblia nagahatag sing masaligan sing bug-os nga mga sabat sa aton mga pamangkot?
2 Ngaa ginasabat sang Biblia ining mga pamangkot subong nga may awtoridad? Bangod Pulong sang Dios ini. Gingamit niya ang mga tawo sa pagsulat sini, apang subong nga ginasiling sing maathag sa 2 Timoteo 3:16, “ang bug-os nga Kasulatan gin-inspirar sang Dios.” Indi ini bunga sang pribado nga pagpatpat sang mga tawo sa mga hitabo. “Ang tagna [mga pagpahayag sang mga butang nga maabot, mga sugo sang Dios, talaksan sang Biblia sa moralidad] wala gid mag-abot paagi sa kabubut-on sang tawo, kundi ang mga tawo nagpamulong gikan sa Dios samtang ginatuytuyan sila sang balaan nga espiritu.”—2 Pedro 1:21.
3. (a) Maghatag sing mga halimbawa nga nagapakita kon daw ano kadaku nga ginpabilihan sang mga tawo sa nanuhaytuhay nga kadutaan ang Biblia. (b) Ngaa ang mga indibiduwal nangin handa nga irisgo ang ila kabuhi agod mabasa ang Kasulatan?
3 Bangod sang pag-apresyar sa kabilihanan sang Biblia, madamo nga tawo ang nag-atubang sang katalagman nga mabilanggo, kag mapatay pa gani, agod makatigayon kag makabasa sini. Matuod ini sang una sa Katoliko nga Espanya, diin hinadlukan ang klero nga basi magluya ang ila impluwensia kon ang mga tawo makabasa sing Biblia sa ila kaugalingon nga hambal; matuod man ini sa Albania, diin mapintas nga mga tikang ang ginhimo sa idalom sang isa ka ateistiko nga pagginahom agod tapuson ang tanan nga relihioso nga impluwensia. Apang, ang mahinadlukon-sa-Dios nga mga indibiduwal nagpakabahandi sa mga kopya sang Kasulatan, nagbasa sini, kag nagpaambit sini sa isa kag isa. Sang tion sang Inaway Kalibutanon II, sa kampo konsentrasyon sa Sachsenhausen, ang Biblia mahalungon nga ginpasapasa gikan sa isa ka bloke sang mga selda padulong sa lain naman (bisan pa gindumilian ini), kag ginsaulo sang mga makabasa sini ang pila ka bahin agod ipaalinton sa iban pa gid. Sang tion sang katuigan 1950, sa ginatawag sadto nga Komunista nga Sidlangan nga Alemanya, ang mga Saksi ni Jehova nga nabilanggo bangod sang ila pagtuo nag-atubang sa katalagman nga mabartulina sa madugay nga tion sang ginpasapasa nila ang diutay nga mga bahin sang Biblia gikan sa isa ka bilanggo pakadto sa isa naman agod mabasa nila ini kon gab-i. Ngaa ginhimo nila ini? Bangod ginkilala nila nga ang Biblia amo ang Pulong sang Dios, kag nahibaluan nila nga “indi sa tinapay lamang” kundi sa “tagsa ka pulong nga nagaguwa sa baba ni Jehova nagakabuhi ang tawo.” (Deuteronomio 8:3) Ining mga pulong, nga narekord sa Biblia, nakabulig sa sadtong mga Saksi sa pagpabilin nga buhi sa espirituwal walay sapayan nga sila ginpaidalom sa indi mapatihan nga kapintas.
4. Ano dapat ang mangin duog sang Biblia sa aton kabuhi?
4 Ang Biblia indi isa ka libro nga ibutang lamang sa estante para sa okasyonal nga reperensia, ukon gintuyo ini nga gamiton lamang kon ang mga masigkasumilimba nagatipon para sa pagsimba. Dapat ini gamiton sa kada adlaw agod maghatag sing kapawa sa mga kahimtangan nga nagaatubang sa aton kag agod ipakita sa aton ang husto nga dalanon nga dapat laktan.—Salmo 25:4, 5.
