Pag-atubang sa Hangkat sang Pagkamainunungon

“Magsuklob sang bag-ong personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.”​—⁠EFESO 4:⁠24.

1. Ngaa utang naton kay Jehova nga Dios ang pagkamainunungon?

ANG pag-atubang sa hangkat sang pagkamainunungon may madamo nga bahin. Ang labing importante amo ang pag-atubang sa hangkat sang pagkamainunungon kay Jehova nga Dios. Sa pagkamatuod, bangod sang kon sin-o si Jehova kag sang kon ano ang ginhimo niya para sa aton, kag bangod sang aton dedikasyon sa iya, utang naton sa iya ang pagkamainunungon. Paano naton ginapakita ang pagkamainunungon kay Jehova nga Dios? Ang panguna nga paagi amo ang pagkamamainunungon sa matarong nga mga prinsipio ni Jehova.

2, 3. Ano ang kaangtanan sang pagkamainunungon kag pagkamatarong?

² Agod maatubang ina nga hangkat, dapat naton pamatian ang mga pulong nga masapwan sa 1 Pedro 1:​15, 16: “Nahisuno sa Isa nga Balaan nga nagtawag sa inyo, magpakabalaan man kamo gid sa tanan nga paggawi, bangod nasulat na; ‘Magpakabalaan kamo, kay balaan ako.’” Ang pagkamainunungon kay Jehova nga Dios magapahulag sa aton nga tumanon sia sa tanan nga tion, nagapahisanto sang aton mga hunahuna, mga pulong, kag mga buhat sa iya balaan nga kabubut-on. Nagakahulugan ini sang pagtipig sing maayong konsiensia, subong sang ginasugo sa aton sa 1 Timoteo 1:​3-5: “Ang katuyuan gid sining tulin [nga indi magtudlo sing tuhay nga doktrina ukon maghatag sing igtalupangod sa butig nga mga sugilanon] amo ang gugma nga gikan sa tagipusuon nga putli kag gikan sa maayo nga konsiensia kag gikan sa pagtuo nga indi salimpapaw.” Matuod, wala sing isa sa aton ang himpit, apang dapat naton tinguhaan nga himuon ang aton bug-os nga masarangan, indi bala?

³ Ang pagkamainunungon kay Jehova magapugong sa aton nga ikompromiso sing makagod ang matarong nga mga prinsipio. Sa pagkamatuod, ang pagkamainunungon magapugong sa aton nga mangin salimpapaw. Ang pagkamainunungon amo ang ginahunahuna sang salmista sang nag-amba sia: “Tudlui ako, O Jehova, sang imo dalanon. Magalakat ako sa imo kamatuoran. Bug-usa ang akon tagipusuon sa pagkahadlok sang imo ngalan.” (Salmo 86:11) Ang pagkamainunungon nagakinahanglan sang kon ano gid ang ginalaragway subong “pagkamatinumanon sa mga kasuguan ukon mga prinsipio nga indi mapatuman sang mga tawo.”

4, 5. Ang pagkamainunungon magapugong sa aton sa paghimo sing anong sayop nga buhat?

⁴ Ang pagkamainunungon kay Jehova nga Dios magapugong man sa aton sa paghimo sing bisan ano nga butang nga makadala sing pasipala sa iya ngalan kag Ginharian. Halimbawa, duha ka Cristiano ang indi anay maghangpanay sa isa kag isa amo nga dinagakaigo sila nga nagkadto sa kalibutanon nga hukmanan sang kasuguan. Ang hukom namangkot, ‘Mga Saksi ni Jehova bala kamo nga duha?’ Maathag nga indi niya mahangpan kon ano ang ila ginahimo sa hukmanan. Daw ano gid nga pagpakahuya! Ang pagkamainunungon kay Jehova nga Dios mahimo kuntani nga nagpahulag sa sining mga utod sa pagtuman sa laygay ni apostol Pablo: “Kon amo, tunay gid ini nga nagakahulugan sing bug-os nga pagkalupig sa inyo nga nagkinasabaay kamo sa isa kag isa. Ngaa indi na lang ninyo pagpabayaan nga himuan kamo sing sayop? Ngaa indi na lang ninyo pagpabayaan nga dayaon kamo?” (1 Corinto 6:⁠7) Sa pagkamatuod, ang dalanon sang pagkamainunungon kay Jehova nga Dios amo ang pag-antos sing personal nga kapierdehan sa baylo nga pakahuy-an si Jehova kag ang iya organisasyon.

