Ang Panimalay ni Jehova Nagaagom sing Hamili nga Paghiusa
“Tuluka! Daw ano kaayo kag daw ano katahom sang mag-ulutod nga magpuyo sing tingob sa paghiusa!”—SALMO 133:1.
1. Ano ang kahimtangan sang madamong pamilya karon?
ANG pamilya yara karon sa katalagman. Sa madamong pamilya, ang mga higot sang pag-asawahay yara sa ital-ital. Ang diborsio labi nga nangin kinaandan, kag madamong kabataan sang nagdiborsio nga mga ginikanan ang nagabatyag sing daku nga kasubo. Minilyon ka pamilya ang di-malipayon kag di-nahiusa. Apang, may isa ka pamilya nga nakahibalo sing matuod nga kalipay kag tunay nga paghiusa. Ini amo ang bug-os uniberso nga panimalay ni Jehova nga Dios. Sa sini, linaksa ka di-kitaon nga mga anghel ang nagatuman sang ila gintangdo nga mga hilikuton nahisuno sa balaan nga kabubut-on. (Salmo 103:20, 21) Apang may pamilya bala sa duta nga nagaagom sing subong sini nga paghiusa?
2, 3. (a) Sin-o karon ang bahin sang bug-os uniberso nga panimalay sang Dios, kag sa ano naton mahimo mapaanggid ang tanan nga mga Saksi ni Jehova karon? (b) Anong mga pamangkot ang hinun-anunan naton?
2 Si apostol Pablo nagsulat: “Ginaluhod ko ang akon mga tuhod sa Amay, nga sa iya utang sang tagsa ka pamilya sa langit kag sa duta ang iya ngalan.” (Efeso 3:14, 15) Utang sang tagsa ka kaliwat sa duta ang iya ngalan sa Dios bangod sia amo ang Manunuga. Walay sapayan nga wala sing tawhanon nga mga pamilya sa langit, sa malaragwayon nga hambal ang Dios minyo sa iya langitnon nga organisasyon, kag may isa ka espirituwal nga nobya si Jesus nga magahiusa upod sa iya sa mga langit. (Isaias 54:5; Lucas 20:34, 35; 1 Corinto 15:50; 2 Corinto 11:2) Ang matutom nga mga hinaplas sa duta bahin na karon sang bug-os uniberso nga panimalay sang Dios, kag ang “iban nga mga karnero” ni Jesus, nga may dutan-on nga mga paglaum, amo ang palaabuton nga mga katapo sini. (Juan 10:16; Roma 8:14-17; Ang Lalantawan, Enero 15, 1996, pahina 31) Apang, ang tanan nga mga Saksi ni Jehova karon sarang mapaanggid sa isa ka nahiusa bug-os kalibutan nga panimalay.
3 Bahin ka bala sang dalayawon nga internasyonal nga panimalay sang mga alagad sang Dios? Kon amo, ginaagom mo ang isa sang labing daku nga mga pagpakamaayo nga matigayon ni bisan sin-o. Minilyon ang nagapamatuod nga ang tugob-globo nga panimalay ni Jehova—ang iya kitaon nga organisasyon—isa ka duog nga may paghidait kag paghiusa sa kalibutanon nga desyerto sang pinuyasay kag binangigay. Paano malaragway ang paghiusa sang bug-os kalibutan nga panimalay ni Jehova? Kag anong mga butang ang nagapasanyog sining paghiusa?
Daw Ano Kaayo kag Daw Ano Katahom!
4. Sa imo kaugalingon nga mga tinaga, paano mo ipabutyag ang ginasiling sang Salmo 133 nahanungod sa utudnon nga paghiusa?
4 Gin-apresyar sing tudok ni salmista David ang utudnon nga paghiusa. Nainspirar pa gani sia sa pag-amba nahanungod sini! Handurawa sia upod sang iya arpa samtang nagaamba sia: “Tuluka! Daw ano kaayo kag daw ano katahom sang mag-ulutod nga magpuyo sing tingob sa paghiusa! Kaangay ini sang maayo nga lana sa ulo, nga nagailig sa bungot, sa bungot ni Aaron, nga nagailig sa liab sang iya mga panapton. Kaangay ini sang tun-og sang Hermon nga nagapanaug sa mga bukid sang Sion. Kay didto si Jehova nagsugo sang pagpakamaayo, bisan sang kabuhi tubtob sa tion nga walay latid.”—Salmo 133:1-3.
