Padayuna ang Inyo Gugma sa Paghiliutod!

“Padayuna ninyo ang gugma sa paghiliutod.”​—⁠HEBREO 13:⁠1.

1. Ano ang himuon mo agod indi mapalong ang kalayo sa isa ka matugnaw nga gab-i, kag ano ang aton kaanggid sa sini nga responsabilidad?

MAKATALAGAM ang tugnaw sa guwa kag naganubo pa ang temperatura. Ang lamang nga nagapainit sa imo balay amo ang kalayo nga nagabitibiti sa dalabukan. Ang imo kabuhi nasandig sa padayon nga pagdabdab sang kalayo. Magapungko lamang bala ikaw kag magatan-aw samtang ang kalayo amat-amat nga nagakapalong kag ang mapula nga singkal sang mga baga amat-amat nga nagakapatay tubtob mangin abo? Sa pagkamatuod indi. Wala sing kakapoy nga ginadabukan mo ang kalayo agod indi mapalong. Sa isa ka kahulugan, ang kada isa sa aton may kaanggid sa sini nga hilikuton kon tuhoy sa mas importante nga “kalayo”​—⁠isa ka butang nga dapat magdabdab sa aton tagipusuon​—⁠ang gugma.

2. (a) Ngaa masiling nga ang gugma nagbugnaw sa sining katapusan nga mga adlaw? (b) Daw ano ka importante ang gugma sa matuod nga mga Cristiano?

² Nagakabuhi kita sa tion nga, suno sa madugay na gintagna ni Jesus, ang gugma magabugnaw sa tunga sang nagapangangkon nga mga Cristiano sa bilog nga kalibutan. (Mateo 24:12) Ginpatuhuyan ni Jesus ang labing importante nga sahi sang gugma, ang gugma para kay Jehova nga Dios kag para sa iya Pulong, ang Biblia. Nagabugnaw man ang iban nga sahi sang gugma. Gintagna sang Biblia nga sa “katapusan nga mga adlaw,” madamo ang “wala sing kinaugali nga gugma.” (2 Timoteo 3:​1-5) Matuod gid ini! Ang pamilya dapat kuntani mangin duog sang kinaugali nga gugma, apang bisan diri gani, ang kasingki kag pag-abuso​—⁠kon kaisa makahaladlok gid​—⁠kinaandan na. Apang, sa sining kalibutan nga wala sing gugma, ginasugo ang mga Cristiano nga indi lamang maghigugmaanay kundi magpakita sing nagasakripisyo sa kaugalingon nga gugma, ginauna ang iban sangsa kaugalingon. Dapat naton ipakita ining gugma sa paagi nga makita sang tanan, ginahimo ini nga amo ang nagapakilala nga tanda sang matuod nga Cristianong kongregasyon.​—⁠Juan 13:​34, 35.

3. Ano ang gugma sa paghiliutod, kag ano ang buot silingon sang pagtugot sa sini nga magpadayon?

³ Si apostol Pablo gin-inspirar sa pagsugo: “Padayuna ang inyo gugma sa paghiliutod.” (Hebreo 13:1) Suno sa isa ka publikasyon sang mga iskolar, ang Griegong tinaga diri nga ginbadbad “gugma sa paghiliutod” (phi·la·del·phiʹa) “nagapatuhoy sa mapinalanggaon nga gugma, pagpakita sing kaluoy, kahanuklog, pagtanyag sing bulig.” Kag ano ang buot silingon ni Pablo sang magsiling sia nga dapat naton padayunon ini nga sahi sang gugma? “Indi ini dapat magbugnaw,” siling sang amo gihapon nga publikasyon. Gani indi lamang kita dapat magbatyag sing gugma para sa aton kauturan; dapat man naton ipakita ini. Dugang pa, dapat naton huptan sing dayon ining gugma, wala gid ini ginatugutan nga magbugnaw. Mabudlay bala? Huo, apang buligan kita sang espiritu ni Jehova sa pagpalambo sing gugma sa paghiliutod kag sa paghupot sini. Binagbinagon naton ang tatlo ka paagi agod dabukan ang kalayo sining gugma sa aton mga tagipusuon.

