Nagtipon Sila Subong Malipayon nga mga Dumalayaw
ANG dumaan nga katawhan ni Jehova nga Dios ginsugo nga “magmasinadyahon sing bug-os” kon magtipon sila sa pagsimba. (Deuteronomio 16:15) Ang “Malipayon nga mga Dumalayaw” nga Distrito nga mga Kombension sang 1995/96 pat-od gid nga nakahatag sa mga Saksi ni Jehova sing maayong mga rason sa pagkalipay.
Kutob sang pagsugod sining mga serye sang kombension, naglig-on sila sa pagtuo. Ginpakita man nila kon paano masalapuan ang kalipay sa isa ka masubo nga kalibutan. Binagbinagon naton karon ang tagsa ka adlaw sang kombension.
‘Dayawa Ninyo si Jehova . . . Magkalipay!’
Ang tema sa hitaas sang nahaunang adlaw sang kombension ginpasad sa Salmo 149:1, 2. Ang diskurso nga “May Rason Kita sa Pagsinggit sa Kalipay” nag-usisa sang aplikasyon sang tagna sang Isaias kapitulo 35. Natuman ini sa dumaan nga Israel kag ilabi na gid sa aton adlaw paagi sa pagpasag-uli sa mga sumilimba ni Jehova sa kabuganaan kag kapagros sa espirituwal nga paraiso. Busa, ang mga kombensionista may rason sa pagsinggit sa kalipay tungod sang kon ano ang gintuyo sang Dios para sa iya katawhan sa isa ka espirituwal nga paraiso kag sa nagapakari nga pisikal nga Paraiso nga malapit na katama.
Ginsabat sang sadsaran nga pamulongpulong, “Nahamulag Subong Malipayon nga mga Dumalayaw sa Bug-os nga Kalibutan,” ang pamangkot: Ano ang nagahamulag sa aton sa sining kalibutan? Ini amo ang aton nahiusa nga pagsimba kay Jehova. Bisan diin man nagapuyo ang mga Saksi ni Jehova sa sining duta, nagapamulong kag nagapanudlo sila sing may paghilisugot. Nagakasadya man sila sa dakung katuyuan ni Jehova nga pakabalaanon ang iya balaan nga ngalan kag bindikahon ang iya pagkasoberano paagi sa iya Ginharian. Apang, paano kita ginabuligan ni Jehova sa pagtigayon sing duog sa iya katuyuan? Gintugyan niya sa aton ang kamatuoran sang iya balaan nga Pulong. Ginhatag sa aton sang Dios ang iya balaan nga espiritu. Ginpakamaayo niya kita sing isa ka bug-os kalibutan nga paghiliutod kag sing isa ka kahimusan para sa putli nga pagsimba. Ang aton internasyonal nga pamilya nagabulig sa aton sa pag-alagad kay Jehova nga may dakung kalipay sa tagipusuon.
Ginpadaku sang “Pagpabilin nga Nahamulag kag Walay Dagta Gikan sa Kalibutan” ang kinahanglanon nga likawan ang reputasyon nga may ginadampigan kag ginapasulabi nga klase. (Santiago 2:5-9) Ang pila mahimo nga nagapakig-upod lamang sa sadtong may kaanggid nga ginhalinan ukon pinansial nga tindog, nagapatumbaya sa mga imol ukon pigado nga masigka-Cristiano. Ang iban mahimo nga magapakamaayo sadtong may mga salabton sa kongregasyon. Nalipat sila nga ang pinakadakung pribilehiyo nga matigayon ni bisan sin-o amo ang mangin isa ka Saksi ni Jehova. Gani, indi naton dapat pagtugutan ang kalibutanon nga mga huyog nga magadagta sa aton kag magatublag sang paghidait sang kongregasyon.—2 Pedro 3:14.
Ginpakita sang pamulongpulong nga “Handa Bala Ako sa Pagminyo?” nga madamo ang nagaminyo sing padasudaso. Ang pila nagminyo agod makalikaw sa mabudlay nga kahimtangan sa puluy-an ukon bangod ang ila mga katubotubo nagamilinyo. Apang, ang mapag-on nga mga rason sa pagminyo nagalakip sang alalangay nga handum nga sundon ang teokratikong mga tulumuron, tunay nga gugma, kinahanglanon para sa pag-inupdanay kag kalig-unan, kag handum nga magbata. Ang espirituwal nga paghanas kinahanglanon bilang paghanda sa pagminyo. Lakip sa iban pa nga mga butang, kinahanglan nga tukuron ang maayong mga kinaiya paagi sa pagsul-ob sang bag-ong personalidad. Maalamon man nga hisayran kon bala ang palaabuton nga tiayon nagahatag sing pamatuod nga may matuod nga kaangtanan kay Jehova kag nagapakig-angot sing matinahuron sa iban. Ang pagpangayo sing laygay gikan sa hamtong nga mga Cristiano maalamon man.—Hulubaton 11:14.
