Mga Kasal nga Nagapadungog kay Jehova

Ang masunod nga artikulo tuhoy sa Cristianong mga kasal ginsulat primero sa Etiopia sa paghatag sing mabuligon nga panuytoy sa Amharico nga hambal para sa madamo sa sinang pungsod nga sining karon lang nangin mga Saksi ni Jehova. Nagahinun-anon ini sa pila ka lokal nga mga kustombre kag mga buhat nga mahimo nga tuhay sa lugar nga imo ginapuy-an. Mahimo ka mawili sa kinatuhayan. Sa amo man nga tion, ang artikulo nagahatag sing timbang nga laygay gikan sa Biblia nga maaplikar mo bisan pa nga ang mga kustombre sa kasal tuhay sa inyo lugar.

“CRISTIANONG mga Kasal nga Nagadala sing Kalipay” amo ang titulo sang isa ka matahom nga gintun-an nga artikulo sa Ang Lalantawan sang Oktubre 15, 1984. Ang masunod nga artikulo sa sadto nga guwa gintig-uluhan nga “Pag-agom sing Timbang nga Kalipay sa Sinalusalo sa Kasal.” (Para kay bisan sin-o nga nagahunahuna sa pagpakasal, may dugang pa maalamon nga laygay sa mga libro nga Making Your Family Life Happy, kapitulo 2, kag Your Youth​—⁠Getting the Best Out of It, kapitulo 19 kag 20.)⁠a Madamo na ang nangin mga Saksi ni Jehova sugod sang nagguwa yadto nga mga artikulo, gani luyag namon repasuhon ang pila ka punto nga nagakaigo gid sa aton lugar, subong man ang iban pa nagakabagay nga mga punto nga makabulig sa aton nga himuon ang mga kasal subong mga okasyon nga nagapadungog kay Jehova, ang Ginhalinan sang pag-asawahay.

Ang pamangkot nga dapat anay binagbinagon amo, San-o dapat hiwaton ang isa ka kasal? Ang petsa dapat bala kontrolon sang mga petsa sang tradisyunal nga panag-on sang lokal nga kasal? Ang lokal nga pagpati amo nga ang bisan anong kasal nga ginhimo sa iban nga tion indi magamadinalag-on. Isa ini ka disparatis nga wala sing sadsaran, kay madamong mag-asawa nga nagaalagad sing malipayon kag sing nahiusa kay Jehova ang wala magpakasal sa tradisyunal nga tion. Wala kita nagapati sa maayo ukon malain nga swerte. (Isaias 65:​11; Colosas 2:8) Indi naton mabuligan ang ditumuluo nga mga himata nga makita ang kinatuhayan sa tunga sang kamatuoran kag kabutigan kon italana naton ang petsa sang kasal suno sa ila mga disparatis. Ang katunayan amo, ang mga Cristiano mahimo magminyo sa bisan ano nga bulan.

Kon may pamulongpulong sa kasal nga ginhimos pagkatapos sang kinahanglanon nga sibil nga seremonya, maalamon nga indi magaligad ang madamong inadlaw sa tunga sang duha ka okasyon. Kon luyag sang duha nga may pamulongpulong sa kasal sa Kingdom Hall, dapat nila hambalon sing abanse ang mga gulang sa kongregasyon sa pagpangabay nga magamit ang tilipunan. Pat-uron sang lokal nga mga gulang nga ang mga kahimusan para sa seremonya magabilin sa ila nga may matinlo nga konsiensia. Ang oras dapat italana agod indi makaapektar sa bisan anong hilikuton sang kongregasyon. Ang utod nga lalaki nga magahatag sing pamulongpulong sa kasal magapakigkita anay sa nobyo kag nobya sa paghatag sing mabuligon nga laygay kag pat-uron nga wala sing moral ukon legal nga mga problema sa kasal kag nagaugyon sia sa mga plano para sa bisan anong sosyal nga pagtinipon nga magasunod. Ang pamulongpulong sa kasal magalawig sing mga tunga sa oras kag dapat ihatag sa talahuron nga paagi, nga nagapadaku sang espirituwal nga bahin. Ang pamulongpulong sa kasal mas importante gid sangsa punsion nga mahimo magsunod.