Magpakita sing Kahanuklog

4. Ano ang kahanuklog?

⁴ Kon luyag mo pauswagon ang imo gugma para sa imo Cristianong kauturan nga lalaki kag babayi, dapat mo anay batyagon ini para sa ila, magpakita sing kahanuklog sa mga pagtilaw kag mga hangkat nga ginaatubang nila sa kabuhi. Amo sini ang ginpanugda ni apostol Pedro sang magsulat sia: “Kamo tanan maghupot sing pareho nga panghunahuna, nga nagapakita sing kahanuklog, nga may gugma sa paghiliutod, mainawaon, mapainubuson sa hunahuna.” (1 Pedro 3:8) Ang Griegong tinaga nga gingamit diri para sa pagpakita sing “kahanuklog” nagakahulugan sing “pag-antos upod sa.” Ang isa ka awtoridad tuhoy sa Biblikanhon nga Griego nagsiling tuhoy sa sining tinaga: “Ginalaragway sini ang panghunahuna nga nagaluntad kon makig-ambit kita sa ginabatyag sang iban nga subong bala daw kita sila.” Busa, kinahanglanon ang kahanuklog. Ang isa ka matutom, tigulang na nga alagad ni Jehova nagsiling anay: “Ang kahanuklog amo ang pagbakho sang akon tagipusuon sa imo pag-antos.”

5. Paano naton nahibaluan nga si Jehova may kahanuklog?

⁵ May amo bala sina nga kahanuklog si Jehova? May yara sa pagkamatuod. Halimbawa, mabasa naton ang tuhoy sa pag-antos sang iya katawhan nga Israel: “Sa tanan nila nga kapipit-an ginpiutan sia.” (Isaias 63:9) Wala lamang gintan-aw ni Jehova ang ila pag-antos; nagbatyag sia para sa iya katawhan. Ang iya mismo ginhambal sa iya katawhan nga narekord sa Zacarias 2:8 nagailustrar kon daw ano kabaskog ang iya ginbatyag: “Ang nagatandog sa imo nagatandog sa tawotawo sang akon mata.”⁠a Ang isa ka komentarista nagkomento tuhoy sining bersikulo: “Ang mata isa sang labing masibod kag delikado nga mga bahin sang lawas sang tawo; kag ang tawotawo sang mata​—⁠ang bulukasan diin nagasulod ang kapawa sang langit agod makakita​—⁠amo ang labing sensitibo, subong man importante, nga bahin sang mata. Wala na sing labaw pa sa sini nga makapaalinton sa sibu nga paagi sang daku kag mapinalanggaon nga pag-ulikid ni Jehova sa iya mga hinigugma.”

6. Paano si Jesucristo nagpakita sing kahanuklog?

⁶ Si Jesus man nagpakita pirme sing daku nga kahanuklog. Makapila sia “napahulag sang kaluoy” sa kahimtangan sang iya mga isigkatawo nga may balatian ukon kabudlayan. (Marcos 1:​41; 6:34) Ginpakita niya nga kon ang isa indi mangin maluluy-on sa iya hinaplas nga mga sumulunod, ginabatyag niya nga daw subong bala sa iya ini ginahimo. (Mateo 25:​41-46) Kag karon subong aton langitnon nga “mataas nga saserdote,” makapakita sia sing “simpatiya sa aton mga kaluyahon.”​—⁠Hebreo 4:⁠15.

