Ano ang Mangin Panindugan Mo sa Atubangan sang Lingkoran sang Paghukom?

“Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono.”​—⁠MATEO 25:⁠31.

1-3. Ano ang aton rason sa pagpaabot sing maayo nahanungod sa katarungan?

‘NAKASALA UKON INOSENTE?’ Madamo ang nagapangusisa ukon nagaduhaduha samtang nagapamati sila sa mga report tuhoy sa pila ka kaso sa hukmanan. Ang mga hukom kag mga katapo sang hurado mahimo magatinguha nga mangin bunayag, apang masunson bala nga nagapangibabaw ang katarungan? Wala ka bala makabati sing inhustisya kag pagkadialalangay sa mga proseso sang hustisya? Ina nga inhustisya indi bag-o, subong sang makita naton sa ilustrasyon ni Jesus nga masapwan sa Lucas 18:​1-8.

² Bisan ano man ang imo inagihan sa tawhanon nga hustisya, talupangda ang konklusion ni Jesus: “Indi bala ang Dios mag-apin sa iya mga pinili nga nagatuaw sa iya sa adlaw kag gab-i . . . ? Nagasiling ako sa inyo, magaapin Sia sa ila sing madali. Walay sapayan, kon magkari ang Anak sang tawo, makakita bala sia sing pagtuo sa duta?”

³ Huo, pat-uron ni Jehova nga ang iya mga alagad magabaton sa ulihi sing katarungan. Nadalahig man si Jesus, ilabi na karon bangod nagakabuhi kita sa “katapusan nga mga adlaw” sang karon malauton nga sistema. Sa indi na lang madugay pagagamiton ni Jehova ang iya gamhanan nga Anak sa paghapay sing bug-os sang kalautan sa duta. (2 Timoteo 3:1; 2 Tesalonica 1:​7, 8; Bugna 19:​11-16) Mahangpan naton ang papel ni Jesus gikan sa isa sang katapusan nga mga ilustrasyon nga ginhatag niya, masunson ginatawag nga parabola sang mga karnero kag mga kanding.

4. Paano naton anay ginhangop ang tion sang katumanan sang parabola sang mga karnero kag mga kanding, apang ngaa hatagan naton sing igtalupangod ang parabola sa karon? (Hulubaton 4:⁠18)

⁴ Madugay na naton nahangpan nga ginalaragway sang parabola si Jesus nga nagalingkod subong Hari sang 1914 kag sugod sadto nagahimo sing mga paghukom​—⁠kabuhi nga walay katapusan sa mga tawo nga napamatud-an nga kaangay sang mga karnero, permanente nga kamatayon para sa mga kanding. Apang ang liwat nga pagbinagbinag sa parabola nagapakita sing isa ka tuhay nga paghangop sa tion sang katumanan sini kag sa kon ano ang ginailustrar sini. Ining pagputli nagapabakod sang pagkaimportante sang aton pagbantala nga hilikuton kag sang kahulugan sang pagbaton sang mga tawo. Agod mahangpan ang basihan sining mas madalom nga paghangop sa parabola, binagbinagon naton kon ano ang ginapakita sang Dios tuhoy kay Jehova kag kay Jesus, lunsay subong mga Hari kag subong mga Hukom.

Si Jehova Subong ang Supremo nga Hukom

5, 6. Ngaa nagakaigo tamdon si Jehova subong Hari kag Hukom?

⁵ Si Jehova nagagahom sa uniberso nga may kagamhanan sa ibabaw sang tanan nga tinuga. Bangod wala sia sing ginsuguran kag katapusan, sia ang “Hari nga dayon.” (1 Timoteo 1:17; Salmo 90:​2, 4; Bugna 15:⁠3) May awtoridad sia sa paghimo sing mga pagsulundan, ukon mga kasuguan, kag sa pagpatuman sini. Apang ang iya awtoridad nagalakip subong nga isa ka Hukom. Ang Isaias 33:22 nagasiling: “Si Jehova aton Hukom, si Jehova aton Manughatag-sing-kasuguan, si Jehova aton Hari; sia magaluwas sa aton.”