Ang Cristianong kasal isa ka maayong kahigayunan agod mapakita nga kita “indi bahin sang kalibutan.” (Juan 17:​14; Santiago 1:27) Ang aton kahim-ong dapat nga tumalagsahon. Nagakahulugan ini nga mangin husto kita sa oras sa baylo nga pahulaton ang mga tawo, nga ayhan nagatublag sa mga hilikuton sang kongregasyon. Dapat gid ini dumdumon ilabi na sang nobya, kay ang kalibutanon nga mga himata mahimo maglaygay sa iya nga magpaulihi​—⁠agod ipakita nga importante gid sia. Sa pag-abot sing husto sa oras sarang mapakita sang isa ka hamtong nga Cristianong utod nga babayi nga ang espirituwal nga mga kinaiya, kaangay sa pagkamapainubuson kag pagkamatugsilingon, importante sa iya! Subong man, kon may retratista nga ginaagda sa pagrekord sa okasyon, ang kahim-ong importante. Nagakaigo nga pangabayon ang retratista nga magakari nga nakadyaket, nakakurbata, kag nakapanapot sing pormal kag wala sia nagatublag sa pamulongpulong kon nagakuha sia sing mga retrato. Wala sing retrato ang kuhaon sa tion sang pangamuyo. Ang aton kahim-ong magapadungog kay Jehova kag magahatag sing maayo nga panaksi. Indi kinahanglan nga sundon ang kalibutanon nga mga kustombre sa kasal nga mahimo magatabon sa tunay nga kahulugan sang okasyon.

Ang punsion indi gid man kinahanglanon agod mangin madinalag-on ang isa ka kasal, apang indi supak sa Kasulatan ining makalilipay nga okasyon. Apang, ini nga pagtilipon para sa matuod nga mga Cristiano dapat nga tuhay gikan sa kalibutanon nga mga punsion nga may tanda sing pagpatuyang, lakas nga pag-inom, sobra nga pagkaon, magansal nga musika, nagatugda sing malaw-ay nga mga saot, kag bisan sing mga inaway. Ginalakip sang Biblia ang “mga kinagansal” sa mga buhat sang unod. (Galacia 5:21) Mas mahapos kontrolon sing nagakaigo ang indi tuman ka daku nga pagtilipon. Indi kinahanglan magtukod sing tolda agod paayawan ang popular nga mga kustombre. Kon ang iban mamat-od sa paggamit sing tolda para may espasyo ukon tungod sa paniempo, isa ini ka personal nga desisyon.

Ginpakita sang eksperiensia nga ang epektibo nga paagi sa paglatid sa kadamuon sang mga bisita amo ang paggamit sing espesipikong nasulat nga mga imbitasyon. Mas maalamon nga agdahon ang mga indibiduwal sa baylo sang bug-os nga kongregasyon, kag subong mahim-ong nga mga Cristiano, dapat naton tahuron inang mga limitasyon. Ang nasulat nga mga imbitasyon nagabulig man sa aton nga likawan ang mahuy-an kon magaabot sa punsion ang isa ka tawo nga na-disfellowship, kay kon matabo ina, madamong utod nga lalaki kag babayi ang mahimo mamat-od nga maglakat. (1 Corinto 5:​9-11) Kon agdahon sang kalaslon ang ditumuluo nga mga himata ukon mga kilala, pat-od gid nga limitado ini sa kadamuon, nga nagahatag sing mas daku nga importansia sa sadtong “may labot sa aton sa pagtuo.” (Galacia 6:10) Namat-od ang iban nga agdahon ang kalibutanon nga mga kilala ukon ditumuluo nga mga himata sa pamulongpulong sa kasal sa baylo nga sa punsion. Ngaa? Ti, may mga hitabo nga ang kalibutanon nga mga himata nagahimo sing makahuluya nga kahimtangan sa punsion sa kasal sa bagay nga madamong utod nga lalaki kag babayi ang naghunahuna nga indi sila mahimo nga makatener pa. Ang pila ka kalaslon naghimo sing kahimusan nga may isa lamang ka diutay nga sinalusalo upod sa suod nga mga katapo sang pamilya kag Cristianong mga abyan.