⁵ Ang pagkamainunungon kay Jehova nga Dios nagadalahig man sang indi pagpadala sa kahadlok sa tawo. “Ang kahadlok sa tawo nagadala sing siod, apang sia nga nagasalig kay Jehova pagaamligan.” (Hulubaton 29:25) Busa, wala kita nagakompromiso kon nagaatubang sing paghingabot, kundi ginasunod naton ang halimbawa nga ginpahamtang sang mga Saksi ni Jehova sa anay Unyon Sobyet, sa Malawi, sa Etiopia, kag sa madamo pa nga kadutaan.

6. Ang pagkamainunungon magapugong sa aton sa pagpakig-angot kay sin-o?

⁶ Kon mainunungon kita kay Jehova nga Dios, likawan naton ang pagpakig-abyan sa tanan nga mga kaaway niya. Amo ina kon ngaa si disipulo Santiago nagsulat: “Mga makihilahion, wala bala kamo makahibalo nga ang pagpakig-abyan sa kalibutan pagpakig-away sa Dios? Busa, ang bisan sin-o nga maluyag makig-abyan sa kalibutan nagahimo sang iya kaugalingon nga kaaway sang Dios.” (Santiago 4:⁠4) Luyag naton tigayunon ang pagkamainunungon nga ginpakita ni Hari David sang nagsiling sia: “Wala bala ako nagadumot sa mga nagadumot sa imo, O Jehova, kag wala bala ako nagakalisud sa mga nagatindog batok sa imo? Ginadumtan ko sila sa himpit nga pagdumot. Sila nangin kaaway ko.” (Salmo 139:​21, 22) Indi naton luyag makig-upod kay bisan sin-o nga hungod nga mga makasasala, kay indi kita magkapareho. Indi bala nga ang pagkamainunungon sa Dios magapugong sa aton sa pagpakig-upod kay bisan sin-o sining mga kaaway ni Jehova, sing personal man ukon paagi sa telebisyon?

Pagpangapin kay Jehova

7. Ang pagkamainunungon magabulig sa aton sa paghimo sing ano nahanungod kay Jehova, kag paano ini ginhimo ni Elihu?

⁷ Ang pagkamainunungon magapahulag sa aton nga pangapinan si Jehova nga Dios. May maayo gid kita nga halimbawa kay Elihu! Ang Job 32:​2, 3 nagasugid sa aton: “Nagdabdab ang kasingkal ni Elihu . . . Nagdabdab ang iya kasingkal batok kay Job bangod nga ginpakamatarong niya ang iya kaugalingon sangsa Dios. Nagdabdab man ang iya kasingkal batok sa iya tatlo ka abyan bangod nga wala sila makakita sing sabat apang nagpadayon sa pagpakamalaut sa Dios.” Sa Job kapitulo 32 tubtob 37, ginpangapinan ni Elihu si Jehova. Halimbawa, sia nagsiling: “Pabayai ako sing diutay, kag pahayagan ko ikaw kay may isiling pa ako nahanungod sa Dios. . . . Ipahanungod ko ang pagkamatarong sa akon Magbubuhat. . . . Wala niya ginapabulag ang iya mga mata sa matarong.”​—⁠Job 36:​2-7.