Gintuyo Agod Basahon kag Mahangpan
5. (a) Kon mahimo gid, ano ang dapat mapanag-iyahan sang kada isa sa aton? (b) Sa dumaan nga Israel, paano nahibaluan sang katawhan kon ano ang ginaunod sang Kasulatan? (c) Paano ang Salmo 19:7-11 nagaapektar sang imo panimuot sa pagbasa sing Biblia?
5 Sa aton adlaw, ang mga kopya sang Biblia madali nga matigayon sa kalabanan nga kadutaan, kag ginapalig-on namon ang tagsa ka bumalasa sang Ang Lalantawan nga magtigayon sing isa ka kopya sini. Sang tion nga ginasulat ang Biblia, wala pa sadto sing mga makina sa pag-imprinta. Ang katawhan sa kabilugan wala sing personal nga mga kopya. Apang naghimo si Jehova sing kahimusan nga mabatian sang iya mga alagad kon ano ang nasulat na. Sa amo, ang Exodo 24:7 nagareport, nga sa tapos nasulat ni Moises ang ginsugo ni Jehova, ‘ginkuha [niya] ang tulun-an sang katipan kag ginbasa ini sa igdulungog sang katawhan.’ Bangod nasaksihan nila ang labaw sa kinaugali nga mga pagpasundayag sa Bukid sang Sinai, ginkilala nila nga ang ginbasa sa ila ni Moises naghalin sa Dios kag nga dapat nila mahibaluan ining impormasyon. (Exodo 19:9, 16-19; 20:22) Dapat man naton mahibaluan kon ano ang narekord sa Pulong sang Dios.—Salmo 19:7-11.
6. (a) Antes makasulod ang pungsod sang Israel sa Ginsaad nga Duta, ano ang ginhimo ni Moises? (b) Paano naton mailog ang huwaran ni Moises?
6 Samtang ang pungsod sang Israel naghanda sa pagtabok sa Suba sang Jordan agod magsulod sa Ginsaad nga Duta, sa amo biyaan ang ila pagpanlugayaw sa kahanayakan, nagakaigo nga repasuhon nila ang Kasuguan ni Jehova kag ang iya mga pagpakig-angot sa ila. Napahulag sang espiritu sang Dios, ginrepaso sa ila ni Moises ang Kasuguan. Ginpahanumdom niya sila sang mga detalye sang Kasuguan, kag ginpadaku man niya ang sadsaran nga mga prinsipio kag mga panimuot nga dapat mag-impluwensia sa ila kaangtanan kay Jehova. (Deuteronomio 4:9, 35; 7:7, 8; 8:10-14; 10:12, 13) Samtang ginatuman naton karon ang bag-o nga mga asaynment ukon ginaatubang ang bag-o nga mga kahimtangan sa kabuhi, mapuslanon man para sa aton nga binagbinagon ang laygay sang Kasulatan nga dapat mag-impluwensia sang aton ginahimo.
7. Wala madugay sa tapos nakatabok ang mga Israelinhon sa Jordan, ano ang ginhimo agod ipasalop sa ila mga hunahuna kag mga tagipusuon ang Kasuguan ni Jehova?
7 Wala lang madugay sa tapos nakatabok ang Israel sa Suba sang Jordan, nagtipon liwat ang katawhan agod repasuhon ang ginpamulong sa ila ni Jehova paagi kay Moises. Ang pungsod nagtipon mga 50 kilometros sa aminhan sang Jerusalem. Ang katunga sang mga tribo nagtipon sa atubangan sang Bukid sang Ebal, kag ang katunga sa atubangan sang Bukid sang Gerizim. Didto ‘ginbasa [ni Josue] ang tanan nga pulong sang kasuguan, ang pagpakamaayo kag ang pagpakamalaut.’ Sa amo ang mga lalaki, mga babayi, kag ang mga magamay, upod sa dumuluong nga mga pumuluyo, nakabati sing sibu sa tion nga pagsulit sang kasuguan tuhoy sa paggawi nga magaresulta sa dikahamuot ni Jehova kag sang mga pagpakamaayo nga ila mabaton kon tumanon nila si Jehova. (Josue 8:34, 35) Dapat mangin maathag sa ila hunahuna kon ano ang maayo kag kon ano ang malain gikan sa pagtamod ni Jehova. Dugang pa, dapat sila magpatudok sa ila tagipusuon sing gugma sa maayo kag sing dumot sa malain, subong sang ginahimo sang tagsatagsa sa aton karon.—Salmo 97:10; 119:103, 104; Amos 5:15.