Suno sa Juan 2:​8, 9, ang pagpili sing isa ka “direktor sang sinalusalo” praktikal. Luyag sang nobyo nga pilion ang isa ka ginasaligan nga Cristiano nga magaatipan nga ang kahim-ong kag mataas nga mga talaksan ginahuptan. Kon ang mga bisita magadala sing mga regalo, indi ini dapat paghimuon sing ‘pakitakita.’ (1 Juan 2:16) Ang musika mahimo mangin makalilipay nga indi na kinahanglan nga laktan pa sing mapangduhaduhaan nga mga liriko, sobra nga kagahod, ukon magansal nga ritmo. Natukiban sang iban nga labing maayo nga pamatian anay sang isa ka gulang ang musika nga patokaron. Ang saot mahimo nga may mga tugalbong, kay madamong tradisyunal nga mga saot ang naghalin sa saot sa pertilidad kag nagapakita sing dinagakaigo nga pagpukaw sa sekso. Ang ‘tion sa pagkihad sing cake kag pagserbe sini upod sang champagne’ gintamod kon kaisa sang mga tagaguwa subong senyales sa pagpagusa. Sa katunayan, madamong Cristianong kalaslon ang namat-od nga wala sing alkohol sa mga punsion sa kasal, sa amo malikawan ang mga problema.

Sanglit luyag naton padunggan si Jehova, likawan naton ang pagpakitakita nga nagaganyat sing sobra nga igtalupangod sa aton kaugalingon. Bisan ang sekular nga mga magasin nagapamatok sa popular nga huyog sa pagpagusa. Daw ano ka dimaalamon para sa kalaslon ang mangutang bangod sa engrande nga kasal kag nian magakinot sa madamong tinuig agod mabayaran ang mga nagasto sa sinang isa ka adlaw lamang! Sa pagkamatuod, ang panapton nga suksukon sa okasyon dapat nga maugdang kag naareglo sing maayo, nga nagakaigo sa isa ka tawo nga nagapangangkon nga nagasimba sa Dios. (1 Timoteo 2:​9, 10) Ang artikulo nga “Christian Weddings Should Reflect Reasonableness” (The Watchtower sang Enero 15, 1969) naghatag sining makawiwili nga mga komento tuhoy sa panapton:

“Ang kasal sang isa ka tawo isa ka pinasahi nga okasyon, gani kinaandan na nga ginahatagan sing igtalupangod ang mangin malipayon kag matahom tan-awon. Apang wala ini nagakahulugan nga ang isa dapat magsuksok sing isa ka sahi nga trahe ukon amerikana. Maayo nga binagbinagon sang isa ang lokal nga mga estilo, gasto, kag personal nga mga luyag. . . . Apang, makatarunganon bala nga magbakal sing mahal nga panapton nga makapabug-at sa ila ukon sa iban? . . . Ang iban nga mga nobya nalipay magsuksok sing trahe sang isa ka mahal nga abyan ukon himata. Ang iban naman kontento na nga sila ang magatahi sang ila kaugalingon nga trahe sa kasal, ayhan agod makatahi sing panapton nga mahimo magamit sa iban pa nga mga okasyon sa ulihi. Kag nagakaigo gid para sa duha nga magpakasal sa ila labing matahom kinaandan nga panapton . . . Ang iban nga makasarang sing engrande nga kasal mahimo mamat-od sing personal nga maghiwat sing isa ka ‘simple nga kasal’ bangod sa ital-ital nga tion.”

