Madumduman Mo Bala?

Nasapwan mo bala ang ulihi nga mga guwa sang Ang Lalantawan nga may praktikal nga kabilihanan sa imo? Nian ngaa indi tilawan ang imo memorya paagi sa masunod nga mga pamangkot?

◻ Ano ang mangin kaangay sang Armagedon? (Bugna 16:​14, 16)

Indi ini mangin isa ka nuklear nga apokalipsis ukon isa ka kalamidad nga ginhimo sang mga tawo. Indi, isa ini ka inaway sang Dios nga magatapos sa tanan tawhanon nga inaway, nga magahapay sa tanan nga nagasakdag sa sina nga mga inaway, kag magapaluntad sing matuod nga paghidait sa mga nagahigugma sing paghidait. Indi ini magapalantang. (Habacuc 2:3)​—⁠4/15, pahina 17.

◻ Ano nga sahi sang kasal ang nagapadungog kay Jehova?

Ang kasal nga nagapangibabaw ang espirituwal nga mga butang sangsa kalibutanon nga mga paagi tunay nga nagapadungog kay Jehova. Ang mga Cristiano magakalipay sa okasyon kon likawan nila ang malaw-ay nga kalibutanon nga mga kinabatasan, mga disparatis, kag mga pagpatuyang; kon indi nila pagtugutan nga magatublag ini sa regular nga teokratikong mga hilikuton; kag kon magpakita sila sing kaugdang sa baylo sang pagpakitakita.​—⁠4/15, pahina 26.

◻ Ano ang mga kinaiya sang tawo nga may integridad?

Ang tawo nga may integridad sarang masaligan, indi lamang sang iya isigkatawo kundi, ilabi na gid, sang Dios. Ang kaputli sang iya tagipusuon makita sa iya mga buhat. Indi sia salimpapaw. Indi sia malimbungon ukon magarot. (2 Corinto 4:2)​—⁠5/1, pahina 6.

◻ Ngaa nagsiling si Jeremias: “Maayo para sa tawo nga may ikasarang nga magdala sang gota sang iya pagkapamatan-on?” (Panalabiton 3:27)

Ang paglandas sa mga pagtilaw samtang pamatan-on nagabulig sa isa nga mangin handa sa pag-atubang sa mga kabudlayan sang pagkaadulto. (2 Timoteo 3:12) Ang mga kaayuhan sang pagkamatutom nagalabaw sing daku sa bisan anong umalagi nga kahapusan nga mahimo sang pagkompromiso.​—⁠5/1, pahina 32.

◻ Ano ang ginlandong nanday Moises kag Elias sa palanan-awon sang pagbaylo-dagway?

Sa konteksto sang pagbaylo-dagway, sanday Moises kag Elias nagakaigo nga nagalaragway sa hinaplas nga mga kauturan ni Jesus. Ang ila, subong man ni Jesus, ‘pagpakita nga may himaya’ naglaragway nga ang matutom nga hinaplas nga mga Cristiano “mahimaya kaupod” ni Jesus sa kahimusan sang langitnon nga Ginharian. (Lucas 9:​30, 31; Roma 8:17; 2 Tesalonica 1:10)​—⁠5/15, pahina 12, 14.

◻ Ano ang “balaan nga tinago” sang Dios? (1 Corinto 2:7)

Ang “balaan nga tinago” sang Dios nasentro kay Jesucristo. (Efeso 1:​9, 10) Apang, indi lamang ini pagkilala kay Jesus subong ang ginsaad nga Mesias. Nagadalahig ini sa langitnon nga panguluhan, ang Mesianikong Ginharian sang Dios, kag nagalakip sa papel nga gintangdo kay Jesus sa katuyuan sang Dios.​—⁠6/1, pahina 13.

◻ Paano dapat tamdon sang isa ka Cristiano ang pagtigulang ukon pagmasakit?