5. Pasad sa Salmo 133:1, 2, anong pagpaanggid ang ginhimo sa ulot sang mga Israelinhon kag sang mga alagad sang Dios karon nga adlaw?
5 Yadtong mga pinamulong naaplikar sa utudnon nga paghiusa nga naagom sang dumaan nga katawhan sang Dios, ang mga Israelinhon. Sang didto sila sa Jerusalem para sa ila tatlo ka tuigan nga mga piesta, nagpuyo gid sila sing tingob sa paghiusa. Bisan nga naghalin sila sa nanuhaytuhay nga mga tribo, isa sila ka panimalay. Ang pag-inupdanay may maayo nga epekto sa ila, kaangay sang nagaparepresko nga inughaplas nga lana nga may mahumot nga kaamyon. Sang ginbubo ining lana sa ulo ni Aaron, nag-ilig ini pakadto sa iya bungot kag naglab-ot sa liab sang iya panapton. Para sa mga Israelinhon, ang pag-inupdanay may maayo nga impluwensia nga naglapnag sa nagtipon nga katawhan sa kabilugan. Ang mga di-paghangpanay nalubad, kag ang paghiusa napasanyog. Ang kaanggid nga paghiusa nagaluntad sa tugob-globo nga panimalay ni Jehova karon. Ang tayuyon nga pag-inupdanay may maayong espirituwal nga epekto sa mga katapo. Ang bisan anong mga di-paghangpanay ukon mga palaligban nagakadula samtang ang laygay sang Pulong sang Dios ginaaplikar. (Mateo 5:23, 24; 18:15-17) Ginaapresyar sing daku sang katawhan ni Jehova ang alalangay nga pagpalig-on nga nagaresulta gikan sa ila utudnon nga paghiusa.
6, 7. Paano ang paghiusa sang Israel kaanggid sang tun-og sang Bukid nga Hermon, kag diin karon masapwan ang pagpakamaayo sang Dios?
6 Paano ang pagpuyo sing tingob sang Israel sa paghiusa kaangay man sang tun-og sang Bukid nga Hermon? Ti, sanglit ang putukputukan sining bukid kapin sa 2,800 metros sa ibabaw sang nibel sang dagat, ginakulapan ini sang yelo sa halos bug-os nga tuig. Ang mayelo nga putukputukan sang Hermon nagapalapuyot sang alisngaw sa gab-i kag sa amo nagapatubas sing bugana nga tun-og nga nagaamlig sa mga talamnan sa tion sang malawig nga tig-ilinit. Ginadala sang mabugnaw nga hangin halin sa bukid sang Hermon ining mga alisngaw sa bagatnan tubtob sa Jerusalem, diin nagalapuyot ini subong tun-og. Gani ang salmista nakapamulong sing husto nahanungod sa ‘tun-og sang Hermon nga nagapanaug sa Bukid nga Sion.’ Daw ano kaayo nga pahanumdom tuhoy sa nagaparepresko nga impluwensia nga nagapasanyog sang paghiusa sa panimalay sang mga sumilimba ni Jehova!
7 Antes gintukod ang Cristianong kongregasyon, ang Sion, ukon Jerusalem, amo ang sentro sang matuod nga pagsimba. Hanti, diri sini nga ginsugo sang Dios ang pagpakamaayo. Sanglit ang Tuburan sang tanan nga pagpakamaayo nagapuyo nga malaragwayon sa santuaryo sa Jerusalem, ang mga pagpakamaayo magahalin didto. Bangod ang matuod nga pagsimba wala na ginalatiran sa isa ka lokasyon, busa, ang pagpakamaayo, gugma, kag paghiusa sang mga alagad sang Dios masapwan sa bug-os nga duta karon. (Juan 13:34, 35) Ano ang pila ka rason nga nagapasanyog sining paghiusa?