Ining nagapasanag nga paghinun-anon ginsundan sang isa nga natig-uluhan sing “Ang mga Ginikanan nga Nakasapo sing Kalipay sa Ila mga Anak.” Ang pagkabun-ag sang isa ka bata masunson nga isa ka tion sang daku nga kasadya. Apang, ang pagpadaku sa mga kabataan nagalakip man sang daku nga katungdanan. (Salmo 127:3) Busa, importante nga ang kabataan tudluan nga higugmaon si Jehova. Sarang ini mahimo sang mga ginikanan paagi sa tayuyon nga pagpakighambal sa ila mga kabataan tuhoy kay Jehova kag paagi sa pag-aplikar sang mga prinsipio sang iya Pulong sa pamilya.
Ang nahaunang adlaw ginhinakpan sing isa ka sorpresa—ang pagpaguwa sa bag-ong brosyur nga Jehovah’s Witnesses and Education. Ginapaathag sini sing maayo nga ang mga Saksi “nagapalig-on sang ila kabataan sa pagpanikasog kag sa paghimo sing serioso sang hilikuton nga ginahatag sa ila sa eskwelahan.” Ginapaathag man sini nga publikasyon ang talalupangdon nga mga resulta sang mga klase sa pagtuon sa pagbasa kag pagsulat nga ginahimo sang mga Saksi ni Jehova sa madamong tinuig sa Nigeria, Mexico, kag sa iban pa nga mga pungsod. Ang brosyur dapat magbulig sa mga edukador nga makita nga ginahatagan naton sing daku nga importansia ang edukasyon.
“Magdulot Pirme sa Dios sing Halad sang Pagdayaw”
Ang nasambit nga tema sang ikaduha nga adlaw ginpasad sa Hebreo 13:15. Ginhatag sang programa sa aga ang isa ka simposium tuhoy sa “Pagsabat sa Panawagan nga Dayawon si Jehova.” Ang edad wala nagapugong sa pagsabat sa sining panawagan. Ang Salmo 148:12, 13 nagapalig-on sa mga pamatan-on nga lalaki, mga ulay, mga tigulang nga lalaki, kag mga bata sa pagdayaw kay Jehova. Madamong malipayon nga mga alagad ni Jehova ang nakapauswag sang ila pagdayaw. Sa bug-os nga kalibutan, kapin sa 600,000 ang nagapakigbahin sa bug-os tion nga hilikuton sa pagbantala, ukon pagpayunir. Kapin sa 15,000 ang nagapakigbahin sa espesyal payunir nga hilikuton, kag kapin sa 15,000 ang nagaalagad sa Bethel.
Ang “Pag-alagad sing Matutom Upod sa Organisasyon ni Jehova” isa ka pamulongpulong nga nagpakita nga ginakinahanglan ang katutom para sa mga alagad sang Dios. Ang katutom kay Jehova nagakahulugan sang pagpabilin sa iya upod ang mabakod nga debosyon sa bagay nga nagapanghikot ini kaangay sang isa ka mapag-on nga kola. Ang katutom nagakinahanglan nga likawan naton ang hungod nga paglapas sa mga sugo sang Biblia, nakita man kita sang iban ukon wala. Nagakinahanglan man ini nga sakdagon naton sing matutom ang mga panudlo sang Biblia nga masapwan sa mga magasin nga Lalantawan kag Magmata! subong man sa tanan iban pa nga espirituwal nga pagkaon nga ginaaman sang Watch Tower Society. Ining pamulongpulong ginsundan sang diskurso sa bawtismo. Daw ano nga kalipay sang ginpamatud-an sang mga kandidato sa bawtismo ang ila dedikasyon kay Jehova!
Ang mga pinamulong sang Oseas 4:1-3 nagahatag sing sulundan para sa pamulongpulong sa hapon nga “Kaligdong Ukon Bisyo—Diin ang Imo Ginasunod?” Bisan pa nga ang pagtamod sang kalibutan sa kaligdong nagnubo, ang mga Cristiano dapat “manikasog sing hanuot” nga sundon ang labing maayo nga moralidad. (2 Pedro 1:5) Nagasugod ini sa kon paano nagahunahuna ang isa ka tawo. Kon ang iya mga hunahuna maligdong, magapamulong sia sang matinlo, maayo, kag makapalig-on nga mga tinaga kag magapanikasog nga mangin bunayag sa iya pagpakig-angot sa iban. Ang pagtinguha nga matigayon ang kaligdong nagalakip man sang pagpanikasog nga mangin mahinangpunon kag maluluy-on sa masigka-Cristiano nga ginalisdan ukon ginapung-awan.—1 Tesalonica 5:14.
Ang isa pa ka pamulongpulong, “Magbantay Batok sa mga Siod sang Yawa,” nagpaandam sa mga Cristiano batok sa pagpadayag sang ila kaugalingon sa yawan-on nga mga impluwensia. Sa patag sang pagbulong sa balatian, ang mga Cristiano dapat magbantay sa mga padugi, subong sang hipnotismo, nga nagapanugda sang okulto. Luwas sina, ang ginahimo sang mga indibiduwal sa pag-atipan sang ila pisikal nga panglawas isa ka personal nga butang.