⁶ Madugay na nga ginakilala sang mga alagad sang Dios si Jehova subong Hukom sang mga kasaba kag mga isyu. Halimbawa, sa tapos matulutimbang sang “Hukom sang bug-os nga duta” ang ebidensia nahanungod sa kalautan sang Sodoma kag Gomorra, naghukom sia nga ang mga pumuluyo nagakabagay laglagon kag ginpatuman yadtong matarong nga paghukom. (Genesis 18:​20-33; Job 34:​10-12) Dapat gid ina magpasalig sa aton nga si Jehova isa ka matarong nga Hukom nga makapatuman pirme sang iya mga paghukom!

7. Paano si Jehova nagapanghikot subong Hukom sa pagpakig-angot sa Israel?

⁷ Sa dumaan nga Israel, si Jehova nagahatag kon kaisa sing direkta nga paghukom. Indi bala mahalipay ka sadto anay sa paghibalo nga isa ka himpit nga Hukom ang nagapamat-od sa mga butang? (Levitico 24:​10-16; Numeros 15:​32-36; 27:​1-11) Ang Dios naghatag man sing “hudisyal nga mga desisyon” nga kon tingubon maayo mangin talaksan para sa paghukom. (Levitico 25:​18, 19; Nehemias 9:13; Salmo 19:​9, 10; 119:​7, 75, 164; 147:​19, 20) Sia ang “Hukom sang bug-os nga duta,” gani kita tanan naapektuhan.​—⁠Hebreo 12:⁠23.

8. Anong may kaangtanan nga palanan-awon ang nakita ni Daniel?

⁸ May testimoniya kita sang “nakasaksi” may kaangtanan sini nga butang. Si manalagna Daniel ginhatagan sing palanan-awon tuhoy sa mapintas nga mga sapat nga nagarepresentar sa mga gobierno kag mga emperyo. (Daniel 7:​1-8, 17) Sia nagdugang: “Ginpahamtang ang mga trono kag ang Dumaan sang mga Adlaw naglingkod. Ang iya panapton maputi subong sang niebe.” (Daniel 7:⁠9) Talupangda nga nakita ni Daniel ang mga trono “kag ang Dumaan sang mga Adlaw [si Jehova] naglingkod.” Pamangkuta ang imo kaugalingon, ‘Ginsaksihan bala diri ni Daniel ang Paghari ni Jehova?’

9. Ano ang isa ka kahulugan sang ‘paglingkod’ sa trono? Maghatag sing mga halimbawa.

⁹ Ti, kon mabasa naton nga ang isa “naglingkod” sa trono, mahimo kita magahunahuna sang iya paghari, kay ang Biblia nagagamit kon kaisa sina nga pamulong. Halimbawa: “Sang nagsugod [si Zimri] sa paghari, sa gilayon nga nakalingkod sia sa iya trono, sia . . . ” (1 Hari 16:11; 2 Hari 10:30; 15:12; Jeremias 33:17) Ang Mesianikong tagna nagsiling: “Sia magalingkod kag magadumala sa iya trono.” Hanti, ang ‘paglingkod sa trono’ mahimo magkahulugan sang paghari. (Zacarias 6:​12, 13) Si Jehova ginalaragway subong ang Hari nga nagalingkod sa trono. (1 Hari 22:19; Isaias 6:1; Bugna 4:​1-3) Sia “Hari nga Dayon.” Apang, samtang ginpadaku niya ang bag-ong bahin sang pagkasoberano, masiling nga nangin Hari sia, subong nga daw nagalingkod liwat sa iya trono.​—⁠1 Cronica 16:​1, 31; Isaias 52:7; Bugna 11:​15-17; 15:3; 19:​1, 2, 6.

10. Ano ang pangunang hilikuton sang Israelinhon nga mga hari? Ilaragway.

¹⁰ Apang yari ang importante nga punto: Ang pangunang hilikuton sang dumaan nga mga hari amo ang pagpamati sa mga kasaba kag paghatag sing mga paghukom. (Hulubaton 29:14) Dumduma ang maalamon nga paghukom ni Solomon sa pag-angkon sang duha ka babayi sa isa ka lapsag. (1 Hari 3:​16-28; 2 Cronica 9:⁠8) Ang isa sang iya mga tinukod sang gobierno amo ang “Portico sang Trono diin sia magahukom,” nga gintawag man “ang portico sang paghukom.” (1 Hari 7:⁠7) Ang Jerusalem ginlaragway subong ang duog diin “napahamtang ang mga trono sa paghukom.” (Salmo 122:⁠5) Sing maathag, ‘ang paglingkod sa trono’ mahimo man magkahulugan sang paggamit sing hudisyal nga awtoridad.​—⁠Exodo 18:13; Hulubaton 20:⁠8.