Mga Rason nga Nagapasanyog sang Paghiusa
8. Ano ang matun-an naton nahanungod sa paghiusa sa Juan 17:20, 21?
8 Ang paghiusa sang mga sumilimba ni Jehova nasandig sa pagsunod sa nahangpan sing husto nga Pulong sang Dios, lakip na sa mga panudlo ni Jesucristo. Paagi sa pagpadala ni Jehova sang iya Anak sa kalibutan sa pagpanaksi sa kamatuoran kag sa pagkapatay sing mahalaron nga kamatayon, ang dalan nabuksan para sa pagporma sang nahiusa nga Cristianong kongregasyon. (Juan 3:16; 18:37) Ang tunay nga paghiusa sa tunga sang mga katapo gin-athag sang si Jesus nangamuyo: “Nagapangabay ako, indi lamang tungod sini, kundi tungod man sa mga magatuo sa akon paagi sa ila pulong; agod nga sila tanan mangin isa, subong nga ikaw, Amay, nahiusa sa akon kag nahiusa ako sa imo, agod sila man mahiusa sa aton, agod ang kalibutan magtuo nga ginpadala mo ako.” (Juan 17:20, 21) Natigayon gid man sang mga sumulunod ni Jesus ang paghiusa nga kaanggid sa nagaluntad sa tunga sang Dios kag sang iya Anak. Ini bangod gintuman nila ang Pulong sang Dios kag ang mga panudlo ni Jesus. Ini man nga panimuot amo ang daku nga rason sa paghiusa sang bug-os kalibutan nga panimalay ni Jehova karon.
9. Ano ang papel sang balaan nga espiritu sa paghiusa sang katawhan ni Jehova?
9 Ang isa pa ka rason nga nagahiusa sa katawhan ni Jehova amo nga kita may balaan nga espiritu, ukon aktibo nga puwersa, sang Dios. Nagabulig ini sa aton nga mahangpan ang ginbuyagyag nga kamatuoran sang Pulong ni Jehova kag busa maalagad sia sing nahiusa. (Juan 16:12, 13) Ang espiritu nagabulig sa aton sa paglikaw sa nagapabahinbahin nga undanon nga mga buhat subong sang pinuyas, kahisa, kasingkal, kag paindis-indis. Sa baylo, ang espiritu sang Dios nagapaposible nga mapalambo naton ang nagahiusa nga bunga sang gugma, kalipay, paghidait, pagbatas, kalulo, pagkaayo, pagtuo, kalum-ok, kag pagpugong sa kaugalingon.—Galacia 5:19-23.
10. (a) Anong pagpaanggid ang matigayon sa ulot sang gugma nga nagaluntad sa isa ka nahiusa tawhanon nga pamilya kag sa gugma nga makita sa tunga sang mga debotado kay Jehova? (b) Paano ginpabutyag sang isa ka katapo sang Nagadumala nga Hubon ang iya balatyagon nahanungod sa pagtipon upod sa iya espirituwal nga mga kauturan?
10 Ang mga katapo sang nahiusa nga pamilya nagahigugmaanay sa isa kag isa kag malipayon nga nagaulupuray. Sing kaanggid, ang mga yara sa nahiusa nga panimalay sang mga sumilimba ni Jehova nagahigugma sa iya, sa iya Anak, kag sa mga masigkatumuluo. (Marcos 12:30; Juan 21:15-17; 1 Juan 4:21) Subong nga ang mahigugmaon kinaugali nga panimalay nagakalipay nga magsaluhay sa pagkaon, ang mga debotado sa Dios nalipay sa pagtambong sa Cristianong mga miting, mga asambleya, kag mga kombension agod makabenepisyo gikan sa makalilipay nga pag-inupdanay kag maayo gid nga espirituwal nga pagkaon. (Mateo 24:45-47; Hebreo 10:24, 25) Ang isa ka katapo sang Nagadumala nga Hubon sang mga Saksi ni Jehova nagsiling anay: “Para sa akon, ang pagtipon upod sa mga kauturan amo ang isa sang labing daku nga mga kalipay sa kabuhi kag tuburan sang pagpalig-on. Luyag ko mag-abot sa Kingdom Hall upod sa mga nahauna, kag magbiya upod sa mga naulihi, kon mahimo pa. Nagabatyag ako sing nasulod nga kalipay kon nagapakighambal sa katawhan sang Dios. Kon yara ako sa tunga nila nagabatyag ako nga nasulhayan kaupod sang akon pamilya.” Amo bala sina ang imo nabatyagan?—Salmo 27:4.
11. Sa anong hilikuton ang mga Saksi ni Jehova labi na nga nakasapo sing kalipay, kag ano ang resulta sang paghimo sa pag-alagad sa Dios subong ang pinakasentro nga butang sa aton kabuhi?