8. Ngaa dapat naton pangapinan si Jehova?

⁸ Ngaa dapat pangapinan si Jehova? Karon, ang aton Dios nga si Jehova ginapasipalahan sa madamo gid nga paagi. Ginapangangkon nga wala sia nagaluntad, nga bahin sia sang isa ka Trinidad, nga ginapaantos niya ang mga tawo sing dayon sa kalayuhon nga impierno, nga dimakatarunganon niya nga ginatinguhaan nga kumbertihon ang kalibutan, nga wala sia nagaulikid sa katawhan, kag iban pa. Ginapakita naton ang aton pagkamainunungon sa iya paagi sa pagpangapin sa iya kag sa pagpamatuod nga si Jehova nagaluntad; nga sia isa ka maalamon, makatarunganon, labing gamhanan, kag mahigugmaon nga Dios; nga may tion sia para sa tanan nga butang; kag nga kon ang iya gintalana nga tion magaabot, laglagon niya ang tanan nga malauton kag himuon ang bug-os nga duta nga isa ka paraiso. (Manugwali 3:⁠1) Nagakinahanglan ini nga gamiton naton ang tanan nga kahigayunan sa pagpanaksi sa ngalan kag Ginharian ni Jehova.

Pagkamainunungon sa Organisasyon ni Jehova

9. Sa anong mga isyu ginpakita sang pila ang ila kakulang sing pagkamainunungon?

⁹ Binagbinagon naton karon ang pagkamainunungon sa kitaon nga organisasyon ni Jehova. Sa pagkamatuod, utang naton sa sini ang pagkamainunungon, lakip sa “matutom kag mainandamon nga ulipon,” nga paagi sini ang Cristianong kongregasyon ginapakaon sa espirituwal. (Mateo 24:​45-47) Pananglitan may nagguwa sa mga publikasyon sang Watch Tower nga wala naton mahangpi ukon ginaugyunan sa karon. Ano ang himuon naton? Masandad kag bayaan ang organisasyon? Amo sina ang ginhimo sang iban sang gin-aplikar sang The Watch Tower, madamong tinuig na nga nakaligad, ang bag-ong katipan sa Milenio. Ang iban nasandad sa ginsiling anay sang Ang Lalantawan tuhoy sa isyu sang neutralidad. Kon yadtong nasandad sa sining mga butang nagmainunungon sa organisasyon kag sa ila mga kauturan, kuntani naghulat sila kay Jehova sa pagpaathag sining mga butang, nga ginhimo niya sa iya gintalana nga tion. Sa amo, ang pagkamainunungon nagalakip sang paghulat sing mapailubon tubtob ang dugang pa nga paghangop ginabalhag sang matutom kag mainandamon nga ulipon.

10. Ang pagkamainunungon magapugong sa aton nga mangin mausisaon sa ano?

¹⁰ Ang pagkamainunungon sa kitaon nga organisasyon ni Jehova nagakahulugan man sang pagsikway sa mga apostata. Ang mainunungon nga mga Cristiano indi magapangusisa sa kon ano ang ginasiling sining mga tawo. Matuod, yadtong ginagamit ni Jehova nga Dios sa pagdumala sang iya hilikuton sa duta indi himpit. Apang ano ang ginasiling sang Pulong sang Dios nga himuon naton? Bayaan ang organisasyon sang Dios? Indi. Ang utudnon nga pagpalangga dapat magahupot sa aton nga mainunungon sa sini, kag dapat kita magpadayon sa ‘paghigugmaanay sing hanuot gikan sa tagipusuon.’​—⁠1 Pedro 1:⁠22.

Pagkamainunungon sa Mainunungon nga mga Gulang

11. Ang pagkamainunungon magabulig sa aton sa pagbantay batok sa anong negatibo nga panghunahuna?

¹¹ Kon may butang nga ginsiling ukon ginhimo sa kongregasyon nga nabudlayan kita sa paghangop, ang pagkamainunungon magapugong sa aton sa paghukom kag magabulig sa aton sa pagtigayon sing panindugan nga ayhan isa lamang ini ka butang sang paghantop. Indi bala mas maayo nga hunahunaon ang maayong mga kinaiya sang gintangdo nga mga gulang kag sang iban nga mga masigkatumuluo sa baylo sang ila mga kakulangan? Huo, luyag naton magbantay batok sa sining tanan negatibo nga panghunahuna, kay may kaangtanan ini sa pagkadimainunungon! Ang pagkamainunungon magabulig man sa aton sa pagtuman sa sugo ni Pablo nga “dili maghambal sing malaut nahanungod kay bisan sin-o.”​—⁠Tito 3:​1, 2.

