Isa ka Madinalag-on nga Kampanya sa Kingdom News

“NGAA ang Kabuhi Puno Gid sing mga Problema?​—⁠Posible Bala ang Wala sing Problema nga Paraiso?” Amo ini ang tig-ulo sang Kingdom News Num. 34, isa ka apat ka pahina nga ­tract nga ginpanagtag sa bug-os kalibutan sa 139 ka lenguahe sang Abril kag Mayo sang nagligad nga tuig. Ginlaragway sang mga Saksi sa Ja­mai­ca ining kampanya sa pag-alagad subong “isa sang importante nga mga hitabo sang tuig.” Gintawag ini sang mga Saksi sa Bel­gium nga “isa ka daku nga tuburan sang kalipay para sa mga kauturan.” Sa Republika sang Czech, amo ini ang una nga tion nga ang mga Saksi ni Jehova may kahigayunan sa pagpakigbahin sa pagpanagtag sing Kingdom News. Ang sanga nagreport: “Ang kampanya nagdala sing espiritu sang kakugi kag kapagsik.” Ang kaangay man nga mga balatyagon nabatian sa madamo iban pa nga pungsod.

Ang Kingdom News Num. 34 may pinasahi nga mensahe sa sadtong nagapanghayhay kag nagabakho bangod sang mga kangil-aran nga ginhimo sa ngalan sang relihion. (Ezequiel 9:⁠4) May lugpay ini para sa mga nagamuhan sa kabuhi bangod sang “makahalanguyos nga mga tion nga mabudlay pakigbagayan” diin wala sila sing kontrol. (2 Timoteo 3:⁠1) Nagapatuhoy sa Biblia, ginpakita sang ­tract nga ang mga problema sa kabuhi madali na lang lubaron. Ang isa ka wala sing problema nga paraiso pat-od gid. (Lucas 23:43) Madamo sang nakabasa sing Kingdom News ang nabuyok sa mensahe sini. Ang isa ka tawo sa Togo nagsiling sa isa ka Saksi: “Ang inyo mga ginsiling indi mapamatukan.”

Indi mapanghiwala, ang pagpanagtag sining Kingdom News nagganyat sing tumalagsahon nga atension. Sa Den­mark isa ka tagbalay ang nagsiling sa isa ka Saksi nga nagatanyag sing ­tract: “Bag-o lang ako nag-abot halin sa Estados Unidos. Antes ako maghalin, may isa nga nagtanyag sang inyo ­tract sa akon. Karon bag-o lang ako nag-abot diri, kag sa gilayon amo man nga ­tract sa Dan­ish ang gindul-ong diri!”

Mapagsik nga Pagsakdag sa Kampanya

Ang mga Saksi ni Jehova sa bug-os nga kalibutan mapagsik nga nakigbahin sa hilikuton sang pagpanagtag sing ­tract. Ang Aus­tria, El Sal­va­dor, Hai­ti, Hun­gary, Italya, New Cal­edo­nia, pila lamang sang madamong pungsod nga nagreport sang pinakamataas nga mga manugbantala sa mga binulan sang ginpanagtag ang Kingdom News.

Ang isa ka alagad sang sirkito sa Zam­bia naghanas sang iya tatlo ka tuig nga anak nga babayi, si Deb­orah, sa pagtanyag sing literatura sa pamalaybalay. Sang tion sang kampanya sang Kingdom News Num. 34, nakapahamtang si Deb­orah sing kapin sa 45 ka kopya sang ­tract. Ginsugdan sang iya iloy ang mga pagtuon sa Biblia sa pila ka mga nagbaton sing Kingdom News halin kay Deb­orah.

Sa Bagatnan nga Aprika isa ka tin-edyer ang nagtanyag sing ­tract sa isa ka kabutho nga si Cash­ia. Ginbasa ni Cash­ia ang ­tract kag nagsiling: “Makadalayaw gid ini​—⁠mabuhi sing dayon sa paraiso nga duta! Ngaa wala ako ginsugiran tuhoy sini sang una pa?” Nasugdan ang isa ka pagtuon sa Biblia. Sa sulod sang isa ka semana nakabaton si Cash­ia sing isa pa ka ­tract. Ang ikaduha naghalin sa iya ginasulatan nga abyan nga Romano Katoliko, nga nagapuyo sa Cy­prus. Ang ginasulatan nga abyan nagpaathag kay Cash­ia kon ngaa butig ang mga panudlo sang Iglesia Katolika Romana kag ginsugiran niya sia nga tuyo niya nga magtuon sing Biblia upod sa mga Saksi ni Jehova. Sa pagkamatuod, nagpalig-on yadto sing daku sa determinasyon ni Cash­ia nga padayunon ang iya pagtuon.

