Sin-o ang Makalampuwas sa “Adlaw ni Jehova”?

“Ano bala nga sari sang mga tawo dapat mangin amo kamo sa balaan nga mga paggawi kag sa mga buhat sang diosnon nga debosyon, nga nagahulat kag nagadumdom pirme sang presensia sang adlaw ni Jehova!”​—⁠2 PEDRO 3:​11, 12.

1. Sin-o ang nangabudlay nga may espiritu kag gahom ni Elias?

SI Jehova nga Dios nagpili sa tunga sang katawhan sing mga indibiduwal nga mangin mga masigkamanunubli kaupod sang iya Anak, nga si Jesucristo, sa langitnon nga Ginharian. (Roma 8:​16, 17) Samtang yari pa sila sa duta, ang hinaplas nga mga Cristiano nangabudlay nga may espiritu kag gahom ni Elias. (Lucas 1:17) Sa naunang artikulo, nakita naton ang pila ka pagkaanggid sang ila mga ginahimo kag sang iya ni manalagna Elias. Apang kamusta ang ginhimo sang nagbulos kay Elias, nga si manalagna Eliseo?​—⁠1 Hari 19:​15, 16.

2. (a) Ano ang katapusan nga milagro ni Elias, kag ang nahauna ni Eliseo? (b) Ano ang pamatuod nga si Elias wala magkadto sa langit?

² Ang katapusan nga milagro nga ginhimo ni Elias amo ang paghawa sa mga tubig sang Suba sang Jordan paagi sa pagbunal sang iya opisyal nga kunop sa sini. Nagtugot ini nga makatabok sanday Elias kag Eliseo sa mamala nga duta. Samtang nagalakat sila sa nasidlangan nga bahin sang suba, gindala si Elias sang buhawi sa lain nga lokasyon sa duta. (Tan-awa ang kahon sa pahina 15 nga natig-uluhan “Diin nga mga Langit Nagsaka si Elias?”) Ang nabilin amo ang opisyal nga kunop ni Elias. Sang gingamit ini ni Eliseo sa pagbunal sa Jordan, ang mga tubig sini liwat nga naghawa, nga nagpaposible agod makabalik sia sa mamala nga duta. Gin-athag sini nga milagro nga si Eliseo nangin ang tal-us ni Elias sa pagpauswag sing matuod nga pagsimba sa Israel.​—⁠2 Hari 2:​6-15.

Ang Diosnon nga mga Kinaiya Kinahanglanon

3. Ano ang ginsiling nanday Pablo kag Pedro tuhoy sa presensia ni Jesus kag sa “adlaw ni Jehova”?

³ Mga siglo pagligad sang panahon nanday Elias kag Eliseo, gin-angot nanday apostol Pablo kag Pedro ang nagapakari nga “adlaw ni Jehova” sa presensia ni Jesucristo kag sa palaabuton pa sadto nga “bag-ong mga langit kag bag-ong duta.” (2 Tesalonica 2:​1, 2; 2 Pedro 3:​10-13) Agod makalampuwas sa dakung adlaw ni Jehova​—⁠kon laglagon sang Dios ang iya mga kaaway kag luwason ang iya katawhan​—⁠dapat naton pangitaon si Jehova kag ipakita ang kahagop kag pagkamatarong. (Sofonias 2:​1-3) Apang ang dugang pa nga mga kinaiya nagaathag samtang ginabinagbinag naton ang mga hitabo may kaangtanan kay manalagna Eliseo.

4. Ano ang papel sang kakugi sa pag-alagad kay Jehova?

⁴ Ang kakugi sa pag-alagad sa Dios kinahanglanon agod makalampuwas kita sa “adlaw ni Jehova.” Sanday Elias kag Eliseo makugi sa pag-alagad kay Jehova. Upod ang amo man nga kakugi, ang nagkalabilin karon sang ginhaplas nga mga Cristiano nagahimo sing balaan nga pag-alagad kay Jehova kag nagapanguna sa pagbantala sing maayong balita.⁠a Kutob sang tunga-tunga sang dekada 1930, ginpalig-on nila ang tanan nga nagbaton sing mensahe sang Ginharian kag naglaum nga magkabuhi sing dayon sa duta nga idedikar ang ila kaugalingon kay Jehova kag magpabawtismo. (Marcos 8:​34; 1 Pedro 3:21) Minilyon ang naghulag sing kalahamut-an sa sining pagpalig-on. Sadto anay yara sila sa espirituwal nga kadudulman kag patay sa sala, apang karon natun-an nila ang kamatuoran sang Dios, ginbaton ang paglaum nga kabuhi nga dayon sa dutan-on nga paraiso, kag makugi sa pag-alagad kay Jehova. (Salmo 37:​29; Bugna 21:​3-5) Paagi sa ila kakugi, kooperasyon, pagkamaabiabihon, kag iban pa maayong mga buhat, nagahatag sila sing daku nga kapahuwayan sa espirituwal nga kauturan ni Cristo nga yari pa sa duta.​—⁠Mateo 25:​31-46.

