Pagpailob—Ngaa Tuman ka Talagsahon?

SI Emilio mga sisentahon.⁠a Nagkadto sia sa Oahu nga may isa ka masubo nga misyon​—⁠agod ilubong ang iya hamtong nga anak nga lalaki. Samtang nagalakat sa isa ka matawhay nga dalan sa kilid sang bungyod kag nagapakigsugilanon sa pila ka abyan, nakibot si Emilio sa isa ka awto nga paisol nga nagapaburhot halin sa isa ka banas. Diutayan lang sia mahapit sang awto, kag bangod sang kaakig kag indi pagpailob, ginsinggitan ni Emilio ang tsuper kag ginpulpog ang buli sang awto sang iya kamot. Nagsunod ang isa ka baisay. Mahimo nga gintikwang sang tsuper si Emilio, nga natumba kag naigo ang iya ulo sa semento. Pila ka adlaw sang ulihi, si Emilio napatay bangod sang samad sa iya ulo. Daw ano kasubo nga resulta!

Nagakabuhi kita sa isa ka kalibutan diin ang pagpailob isa ka talagsahon nga kinaiya. Dugang kag dugang nga mga tsuper sang awto ang nagapaburhot sa pagpadalagan. Ang iban nagaikog​—⁠nagasunod sing maiping gid⁠—​sa mga awto nga nagadalagan sing madasig. Ang iban nagasulusaylo sing linya sa dalan bangod indi nila luyag maulihi. Sa balay, ang mga katapo sang pamilya nagasilabo sa kaakig kag nagasingki. Bisan ang iban nga mga Cristiano mahimo nga maugot sing tuman bangod sang mga kakulangan ukon mga kasaypanan sang ila espirituwal nga mga kauturan.

Ngaa ang pagpailob tuman ka talagsahon? Amo bala ini halin pa sang una? Ngaa mabudlay gid ang mangin mapailubon sa aton tion?

Mga Halimbawa sang Indi Pagpailob

Ang Biblia nagasugid tuhoy sa isa ka babayi nga wala maghulat sa pagkonsulta sang iya bana antes maghimo sing importante nga desisyon. Ang iya ngalan amo si Eva. Wala maghulat kay Adan, ayhan bangod sang indi pagpailob, ginkaon niya ang ginadumilian nga bunga. (Genesis 3:​1-6) Kamusta ang iya bana? Nagpakita man sia sing indi pagpailob paagi sa pagsunod kay Eva sa sala nga wala anay mangayo sing bulig ukon panuytoy sa iya langitnon nga Amay, si Jehova. Ang ila kakagod, ayhan ginaupdan sing indi pagpailob nga nagdul-ong sa sala, nagdala sing makamamatay nga mga resulta para sa aton tanan. Halin sa ila nabaton man naton subong palanublion ang huyog nga magpakasala, lakip ang pagkamatinaastaason kag pagkadimapailubon.​—⁠Roma 5:⁠12.

Mga 2,500 ka tuig sa tapos magpakasala ang aton nahaunang mga ginikanan, ang pinili nga katawhan sang Dios, ang mga Israelinhon, nagpakita sing daku kag dalayon nga kakulang sing pagtuo, subong man sing kakulang sing pagpailob. Bisan nga bag-o lang sila ginluwas sing milagruso ni Jehova gikan sa kahiulipnan sa Egipto, madali nila nga ‘nalipatan ang iya mga binuhatan’ kag “wala sila maghulat sang iya laygay.” (Salmo 106:7-14) Sa liwat kag liwat naghimo sila sing mabug-at nga sala bangod indi sila mapailubon. Naghimo sila sing baka nga bulawan kag ginsimba ini; nagkumod sila nahanungod sa materyal nga aman ni Jehova nga manna para sa ila; kag madamo sa ila ang nagrebelde pa gani batok sa gintangdo ni Jehova nga tiglawas, nga si Moises. Sa pagkamatuod, ang ila kakulang sing pailob nagdul-ong sa ila kasubo kag kalalat-an.

Nawasi sang nahaunang tawhanon nga hari sang Israel, nga si Saul, ang kahigayunan agod ang iya mga anak nga lalaki mangin harianon nga mga tal-us. Ngaa? Bangod wala sia maghulat kay manalagna Samuel, nga amo dapat ang maghalad kay Jehova. Ang kahadlok sa tawo amo ang nagtiklod kay Saul nga unahan si Samuel sa paghalad. Handurawa kon ano ang mahimo nga ginbatyag niya sang nag-abot si Samuel sa tapos mismo nga natapos ni Saul ang seremoniya! Kon naghulat lamang sia sing pila pa ka minuto!​—⁠1 Samuel 13:​6-14.