Ang isa ka dies anyos nga bata nga lalaki sa Swit­zer­land nagpakigbahin upod sa iya iloy sa pagpanagtag sing ­tract. Ginhatag niya ang isa ka kopya sa lamharon nga babayi kag ginpalig-on sia nga basahon ini sing maayo. Ginpamangkot sang lamaharon nga babayi ang bata nga lalaki kon ginapatihan gid niya ang ginapakita sang laragwaay sa panghapin​—⁠walay katapusan nga kabuhi sa duta. Ang sabat sang bata? “Siempre, huo, pat-od gid ako.” Nian nagpanugiron ang babayi nga nagapangita sia sing matuod nga pagtuo bangod may madamo nga pagsumpakilay sa iya kaugalingon nga relihion. Sang pagduaw liwat, nasugdan ang isa ka pagtuon sa Biblia.

Gilayon nga Reaksion

Kon kaisa ang Kingdom News nagtuga sing gilayon nga reaksion sa mga nagabasa sini. Sa tapos mabasa ang ­tract, ang isa ka 11-anyos nga bata nga babayi sa Bel­gium nagtu-ad sa isa sang mga Saksi ni Jehova nga nagpangawat sia sa balaklan. Luyag sang iloy sang bata nga hipsan na lang ini, apang ang konsiensia sang bata ginpahulag sang iya nabasahan, kag nagpamilit sia nga makigkita sa manugdumala sang balaklan. Sang ulihi nagpasugot ang iloy nga pabalikon ang iya anak sa balaklan upod ang Saksi. Nakibot ang manugdumala sa iya pagtu-ad. Sang nahibal-an niya nga ang nagpahulag sa iya sa paghimo sini amo ang Kingdom News, nagkuha sia sing isa ka kopya para sa iya agod tan-awon kon ano ang ginaunod sini nga tuman ka gamhanan. Ang bata nga babayi sa karon nagatuon sing mauswagon sa Biblia.

Ang isa ka Saksi sa Cameroon nagbilin sing isa ka kopya sang Kingdom News sa isa ka tawo kag nagpanugiron: “Sang nagbalik kami, nakita namon nga ginkuritan na niya ini kag may madamo nga pamangkot. Sa tapos makabaton sing makaalayaw nga mga sabat, nagsiling sia: ‘Matuod gid nga nag-amot ang relihion sa kasubo sang katawhan. Ang inyo ­tract nagbulig sa akon nga mahangpan ang madamo, apang luyag ko makahibalo sing dugang pa.’ ” May yara na sia karon regular nga pagtuon sing Biblia.

Ang isa ka Saksi nga nagaduaw sa pamalaybalay sa Uru­guay nagpahamtang sing isa ka ­tract sa isa ka tawo. Ginpadayon sang Saksi ang iya pamalaybalay nga pagbantala kag nanghikot sa bug-os nga bloke tubtob nakaabot sia sa likod nga puertahan sang balay sang tawo. Nakibot sia nga makita ang tawo nga nagahulat sa iya, nga ginauyatan ang ­tract. Nabasa na niya ini kag luyag sing dugang nga impormasyon. Nasugdan sa gilayon mismo ang isa ka pagtuon.

Nagbulig ang Publiko sa Pagpanagtag

Sa Japan ang isa ka lamharon nga Saksi nagpalapit sa isa ka tawo nga nagapangidaron sing 50 anyos kag ginpakita ang ­tract sa iya. Ang tawo namangkot: “Ano ang ginahimo ninyo sa sina nga polyeto kon makasugata kamo sing mga tawo nga indi makakita?” Gin-ako sang Saksi nga wala sia makahibalo. Ginsilingan sia sing tawo nga maghulat sing makadali kag nagsulod sia sa iya balay. Nagbalik sia nga dala ang isa ka kopya sang Kingdom News kag nagsiling: “Nakabaton na ako sina nga polyeto. Ginhunahuna ko nga nagaunod ini sing tuman ka makawiwili kag importante nga impormasyon, gani ginkopya ko ini sa ­Braille. Palihug gamita ini sa mga bulag nga tawo.” Naghinguyang ang tawo sing madamong inoras sa pagkopya sing Kingdom News pakadto sa ­Braille agod indi mawasi sang mga bulag ang ginaunod sini.