5. Ngaa importante gid ang maghimo sing maayong mga butang sa “mga kauturan” ni Jesus, kag ano ang aton halimbawa gikan sa adlaw ni Eliseo?

⁵ Ang mga nagahimo sing maayong mga butang para sa “mga kauturan” ni Jesus bangod ining mga hinaplas amo ang iya mga sumulunod may paglaum nga makalampuwas sa “adlaw ni Jehova.” Isa ka mag-asawa sa minuro sang Sunem ang ginpakamaayo sing daku bangod sang ila pagkamaluluy-on kag pagkamaabiabihon kay Eliseo kag sa iya alagad. Ining mag-asawa wala sing anak, kag ang bana tigulang na. Apang nanaad si Eliseo sa Sunemnon nga babayi nga magaanak sia sing lalaki, kag nagmatuod gid ini. Sang ining bugtong nga anak nga lalaki napatay pagligad sang pila ka tuig, si Eliseo nagkadto sa Sunem kag ginbanhaw sia. (2 Hari 4:​8-17, 32-37) Daw ano ka daku nga padya tungod sang pagpakita sing pagkamaabiabihon kay Eliseo!

6, 7. Anong halimbawa ang ginhatag ni Naaman, kag ano ang kahilabtanan sini sa paglampuwas sa “adlaw ni Jehova”?

⁶ Ang pagkamapainubuson ginakinahanglan agod mabaton ang pasad-sa-Biblia nga panuytoy gikan sa “mga kauturan” ni Cristo upod ang paglaum nga makalampuwas sa adlaw ni Jehova. Ang aruon nga pangulo nga hangaway sang Siria nga si Naaman dapat magpakita sing pagpaubos agod sundon ang panugda sang isa ka bihag nga Israelinhon nga bata nga babayi kag tinguhaan nga mag-ayo paagi sa pagkadto sa Israel agod makita si Eliseo. Sa baylo nga magguwa sa iya balay agod sug-alawon si Naaman, si Eliseo nagpadala sa iya sini nga mensahe: “Magpaligo ka sing makapito sa Jordan agod ang imo unod mauli sa imo; kag magmangin matinlo ka.” (2 Hari 5:10) Nasaklaw ang bugal ni Naaman, kag naakig sia, apang pagkatapos nga mapainubuson sia nga naglakat kag naglumoy sa Jordan sing makapito, “ang iya unod nag-uli kaangay sa unod sang diutay nga bata kag nagtinlo sia.” (2 Hari 5:14) Antes magpauli, si Naaman naglakbay pabalik sa Samaria agod magpasalamat sa manalagna ni Jehova. Bangod indi luyag nga manginpulos sa materyal gikan sa hatag-Dios nga mga gahom, si Eliseo nagsug-alaw kay Naaman apang wala magbaton sing bisan ano nga dulot. Si Naaman mapainubuson nga nagsiling kay Eliseo: “Ang imo alagad indi na magdulot sing halad-nga-sinunog ukon halad sa iban nga mga dios kundi kay Jehova.”​—⁠2 Hari 5:⁠17.

⁷ Paagi sa mapainubuson nga pagsunod sa Makasulatanhon nga laygay sang mga hinaplas, minilyon ang bugana nga ginapakamaayo karon. Dugang pa, paagi sa pagpakita sing pagtuo sa halad-gawad ni Jesus, ining mga bunayag sing tagipusuon nangin matinlo sa espirituwal. Nagaagom karon sila sing pribilehiyo nga mangin mga abyan nanday Jehova nga Dios kag Jesucristo. (Salmo 15:​1, 2; Lucas 16:9) Kag ang ila debosyon sa Dios kag sa pag-alagad sa iya pagapadyaan paagi sa pagluwas sa ila gikan sa dayon nga paglaglag sa bugalon, dimahinulsulon nga mga makasasala sa nagapakari sing madasig nga “adlaw ni Jehova.”​—⁠Lucas 13:​24; 1 Juan 1:⁠7.

“Sin-o Bala ang Dampig sa Akon? Sin-o?”

8. (a) Ano ang panimuot sang mga makalampuwas sa “adlaw ni Jehova” sa paghimo sang kabubut-on sang Dios? (b) Anong hilikuton ang ginhatag kay Jehu? (c) Ano ang natabo kay Jesebel?

