Report sang mga Manugbantala sang Ginharian

Maayong mga Buhat nga Nagahimaya kay Jehova

SA IYA Sermon sa Bukid, nagsiling si Jesus sa iya mga disipulo: “Paiwaga ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” (Mateo 5:16) Sing kaanggid, ang matuod nga mga Cristiano sa karon nagahimo sing “buhat nga maayo” nga nagahimaya kay Jehovah.

Ano ining maayong mga buhat? Nagalakip ini sa pagbantala sing maayong balita, apang importante man ang aton maayong paggawi. Sa masami ang aton maayong paggawi amo ang una nga nagaganyat sa mga tawo sa Cristianong kongregasyon. Ang masunod nga mga eksperiensia nagailustrar kon paano ang mga Saksi ni Jehova sa Mar­ti­nique ‘nagapaiwag sang ila kapawa sa atubangan sang mga tawo.’

◻ Samtang nagabantala sa pamalay-balay nga hilikuton, ginduaw sang isa sang mga Saksi ni Jehova ang isa ka Katoliko nga babayi. Sa sulod sang 25 ka tuig ining babayi nagapuyo upod sa isa ka lalaki nga wala sila makasal. Nahibaluan na niya ang mga panudlo sang mga Saksi ni Jehova, bangod mga pito ka tuig na ang nagligad, nakabaton sia sing libro nga Mahimu ka Mabuhi sing Dayon sa Paraiso sa Duta.a Nagpanugiron ang babayi sa Saksi: “Madamo gid ang mga relihion. Indi ko mahibaluan kon sin-o ang pagapatihan ko sa sining tanan nga kagumon.” Ginpaathag sang Saksi nga ang kamatuoran masapwan lamang sa Biblia kag agod mahibaluan ini, kinahanglan nga magtuon sia sa Kasulatan sing maid-id kag mangamuyo sa Dios sang iya espiritu kag pagtuytoy.

Sang ulihi, bisan interesado sa pagtuon sa Biblia, madamo nga beses nga nagpamalibad ang babayi sa pangagda nga magtambong sa Cristianong mga miting sa Kingdom Hall sang mga Saksi ni Jehova. Ngaa? Tuman gid sia ka mahuluy-on. Apang, sang gin-agda sa Memoryal sang kamatayon ni Cristo, nalandas niya ang iya pagkamahuluy-on kag nagtambong.

Ang nagpaganyat sa iya sing labi tuhoy sa miting amo ang mahigugmaon nga pakig-upod sa sulod sang Kingdom Hall. Wala pa gid niya maeksperiensiahan ang subong sadto ka tunay nga pag-abyanay sa iya simbahan! Pagkatapos sadtong miting nagsugod na sia sa pagtambong sa tanan nga miting nga ginahiwat sang lokal nga mga Saksi, kag sang ulihi ginpakaslan niya ang lalaki nga iya ginapuyo-puyo. Isa na sia karon ka bawtismado nga katapo sang kongregasyon.

◻ Ang maayong mga buhat sang isa pa ka Saksi nakapatubas sing maayong mga resulta. May mataas sia nga posisyon sa isa ka opisina. Pagkatapos makasulod sa trabaho ang isa ka tawo gikan sa isla sang Réunion, ginyubit sia sang iban nga mga mamumugon bangod sang iya pagkaputot. Nangin kaladlawan sia. Sa kabaliskaran, ang Saksi masami nga malulo kag matinahuron sa sining tawo. Sang ulihi ginpamangkot niya kon ngaa tuhay gid sia.

Ginpaathag sang Saksi nga ang iya matinahuron nga paggawi resulta sang mga prinsipio sa Biblia nga natun-an niya gikan sa mga Saksi ni Jehova. Ginpakita man niya kon ano ang ginasiling sang Kasulatan tuhoy sa mga katuyuan sang Dios kag ang paglaum sang isa ka bag-ong kalibutan. Ginbaton sang tawo ang isa ka pagtuon sa Biblia, nagsugod sa pagtambong sa Cristianong mga miting, kag ginpakaslan ang babayi nga iya ginapuyo-puyo.

Sang ulihi nagbalik sia sa Réunion. Sadto anay, nakaeksperiensia sia sing kabudlayan upod sa iya nga himata, labi na gid sa pamilya sang iya asawa. Apang sa karon nahamuot gid sila sa iya maayong Cristianong paggawi. Ang lalaki ginbawtismuhan kag karon isa na ka ministeryal nga alagad. Pila ka katapo sang pamilya, lakip ang iya asawa kag duha ka anak nga babayi, ang nagaalagad man sa Cristianong kongregasyon subong manugbantala sang maayong balita sang Ginharian sang Dios.

[Footnote]