11, 12. (a) Ano ang kahulugan sang paglingkod ni Jehova, nga ginsambit sa Daniel kapitulo 7? (b) Paano ginapamatud-an sang iban pa nga mga teksto nga si Jehova nagalingkod sa paghukom?

¹¹ Balikan naton karon ang danyag diin nakita ni Daniel ang ‘Dumaan sang mga Adlaw nga nagalingkod.’ Ang Daniel 7:10 nagadugang: “Ang Hukmanan ginpahamtang, kag may mga tulun-an nga ginhumlad.” Huo, ang Dumaan sang mga Adlaw naglingkod sa paghatag sing paghukom tuhoy sa paggahom sa kalibutan kag sa paghukom sa Anak sang tawo subong takus maggahom. (Daniel 7:​13, 14) Nian aton mabasa nga “nag-abot ang Dumaan sang mga Adlaw kag ginhatag ang paghukom sa mga balaan,” yadtong ginhukman nga nagakabagay sa paggahom upod sa Anak sang tawo. (Daniel 7:22) Sa katapusan “ang Hukmanan mismo nagpadayon sa paglingkod” kag sa paghatag sing dimaayo nga paghukom sa katapusan nga kagamhanan sa kalibutan.​—⁠Daniel 7:⁠26.a

¹² Gani, ang pagkakita ni Daniel sa Dios nga ‘nagalingkod sa trono’ nagkahulugan sang pagkari Niya sa paghatag sing paghukom. Sing mas maaga si David nag-amba: “Ginpatuman mo [Jehova] ang akon paghukom kag ang akon kausa; nagalingkod ka sa trono nga nagahukom sing matarong.” (Salmo 9:​4, 7) Kag si Joel nagsulat: “Maghulag ang mga pungsod sang ila kaugalingon kag magtaklad sa nalupyakan ni Josafat; kay didto magalingkod ako [si Jehova] sa paghukom sang tanan nga mga pungsod.” (Joel 3:12; ipaanggid ang Isaias 16:⁠5.) Si Jesus kag si Pablo lunsay yara sa hudisyal nga mga kahimtangan nga sa sini ang isa ka tawo naglingkod sa pagpamati sa kasaba kag sa paghatag sing paghukom.b​—⁠Juan 19:​12-16; Binuhatan 23:3; 25:⁠6.

Ang Posisyon ni Jesus

13, 14. (a) Ano ang pasalig sa katawhan sang Dios nga si Jesus mangin Hari? (b) San-o si Jesus naglingkod sa iya trono, kag sa anong kahulugan naggahom sia kutob sang 33 C.E.?

¹³ Si Jehova Hari kag Hukom. Kamusta si Jesus? Ang anghel nga nagpahibalo sang iya pagkatawo nagsiling: “Si Jehova nga Dios magahatag sa iya sang trono sang iya amay nga si David, . . . kag ang iya ginharian walay katapusan.” (Lucas 1:​32, 33) Si Jesus mangin permanente nga manunubli sang pagkahari ni David. (2 Samuel 7:​12-16) Magagahom sia halin sa langit, kay si David nagsiling: “Ang pinamulong ni Jehova sa akon Ginuo [si Jesus] amo: ‘Lingkod ka sa akon tuo nga kamot tubtob nga mahimo ko ang imo mga kaaway nga palatungan sang imo mga tiil.’ Si Jehova magapadala kutob sa Sion sang setro sang imo kusog, nga nagasiling: ‘Gahom ka sa tunga sang imo mga kaaway.’ ”​—⁠Salmo 110:​1-4.