7. Paano makabulig sa aton ang kahanuklog kon ang isa ka utod nga lalaki ukon babayi nagapaakig sa aton?

⁷ May “simpatiya sa aton mga kaluyahon”​—⁠indi bala ina makalulugpay? Sa pagkamatuod, amo man sini ang luyag naton himuon sa isa kag isa. Sa pagkamatuod, mas mahapos pangitaon ang kaluyahon sang iban. (Mateo 7:​3-5) Apang sa masunod nga tion nga paakigon ikaw sang isa ka utod nga lalaki ukon babayi, ngaa indi tilawan ini? Handurawa ang imo kaugalingon nga ikaw ang yara sa kahimtangan sina nga tawo, may subong sina nga gindak-an, subong sina nga personalidad, nga amo ang ginabangdan sang mga kaluyahon nga dapat landason. Mapat-od mo bala nga indi ikaw makahimo sing pareho man nga mga sayop​—⁠ayhan mas grabe pa gani? Sa baylo nga sobra ang paabuton gikan sa iban, dapat kita magpakita sing kahanuklog, nga magabulig sa aton nga mangin rasonable kaangay ni Jehova, nga ‘nagadumdom nga kita yab-ok.’ (Salmo 103:​14; Santiago 3:17) Nahibaluan niya ang aton mga limitasyon. Wala gid sia nagapaabot sing labaw sa masarangan naton. (Ipaanggid ang 1 Hari 19:​5-7.) Magpakita kita tanan sing kahanuklog sa iban.

8. Ano ang dapat naton himuon kon ang isa ka utod nga lalaki ukon babayi ginabudlayan?

⁸ Nagsulat si Pablo nga ang kongregasyon kaangay sang isa ka lawas nga may nanuhaytuhay nga bahin nga dapat magpanghikot nga may paghiusa. Sia nagdugang pa: “Kon ang isa ka bahin nagaantos, ang tanan nga bahin nagaantos upod sa sini.” (1 Corinto 12:​12-26) Dapat kita mag-antos man, ukon magpakita sing kahanuklog, upod sa mga ginabudlayan. Ang mga gulang nagapanguna sa paghimo sini. Nagsulat man si Pablo: “Sin-o ang maluya, kag ako indi maluya? Sin-o ang ginpasandad, kag wala ako nagasingkal?” (2 Corinto 11:29) Ang mga gulang kag nagalakbay nga mga manugtatap nagailog kay Pablo sa sining bahin. Sa ila mga pamulongpulong, sa ila pagbantay nga hilikuton, kag bisan sa ila pag-uyat sing hudisyal nga mga bagay, nagatinguha sila sa pagpakita sing kahanuklog. Si Pablo nagrekomendar: “Maghibi upod sa mga tawo nga nagahibi.” (Roma 12:15) Kon mabatyagan sang mga karnero nga ang mga manugbantay may kahanuklog gid sa ila, nakahangop sa ila mga limitasyon, kag nagapakita sing simpatiya sa mga kabudlayan nga ila ginaatubang, masami nga mas handa sila nga magbaton sing laygay, pagtuytoy, kag disiplina. Malangkagon sila nga magatambong sa mga miting, kay nagasalig sila nga makasapo sila sing ‘paumpaw sa ila mga kalag.’​—⁠Mateo 11:⁠29.

Pagpakita sing Apresasyon

9. Paano ginapakita ni Jehova nga ginaapresyar niya ang maayo sa aton?

⁹ Ang ikaduha nga paagi agod madabukan ang gugma sa paghiliutod amo ang pagpakita sing apresasyon. Agod maapresyar ang iban, dapat naton talupangdon kag pabaloran ang ila maayong mga kinaiya kag mga panikasog. Kon himuon naton ini, ginailog naton si Jehova mismo. (Efeso 5:1) Ginapatawad niya sa adlaw-adlaw ang aton madamo nga diutay nga mga sala. Ginapatawad man gani niya ang mabug-at nga mga sala kon ginapakita ang matuod nga paghinulsol. Kag kon napatawad na niya ang aton mga sala, wala na niya ini ginahunahuna. (Ezequiel 33:​14-16) Ang salmista namangkot anay: “Kon ang mga sala ang imo ginabantayan, O Jah, O Jehova, sin-o ang makatindog?” (Salmo 130:3) Ang ginatalupangod ni Jehova amo ang maayong mga butang nga aton ginahimo sa pag-alagad sa iya.​—⁠Hebreo 6:⁠10.

10. (a) Ngaa makatalagam nga madulaan sing apresasyon ang mag-asawa sa isa kag isa? (b) Ano ang dapat himuon sang isa nga nadulaan sing apresasyon sa iya tiayon?