8. Ano ang benepisyo sang pagbasa sing Pulong sang Dios sa pila ka pungsudnon nga mga pagtilipon sa Israel?
8 Dugang pa sa mga pagbasa sang Kasuguan sa tion sadtong maragtason nga mga okasyon, ang isa ka aman para sa regular nga pagbasa sing Pulong sang Dios ginbalay sa Deuteronomio 31:10-12. Kada ikapito ka tuig ang bug-os nga pungsod dapat magtipon agod mamati sa pagbasa sing Pulong sang Dios. Naghatag ini sa ila sing espirituwal nga pagkaon. Ginhuptan sini nga buhi sa ila mga hunahuna kag mga tagipusuon ang mga saad nahanungod sa Binhi kag sa amo nagtuytoy ini sa mga matutom padulong sa Mesias. Ang mga kahimusan para sa espirituwal nga pagkaon nga gintukod sang ang Israel didto sa kahanayakan wala mag-untat sang nagsulod sila sa Ginsaad nga Duta. (1 Corinto 10:3, 4) Sa baylo, ang Pulong sang Dios ginpalambo paagi sa paglakip sing dugang pa nga mga kapahayagan sang mga manalagna.
9. (a) Sang nagtilipon lamang bala ang mga Israelinhon sa dalagku nga mga grupo nga ginbasa nila ang Kasulatan? Ipaathag. (b) Paano ang instruksion sa Kasulatan ginhatag sa sulod sang indibiduwal nga mga pamilya, kag ano ang tulumuron sini?
9 Ang pagrepaso sa laygay sang Pulong sang Dios wala lamang ginhimo sa sadtong mga tion sang ang katawhan nagtilipon sa isa ka daku nga grupo. Ang mga bahin sang Pulong sang Dios kag ang mga prinsipio sa sini dapat ginhambalan sa adlaw-adlaw. (Deuteronomio 6:4-9) Sa kalabanan nga duog karon, ang mga pamatan-on mahimo makatigayon sing personal nga kopya sang Biblia, kag mapuslanon gid para sa ila nga himuon ini. Apang sa dumaan nga Israel, indi subong sini. Sadto, kon ang mga ginikanan maghatag sing instruksion gikan sa Pulong sang Dios, nagasandig sila sa kon ano ang ila nasaulo kag sa mga kamatuoran nga ginpakabahandi nila sa ila tagipusuon, upod ang bisan anong diutay nga mga dinalan nga mahimo personal nga ginsulat nila. Paagi sa masunson nga pagsulit, magatinguha sila sa pagpalambo sa ila kabataan sing gugma para kay Jehova kag sa iya mga dalanon. Ang tulumuron indi lamang ang puno sing ihibalo nga ulo kundi amo ang pagbulig sa tagsa ka katapo sang pamilya nga magkabuhi sa isa ka paagi nga nagapakita sing gugma para kay Jehova kag sa iya Pulong.—Deuteronomio 11:18, 19, 22, 23.
Pagbasa sing Kasulatan sa mga Sinagoga
10, 11. Ano nga programa sang pagbasa sing Kasulatan ang ginsunod sa mga sinagoga, kag paano gintamod ni Jesus ining mga okasyon?
10 Sa pila ka tion sa tapos gindala nga bihag ang mga Judiyo sa Babilonia, gintukod ang mga sinagoga subong mga duog para sa pagsimba. Agod ang Pulong sang Dios mabasa kag mahambalan sa sining mga tilipunan, dugang pa nga mga kopya sang Kasulatan ang ginhimo. Amo ini ang rason kon ngaa may nabilin nga mga 6,000 ka dumaan nga sinulat sang kamot nga mga kopya nga nagaunod sing mga bahin sang Hebreong Kasulatan.
