Matuod nga Paghiusa sa Tunga sang mga Cristiano—Paano?

¹ Ano ang makapahiusa sa kapin sa anom ka milyon ka tawo gikan sa 234 ka kadutaan nga may mga 380 ka lenguahe? Amo lamang ang pagsimba kay Jehova nga Dios. (Miq. 2:​12; 4:​1-3) Nahibaluan sang mga Saksi ni Jehova suno sa ila mismo naeksperiensiahan nga ang matuod nga paghiusa sang mga Cristiano nagakatabo karon. Subong ‘isa ka panong’ sa idalom sang aton ‘isa ka manugbantay,’ determinado kita nga pakigbatuan ining nagapabahinbahin nga espiritu sang kalibutan.​—⁠Juan 10:16; Efe. 2:2.

² Ang wala nagabag-o nga katuyuan ni Jehova amo nga ang tanan nga maalam nga tinuga mahiusa sa matuod nga pagsimba. (Bug. 5:13) Nakahibalo sang importansia sini, nangamuyo sing hanuot si Jesus tuhoy sa paghiusa sang iya mga sumulunod. (Juan 17:​20, 21) Paano ang tagsatagsa sa aton makaamot sa paghiusa sang Cristianong kongregasyon?

³ Kon Paano Matigayon ang Paghiusa: Kon wala ang Pulong kag espiritu sang Dios, indi gid matigayon ang Cristianong paghiusa. Ang pag-aplikar naton sang aton nabasa sa Biblia nagatugot sa espiritu sang Dios nga magpanghikot sing maayo sa aton kabuhi. Nagabulig ini sa aton nga ‘matipigan ang paghiusa sang Espiritu sa higot sang paghidait.’ (Efe. 4:3) Nagapahulag ini sa aton nga magpainumuray bangod sang gugma. (Col. 3:​13, 14; 1 Ped. 4:8) Ginapasanyog mo bala ang paghiusa paagi sa pagpamalandong sa Pulong sang Dios kada adlaw?

⁴ Ang sugo sa aton nga magbantala kag maghimo sing mga disipulo nagapahiusa man sa aton. Kon nagapangabudlay kita upod sa iban sa Cristianong ministeryo, nga “nagapanikasog sing tingob tungod sa pagtuo sang maayong balita,” nangin mga “masigkamanugpangabudlay kita sa kamatuoran.” (Fil. 1:​27; 3 Juan 8) Samtang ginahimo naton ini, nagabakod ang nagapahiusa nga mga higot sang gugma sa sulod sang kongregasyon. Ngaa indi mo pag-agdahon ang isa nga wala mo maupod sining karon lang nga updan ka sa ministeryo sa latagon sini nga semana?

⁵ Pribilehiyo gid naton nga mangin bahin sang lamang matuod kag internasyonal nga paghiliutod sa duta karon! (1 Ped. 5:9) Sa Disiembre kag sa maaga nga bahin sang Enero, linibo sa Pilipinas ang makaeksperiensia gid sining paghiusa sa “Himayaa ang Dios” nga mga Distrito nga Kombension. Kabay nga ang tagsa sa aton makaamot sa sining hamili nga paghiusa paagi sa pagbasa sa Pulong sang Dios kada adlaw, paagi sa paghusay sing mga di-paghangpanay sa mahigugmaon nga paagi, kag paagi sa pagbantala sing maayong balita “sa isa ka tingog.”​—⁠Roma 15:6.