¹⁰ Importante nga sundon ining huwaran labi na sa pamilya. Kon ang mga ginikanan magpakita sing apresasyon sa isa kag isa, nagatukod sila sing sulundan para sa pamilya. Sa sining dag-on nga wala nagadugay ang pag-asawahay, mahapos lang nga pasapayanan ang tiayon kag padakuon ang iya mga sayop kag pakadiutayon ang iya maayong mga kinaiya. Ining negatibo nga panghunahuna nagapaluya sa pag-asawahay, ginahimo ini nga isa ka dimakalilipay nga lulan. Kon ang imo apresasyon sa imo tiayon nagaluya, pamangkuta ang imo kaugalingon, ‘Wala gid bala sing maayong mga kinaiya ang akon tiayon?’ Hunahunaa liwat ang mga rason kon ngaa ginhigugma mo sia anay kag nagpakasal kamo. Nadula na gid bala ining tanan nga rason nga ginhigugma mo ining tumalagsahon nga tawo? Sa pagkamatuod wala; gani tinguhai gid nga apresyahon ang maayong mga kinaiya sang imo tiayon, kag ihambal ang imo apresasyon.​—⁠Hulubaton 31:⁠28.

11. Agod indi mangin salimpapaw ang gugma sa tiayon, anong mga buhat ang dapat likawan?

¹¹ Ang pagpakita sing apresasyon nagabulig man sa mag-asawa nga huptan ang ila paghigugmaanay nga wala sing pagkasalimpapaw. (Ipaanggid ang 2 Corinto 6:​6; 1 Pedro 1:⁠22.) Ini nga gugma, nga ginadabukan sang tinagipusuon nga apresasyon, indi magahatag sing duog para sa kapintas kon silahanon lamang, wala sing duog para sa mga tinaga nga masakit kag nagapakanubo, wala sing duog para sa indi pagbugnuhanay diin mahimo magligad ang pila ka adlaw nga wala man lang nagapabutyag sing malulo ukon maayo nga pulong, kag sa pagkamatuod wala sing duog para sa pisikal nga pagpanakit. (Efeso 5:​28, 29) Ang mag-asawa nga nagaapresyar gid sa isa kag isa nagapadungog sa isa kag isa. Wala nila ginahimo ini kon sa publiko lamang sila kundi sa kada tion nga makita sila ni Jehova​—⁠kon sa aton pa, sa tanan nga tion.​—⁠Hulubaton 5:⁠21.

12. Ngaa dapat magpabutyag sing apresasyon ang mga ginikanan sa maayo nga butang nga makita sa ila mga kabataan?

¹² Dapat man mabatyagan sang kabataan nga ginaapresyar sila. Indi buot silingon nga uluintuon sila sang mga ginikanan, kundi dapat nila hatagan sing komendasyon ang dalayawon nga mga kinaiya sang ila kabataan kag ang maayo nga ginahimo nila. Dumduma ang huwaran ni Jehova sa pagpabutyag sang iya kahamuot kay Jesus. (Marcos 1:11) Dumduma man, ang huwaran ni Jesus subong ang “agalon” sa isa ka parabola. Pareho nga komendasyon ang ginpabutyag niya sa duha ka ‘maayo kag matutom nga mga ulipon,’ bisan pa indi pareho ang ginhatag niya sa ila kag indi man pareho ang napatubas nila. (Mateo 25:​20-23; ipaanggid ang Mateo 13:⁠23.) Ang maalamon nga mga ginikanan nagapangita man sing mga paagi agod maapresyar nila ang tumalagsahon nga mga kinaiya, mga ikasarang, kag mga nahimuan sang tagsa ka bata. Sa amo man nga tion, ginatinguhaan nila nga indi pagpadakuon sing tuman ang mga nahimuan kag sa amo mapilitan ang ila kabataan sa pagtinguha nga malabawan ang isa kag isa sa ila. Indi nila luyag magdaku ang ila kabataan nga akig ukon nagakasubo.​—⁠Efeso 6:​4; Colosas 3:⁠21.