Kon naghulat lamang si Eva kay Adan sa baylo nga padasudaso nga nagkuha sang bunga! Kon nadumduman lamang sang mga Israelinhon nga maghulat sang laygay ni Jehova! Huo, ang pagpailob nakabulig kuntani agod maluwas sila kag kita gikan sa daku nga kasubo kag kasakit.

Mga Kabangdanan sang Indi Pagpailob

Ang Biblia nagabulig sa aton nga mahangpan ang pangunang kabangdanan sang indi pagpailob karon. Ginalaragway sang 2 Timoteo kapitulo 3 ang aton kaliwatan subong nagakabuhi sa “makahalanguyos nga mga tion nga mabudlay atubangon.” Ini nagasiling nga ang mga tawo “magamahigugmaon sang kaugalingon, mahigugmaon sang kuwarta, bugalon, palabilabihon . . . walay pagpugong sang kaugalingon, mabangis, wala sing gugma sa kaayuhan.” (Bersikulo 2, 3) Inang mahamkunon kag maiyaiyahon nga panimuot nagaluntad sa tagipusuon kag hunahuna sang madamo nga mga tawo, nga nagapabudlay para sa tanan, bisan sa matuod nga mga Cristiano, sa pagpakita sing pailob. Kon makita naton ang kalibutanon nga mga tawo nga nagamaneho sing tuman kadasig ukon nagapanagil-ot ukon nagainsulto sa aton, ang aton pagkamapailubon ginatilawan gid. Mahimo kita masulay nga ilugon sila ukon balusan sila, sa amo nagapaubos sang aton kaugalingon sa ila nibel sang mahamkunon nga bugal.

Kon kaisa ang aton mismo sayop nga mga desisyon amo ang kabangdanan nga madulaan kita sing pagpailob. Talupangda kon paano ginalarawan ni Hari Solomon ang padasudaso, sayop nga pangatarungan kag dimapailubon, akig nga hulag: “Maayo pa ang mapailubon sangsa bugalon sa espiritu. Dili ka magmadagmit sa imo espiritu sa pagpangakig, kay ang kaakig nagapuyo sa dughan sang mga buangbuang.” (Manugwali 7:​8, 9) Kon maghinguyang kita sing tion sa pagtigayon sing bug-os, husto nga larawan sang isa ka sitwasyon antes maghimo sing bisan ano nga buhat, mahimo kita nga mangin mas mahinangpanon, mas mahinuklugon, mas mapailubon sa iban. Sa pihak nga bahin, ang bugalon kag maiyaiyahon nga espiritu mahimo bangdan nga ­mangin makitid kita sing hunahuna, dimapailubon, kag maakigon, kaangay sang makinumuron, tingkuyan nga mga Israelinhon nga nagpaugtas kay Moises.​—⁠Numeros 20:​2-5, 10.

Ang isa pa ka kabangdanan sang nagadugang nga kakulang sing pagpailob sining kalibutan amo ang walay paglaum nga kahimtangan sini, nga resulta sang pagkanahamulag kay Jehova. Ginpabutyag ni David ang kinahanglanon sang tawo nga maglaum kay Jehova: “O kalag ko, hulat ka sing hipos sa Dios lamang, kay ang pagpaabot ko nagagikan sa iya.” (Salmo 62:⁠5) Madamong mga tawo nga wala makakilala kay Jehova ang may limitado kag masubo nga panimuot, gani ginatinguhaan nila nga himuslan ang tanan nga kalipayan kag kaayuhan nga masarangan nila antes sila mapatay. Kaangay sang ila espirituwal nga amay, nga si Satanas nga Yawa, masunson sila nga indi interesado kon paano nagakasaklaw ang iban sa ila mga buhat.​—⁠Juan 8:44; 1 Juan 5:⁠19.

Indi katingalahan nga ang pagpailob tuman ka talagsahon karon. Ining malauton, makagod nga sistema sang mga butang, ang dios sini nga si Satanas, kag ang makasasala nga mga huyog sang aton makasasala nga unod nagapabudlay sa tanan, bisan sa mga hanuot, nga mangin mapailubon. Apang, ang Biblia nagalaygay sa aton nga “magpailob,” ilabi na nahanungod sa katumanan sang mga katuyuan sang Dios. (Santiago 5:⁠8) Ngaa ang pagpailob tuman ka hamili? Anong mga padya ang ginadala sini sa aton?