Sa baylo nga tamdon ining mga pagtilaw subong paglatid sang iya pag-alagad kay Jehova, dapat niya ini tamdon subong isa ka kahigayunan nga mapauswag ang iya pagsalig sa iya. Dapat man niya dumdumon nga ang kabilihanan sang isa ka Cristiano indi lamang matakus paagi sa kadamuon sang iya hilikuton kundi paagi man sa iya pagtuo kag pagkatudok sang gugma. (Marcos 12:​41-44)​—⁠6/1, pahina 26.

◻ Paano ang paggamit ni Jehova sa mga tawo sa baylo sang mga anghel sa pagsulat sang Biblia nagapakita sang iya daku nga kaalam?

Kon ang Biblia ginsulat nga wala sing tawhanon nga elemento, mahimo kita mabudlayan sa paghangop sa mensahe sang Biblia. Subong man, ang Biblia may kainit, pagkananuhaytuhay, kag ganyat nga ginahatag sang tawhanon nga elemento.​—⁠6/15, pahina 8.

◻ Ano ang sekreto sang kalipay sa pamilya?

Ang sekreto sang kalipay sa pamilya masapwan sa mga pahina sang Pulong sang Dios, ang Biblia, kag sa pag-aplikar sa mga prinsipio sini, subong sang pagpugong sa kaugalingon, pagkilala sa pagkaulo, maayong komunikasyon, kag gugma.​—⁠6/15, pahina 23, 24.

◻ Paano ang pagpang-ayo nga ginhimo ni Jesus tuhay sa kinaandan nga ginahimo sang mga nagapangangkon nga may gahom sa pagpang-ayo sa karon?

Wala sing makusog nga balatyagon nga ginpakita ang kadam-an kag wala sing dramatiko nga pagkadimahim-os sa bahin ni Jesus. Dugang pa, wala gid mapaslawan si Jesus nga ayuhon ang nagamasakit sa balibad nga ang ila dulot indi gid bastante ukon nga kulang sila sing pagtuo.​—⁠7/1, pahina 5.

◻ Paano ginbuligan ni Jehova ang iya katawhan nga makatigayon sing duog sa iya balaan nga katuyuan nahanungod sa iya ngalan kag Ginharian?

Una, gintugyan ni Jehova sa iya katawhan ang kamatuoran. Ikaduha, ginhatag niya sa ila ang iya balaan nga espiritu. Kag ikatlo, yara ang aton bug-os kalibutan nga paghiliutod kag ang kahimusan sang organisasyon ni Jehova sa pagsimba.​—⁠7/1, pahina 19, 20.

◻ Ano ang pagkatadlong? Ang pagkatadlong amo ang ekselente nga moralidad, pagkaayo, husto nga paggawi kag panghunahuna. Indi ini mahinay-maghulag nga kinaiya kundi isa nga aktibo, positibo. Ang pagkatadlong indi lamang paglikaw sa sala; nagakahulugan ini sing pagtinguha sa kon ano ang maayo. (1 Timoteo 6:11)​—⁠7/15, pahina 14.

◻ Ano ang labing hamili nga palanublion nga maliton sang mga ginikanan sa ila mga anak? Ang labing hamili nga panublion amo ang ila mismo halimbawa sang pagpakita sing gugma sa iban. Sing talalupangdon, dapat makita kag mabatian sang kabataan ang ila mga ginikanan nga nagapabutyag kag nagapakita sing matuod nga gugma sa Dios sa tanan nga ila ginahimo.​—⁠7/15, pahina 21.

◻ Ano ang pila ka kinahanglanon para sa isa ka epektibo nga pagtinuon sang pamilya?

Ang pagtinuon sang pamilya dapat mangin regular. Dapat ka ‘magbakal sing tion’ para sa pagtuon. (Efeso 5:​15-17) Himua nga makapapagsik sa kabataan ang mga tion sang pagtuon paagi sa paghimo nga buhi sa Biblia. Para malipay sa sini ang kabataan, dapat sila magbatyag nga nadalahig sa sini.​—⁠8/1, pahina 26, 28.