Sa kaanggid, ang mga may bahin sa kasal (ang mga abyan sang nobyo kag mga abyan nga babayi sang nobya) indi kinahanglan nga madamo. Indi man nila dapat hatagan sing dinagakaigo nga igtalupangod ang ila kaugalingon paagi sa ila mga panapton kag mga hulag. Walay sapayan nga ang isa ka tawo nga disfellowship mahimo tugutan nga makatambong sa pamulongpulong sa Kingdom Hall, ang The Watchtower sang Oktubre 15, 1984, nagsiling: “Indi nagakaigo nga may mga tawo nga disfellowship ukon nga ang ila iskandaluso nga estilo sang paggawi nagasupak sing daku sa mga prinsipio sang Biblia sa mga may bahin sa kasal.”

Bisan pa si Jesus nagtambong sa kasal, indi naton mahanduraw nga magaugyon sia sa popular nga kustombre nga may prosesyon sang mga awto nga nagalibot sa banwa sing tuman kagahod; ginamultahan pa gani sang mga pulis ang mga tsuper nga nagabusina sa isa ka prosesyon sa kasal. (Tan-awa ang Mateo 22:⁠21.) Sa pagsumaryo, sa baylo nga ilugon ang pakitakita ukon kinaandan nga mga buhat sang mga tawo sang mga pungsod, ang mga Cristiano dapat magpakita sing kaalam sang mga maugdang.​—⁠Hulubaton 11:​2.

Apang kamusta ang pagtambong sa kasal sang mga kaingod, kalibutanon nga mga kaupod sa trabaho, ukon malayo nga mga himata kag mga kilala? Ang tagsa ka Cristiano dapat mamat-od sing personal sa sini. Nagakaigo dumdumon nga ang aton tion hamili, kay kinahanglan naton ang tion para sa aton ministeryo, personal nga pagtuon, kag iban pa nga mga hilikuton sa pamilya kag sa kongregasyon. (Efeso 5:15, 16) Sa talipuspusan sang mga semana, may mga miting kita kag pag-alagad sa latagon nga indi naton luyag mawasi. (Hebreo 10:​24, 25) Ang oras sang madamong kasal nagadungan sa mga asambleya ukon sa pinasahi nga mga panikasog sa latagon may kaangtanan sa Panihapon sang Ginuo. Indi naton dapat tugutan ang aton kaugalingon nga matublag gikan sa paghimo sing pinasahi man nga mga panikasog nga ginahimo sang aton mga kauturan sa bug-os nga kalibutan agod makatambong sa Panihapon sang Ginuo. Antes makatuon sang kamatuoran, madamong tion ang aton ginhinguyang upod sa mga kalibutanon, ayhan sa mga kahimtangan nga wala nagapadungog sa Dios. (1 Pedro 4:​3, 4) Tuhay na karon ang aton mga prioridad. Posible gid nga matamyaw ang kalibutanon nga kalaslon paagi sa pagpadala sing kard ukon sa pagduaw sa makadali sa masunod nga adlaw. Gingamit sang iban ining mga okasyon sa pagpanaksi, nagapaambit sing pila ka kasulatan nga nagakaigo sa mga bag-ong kasal.

Ang kasal nga nagapangibabaw ang espirituwal nga mga bahin sangsa kalibutanon nga mga paagi tunay nga nagapadungog kay Jehova. Paagi sa pagpat-od nga ginahuptan ini nga nahamulag sa kalibutan lakip sa mga disparatis kag mga pagpatuyang sini, paagi sa indi pagtugot nga magatublag ini sa regular nga teokratikong mga hilikuton, kag paagi sa pagpakita sing kaugdang sa baylo sang pagpakitakita, ang mga Cristiano magakalipay sa okasyon. Dugang pa, sarang nila mabalikan liwat ang okasyon nga may matinlo nga konsiensia kag makalilipay nga mga handumanan. Upod ang pagpakita sing kaalam kag pagkamakatarunganon, kabay nga ang aton tanan Cristianong mga kasal magahatag sing panaksi sa bunayag-sing-tagipusuon nga mga tagpanilag.

[Footnote]

[Kapsion sa pahina 24]

Wala ginasunod sang mga Cristiano ang tanan lokal nga kustombre sa kasal