11 Ang isa ka importante nga bahin sang miting sa sinagoga amo ang pagbasa sing Torah, katumbas sa una nga lima ka tulun-an sang modernong-adlaw nga mga Biblia. Ang Binuhatan 15:21 nagareport nga sang unang siglo C.E., ina nga pagbasa ginahimo sa kada Adlaw nga Inugpahuway, kag ginapakita sang Mishnah nga sang ikaduha nga siglo, ginabasa man ang Torah kada ikaduha kag ikalima nga adlaw sang semana. May pila ka indibiduwal nga nagabuslanay sa pagbasa sang gintangdo nga mga bahin. Ang kinabatasan sang mga Judiyo nga nakapuyo sa Babilonia amo nga basahon ang bug-os nga Torah kada tuig; ang kinabatasan sa Palestina amo nga italana ang pagbasa sini sa sulod sang tatlo ka tuig. Ang isa ka bahin gikan sa Mga Manalagna ginbasa man kag ginpaathag. Nangin kinabatasan ni Jesus nga magtambong sa mga programa sang pagbasa sing Biblia kon Adlaw nga Inugpahuway sa duog nga iya ginpuy-an.—Lucas 4:16-21.
Personal nga Sabat kag Pag-aplikar
12. (a) Sang ginbasa ni Moises ang Kasuguan sa katawhan, paano nakabenepisyo ang katawhan? (b) Paano nagsabat ang katawhan?
12 Ang pagbasa sing inspirado nga Kasulatan wala gintuyo nga mangin isa ka pormalismo lamang. Wala ini ginhimo agod lamang paayawan ang pagpangusyuso sang mga tawo. Sang ginbasa ni Moises “ang tulun-an sang katipan” sa Israel sa kapatagan nga nagaatubang sa Bukid sang Sinai, ginhimo niya ini agod nga mahibaluan nila ang ila mga salabton sa atubangan sang Dios kag tumanon ini. Himuon bala nila ini? Ang pagbasa nagkinahanglan sing sabat. Ginkilala ina sang mga tawo, kag naghambal sila, nga nagasiling: “Handa kami nga himuon ang tanan nga napamulong ni Jehova kag magmatinumanon kami.”—Exodo 24:7; ipaanggid ang Exodo 19:8; 24:3.
13. Sang ginbasa ni Josue ang mga pagpakamalaut para sa paglalis, ano ang dapat himuon sang katawhan, kag sa ano nga katuyuan?
13 Sang ulihi, sang ginbasa ni Josue sa pungsod ang ginsaad nga mga pagpakamaayo kag ang mga sumpa, ukon mga pagpakamalaut, ginkinahanglan ang isa ka sabat. Sa tapos sang tagsa ka pagpakamalaut, ginhatag ini nga instruksion: “Kag ang bug-os nga katawhan dapat magsiling, ‘Kabay pa!’ ” (Deuteronomio 27:4-26) Sa amo, sa pagbinagbinag sa tagsa ka punto nagpabutyag sila sing pag-ugyon sa pagpakamalaut ni Jehova sa ginsambit nga mga sala. Pat-od gid nga isa yadto ka makapahamuot nga hitabo sang ang bug-os nga pungsod nagdaguob sa ila pag-ugyon!
14. Sang mga adlaw ni Nehemias, ngaa nangin mapuslanon gid ang pagbasa sing Kasuguan sa publiko?
14 Sang mga adlaw ni Nehemias, sang nagtipon ang bug-os nga katawhan sa Jerusalem agod mamati sa Kasuguan, nakita nila nga wala nila matuman sing bug-os ang mga instruksion nga nasulat didto. Sadto nga okasyon gin-aplikar nila sa gilayon ang ila natun-an. Ano ang resulta? “Tama kadaku nga kasadya.” (Nehemias 8:13-17) Sa tapos sang isa ka semana nga adlaw-adlaw nga pagbasa sing Biblia sa tion sang piesta, narealisar nila nga kapin pa ang kinahanglanon. Sing mapangamuyuon ginrepaso nila ang maragtas sang mga pagpakig-angot ni Jehova sa iya katawhan kutob sang mga adlaw ni Abraham padayon. Ini tanan nagpahulag sa ila nga maghimo sing panumpa nga magsunod sa mga ginapatuman sang Kasuguan, nga maglikaw sa pagminyo sa mga dumuluong, kag nga batunon ang mga obligasyon sa pagtipig sa templo kag sang hilikuton sini.—Nehemias, kapitulo 8-10.