¹⁴ San-o ina mahanabo? Si Jesus wala maggahom subong Hari samtang isa ka tawo. (Juan 18:​33-37) Sang 33 C.E., sia napatay, ginbanhaw, kag nagkayab sa langit. Ang Hebreo 10:12 nagasiling: “Ining tawo nagdulot sing isa ka halad para sa mga sala sing walay katapusan kag naglingkod sa tuo nga kamot sang Dios.” Ano ang awtoridad ni Jesus: “Ginpalingkod sia [sang Dios] sa iya tuo nga kamot sa langitnon nga mga duog, nga labaw pa gid sa tanan nga panguluhan kag awtoridad kag gahom kag pagkaginuo . . . kag ginhimo sia nga ulo sa tanan nga butang sa kongregasyon.” (Efeso 1:​20-22) Bangod si Jesus sadto may harianon nga awtoridad sa mga Cristiano, si Pablo makasulat nga si Jehova “nagluwas sa aton gikan sa awtoridad sang kadudulman kag nagliton sa aton sa ginharian sang Anak sang iya gugma.”​—⁠Colosas 1:13; 3:⁠1.

15, 16. (a) Ngaa masiling naton nga si Jesus wala mangin Hari sang Ginharian sang Dios sang 33 C.E.? (b) San-o nagsugod sa paggahom si Jesus sa Ginharian sang Dios?

¹⁵ Apang, sadto nga tion, si Jesus wala magpanghikot subong Hari kag Hukom sa mga pungsod. Naglingkod sia sunod sa Dios, naghulat sang tion sa pagpanghikot subong Hari sang Ginharian sang Dios. Si Pablo nagsulat sa iya: “May kaangtanan sa kon sin-o sang mga anghel sa bisan kon san-o nagsiling sia: ‘Lingkod ka sa akon tuo nga kamot, tubtob nga mahimo ko ang imo mga kaaway nga palatungan sang imo mga tiil?’ ”​—⁠Hebreo 1:⁠13.

¹⁶ Ang mga Saksi ni Jehova nagbalhag sing madamong ebidensia nga ang panag-on sang paghulat ni Jesus natapos sang 1914, sang nangin manuggahom sia sang Ginharian sang Dios sa dikitaon nga mga langit. Ang Bugna 11:​15, 18 nagasiling: “Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari sa walay katubtuban.” “Apang naakig ang kapungsuran, kag nag-abot ang imo kasingkal.” Huo, ginpabutyag sang mga pungsod ang kasingkal sa isa kag isa sadtong Inaway Kalibutanon I. (Lucas 21:24) Ang mga inaway, linog, kamatay, kakulang sing pagkaon, kag kaanggid nga mga butang, nga nakita naton kutob sang 1914 nagapamatuod nga si Jesus nagagahom na karon sa Ginharian sang Dios, kag ang katapusan sang kalibutan malapit na.​—⁠Mateo 24:​3-14.

17. Anong pangunang mga punto ang napatok na naton?

¹⁷ Ang masunod amo ang malip-ot nga repaso: Ang Dios masiling nga nagalingkod sa trono subong Hari, apang sa isa pa ka kahulugan mahimo sia maglingkod sa iya trono sa paghukom. Sang 33 C.E., si Jesus naglingkod sa tuo nga kamot sang Dios, kag sia karon Hari sang Ginharian. Apang si Jesus bala, nga nagagahom karon subong Hari, nagaalagad man subong Hukom? Kag ngaa dapat kita mabalaka sa sini, ilabi na sa sining tion?

18. Ano ang ebidensia nga si Jesus mangin Hukom man?

¹⁸ Si Jehova, nga may kinamatarong sa pagtangdo sing mga hukom, nagpili kay Jesus subong Hukom nga nagasunod sang Iya mga talaksan. Ginpakita ini ni Jesus sang nagpamulong sia nahanungod sa mga tawo nga mangin buhi sa espirituwal: “Ang Amay wala nagahukom kay bisan sin-o nga tawo, kundi natugyan niya sa Anak ang bug-os nga paghukom.” (Juan 5:22) Apang, ang hudisyal nga katungdanan ni Jesus nagalabaw sa sina nga sahi sang paghukom, kay hukom sia sang mga buhi kag mga patay. (Binuhatan 10:42; 2 Timoteo 4:⁠1) Si Pablo nagsiling anay: “Nagtangdo [ang Dios] sing isa ka adlaw kon san-o ginatuyo niya nga hukman ang napuy-an nga duta sa pagkamatarong paagi sa isa ka tawo [si Jesus] nga iya gintangduan, kag naghatag sia sing garantiya sa tanan nga tawo paagi sa pagbanhaw niya sa iya.”​—⁠Binuhatan 17:31; Salmo 72:​2-7.