13. Sin-o ang nagapanguna sa pagpakita sing apresasyon para sa tagsa ka katapo sang kongregasyon?

¹³ Sa Cristianong kongregasyon, ang mga gulang kag nagalakbay nga mga manugtatap nagapanguna sa pagpakita sing apresasyon para sa tagsa ka indibiduwal nga katapo sang panong sang Dios. Mabudlay ang ila posisyon, kay may yara man sila mabug-at nga salabton nga magdisiplina sa pagkamatarong, magtadlong sa mga nakasala sa espiritu sang kalum-ok, kag maghatag sing mabaskog nga laygay sa mga nagakinahanglan sini. Paano nila ginabalanse ining magkatuhay nga mga salabton?​—⁠Galacia 6:​1; 2 Timoteo 3:⁠16.

14, 15. (a) Paano si Pablo nagpakita sing pagkabalanse tuhoy sa paghatag sing mabaskog nga laygay? (b) Paano mabalanse sang Cristianong mga manugtatap ang kinahanglanon nga tadlungon ang mga sayop kag ang kinahanglanon nga maghatag sing komendasyon? Iilustrar.

¹⁴ Daku nga bulig ang huwaran ni Pablo. Isa sia ka talalupangdon nga manunudlo, gulang, kag manugbantay. Ginhusay niya ang mga kongregasyon nga may mabug-at nga mga problema, kag maisugon nga wala sia magpugong sa paghatag sing mabaskog nga laygay kon kinahanglanon. (2 Corinto 7:​8-11) Ang pagrepaso sa ministeryo ni Pablo nagapahangop nga wala sia maggamit pirme sing nagasabdong nga metodo sa pagpanudlo​—⁠kundi kon kinahanglanon lamang ini ukon maalamon suno sa kahimtangan. Sa sini, nagpakita sia sing diosnon nga kaalam.

¹⁵ Kon ang ministeryo sang isa ka gulang sa atubangan sang kongregasyon ginapaangay sa isa ka musika, nian ang pagsabdong kag pagsaway mangin isa lamang ka nota nga nagabagay sa bug-os nga musika. Ina nga nota nagakaigo sa iya duog. (Lucas 17:​3; 2 Timoteo 4:2) Handurawa ang isa ka ambahanon nga nagaunod sina lamang nga isa ka nota, nga ginasulitsulit. Indi madugay mangin makaulugot ini pamatian. Gani man, ginatinguhaan sang Cristianong mga gulang nga bug-uson ang ila pagpanudlo kag ginapatahom ini paagi sa pagbulubag-o sini. Indi pagtadlong lamang sa mga problema ang unod sang ila pagpanudlo. Sa baylo, makapalig-on ang kabug-usan sini. Kaangay ni Jesucristo, ang una nga ginapangita sang mahigugmaon nga mga gulang amo ang maayo nga butang nga dapat hatagan sing komendasyon, indi ang sayop agod mulayon. Ginaapresyar nila ang lakas nga pagpangabudlay sang ila mga masigka-Cristiano. Nagasalig sila nga sa kabilugan, ang tagsatagsa nagahimo sang iya labing masarangan sa pag-alagad kay Jehova. Kag wala nagapugong ang mga gulang nga ipautwas ini sa mga pulong.​—⁠Ipaanggid ang 2 Tesalonica 3:⁠4.

16. Ano ang epekto sang mainapresyahon kag mahinuklugon nga panimuot ni Pablo sa iya mga masigka-Cristiano?

¹⁶ Pat-od nga ginbatyag sang kalabanan nga Cristiano nga gin-alagaran ni Pablo nga ginaapresyar niya sila kag may kahanuklog sa ila. Paano naton nahibaluan ini? Tan-awa kon ano ang ginbatyag nila para kay Pablo. Wala sila mahadlok sa iya, bisan pa may daku sia nga awtoridad. Indi, ginhigugma sia kag madali palapitan. Sang maghalin sia sa isa ka duog, ang mga gulang ‘naghakos sa iya kag mapinalanggaon nga ginhalukan sia’! (Binuhatan 20:​17, 37) Nagapasalamat gid ang mga gulang​—⁠kag kita tanan​—⁠nga si Pablo isa ka huwaran nga mailog naton! Huo, magpakita kita sing apresasyon sa isa kag isa.

