Sauluga ang Memoryal sing Takus

GAB-I sadto sang Nisan 14, 33 C.E., sang ginpatok ni Jesus ang Memoryal.a Bag-o lang niya natapos ang pagsaulog sing Paskua nga selebrasyon upod sa iya 12 ka apostoles, gani sarang naton mapat-od ang petsa. Sa tapos mapahalin ang maluib nga si Judas, “nagkuha [si Jesus] sing tinapay, ginpakamaayo ini, gintipiktipik ini kag ginhatag ini sa ila, kag nagsiling: ‘Kuha kamo, nagakahulugan ini sang akon lawas.’ Kag nagkuha sing isa ka tagayan, nagpasalamat sia kag ginhatag ini sa ila, kag sila tanan nag-inom sa sini. Kag nagsiling sia sa ila: ‘Nagakahulugan ini sang akon “dugo sang katipan,” nga ginaula tungod sa madamo.’ ”​—⁠Marcos 14:​22-24.

Ginsugo ni Jesus ang iya mga disipulo nga dumdumon ang iya kamatayon bangod sang pagkaimportante sini. (Lucas 22:19; 1 Corinto 11:​23-26) Ang iya lamang halad ang makatubos sa katawhan gikan sa katagudilian sang napanubli nga sala kag kamatayon. (Roma 5:12; 6:23) Ang tinapay kag ang alak nga iya gingamit mga simbulo sang iya himpit nga lawas kag sang iya dugo. Nahibaluan ang orihinal nga petsa, masaulog naton ang okasyon sa katumbas nga adlaw kada tuig, subong sang ginhimo sa Judiyong Paskua. Apang dapat naton himuon ini sing takus. Ngaa?

Si apostol Pablo nagsiling nga yadtong nagapakig-ambit sa mga emblema sang tinapay kag alak ‘nagabantala sing kamatayon sang Ginuo, tubtob nga magkari sia.’ (1 Corinto 11:26) Busa ang sentro sang selebrasyon amo ang kamatayon ni Jesus kag ang kahulugan sini para sa katawhan. Ang okasyon dapat mangin serioso, tion sang pagpamalandong sa kaayo sang Dios kag sang apresasyon nga dapat ipakita naton kay Jehova kag sa iya Anak. (Roma 5:8; Tito 2:14; 1 Juan 4:​9, 10) Gani, si Pablo nagpaandam: “Busa ang bisan sin-o nga magkaon sing tinapay ukon mag-inom sa tagayan sang Ginuo sing indi takus mangin malinapason sang lawas kag sang dugo sang Ginuo.”​—⁠1 Corinto 11:⁠27.

Sing Takus​—⁠Paano?

Sing maathag, indi mahamuot ang Dios kon aton pasipalahan ang okasyon paagi sa pagpakigbahin sa mapangduhaduhaan nga mga buhat ukon paagi sa paghimo sing paganong mga kinabatasan. (Santiago 1:27; 4:​3-4) Nagadumili ini sa popular nga mga hitabo sa tion sang Eas­ter. Sa pagsunod sa sugo ni Jesus nga ‘padayon nga himuon ini sa handumanan [niya],’ luyag naton nga saulugon ang Memoryal subong sang pagpatok niya sini. (Lucas 22:19; 1 Corinto 11:⁠24, 25) Wala ini naglakip sa mga puni nga gindugang sa pagsaulog sang mga simbahan sang Cristiandad. Ang New Catholic Encyclopedia nagabaton nga ang Misa karon tuhay gid sa simple kaayo nga seremonya nga ginsunod ni Cristo kag sang Iya mga Apostoles.” Kag paagi sa masunson nga pagsaulog sang Misa, sing adlaw-adlaw pa gani, ang Cristiandad nagsipak gikan sa kon ano ang gintuyo ni Jesus kag ginhimo ini nga ordinaryo nga hitabo.

Nagsulat si Pablo sa mga Cristiano sa taga-Corinto tuhoy sa pagpakig-ambit sing ditakus bangod sang problema nga nag-utwas sa kongregasyon nahanungod sa Panihapon sang Ginuo. Wala gintahod sang iban ang pagkabalaan sini. Nagbalon sila sing palanyapunon nila kag ginkaon ini antes ukon sa tion sang miting. Masami sila nga nagkaon kag nag-inom sing sobra. Nagpatuyo ini sa ila kag nagpaluya sang ila igbalatyag. Bangod indi sila alisto sa mental kag espirituwal, ‘indi [nila] mahantop ang lawas’ kag busa nangin ‘malinapason sang lawas kag sang dugo sang Ginuo.’ Samtang, yadtong wala makapanihapon gingutom kag nasablagan man. Sa kamatuoran wala sing bisan isa sa ila ang yara sa kahimtangan sa pagpakig-ambit sa mga emblema upod ang apresasyon kag bug-os nga paghangop sang pagkaserioso sang okasyon​—⁠nga ang selebrasyon handumanan sang kamatayon sang Ginuo. Nagresulta ini sa paghukom batok sa ila, kay nagpakita sila sing dipagtahod, pagtamay pa gani, sa sini.​—⁠1 Corinto 11:​27-34.