11 Ang isa ka nahiusa nga pamilya nagakalipay sa paghimo sa mga hilikuton sing magkaupod. Sa kaanggid, ang mga yara sa panimalay sang mga sumilimba ni Jehova nagakalipay sa paghimo sing nahiusa sang ila pagbantala sang Ginharian kag paghimo sing disipulo nga hilikuton. (Mateo 24:14; 28:19, 20) Ang regular nga pagpakigbahin sa sini nagapasuod sing labi sa aton sa iban nga mga Saksi ni Jehova. Ang paghimo sa pag-alagad sa Dios subong ang pinakasentro nga butang sa aton kabuhi kag ang pagsakdag sa tanan nga hilikuton sang iya katawhan nagapasanyog man sang espiritu sang pamilya sa tunga naton.
Ang Teokratikong Kahim-ong Kinahanglanon
12. Ano ang mga karakteristiko sang isa ka malipayon kag nahiusa nga pamilya, kag anong kahimusan ang nagapasanyog sing paghiusa sa nahaunang siglo nga Cristianong mga kongregasyon?
12 Ang isa ka panimalay nga may mabakod apang mahigugmaon nga pagkaulo kag nga mahim-ong mahimo gid nga magahiusa kag magamalipayon. (Efeso 5:22, 33; 6:1) Si Jehova isa ka Dios sang mahidaiton nga kahim-ong, kag ginakabig sia sang tanan sa iya panimalay subong “ang Supremo nga Isa.” (Daniel 7:18, 22, 25, 27; 1 Corinto 14:33) Ginakilala man nila nga gintangdo niya ang iya Anak, nga si Jesucristo, subong manunubli sang tanan nga butang kag ginhatag sa iya ang tanan nga awtoridad sa langit kag sa duta. (Mateo 28:18; Hebreo 1:1, 2) Upod kay Cristo subong ang Ulo sini, ang Cristianong kongregasyon isa ka mahim-ong, nahiusa nga organisasyon. (Efeso 5:23) Agod dumalahan ang mga hilikuton sang nahaunang-siglo nga mga kongregasyon, may isa ka nagadumala nga hubon nga ginahuman sang mga apostoles kag sang iban pa hamtong sa espirituwal nga “tigulang nga mga lalaki.” Ang indibiduwal nga mga kongregasyon may gintangdo nga mga manugtatap, ukon mga gulang, kag ministeryal nga mga alagad. (Binuhatan 15:6; Filipos 1:1) Ang pagtuman sa mga nagapanguna nagapasanyog sing paghiusa.—Hebreo 13:17.
13. Paano ginaganyat ni Jehova ang katawhan, kag ano ang resulta sini?
13 Apang ining tanan nga kahim-ong nagapanugda bala nga ang paghiusa sang mga sumilimba ni Jehova mahimo mapahanungod sa makusog, wala sing balatyagon nga pagpanguna? Indi! Wala sing butang nga di-mahigugmaon nahanungod sa Dios kag sa iya organisasyon. Ginaganyat ni Jehova ang katawhan paagi sa pagpakita sing gugma, kag kada tuig ginatos ka libo ang boluntaryo kag malipayon nga nangin bahin sang organisasyon ni Jehova paagi sa pagpabawtismo bilang simbulo sang ila bug-os tagipusuon nga dedikasyon sa Dios. May espiritu sila nga kaangay kay Josue, nga naglaygay sa mga masigka-Israelinhon: “Magpili kamo sini nga adlaw kon sin-o ang inyo alagdon . . . Apang para sa akon kag sa akon panimalay, magaalagad kami kay Jehova.”—Josue 24:15.
14. Ngaa masiling naton nga ang organisasyon ni Jehova teokratiko?
14 Subong bahin sang panimalay ni Jehova, indi lamang kita malipayon kundi malig-on man. Amo sini bangod ang iya organisasyon teokratiko. Ang Ginharian sang Dios isa ka teokrasya (halin sa Griegong the·osʹ, dios, kag kraʹtos, isa ka pagginahom). Isa ini ka pagginahom sang Dios, ginsugo kag ginpatok niya. Ang hinaplas nga “balaan nga pungsod” ni Jehova nagapasakop sa iya pagginahom kag busa teokratiko man. (1 Pedro 2:9) Upod sa Dakung Teokrata, si Jehova, subong ang aton Hukom, Manughatag-Kasuguan, kag Hari, may rason gid kita nga magbatyag sing kalig-unan. (Isaias 33:22) Apang, kamusta kon magabangon ang pila ka pagsinuay kag magabutang sa katalagman sang aton kalipay, kalig-unan, kag paghiusa?