Mga Buhat sang Mahigugmaon nga Kaayo

17. Ano ang pila ka maayong mga epekto sang mainayuhon nga mga buhat sa kongregasyon?

¹⁷ Ang isa sang labing maayo nga mga gatong para sa gugma sa paghiliutod amo ang simple lamang nga buhat sang kaayo. Subong sang ginsiling ni Jesus, “may kapin nga kalipay sa paghatag sangsa pagbaton.” (Binuhatan 20:35) Kon nagahatag kita sa espirituwal, sa materyal, ukon sang aton tion kag kusog, wala lamang naton ginapahalipay ang iban kundi ang aton man kaugalingon. Sa kongregasyon, ang kaayo makalalaton. Ang isa ka mainayuhon nga buhat nagapahulag sing amo man nga mga buhat. Indi madugayan, ang gugma sa paghiliutod magabugana!​—⁠Lucas 6:⁠38.

18. Ano ang kahulugan sang “kaayo” nga ginsambit sa Miqueas 6:​8?

¹⁸ Ginpalig-on ni Jehova ang iya katawhan nga Israel nga magpakita sing kaayo. Sa Miqueas 6:​8, aton mabasa: “Napahayag niya sa imo, O dutan-on nga tawo, kon ano ang maayo. Kag ano bala ang ginakinahanglan sa imo ni Jehova kundi ang paghimo sing matarong kag ang paghigugma sa kaayo kag ang paglakat sing mapainubuson upod sa imo Dios?” Ano ang buot silingon sang “paghigugma sa kaayo”? Ang Hebreong tinaga nga gingamit diri para sa “kaayo” (cheʹsedh) ginbadbad man sa Ingles subong “mercy” ukon kaluoy sa Hiligaynon. Suno sa The Soncino Books of the Bible, ining tinaga “nagakahulugan sing butang nga kapin ka aktibo sangsa diaktibo nga Ingles nga tinaga nga mercy. Nagakahulugan ini sing ‘kaluoy nga ginapabutyag sa mga buhat,’ ang paghimo sing personal nga mga buhat sang mahigugmaon nga kaayo indi lamang sa mga imol kag mga nawad-an, kundi sa tanan nga isigkatawo sang isa.” Sa amo, ang isa pa ka iskolar nagsiling nga ang cheʹsedh nagakahulugan sing “gugma nga ginapabutyag sa buhat.”

19. (a) Sa anong mga paagi kita mismo mag-una sa pagpakita sing kaayo sa iban sa kongregasyon? (b) Maghatag sing halimbawa kon paano ang gugma sa paghiliutod ginpakita sa imo.

¹⁹ Ang aton gugma sa paghiliutod indi teoriya lamang, ukon diaktibo. Matuod gid ini. Busa, mangita sing mga paagi nga makahimo ikaw sing mainayuhon nga mga butang para sa imo kauturan nga lalaki ka babayi. Sunda si Jesus, nga wala maghulat lamang sa mga tawo nga palapitan sia agod mangayo sing bulig kundi masami nga sia mismo ang nag-una. (Lucas 7:​12-16) Hunahunaa labi na ang mga nagakinahanglan gid sing bulig. Dapat bala duawon ang isa ka tigulang ukon nagamasakit nga tawo ukon ayhan may balaklon bala para sa iya? Nagakinahanglan bala ang isa ka ‘ilo’ sing pila ka tion kag igtalupangod? Nagakinahanglan bala ang isa ka ginapung-awan nga kalag sing isa nga magapamati sa iya ukon sing pila ka makalugpay nga mga pulong? Tubtob sa masarangan naton, hatagan naton sing tion ang pagpakita sining mainayuhon nga mga buhat. (Job 29:​12; 1 Tesalonica 5:​14; Santiago 1:27) Indi gid pagkalimti nga sa isa ka kongregasyon nga puno sing dihimpit nga mga tawo, ang isa sang labing importante nga mga buhat sang kalulo amo ang pagpatawad​—⁠kalimtan sing bug-os ang paghinakit, bisan pa kon may rason ikaw sa pagreklamo. (Colosas 3:13) Ang kahanda sa pagpatawad nagabulig sa paghupot sa kongregasyon nga wala sing mga pagbinahinbahin, dumot, kag pag-ilinaway, nga kaangay sang basa nga habol nga nagapalong sa kalayo sang gugma sa paghiliutod.