15. Paano ang mga instruksion sa Deuteronomio 6:6-9 nagapakita nga, sa sulod sang mga pamilya, ang instruksion sa Pulong sang Dios indi dapat mangin isa ka pormalismo lamang?
15 Sing kaanggid, sa sulod sang pamilya, ang pagtudlo sing Kasulatan wala gintuyo nga mangin isa ka pormalismo lamang. Subong nakita na naton, sa malaragwayon nga mga pulong sa Deuteronomio 6:6-9, ang katawhan ginsugo nga ‘ibugkos ang mga pulong sang Dios subong nga tanda sa ila kamot’—sa amo nagapakita paagi sa ila halimbawa kag aksion sang ila gugma sa mga dalanon ni Jehova. Kag dapat nila itakod ang mga pulong sang Dios subong ‘filacteria sa ulot sang ila mga mata’—sa amo pirme nagapahanumdom sa ila sang mga prinsipio sa Kasulatan kag ginagamit ini subong sadsaran sang ila mga desisyon. (Ipaanggid ang pamulong nga gingamit sa Exodo 13:9, 14-16.) Dapat nila ‘isulat ini sa mga bakalan sang ila balay kag sa ila mga gawang’—sa amo nagapakilala sang ila mga puluy-an kag sang ila mga komunidad subong mga duog diin ang pulong sang Dios ginatahod kag ginaaplikar. Sa iban nga mga pulong, ang ila kabuhi dapat maghatag sing bugana nga pamatuod nga ginahigugma nila kag ginaaplikar ang matarong nga mga sugo ni Jehova. Daw ano ka nangin mapuslanon yadto! Subong man bala sina ka importante ang Pulong sang Dios sa adlaw-adlaw nga pagkabuhi sang aton mga panimalay? Sing makapasubo, ginhimo sang mga Judiyo ini tanan subong isa ka pormalidad lamang, ginasuksok ang nagaunod-sing-kasulatan nga mga filacteria subong nga daw mga anting-anting ini. Ang ila pagsimba wala na nagagikan sa tagipusuon kag ginsikway ini ni Jehova.—Isaias 29:13, 14; Mateo 15:7-9.
Ang Salabton sang mga Yara sa mga Posisyon sang Pagtatap
16. Ngaa importante para kay Josue ang regular nga pagbasa sing Kasulatan?
16 Tuhoy sa pagbasa sing Kasulatan, pinasahi nga igtalupangod ang ginpatuhoy sa ila nga amo ang mga manugtatap sang pungsod. Kay Josue, si Jehova nagsiling: “Magbantay ka sa paghimo suno sa tanan nga kasuguan.” Agod matuman niya ini nga salabton, ginsugo sia: “Dapat mo ini basahon sa mahinay nga tingog sa adlaw kag gab-i, . . . kay nian mahimo mo nga madinalag-on ang imo dalanon kag nian magahikot ka sing maalamon.” (Josue 1:7, 8) Subong amo man sa bisan sin-o nga Cristianong manugtatap karon, ang regular nga pagbasa ni Josue sing Kasulatan magabulig sa iya agod matandaan sing maathag ang espisipiko nga mga sugo nga ginhatag ni Jehova sa Iya katawhan. Dapat man mahangpan ni Josue kon paano si Jehova nakig-angot sa Iya mga alagad sa idalom sang nanuhaytuhay nga kahimtangan. Samtang ginabasa niya ang ginapabutyag nga katuyuan sang Dios, importante nga hunahunaon niya ang iya mismo salabton may kaangtanan sa sina nga katuyuan.
17. (a) Agod ang mga hari makabenepisyo gikan sa pagbasa sing Kasulatan suno sa paagi nga ginpamulong ni Jehova, ano ang kinahanglanon upod sa ila pagbasa? (b) Ngaa importante gid para sa Cristianong mga gulang ang regular nga pagbasa sing Biblia kag pagpamalandong sa sini?