Ang Nagadumala nga Hubon Nagapanghikot sa Pag-amlig sang Paghiusa
15, 16. Anong pagpinuyas ang nagbangon sadtong nahaunang siglo, kag ngaa?
15 Agod maamligan ang paghiusa sang isa ka pamilya, kon kaisa ang isa ka pagpinuyas mahimo nga dapat lubaron. Pananglitan, nian, nga ang isa ka espirituwal nga problema dapat lubaron sa pag-amlig sang paghiusa sang panimalay sang mga sumilimba sang Dios sadtong nahaunang siglo C.E. Ano ang dapat himuon? Ang nagadumala nga hubon nagpanghikot, naghimo sing mga pamat-od sa espirituwal nga mga problema. May Makasulatanhon nga rekord kita tuhoy sa subong sini nga paghulag.
16 Sang mga 49 C.E., ang nagadumala nga hubon nagtipon sa Jerusalem sa paglubad sang isa ka mabug-at nga problema kag sa sina nga paagi naamligan ang paghiusa sang “panimalay sang Dios.” (Efeso 2:19) Mga 13 ka tuig antes sini, si apostol Pedro nagbantala kay Cornelio, kag ang nahaunang mga Gentil, ukon katawhan sang mga pungsod, nangin bawtismado nga mga tumuluo. (Binuhatan, kapitulo 10) Sadtong nahaunang misyonero nga paglakbay ni Pablo, madamong Gentil ang nagbaton sang Cristianismo. (Binuhatan 13:1–14:28) Sa katunayan, isa ka kongregasyon sang Gentil nga mga Cristiano ang gintukod sa Antioquia, Siria. Ang pila ka Cristianong mga Judiyo nagpati nga ang Gentil nga mga nakumbertir dapat magpasirkunsidar kag magtuman sang Mosaikong Kasuguan, apang ang iban wala mag-ugyon. (Binuhatan 15:1-5) Ining pagpinuyas mahimo nga magadul-ong sa bug-os nga pagbinangig, ayhan sa pagporma sing nahamulag nga Judiyo kag Gentil nga mga kongregasyon. Busa ang nagadumala nga hubon naghulag sa gilayon sa pag-amlig sang Cristianong paghiusa.
17. Anong nagahiusa teokratikong paagi ang ginlaragway sa Binuhatan kapitulo 15?
17 Suno sa Binuhatan 15:6-22, “nagtipon ang mga apostoles kag ang tigulang nga mga lalaki agod tan-awon ang nahanungod sini nga butang.” Yara man ang iban, lakip ang isa ka delegasyon halin sa Antioquia. Ginpaathag una ni Pedro nga ‘paagi sa iya baba ang katawhan sang mga pungsod nakabati sang maayong balita kag nagtuo.’ Nian “ang dakung kadam-an” namati samtang ginsugid nanday Bernabe kag Pablo “ang madamong tanda kag kalatingalahan nga nahimo sang Dios paagi sa ila sa tunga sang mga pungsod,” ukon mga Gentil. Nian nagpanugda si Santiago kon paano lubaron ang problema. Pagkatapos makahimo sing desisyon ang nagadumala nga hubon, ginsugiran kita: “Ginpakamaayo sang mga apostoles kag sang tigulang nga mga lalaki pati sang bug-os nga kongregasyon nga magpadala sa Antioquia sing pinili nga mga lalaki gikan sa tunga nila upod kanday Pablo kag Bernabe.” Yadtong “pinili nga mga lalaki”—sanday Judas kag Silas—nagdala sing makapalig-on nga sulat sa mga masigkatumuluo.
18. Anong desisyon ang ginhimo sang nagadumala nga hubon may kaangtanan sa Mosaikong Kasuguan, kag paano ini nag-apektar sa Judiyo kag Gentil nga mga Cristiano?