19. Ngaa husto ang magsiling tuhoy kay Jesus subong nagalingkod subong Hukom?

¹⁹ Busa matarong bala nga ihinakop naton nga si Jesus nagalingkod sa mahimayaon nga trono sa espesipiko nga katungdanan sang Hukom? Huo. Si Jesus nagsiling sa mga apostoles: “Sa liwat nga pagpanuga, kon ang Anak sang tawo maglingkod sa iya trono nga mahimayaon, kamo nga nagasunod sa akon magalingkod man sa napulog duha ka trono, nga nagahukom sa napulog duha ka kabikahan sang Israel.” (Mateo 19:28) Bisan pa nga si Jesus Hari karon sang Ginharian, ang iya dugang pa nga hilikuton nga ginsambit sa Mateo 19:28 magalakip sang paglingkod sa trono sa paghukom sa tion sang Milenio. Sa sina nga tion hukman niya ang tanan nga katawhan, ang matarong kag dimatarong. (Binuhatan 24:15) Mabuligon nga huptan ini sa hunahuna samtang ginaliso naton ang aton igtalupangod sa isa sang mga parabola ni Jehova nga nagahilabot sa aton tion kag sa aton kabuhi.

Ano ang Ginasiling sang Parabola?

20, 21. Ano ang ginpamangkot sang mga apostoles ni Jesus nga nagahilabot sa aton tion, nagadul-ong sa anong pamangkot?

²⁰ Wala madugay antes napatay si Jesus, ang iya mga apostoles namangkot sa iya: “San-o bala mahanabo ini, kag ano bala ang tanda sang imo presensia kag sang katapusan sang sistema sang mga butang?” (Mateo 24:⁠3) Si Jesus nagtagna sing talalupangdon nga mga hitabo sa duta sa wala pa ‘mag-abot ang katapusan.’ Wala madugay antes sina nga katapusan “makita [sang mga pungsod] nga nagakari ang Anak sang tawo sa ibabaw sang mga panganod sang langit nga may gahom kag daku nga himaya.”​—⁠Mateo 24:​14, 29, 30.

²¹ Apang, kamusta ang mga tawo sa amo nga mga pungsod kon ang Anak sang tawo magakari sa iya himaya? Hibaluon naton ini gikan sa parabola sang mga karnero kag mga kanding, nga nagasugod sa mga pulong: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod.”​—⁠Mateo 25:​31, 32.

22, 23. Anong mga punto ang nagapakita nga ang parabola sang mga karnero kag mga kanding wala magsugod nga matuman sang 1914?

²² Naaplikar bala ini nga parabola sang si Jesus naglingkod nga may kagamhanan sang paghari sang 1914, subong sang madugay na naton nga nahangpan? Ti, ang Mateo 25:34 nagasiling sa iya subong Hari, gani ang parabola makatarunganon nga maaplikar sugod sang si Jesus nangin Hari sang 1914. Apang anong paghukom ang ginhimo niya pagkatapos sadto? Indi ini paghukom sa “tanan nga pungsod.” Sa baylo, ginliso niya ang iya igtalupangod sa mga nagapangangkon nga nagahuman sa “panimalay sang Dios.” (1 Pedro 4:17) Nahisuno sa Malaquias 3:​1-3, si Jesus, subong mensahero ni Jehova, nag-usisa sing hudisyal sang hinaplas nga mga Cristiano nga nabilin sa duta. Tion man sadto para sa hudisyal nga pagpamatbat sa Cristiandad, nga nagpangangkon sing butigon subong “ang panimalay sang Dios.”c (Bugna 17:​1, 2; 18:​4-8) Apang wala ginapakita nga sadto nga tion, ukon kutob sadto nga tion, si Jesus naglingkod sang ulihi sa paghukom sa katawhan sang tanan nga pungsod subong mga karnero ukon mga kanding.