Kinahanglanon ang Paghantop

Ang iban nagpakig-ambit sa mga emblema sang Memoryal bisan pa, sang ulihi, narealisar nila nga indi nila dapat ginhimo ini. Yadtong mga makatarunganon nga nagapakig-ambit sa mga emblema sang Memoryal ginpili sang Dios kag may testimoniya sang espiritu sang Dios para sina. (Roma 8:​15-17; 2 Corinto 1:21, 22) Indi ang ila personal nga desisyon ukon determinasyon ang naghimo sa ila nga takus. Ginlimitahan sang Dios ang kadamuon sadtong magagahom upod ni Cristo sa mga langit sa 144,000, isa ka diutay nga kadamuon kon ipaanggid sa tanan nga magabenepisyo gikan sa gawad ni Cristo. (Bugna 14:​1, 3) Ang pagpili nagsugod sang mga adlaw ni Jesus, busa karon may diutay na lamang nga umalambit. Kag samtang nagakapatay ang pila sa ila, inang kadamuon nagabuhin.

Ngaa ang isa mahimo nga makig-ambit sing sayop sa mga emblema? Mahimo nga bangod ini sa relihioso nga mga pagtamod sang una​—⁠nga ang tanan nga matutom mapalangit. Ukon mahimo nga bangod ini sa ambisyon ukon kakagod​—⁠isa ka balatyagon nga ang isa mas nagakabagay sangsa iban​—⁠kag ang handum nga mangin prominente. Ayhan resulta ini sang mabaskog nga mga emosyon nga nagautwas bangod sang daku nga mga problema ukon isa ka trahedya nga nagpadula sang interes sang isa sa kabuhi sa duta. Mahimo man nga bangod ini sang isa ka suod nga pag-abyanay sa isa nga may langitnon nga pagtawag. Kinahanglan nga dumdumon naton tanan nga ang desisyon iya lamang sang Dios, indi aton. (Roma 9:16) Gani kon ang isa ka tawo, ‘sa tapos mausisa ang iya kaugalingon’, nakatalupangod nga indi sia dapat magpakig-ambit sa mga emblema dapat na sia karon maglikaw.​—⁠1 Corinto 11:⁠28.

Ang paglaum nga gintanyag sang Dios sa kalabanan nga mga tawo amo ang kabuhi nga dayon sa isa ka paraiso nga duta. Isa ina ka daku nga pagpakamaayo nga pagalauman, kag isa nga aton gid maluyagan. (Genesis 1:28; Salmo 37:​9, 11) Diri sa duta nga makaupod liwat sang mga matutom ang ila ginbanhaw nga mga hinigugma kag makilala ang mga matarong sang una, subong nanday Abraham, Sara, Moses, Rahab, David, kag Juan Bautista​—⁠nga sila tanan napatay antes ginbuksan ni Jesus ang dalan sa langitnon nga kabuhi.​—⁠Mateo 11:11; ipaanggid ang 1 Corinto 15:​20-23.

Yadtong may dutan-on nga paglaum nagasaulog sang Panihapon sang Ginuo sing takus paagi sa ila pagtambong kag matinahuron nga pagtalupangod, bisan pa wala sila nagapakig-ambit sa tinapay kag alak. Sila man nakabenepisyo sa halad ni Cristo, nga nakabulig sa ila nga matigayon ang kalahamut-an nga tindog sa atubangan sang Dios. (Bugna 7:​14, 15) Samtang nagapamati sila sa ginadiskurso, ang ila apresasyon sa sagrado nga mga butang nagalig-on, kag ang ila handum sa pagpabilin nga nahiusa sa katawhan sang Dios bisan diin nagabaskog.

Sini nga tuig, sa tapos magtunod ang adlaw sa Martes, Abril 2, ang Memoryal pagasaulugon sa tanan nga kapin sa 78,000 ka kongregasyon sang mga Saksi ni Jehova sa bug-os nga duta. Magatambong ka bala?

[Footnote]

[Retrato sa pahina 8]

Ang mga Saksi ni Jehova nagasaulog sang Memoryal sing makaisa kada tuig