18 Ang sulat nga nagapahibalo sang desisyon sang nagadumala nga hubon nagasugod paagi sa mga pulong: “Ang mga apostoles kag ang tigulang nga mga lalaki, mga kauturan, sa mga kauturan sa Antioquia kag Siria kag Cilicia nga naghalin sa mga pungsod: Mga panamyaw!” Ang iban nga mga kauturan nagtambong sa sining maragtason nga pagtipon, apang ang nagadumala nga hubon maathag nga ginahuman sang “mga apostoles kag tigulang nga mga lalaki.” Gintuytuyan sila sang espiritu sang Dios, kay ang sulat nagasiling: “Ginpakamaayo sang balaan nga espiritu kag namon nga indi na magdugang sing labi pa nga lulan sa inyo, luwas sining mga butang nga kinahanglan, nga maglihi kamo sa mga butang nga ginhalad sa mga idolo kag sa dugo kag sa mga butang nga nakuga kag sa pagpakighilawas.” (Binuhatan 15:23-29) Ang mga Cristiano wala ginasugo nga magpasirkunsidar kag magtuman sang Mosaikong Kasuguan. Ining desisyon nagbulig sa Judiyo kag Gentil nga mga Cristiano sa pagpanghikot kag sa pagpamulong nga may paghiusa. Ang mga kongregasyon nagkasadya, kag ang hamili nga paghiusa nagpadayon, subong nga amo man sa bug-os duta nga panimalay sang Dios karon sa idalom sang espirituwal nga pagtuytoy sang Nagadumala nga Hubon sang mga Saksi ni Jehova.—Binuhatan 15:30-35.
Mag-alagad sa Teokratikong Paghiusa
19. Ngaa nagbugana ang paghiusa sa panimalay sang mga sumilimba ni Jehova?
19 Ang paghiusa nagabugana kon ang mga katapo sang isa ka pamilya nagabinuligay sa isa kag isa. Amo man sa panimalay sang mga sumilimba ni Jehova. Bangod teokratiko, ang mga gulang kag ang iban pa sa nahaunang-siglo nga kongregasyon nag-alagad sa Dios nga nagakooperar sing bug-os sa nagadumala nga hubon kag nagabaton sang mga desisyon sini. Sa bulig sang nagadumala nga hubon, ang mga gulang ‘nagbantala sang pulong’ kag ang mga katapo sang mga kongregasyon sa kabilugan ‘nagpamulong nga may paghilisugot.’ (2 Timoteo 4:1, 2; 1 Corinto 1:10) Gani ang amo man Makasulatanhon nga mga kamatuoran ginhatag sa ministeryo kag sa Cristianong mga miting, sa Jerusalem man, sa Antioquia, sa Roma, sa Corinto, ukon sa bisan diin. Inang teokratikong paghiusa nagaluntad karon.
20. Agod amligan ang aton Cristianong paghiusa, ano ang dapat naton himuon?
20 Agod amligan ang aton paghiusa, kita tanan nga bahin sang tugob-globo nga panimalay ni Jehova dapat manikasog nga ipakita ang teokratikong gugma. (1 Juan 4:16) Dapat kita magpasakop sa kabubut-on sang Dios kag magpakita sing tudok nga pagtahod sa ‘matutom nga ulipon’ kag sa Nagadumala nga Hubon. Kaangay sang aton dedikasyon sa Dios, ang aton pagkamatinumanon, siempre pa, boluntaryo kag makalilipay. (1 Juan 5:3) Nagakaigo gid nga gin-angot sang salmista ang kalipay kag pagkamatinumanon! Sia nag-amba: “Dayawa ninyo si Jah! Malipayon ang tawo nga nagakahadlok kay Jehova, nga nagakalipay sing daku sa iya mga sugo.”—Salmo 112:1.
21. Paano naton mapamatud-an ang aton kaugalingon nga teokratiko?
21 Si Jesus, ang Ulo sang kongregasyon, teokratiko sing bug-os kag pirme nagahimo sang kabubut-on sang iya Amay. (Juan 5:30) Busa, sundon naton ang aton Huwaran paagi sa teokratiko kag nahiusa nga paghimo sang kabubut-on ni Jehova bilang pagkooperar sing bug-os sa Iya organisasyon. Nian upod ang tinagipusuon nga kalipay kag pasalamat, mapalanog naton ang ambahanon sang salmista: “Tuluka! Daw ano kaayo kag daw ano katahom sang mag-ulutod nga magpuyo sing tingob sa paghiusa!”
Paano Mo Sabton?
◻ Paano mahimo maangot ang aton Cristianong paghiusa sa Salmo 133?
◻ Ano ang pila ka rason nga nagapasanyog sang paghiusa?
◻ Ngaa ang teokratikong kahim-ong kinahanglanon sa paghiusa sang katawhan sang Dios?
◻ Paano naghulag ang nahaunang-siglo nga nagadumala nga hubon agod amligan ang paghiusa?
◻ Ano ang kahulugan sa imo sang pag-alagad nga may teokratikong paghiusa?
[Retrato sa pahina 13]
Ang nagadumala nga hubon nagpanghikot sa pag-amlig sang paghiusa