²³ Kon usisaon naton ang hilikuton ni Jesus sa parabola, makita naton sia nga nagahukom sa ulihi sa tanan nga pungsod. Wala ginapakita sang parabola nga ina nga paghukom magapadayon tubtob sa ginpalawig nga panag-on sang madamong tinuig, subong nga daw ang tagsa ka tawo nga nagakapatay sa sining nagligad nga mga dekada ginhukman nga takus sang kamatayon nga walay katapusan ukon kabuhi nga walay katapusan. Mahimo nga ang kalabanan nga napatay sining ulihi nga mga dekada nagkadto sa kinaandan nga lulubngan sang katawhan. (Bugna 6:8; 20:13) Apang, ginalaragway sang parabola ang tion nga ginahukman ni Jesus ang katawhan sang “tanan nga pungsod” nga nagakabuhi sadto kag nagaatubang sing kalaglagan sa iya hudisyal nga pamatbat.

24. San-o matuman ang parabola sang mga karnero kag mga kanding?

²⁴ Sa iban nga hambal, ang parabola nagatudlo sa palaabuton kon magakari ang Anak sang tawo sa iya himaya. Magalingkod sia sa paghukom sa katawhan nga nagakabuhi sina nga tion. Ang iya paghukom igapasad sa kon ano ang ginpadayag nila nga amo sila. Sa sina nga tion “ang kinatuhayan sa tunga sang isa nga matarong kag isa nga malauton” nakita na sing maathag. (Malaquias 3:​18) Ang aktuwal nga pagpamatbat kag pagpatuman sang paghukom pagahimuon sa limitado nga tion. Si Jesus magahatag sing makatarunganon nga mga desisyon pasad sa kon ano ang makita sa mga indibiduwal.​—⁠Tan-awa man ang 2 Corinto 5:⁠10.

25. Ano ang ginalaragway sang Mateo 25:31 sa pagpatuhoy sa Anak sang tawo nga nagalingkod sa mahimayaon nga trono?

²⁵ Nagakahulugan ini, nian, nga ang ‘paglingkod ni Jesus sa iya mahimayaon nga trono’ sang paghukom, nga ginsambit sa Mateo 25:​31, naaplikar sa palaabuton nga tion kon ining gamhanan nga Hari magalingkod sa pagpamatbat kag sa pagpatuman sang paghukom sa mga pungsod. Huo, ang danyag sang paghukom nga nagadalahig kay Jesus sa Mateo 25:​31-33, 46 mapaanggid sa danyag sa Daniel kapitulo 7, diin ang nagagahom nga Hari, ang Dumaan sang mga Adlaw, nagalingkod sa pagtuman sang iya katungdanan subong Hukom.

26. Anong bag-ong paathag sa parabola ang nangin maathag?

²⁶ Ang paghangop sa parabola sang mga karnero kag mga kanding sa sining paagi nagapakita nga ang paghatag sing paghukom sa mga karnero kag mga kanding palaabuton pa. Mahanabo ini pagkatapos ang “kapipit-an” nga ginsambit sa Mateo 24:​29, 30 magasugod kag ang Anak sang tawo ‘magakari sa iya himaya.’ (Ipaanggid ang Marcos 13:​24-26.) Nian, sa katapusan sang bug-os malauton nga sistema, si Jesus magadumala sing hukmanan kag magahatag sing paghukom.​—⁠Juan 5:30; 2 Tesalonica 1:​7-10.

27. Sa ano kita dapat mangin interesado sa paghibalo nahanungod sa katapusan nga parabola ni Jesus?

²⁷ Nagaathag ini sang aton paghangop tuhoy sa tion sang katumanan sang parabola ni Jesus, nga nagapakita kon san-o pagahukman ang mga karnero kag mga kanding. Apang paano ini nagaapektar sa aton nga makugi nga nagabantala sang maayong balita sang Ginharian? (Mateo 24:14) Nagahimo bala ini sa aton hilikuton nga indi tanto ka importante, ukon nagahatag bala ini sing mas mabug-at pa nga responsabilidad? Tan-awon naton sa masunod nga artikulo kon paano kita naapektuhan.

[Mga footnote]

Madumduman Mo Bala?

◻ Paano si Jehova nagapanghikot subong Hari kag Hukom?

◻ Ano ang duha ka kahulugan sang ‘paglingkod sa trono’?

◻ Ano ang ginasiling anay naton tuhoy sa tion sang katumanan sang Mateo 25:​31, apang ano ang basihan para sa tuhay nga pagtamod?

◻ San-o ang Anak sang tawo naglingkod sa trono, subong sang ginapakita sa Mateo 25:⁠31?