Pamangkot

◼ Kon luyag sang magnobyahanay nga gamiton ang Kingdom Hall para sa ila kasal, ano nga mga butang ang kinahanglan nila binagbinagon upod sa mga gulang?

Ang mga kasal nga ginplano nahisuno sa mga prinsipio sang Biblia nagahatag sing kadungganan kay Jehova. Amo sini dapat ang matabo sa mga kasal nga ginahiwat sa Kingdom Hall, kay ang mga programa nga ginahiwat diri nagarepresentar sa aton organisasyon. Busa, agod mahimo “ang tanan nga butang sing disente kag suno sa kahimusan,” nagakaigo lamang nga maghinun-anon ang magnobyahanay upod sa lokal nga mga gulang kon luyag nila gamiton ang Kingdom Hall para sa ila kasal.​—1 Cor. 14:40.

Ang magnobyahanay nga luyag maggamit sang Kingdom Hall para sa ila kasal dapat magsulat sa komite sang pag-alagad sang kongregasyon nga nagagamit sina nga Kingdom Hall. Dapat ihatag nila ang ila sulat sing abanse, kag dapat sambiton nila ang petsa kag oras kon san-o nila luyag gamiton ang Kingdom Hall. Dapat dumdumon nila nga indi pagbag-uhon sang mga gulang ang iskedyul sang mga miting kon magsumpakil ini sa iskedyul sang kasal. Isa pa, ang nobya kag nobyo dapat may maayo nga reputasyon. Dapat nagakabuhi sila nahisuno sa mga prinsipio sang Biblia kag sa matarong nga mga talaksan ni Jehova.

Agod mapat-od nga ang kasal magapadungog sa aton dungganon nga Dios, dapat hinun-anunan anay sang magnobyahanay ang mga kahimusan sang kasal upod sa komite sang pag-alagad antes sila maghuman sing mga plano. Ang mga gulang indi magapilit sang ila personal nga mga luyag kon ano ang dapat himuon sa kasal, apang kon may makita sila nga daw kuwestionable sa plano, dapat magpasakop ang magnobyahanay sa pagbag-o nga ipanugda sang mga gulang. Dapat ang mga musika nga patukaron amo yadtong makita lamang sa mga Kingdom Melodies ukon sa aton libro sang mga ambahanon. Ang bisan ano nga pagdekorar nga himuon sa Kingdom Hall ukon pagbag-o sa plastada sang mga pulungkuan dapat man ilisensia. Kon may magakuha sing retrato ukon video, dapat indi ini magatublag sa pagkadungganon sang okasyon. Mahimo tugutan sang mga gulang ang mga pag-ensayo sa Kingdom Hall basta indi ini makasablag sa iban pa nga mga kahimusan sang kongregasyon. Wala sing imbitasyon nga ibutang sa information board. Apang, puede maghatag sing malip-ot nga pahibalo ang mga gulang sa Miting sa Serbisyo agod mahibaluan sang mga kauturan nga may kasal nga pagahiwaton sa Kingdom Hall.

Bisan pa ang mga abay indi kinahanglan nga bawtismado tanan, indi nagakaigo nga himuon nga abay yadtong mga tawo nga ang pagkabuhi supak gid sa mga prinsipio sang Biblia ukon ang paggawi magatublag sa panghunahuna sang mga tumalambong. Ang kasal dapat dumalahan sang isa ka gulang nga awtorisado sa pagkasal. Ini nga gulang kalipikado gid sa pagpadaku sang mga prinsipio sa Biblia nga naaplikar sa sining importante nga okasyon.​—1 Tim. 3:2.

Sanglit ang kasal makaapektar man sa gulang nga magakasal, dapat pahibaluon man sia sa mga kahimusan sang kasal. Dapat makigsugilanon sia anay sa magnobyahanay kag hibaluon kon ano ang ila paggawi samtang magnobyahanay pa sila; ang magnobyahanay dapat mangin prangka kag bunayag sa iya. Kon ang nobya ukon nobyo nakasal na sang una, dapat pamatud-an niya nga hilway sia sa pagminyo-liwat suno sa Kasulatan kag sa kasuguan. (Mat. 19:9) Kon nagdiborsio sia sa iban nga pungsod, dapat ipakita niya ang kopya sang legal nga dokumento nga nagapamatuod nga diborsiado ukon diborsiada sia.

Kon ang magnobyahanay nagakomunikar kag nagakooperar sing bug-os sa mga gulang, pat-od gid nga ang ila kasal mangin isa ka makalilipay nga okasyon para sa tanan.​—Hulu. 15:22; Heb. 13:17.