Pagpailob​—⁠Kon Ngaa Tuman ka Hamili

“Ginaalagaran man nila yadtong nagapailob kag nagahulat.” Inang mga pinamulong ginbungat sang Ingles nga mamalaybay nga si John Milton kapin sa tatlo ka gatos ka tuig ang nakaligad sa iya son­net nga “Sa Iya Pagkabulag.” Sa nahaunang bahin sang binalaybay, ginpabutyag niya ang iya kapaslawan kag pagkabalaka nahanungod sa iya balatyagon nga indi makaalagad sing bug-os sa Dios bangod nabulag sia sang magkuwarentahon sia. Apang subong sang makita gikan sa katapusan nga linya sang binalaybay nga ginbalikwat sa ibabaw, narealisar niya nga sarang masimba sang isa ang Dios paagi sa mapailubon nga pagbatas sang mga kapipit-an kag matawhay nga pagpangita sing mga kahigayunan sa pag-alagad. Nakita ni Milton ang balor sang mapailubon nga pagsalig sa Dios.

Ang kalabanan sa aton mahimo nga may maayo sing panan-aw, apang kita tanan may mga limitasyon nga sarang bangdan agod maakig ukon mabalaka kita. Paano naton matigayon kag mapakita ang pagpailob?

Makapalig-on nga mga Halimbawa

Ang Biblia nagahatag sa aton sing pila ka maayo nga mga halimbawa sang pagpailob. Ang pagpailob ni Jehova nagapaposible nga matigayon sang dimaisip nga minilyon ka tawo ang kabuhi nga walay katapusan. (2 Pedro 3:​9, 15) Sa iya malulo nga imbitasyon nga itakod naton ang iya gota kag “makakita sing kapahuwayan sa [aton] mga kalag,” himpit nga ginapabanaag ni Jesus ang makatilingala nga pagpailob sang iya Amay. (Mateo 11:​28-30) Ang pagpamalandong sa mga halimbawa ni Jehova kag ni Jesus magabulig sa aton nga magmangin mapailubon.

Ang isa nga daw may nagakaigo nga rason nga maakig ukon magtimalos amo ang anak ni Jacob nga si Jose. Dimakatarunganon gid sia nga gintratar sang iya mga utod, nagbuko sang iya kamatayon kag sang ulihi nagbaligya sa iya sa pagkaulipon. Sa Egipto, walay sapayan sang iya maukod kag matutom nga pag-alagad kay Potifar, si Jose ginsumbong kag ginbilanggo sing dimakatarunganon. Mapailubon niya nga ginbatas ang tanan niya nga mga kapipit-an, ayhan naghangop nga yadtong mga pagtilaw magabulig sa pagtuman sang mga katuyuan ni Jehova. (Genesis 45:⁠5) Bangod napalambo niya ang pagtuo kag paglaum kay Jehova upod ang pagpaubos kag paghangop, si Jose nagpailob bisan sa idalom sang labing mabudlay nga mga sirkunstansia.

Ang isa pa ka importante nga bulig amo ang balaan nga espiritu ni Jehova. Kon, halimbawa, madali kita maakig kag mamulayon, mahimo naton mapangamuyo ang balaan nga espiritu agod mapalambo naton ang bunga sini. Ang pagpamalandong sa tagsa sining mga bunga, subong sang pagkamabinatason kag pagpugong sa kaugalingon, magabulig sa aton nga makita kon ano gid ang kaangtanan sini sa pagpailob.​—⁠Galacia 5:​22, 23.

Ang mga Padya sang Pagpailob

Ang pagkamapailubon nagadala sa aton sing madamong mga benepisyo. Nagapabakod ini sang aton pagkatawo kag nagaamlig sa aton gikan sa paghimo sing padasudaso, binuang nga mga buhat. Sin-o sa aton ang wala makahimo sing makapasakit nga mga kasaypanan bangod sang aton maabtik nga reaksion sa mabudlay ukon mahuol nga mga kahimtangan? Ayhan nakasiling kita sing dimalulo nga tinaga ukon nagginawi sing binastos. Ayhan gintugutan naton ang isa ka diutay nga hitabo nga mangin daku nga binangig nga sa amo ang duha ka bahin lunsay indi handa magpaumod sa isa ka pinalangga. Pagkatapos sang daku nga kaakig, kabang-awan, kag kasakit, ayhan mahinulsulon kita nga naghunahuna, ‘Kon nagpailob lamang ako sing labi.’ Ang pagpakita sing pailob magaamlig sa aton gikan sa tanan nga sahi sang kasubo. Ina lamang nga katunayan nagahatag sa aton kabuhi sing labi pa nga kalinong, kalig-unan, kag kaayawan.​—⁠Filipos 4:​5-7.