12, 13. Anong partikular nga mga hangkat ang dapat atubangon sang mga gulang?

¹² Ang pagkamainunungon nagahatag sing partikular nga mga hangkat sa mga gulang. Ang isa sini nga mga hangkat amo ang ikasarang sa pagtago sang butang nga kompidensial. Ang isa ka katapo sang kongregasyon mahimo magtu-ad sa isa ka gulang. Ang pagkamainunungon sa iya magapugong sa gulang sa paglapas sang prinsipio sa pagtago sang butang nga kompidensial. Pagasundon niya ang laygay sang Hulubaton 25:9: “Indi pag-isugid ang kompidensial nga hambalanon sang iban.” Nagakahulugan ina sang indi pagsugid sini bisan sa iya kaugalingon nga asawa!

¹³ Ang mga gulang may iban pa nga mga pagtilaw sang pagkamainunungon nga dapat atubangon. Pahamut-an bala nila ang mga tawo, ukon maisugon kag malulo bala nila nga buligan yadtong nagakinahanglan sing pagtadlong, bisan pa nga sila mga himata ukon suod nga mga abyan? Ang pagkamainunungon sa organisasyon ni Jehova magapahulag sa mga gulang sa tunga naton nga panikasugan nga buligan ang bisan sin-o nga nagakinahanglan sing espirituwal nga bulig. (Galacia 6:​1, 2) Walay sapayan nga mangin malulo kita, ang aton pagkamainunungon magahimo sa aton nga tampad sa aton mga masigkagulang, subong sang tampad nga ginsiling ni apostol Pablo kay apostol Pedro. (Galacia 2:​11-14) Sa pihak nga bahin, ang mga manugtatap dapat maghalong, nga sa pagpanghikot sing dimaalamon ukon sa pagpakita sing pagpasulabi ukon sa iban nga paagi sa pag-abuso sa ila awtoridad, ginahimo nila nga mabudlay para sa mga ginatatap nila ang mangin mainunungon sa organisasyon sang Dios.​—⁠Filipos 4:⁠5.

14, 15. Anong mga butang ang mahimo nga magatilaw sa pagkamainunungon sang mga katapo sang kongregasyon?

¹⁴ May iban pa nga bahin sa pag-atubang sa hangkat sang pagkamainunungon sa kongregasyon kag sa mga gulang sini. Kon daw may magamo nga mga kahimtangan sa kongregasyon, nagahatag ini sa aton sing kahigayunan nga ipakita ang pagkamainunungon kay Jehova kag sa mga nagatiglawas sa iya. (Tan-awa Ang Lalantawan, Hunyo 15, 1987, pahina 15-17.) Kon may gin-disfellow­ship, ginakinahanglan sang pagkamainunungon nga sakdagon naton ang mga gulang, nga wala nagatinguha sa paghunahuna sing iban nga paathag kon bala may nagakaigo nga rason sa ginhimo nga aksion.

¹⁵ Ang pagkamainunungon sa kongregasyon nagakinahanglan man nga sakdagon naton ang tanan lima ka semanal nga mga miting tubtob sa masarangan sang aton sirkunstansia kag ikasarang. Ang pagkamainunungon nagakinahanglan nga indi lamang naton ini tambungan sing regular kundi handaan man ini kag maghatag sing makapabakod nga komento kon may kahigayunan.​—⁠Hebreo 10:​24, 25.

Pagkamainunungon sa Pag-asawahay

16, 17. Anong mga hangkat sa pagkamainunungon ang dapat atubangon sang minyo nga mga Cristiano?