17 Si Jehova nagsugo nga ang bisan sin-o nga maghari sa Iya katawhan, sa pamuno sang iya pagkahari, dapat maghimo sing isa ka kopya sang Kasuguan sang Dios, ginapasad ini sa kopya nga ginatipigan sang mga saserdote. Nian dapat niya ‘basahon ini sa tanan nga adlaw sang iya kabuhi.’ Ang katuyuan sini indi amo lamang ang pagsaulo sang mga kaundan sini. Sa baylo, amo nga agod nga “makatuon sia sa pagkahadlok kay Jehova nga iya Dios” kag agod nga “indi magpalabaw ang iya tagipusuon sa iya mga utod.” (Deuteronomio 17:18-20) Ginkinahanglan sini nga dapat sia magpamalandong sing tudok tuhoy sa iya ginabasa. Mahimo gid naghunahuna ang iban nga mga hari nga tuman sila kasako sa ila mga katungdanan sa pagdumala nga wala sila sing tion sa paghimo sina, kag subong resulta sang ila pagpatumbaya nag-antos ang bug-os nga pungsod. Ang papel sang mga gulang sa Cristianong kongregasyon indi sa pagkamatuod subong sang mga hari. Walay sapayan, subong sang ginhimo sang mga hari, importante nga ang mga gulang magbasa sing Pulong sang Dios kag magpamalandong sa sini. Magabulig ini sa ila sa paghupot sing nagakaigo nga pagtamod sa mga gintugyan sa ila nga atipanon nila. Magabulig man ini sa ila sa pagtuman sang ila mga salabton subong mga manunudlo sa isa ka paagi nga nagapadungog gid sa Dios kag nagapalig-on sa mga masigka-Cristiano sa espirituwal.—Tito 1:9; ipaanggid ang Juan 7:16-18; ipatuhay ang 1 Timoteo 1:6, 7.
18. Ano nga huwaran ni apostol Pablo ang ibulig sa aton sang regular nga pagbasa kag pagtuon sing Biblia nga ilugon naton?
18 Si apostol Pablo, isa ka Cristianong manugtatap sang unang siglo, isa nga nakasonar gid sang inspirado nga Kasulatan. Sang nagpanaksi sia sa mga tawo sa dumaan nga Tesalonica, nakapangatarungan sia sing epektibo sa ila gikan sa Kasulatan kag nabuligan sila nga mahangpan ang kahulugan. (Binuhatan 17:1-4) Nalab-ot niya ang tagipusuon sang sinsero nga mga manugpalamati. Sa amo, madamo sang nakapamati sa iya ang nangin mga tumuluo. (1 Tesalonica 2:13) Subong resulta sang imo programa sa pagbasa kag pagtuon sing Biblia, makapangatarungan ka bala sing epektibo gikan sa Kasulatan? Ang duog sang pagbasa sing Biblia sa imo kabuhi kag ang imo paagi sang paghimo sini nagapakita bala sing pamatuod nga ginaapresyar mo gid kon ano ang kahulugan sang imo pagpanag-iya sing Pulong sang Dios? Sa masunod nga artikulo, pagabinagbinagon naton kon paano ang isa ka positibo nga sabat sarang mahatag sa sining mga pamangkot bisan pa sang mga tawo nga puno na gid ang ila mga iskedyul.
Paano Mo Sabton?
◻ Ngaa nangin handa ang mga tawo nga irisgo ang kabuhi kag kahilwayan agod mabasa ang Biblia?
◻ Paano kita makabenepisyo paagi sa pagrepaso sang mga aman nga ginhimo agod mapamatian sang dumaan nga Israel ang Pulong sang Dios?
◻ Ano ang dapat naton himuon sa aton nabasa sa Biblia?
◻ Ngaa ilabi na nga importante para sa Cristianong mga gulang ang pagbasa sing Biblia kag pagpamalandong sa sini?
[Retrato sa pahina 9]
Ginsugo ni Jehova si Josue: “Dapat mo basahon ini sa mahinay nga tingog sa adlaw kag gab-i”