20. Paano naton tanan mausisa sing padayon ang aton kaugalingon?

²⁰ Mangin determinado kita tanan nga huptan ining importante nga kalayo sang gugma nga nagadabdab sa aton tagipusuon. Padayon nga usisaon naton ang aton kaugalingon. Nagapakita bala kita sing kahanuklog sa iban? Nagapakita bala kita sing apresasyon sa iban? Nagahimo bala kita sing mainayuhon nga mga buhat sa iban? Tubtob ginahimo naton ini, ang kalayo sang gugma magapainit sa aton paghiliutod bisan daw ano pa katugnaw kag walay patugsiling ining kalibutan. Kon amo, “padayuna ang inyo gugma sa paghiliutod”​—⁠karon kag tubtob sa walay katubtuban!​—⁠Hebreo 13:⁠1.

[footnote]

Ano sa Banta Mo?

◻ Ano ang gugma sa paghiliutod, kag ngaa dapat naton tugutan nga magpadayon ini?

◻ Paano ang kahanuklog makabulig sa aton sa paghupot sang aton gugma sa paghiliutod?

◻ Ano ang papel sang apresasyon sa gugma sa paghiliutod?

◻ Paano ang mga buhat sang kaayo nagapabugana sang gugma sa paghiliutod sa Cristianong kongregasyon?

[Kahon sa pahina 16]

Gugma nga May Binuhatan

Sang nagligad nga pila ka tuig, ang isa ka tawo nga nakatuon sa Biblia sa sulod sang isa ka tion upod sa mga Saksi ni Jehova daw nagaduhaduha gihapon tuhoy sa gugma sa paghiliutod. Nahibaluan niya nga si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:⁠35) Apang nabudlayan sia sa pagpati sa sini. Isa ka adlaw nakita niya ang Cristianong gugma nga may binuhatan.

Bisan pa indi makahalin sa wheel­chair, nagalakbay ini nga tawo sing malayo halin sa iya balay. Sa Betlehem, sa Israel, nagtambong sia sa isa ka miting sa kongregasyon. Didto, nag-insister ang isa ka Arabo nga Saksi nga magpaligad ang isa ka Saksi nga turista sing isa ka gab-i upod sa iya pamilya, kag gin-agda man ining estudyante sa Biblia. Antes magtulog, naglisensia ang estudyante sa tagbalay kon mahimo sia makaguwa sa veranda pagkaaga agod tan-awon ang pagbutlak sang adlaw. Mabaskog nga ginpaandaman sia sang tagbalay nga indi niya dapat paghimuon ini. Pagkaaga ginpaathag sining Arabo nga utod ang rason. Paagi sa isa ka manugbadbad, nagsiling sia nga kon mahibaluan sang iya mga kaingod nga may mga bisita sia nga mga Judiyo​—⁠subong amo ining estudyante sang Biblia​—⁠sunugon nila ang iya balay upod sa iya kag sa iya pamilya. Bangod naglibog ang ulo sang estudyante sa Biblia, namangkot sia, “Ti, ngaa ginbutang mo ang imo kaugalingon sa sini nga katalagman?” Wala nagagamit sing manugbadbad, gintulok sia sang Arabo nga utod sa mata kag nagsiling lamang, “Juan 13:⁠35.”

Nahamuot gid ang estudyante sa Biblia sa matuod nga gugma sa paghiliutod. Ginbawtismuhan sia wala madugay pagkatapos sadto.

[Kapsion sa pahina 18]

Ang mainabyanon kag mainapresyahon nga kinaugali ni apostol Pablo naghimo sa iya nga madali palapitan