Ang ikaduhang adlaw naghinakop sa isa ka makalilipay nga sorpresa—ang pagpaguwa sa isa ka bag-ong de-bulsa nga publikasyon nga gindesinyo agod buligan ang bunayag sing tagipusuon nga mga tawo sa pag-uswag sing madasig padulong sa dedikasyon kag bawtismo. Ining bag-ong 192-ka-pahina nga libro ginatig-uluhan nga Ang Ihibalo nga Nagadul-ong sa Kabuhi nga Walay Katapusan. Ginahatag sang Ihibalo nga libro ang kamatuoran sa makapalig-on nga paagi. Wala sini ginatul-id ang pagpamatuod nga sayop sang butig nga mga doktrina. Bangod maathag ini kag lohiko, madali ini gamiton sa pagdumala sing pagtuon sa Biblia kag sa pagbulig sa mga tawo nga mahangpan ang makalilipay nga ihibalo sang Dios.
“Magkasadya Kamo kag Magkalipay sing Dayon”
Ining mga pinamulong halin sa Isaias 65:18 amo ang tema sang ikatlong adlaw sang kombension. Ginatudlo sang katumanan sang tagna sang Biblia ang 1914 subong ang tuig nga ining malauton nga sistema nagsulod sa katapusan nga mga adlaw sini. Hanti, ang simposium sang mga pamulongpulong nga natig-uluhan “Malipayon nga mga Dumalayaw sa Katapusan Sining Sistema” nagganyat sang igtalupangod sang tumalambong. Ginpakita sang humalambal kon paano ang binilyon ginaimpluwensiahan sing makusog sang sakon kag masingki nga espiritu sang kalibutan. Sa ulihi, pagahukman sila subong bahin sang kalibutan diin si Satanas ang gumalahom. Busa, karon na ang tion sa pagpili. Kay sin-o kita magadampig? Luyag bala naton simbahon si Jehova kag sakdagon ang iya pagkasoberano, ukon tugutan bala naton si Satanas nga mangin ang aton gumalahom paagi sa paghimo sang mga butang nga kalahamut-an sa iya? Kita tanan dapat magtindog sing pat-od dampig kay Jehova.
Ang diskurso publiko sa kombension, “Dayawa ang Hari sang Katubtuban!” naghatag sa tanan nga tumalambong sing matig-a nga pagkaon para hunahunaon. Walay sapayan nga ang ideya tuhoy sa katubtuban daw labaw sa mahangpan sang maluya nga mga tawo, nahangpan ini sing bug-os ni Jehova. “Si Jehova Hari tubtob sa tion nga dinapat-od, bisan sa walay katubtuban,” amba sang salmista. (Salmo 10:16) Ginbuksan sining Hari sang katubtuban ang dalan para maagom sang katawhan ang kabuhi nga dayon paagi sa iya Anak, si Jesucristo. (Juan 17:3) “Huo, mahimo naton matigayon nga mga makasasala nga katawhan ang kabuhi nga walay katapusan paagi sa balaan nga panudlo kag pagtuo sa halad nga gawad ni Jesus,” siling sang humalambal.
Samtang nagahinakop ang kombension, ang tumalambong napalig-on sang katapusan nga pamulongpulong, nga natig-uluhan “Dayawa si Jehova sing Malipayon Adlaw-adlaw.” Makalilipay makabaton sing mga report tuhoy sa pag-uswag sang paghimo sing disipulo nga hilikuton sa bug-os nga duta. Kag ang mga kombensionista napahulag sa ‘pagpakamaayo kay Jehova sa bug-os nga adlaw kag sa pagdayaw sang iya ngalan sa walay katubtuban.’—Salmo 145:2.
Ang dimabungat nga mga buhat sang kapintas nagadula sang kalipay sa kalibutan. Apang, ang mga indibiduwal nga nagasalig sing bug-os kay Jehova sarang makapanag-iya sang diosnon nga kalipay. Busa, subong isa ka bug-os kalibutan nga paghiliutod, sarang masulit sang mga Saksi ni Jehova ang masunod nga mga pinamulong sang Salmo 35:27, 28: “Pahugyawa sila sa kalipay kag pasadyaha ang mga nagakalipay sa akon pagkamatarong, kag pasilinga sila sing dalayon: ‘Pakadakua si Jehova, nga nagakalipay sa paghidait sang iya alagad.’ Kag ang akon dila magahambal sa mahinay sang imo pagkamatarong, sang imo pagdayaw sa bug-os nga adlaw.”
[Retrato sa pahina 7]
Ang mga pamilya makapanginpulos gikan sa brosyur nga “Jehovah’s Witnesses and Education”
[Retrato sa pahina 8, 9]
Ang bag-ong libro,“Ang Ihibalo nga Nagadul-ong sa Kabuhi nga Walay Katapusan,” nagahatag sang kamatuoran sang Biblia sa makapalig-on nga paagi
[Retrato sa pahina 9]
Madamo ang ginbawtismuhan bilang simbulo sang ila dedikasyon kay Jehova
[Retrato sa pahina 9]
Ang mga kombensionista natandog sing daku sang drama nga “Pagpadungog sa mga Takus sa Ila Katigulangon”