¹⁶ Kay sin-o pa kita nakautang sing pagkamainunungon? Kon kita minyo, bangod sang aton mga sinumpaan sa pag-asawahay, dapat naton atubangon ang hangkat nga mangin mainunungon sa aton tiayon. Ang pagkamainunungon sa aton tiayon magapugong sa aton sa paghimo sing sayop nga mangin mas mabuot sa iban nga mga babayi ukon mga lalaki sangsa aton kaugalingon nga asawa ukon bana. Ang pagkamainunungon sa aton tiayon nagakinahanglan man nga wala naton ginasugid sa iban ang mga kaluyahon ukon mga kakulangan sang aton tiayon. Mas mahapos magreklamo sa iban sangsa mangabudlay nga huptan nga bukas ang linya sang komunikasyon sa aton tiayon, nga dapat naton himuon nahisuno sa Bulawanon nga Kasuguan. (Mateo 7:12) Sa pagkamatuod, ang pag-asawahay nagahatag sing daku nga hangkat sa aton Cristianong pagkamainunungon.

¹⁷ Agod maatubang ang hangkat sang pagkamainunungon, indi lamang naton dapat likawan nga makasala sing dayag nga sayop nga pagginawi kundi dapat man naton bantayan ang aton gid mga panghunahuna kag mga balatyagon. (Salmo 19:14) Halimbawa, kon ang aton malimbungon nga mga tagipusuon makagod sa kalipayan kag kakunyag, mahapos gid para sa aton ang magpadayon sing makagod halin sa pagdayaw tubtob sa paghandum. Nagalaygay sang katutom sa pag-asawahay, si Hari Solomon nagalaygay sing malaragwayon sa mga bana sa ‘pag-inom sing tubig sa ila kaugalingon nga suluptan.’ (Hulubaton 5:15) Kag si Jesus nagsiling: “Ang tagsatagsa nga padayon nga nagatulok sa babayi sa pagkaibog sa iya nakapanglahi na sa iya sa tagipusuon niya.” (Mateo 5:28) Ang mga bana nga nagapaduyog sang ila kaugalingon sa pornograpiko nga materyal may katalagman nga masulay sa paghimo sing panglahi, sa amo nagaluib sa ila mga asawa kag mangin dimainunungon sa ila. Sa sina man nga rason, ang asawa nga nahuyog sing tuman sa pagtan-aw sing mga drama sa telebisyon nga nagahinun-anon sang makihilahion nga mga danyag mahimo masulay nga mangin dimainunungon sa iya bana. Apang, paagi sa tunay nga pagkamainunungon sa aton tiayon, ginapabakod naton ang higot sang pag-asawahay, kag ginabuligan naton ang isa kag isa sa aton mga panikasog nga pahamut-an si Jehova nga Dios.

Mga Bulig sa Pagpabilin nga Mainunungon

18. Ang paghangop sa ano ang magabulig sa aton nga magmangin mainunungon?

¹⁸ Ano ang magabulig sa aton sa pag-atubang sa hangkat sang pagkamainunungon sa sining apat ka bahin: pagkamainunungon kay Jehova, sa iya organisasyon, sa kongregasyon, kag sa aton tiayon? Ang isa ka bulig amo ang paghangop nga ang pag-atubang sa hangkat sang pagkamainunungon ginaangot sing suod sa pagbindikar sa pagkasoberano ni Jehova. Huo, paagi sa pagpabilin nga mainunungon ginapakita naton nga ­ginatamod naton si Jehova subong Soberano sa Bug-os nga Uniberso. Sa amo mahimo man kita makatigayon sing pagtahod sa kaugalingon kag sing paglaum sang kabuhi nga walay katapusan sa bag-ong kalibutan ni Jehova. Mahimo naton mabuligan ang aton kaugalingon sa pagpabilin nga mainunungon paagi sa pagbinagbinag sa maayong mga halimbawa sang pagkamainunungon, halin kay Jehova pakadto sa sadtong ginsambit sa Biblia kag sa aton mga publikasyon sa Watch Tower, lakip ang mga sugilanon sa Yearbook.

19. Ano ang papel sang pagtuo sa aton pagkamainunungon?

¹⁹ Ang mabakod nga pagtuo kay Jehova nga Dios kag ang kahadlok nga indi sia mapahamut-an magabulig sa aton sa pag-atubang sa hangkat sang pagkamainunungon. Ginapabakod naton ang aton pagtuo kag kahadlok kay Jehova paagi sa makugi nga pagtuon sang Pulong sang Dios kag paagi sa pagpakigbahin sa Cristianong ministeryo. Magabulig ini sa aton sa pagpanghikot nahisuno sa laygay ni Pablo sa Efeso 4:​23, 24: “Magbag-o kamo sa puwersa nga nagapahikot sang inyo hunahuna, kag dapat kamo magsuklob sang bag-ong personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.”