Ang pagpailob nagabulig man sa aton nga matigayon ang malinong, masinaligon nga tagipusuon. Nagadul-ong ini sa pag-agom naton sing maayo pa nga pisikal, emosyonal, kag espirituwal nga kapagros. (Hulubaton 14:30) Ang dimapunggan, nagasilabo nga kaakig makatuga sing daku nga emosyonal kag pisikal nga balatian kag kamatayon. Sa pihak nga bahin, paagi sa pagpailob matigayon naton ang mas positibo nga panimuot sa iban, ilabi na sa aton espirituwal nga mga kauturan kag mga katapo sang pamilya. Nian labi kita nga mahuyog nga mangin mapatugsilingon kag mabinuligon sa baylo nga mangin maakigon kag mamulayon. Busa, ang iban labi nga mahapusan kag labi nga mahalipay makig-upod sa aton.

Ang mga gulang sa Cristianong kongregasyon dapat ilabi na nga magpakita sing pagpailob. Kon kaisa, ang mga masigka-Cristiano nagapalapit sa ila nga may malubha nga mga problema. Ining mga sinsero mahimo nga naligban, natublag, ukon napung-awan, samtang ang mga gulang naman mahimo nga nakapoy ukon naligban sang ila personal ukon pamilya nga mga problema. Apang, daw ano ka importante nga ipakita sang mga gulang ang pagpailob sa sinang mabudlay nga mga sirkunstansia! Sa sining paagi sarang sila makatudlo nga “may kalulo” kag ‘mapakig-angutan ang panong sing mapinalanggaon.’ (2 Timoteo 2:​24, 25; Binuhatan 20:​28, 29) Ang hamili nga mga kabuhi nabutang sa katalagman. Ang malulo, mahigugmaon, kag mapailubon nga mga gulang pagpakamaayo gid sa kongregasyon!

Dapat pakig-angutan sang mga ulo sang pamilya ang ila mga panimalay nga may pagpailob, paghangop, kag pagkalulo. Dapat man nila paabuton kag palig-unon ang tanan nga mga katapo sang pamilya sa pagpakita sini man nga mga kinaiya. (Mateo 7:12) Magaamot ini sing daku sa gugma kag paghidait sang puluy-an.

Ang pagpakita sing pailob samtang nagaalagad sa latagon magabulig sa Cristianong mga ministro sa pagkalipay sing labi pa sa sining pag-alagad. Magabulig ini sa ila nga mabatas sing labi pa ang bisan anong dipagsapak kag pagpamatok nga masumalang. Sa baylo nga makigbais sa akig nga mga tagbalay, ang mapailubon nga mga ministro sarang makahatag sing malulo nga sabat ukon mahipos nga magalakat, sa amo nagahupot sang paghidait kag kalipay. (Mateo 10:​12, 13) Dugang pa, kon pakig-angutan sang mga Cristiano ang tanan sing mapailubon kag malulo, ang mga katulad-karnero mabuyok sa mensahe sang Ginharian. Ginpakamaayo ni Jehova ang mapailubon nga mga panikasog sa bug-os kalibutan nga kasangkaron, samtang ginatos ka libo ka mahagop nga mga nagapangita sing kamatuoran ang nagapanong sa mahigugmaon nga kongregasyon ni Jehova kada tuig.

Sa pagkamatuod, ang pagpakita sing pailob nagadala sa aton sing maayong mga padya. Malikawan naton ang madamong aksidente kag problema bangod sang dipagpugong sa aton mga buhat ukon bangod sang pagkaabtik sa aton dila. Kita mangin mas malipayon, mas matawhay, kag mahimo nga mas mapagros. Maagom naton ang daku pa nga kalipay kag paghidait sa aton ministeryo, sa kongregasyon, kag sa puluy-an. Apang labaw sa tanan, maagom naton ang mas suod nga kaangtanan sa Dios. Gani maghulat kay Jehova. Magpakita sing pailob!

[Footnote]

[Mga retrato sa pahina 10]

Daw ano bala ikaw ka mapailubon sa adlaw-adlaw nga pagkabuhi?