Sa Slovakia naluyagan gid sang isa ka tawo ang ­tract amo nga nagpakopya sia sini sing 20 ka kopya, kag ginpanagtag niya mismo ining itom kag puti nga mga kopya. Ang isa ka manugbantala sa Swit­zer­land nagbilin sing isa ka Kingdom News sa isa ka pamilya kag nagpadayon sa pagpanghikot sa naibabaw nga bahin sang tinukod nga ginapuy-an sang pamilya. Sang pagpanaug niya, ginsugata sia sang isa ka bata nga lalaki sang pamilya, nga nagpangayo sing 19 ka dugang pa nga kopya sang ­tract. Sa eskuelahan sang bata nga lalaki, ang mga estudyante gintangduan sa pagsulat tuhoy sa mga problema kag ang pagpangita sing mga solusyon. Luyag niya ang isa ka kopya sang Kingdom News para sa kada kabutho niya.

Wala sing Isa nga Nalaktawan

Yadtong nakigbahin sa kampanya nagtinguha gid sa pagpat-od nga wala sing isa nga nalaktawan. Sa New Cal­edonia duha ka Saksi ang naglakbay sa mga teritoryo sa naligwin nga tribo agod sa pagpanagtag sing Kingdom News. Sa dalanon, namutikan nila ang isa ka dalan nga daw wala ginaagyan, apang walay sapayan namat-od sila nga tan-awon kon may nagapuyo sa punta sini. Ginbayaan ang awto, ginlatas nila ang dalan, nagaubog sa mga sapa tubtob sang ulihi nakakita sila sing balay. Nagapuyo didto ang isa ka mag-asawa nga wala pa gid makabati tuhoy sa mga Saksi ni Jehova, kag ginbaton nila ang isa ka kopya sang Kingdom News. Sang ulihi nagduaw liwat ang mga manugbantala kag sa ila kakibot nasapwan nila nga ginkay-o sang mag-asawa ang dalan kag ang madamong gamay nga taytay agod ang mga Saksi makasakay sa ila awto tubtob gid sa balay. Nasugdan ang isa ka regular nga pagtuon sa Biblia.

Sa Poland isa ka Saksi ang dapat mag-agi sa duog sang konstruksion agod makatanyag sing isa ka kopya sang Kingdom News sa isa ka tagbalay. Ang mga trabahador nagtan-aw samtang nag-agi sia sa likod nga bahin sang tinukod. Sang ulihi, ang isa sang mga trabahador nagtawag sa iya, nga nagapangabay sa iya nga indi sila pagkalimtan. Sang nagpalapit sia sa ila, nagdulog sila kag nagpamati sing maayo sa presentasyon sang ­tract. Ginbaton nila ang mga kopya sang Kingdom News subong man mga magasin kag sang ulihi, sa pagduaw liwat, mga libro.

Ginatos ka minilyon sang Kingdom News Num. 34 ang ginpanagtag sa madamong lengua­he. Ang mga mensahe sini may mabaskog na nga epekto. Madamo ang nakahibalo nga ang wala sing problema nga paraiso posible. Nagapangamuyo kami nga ang mga matarong sing tagipusuon padayon nga magasabat kag sa ulihi mangin isa sang “mga mahagop” nga “magapanubli sang duta, kag . . . magakalipay sila sa kabuganaan sang paghidait.”​—⁠Salmo 37:⁠11.

[Kahon sa pahina 31]

Padayon nga Magpanagtag sing mga Magasin!

Ang Abril kag Mayo 1995 nakatigayon sing madinalag-on gid nga kampanya sa pagpanagtag sing Kingdom News Num. 34 Sa sulod sadtong duha ka bulan, may talalupangdon man nga pagpanagtag sang Lalantawan kag Magmata! nga mga magasin. Ang isa ka utod sa Republika sang Czech, halimbawa, nagreport nga sang Abril nakapahamtang sia sing 250 ka kopya sang Kingdom News kag 750 ka magasin. Sa Gua­de­loupe, ang Sabado, Abril 15, ginpili subong ang pinasahi nga adlaw sang magasin. Halos tanan nga manugbantala sa pungsod nakigbahin sa pagministeryo sadto nga adlaw! Ang Slo­vakia may bag-o nga kataason sang pagpanagtag sing magasin sang Abril. Ang kaangay nga mga report naghalin sa madamo iban pa nga mga pungsod.

Gani ngaa indi paghimuon ang Abril kag Mayo 1996 nga talalupangdon nga binulan para sa pag­panagtag sing magasin? Ang mga kongregasyon makaorganisar sing pinasahi nga mga adlaw sang magasin. Ang mga indibidual makapakigbahin sa pag-aux­il­iary payunir. Sa sini kag sa iban pa nga mga paagi, mapalig-on ang pagpanagtag sing ma­gasin, kag ang importante nga mensahe nga ginbantala sang Kingdom News Num. 34 mapalapnag sing padayon. Nian, subong sang natabo sang nagligad nga tuig, pat-od nga pakamaayuhon ni Jehova ang espiritu sang kakugi nga aton ginapakita.​—⁠2 Timoteo 4:⁠22.