20. Labaw sa tanan, anong kinaiya ang magabulig sa aton nga magmangin mainunungon kay Jehova kag sa tanan pa nga sa ila utang naton ang pagkamainunungon?

²⁰ Ang paghangop sa mga kinaiya ni Jehova magabulig sa aton nga mangin mainunungon. Labaw sa tanan, ang dimakagod nga gugma sa aton langitnon nga Amay kag pasalamat sa tanan nga ginhimo niya para sa aton, ang paghigugma sa iya upod ang aton bug-os nga tagipusuon kag kalag kag hunahuna kag kusog magabulig sa aton nga magmangin mainunungon sa iya. Dugang pa, ang pagtigayon sang gugma nga ginsiling ni Jesus nga magapakilala sa iya mga sumulunod magabulig sa aton nga magmangin mainunungon sa tanan nga Cristiano sa kongregasyon kag sa aton pamilya. Sa iban nga hambal, isa gid ini ka butang sang kon bala mangin makagod ukon dimakagod. Ang pagkadimainunungon nagakahulugan sang pagkakagod. Ang pagkamainunungon nagakahulugan sang pagkadimakagod.​—⁠Marcos 12:​30, 31; Juan 13:​34, 35.

21. Paano masumaryo ang butang tuhoy sa pag-atubang sa hangkat sang pagkamainunungon?

²¹ Sa pagsumaryo: Ang pagkamainunungon amo ang tunay nga kinaiya nga ginpakita ni Jehova nga Dios, ni Jesucristo, kag sang tanan nga matuod nga mga alagad ni Jehova. Agod matigayon ang maayo nga kahimtangan upod kay Jehova nga Dios, dapat naton atubangon ang hangkat sang pagkamainunungon sa iya paagi sa pagpahisuno sa iya matarong nga mga kinahanglanon, sa indi pagpakig-upod sa iya mga kaaway, kag sa pagpangapin kay Jehova sa pagpanaksi sing pormal kag dipormal. Dapat man naton atubangon ang hangkat nga mangin mainunungon sa kitaon nga organisasyon ni Jehova. Dapat kita mangin mainunungon sa aton mga kongregasyon kag mainunungon sa aton mga tiayon. Paagi sa pag-atubang sa hangkat sang pagkamainunungon sing madinalag-on, magapakigbahin kita sa pagbindikar sa pagkasoberano ni Jehova, kag magadampig sa iya sa isyu. Gani matigayon naton ang iya kahamuot kag mabaton ang padya nga kabuhi nga walay katapusan. Ang ginsiling ni apostol Pablo nahanungod sa diosnon nga debosyon mahimo man masiling sa aton pag-atubang sa hangkat sang pagkamainunungon. Mapuslanon ini para sa kabuhi karon kag para sa magaabot.​—⁠Salmo 18:25; 1 Timoteo 4:⁠8.

Paano Ninyo Sabton?

◻ Sa anong mga paagi mahimo naton maatubang ang hangkat sa pagkamainunungon sa Dios?

◻ Ano ang ginakinahanglan sa aton sang pagkamainunungon sa organisasyon ni Jehova?

◻ Paano maatubang sang mga gulang ang hangkat sang pagkamainunungon?

◻ Anong hangkat may kaangtanan sa pagkamainunungon ang dapat atubangon sang minyo nga mga Cristiano?

◻ Anong mga kinaiya ang magabulig sa aton sa pag-atubang sa hangkat sang pagkamainunungon?

[Retrato sa pahina 17]

Ang pagkamainunungon sa mga katapo sang kongregasyon magapugong sa mga gulang sa pagsugid sang kompidensial nga mga butang

[Retrato sa pahina 18]

Ang pagkamainunungon sa tiayon magapabakod sang higot sang pag-asawahay