⁸ Ang mga nagalaum nga makalampuwas sa “adlaw ni Jehova” dapat man mangin determinado sa paghimo sa kabubut-on sang Dios. Si Elias masidla nga nagtagna sang kalaglagan sang manugpatay, nagasimba kay Baal nga pamilya ni Hari Acab. (1 Hari 21:​17-26) Apang, antes ginhimo ining pagpatay, dapat tapuson ni Eliseo nga tal-us ni Elias ang pila ka wala pa matapos nga hilikuton. (1 Hari 19:​15-17) Sang ang gintalana nga tion ni Jehova nag-abot, ginsugo ni Eliseo ang isa ka alagad sa paglakat kag sa paghaplas sa bag-ong pangulo sang hangaway nga si Jehu subong ang bag-ong hari sang Israel. Sa tapos mabubo ang lana sa ulo ni Jehu, ang mensahero nagsiling sa iya: “Amo ini ang ginasiling ni Jehova nga Dios sang Israel, ‘Ginahaplasan ko ikaw subong hari sa ibabaw sang katawhan ni Jehova, nga amo, sa ibabaw sang Israel. Kag laglagon mo ang panimalay ni Acab nga imo agalon, kag dapat ko itimalos ang dugo sang akon mga alagad nga mga manalagna kag ang dugo sang tanan nga alagad ni Jehova sa kamot ni Jesebel. Kag ang bug-os nga panimalay ni Acab dapat mawala.’ ” Ang malauton nga si Reyna Jesebel ginhaboy sa mga ido kag wala makatigayon sing desente nga lubong.​—⁠2 Hari 9:​1-10.

9, 10. Paano natuman ang pinamulong ni Elias kay Jesebel?

⁹ Ginkilala sang mga tinawo ni Jehu ang pagkaimportante sang paghaplas kag ginpahayag sia subong bag-ong hari sang Israel. Nagpanghikot sing maisugon, si Jehu nagdalidali pakadto sa Jezreel agod sugdan ang iya hilikuton nga pagpatay sa apostata nga mga lider sang pagsimba kay Baal. Ang una nga naigo sing makamamatay nga pana ni Jehu amo ang anak ni Acab, nga si Hari Joram. Nagsakay sia pakadto sa siudad agod mamangkot kon bala nagkari si Jehu sa isa ka mahidaiton nga misyon. “Ano bala nga paghidait samtang tama kadamo ang pagkamakihilawason ni Jesebel nga imo iloy kag ang iya mga pagkadiwatahan?” sabat ni Jehu. Sa sina, ang pana ni Jehu naglapos sa tagipusuon ni Joram.​—⁠2 Hari 9:​22-24.

¹⁰ Ang diosnon nga mga babayi nagalikaw nga mangin kaangay ni Jesebel ukon bisan sin-o nga kaangay niya. (Bugna 2:​18-23) Sang mag-abot si Jehu sa Jezreel, si Jesebel nagpatahom. Naggawa sa talambuan, gintamyaw niya si Jehu sing mauligyaton. Ginpamangkot ni Jehu ang mga alagad ni Jesebel: “Sin-o bala ang dampig sa akon? Sin-o?” Sa gilayon, duha ukon tatlo ka opisyales sang palasyo ang naggawa. Dampig bala sila kay Jehu? “Ihulog sia!” sugo niya. Sa sina, naghulag sila sa gilayon, kag ginhulog sa talambuan ang malaut nga si Jesebel. Gintapaktapak sia, ayhan sang mga kabayo. Sang nag-abot ang mga tawo agod ilubong sia, ‘wala na sila sing nakita kundi ang iya bagol kag mga tiil kag mga palad sang iya mga kamot.’ Tumalagsahon gid ini nga katumanan sang pinamulong ni Elias: “Kaunon sang mga ido ang unod ni Jesebel!”​—⁠2 Hari 9:​30-37.

Tinagipusuon nga Pagsuporta sa Matuod nga Pagsimba

11. Sin-o si Jehonadab, kag paano niya ginpakita ang iya pagsuporta sa matuod nga pagsimba?

¹¹ Ang mga nagalaum nga makalampuwas sa “adlaw ni Jehova” kag magkabuhi sing dayon sa duta dapat magsuporta sing bug-os tagipusuon sa matuod nga pagsimba. Dapat sila mangin kaangay ni Jehonadab, ukon Jonadab, isa ka di-Israelinhon nga sumilimba ni Jehova. Samtang padayon nga ginatuman ni Jehu ang iya asaynment sing makugihon, luyag ni Jehonadab nga ipakita ang iya pag-ugyon kag pagsuporta. Gani naglakat sia agod sugataon ang bag-ong hari sang Israel, nga manugkadto sa Samaria agod patyon ang mga nagkalabilin sa panimalay ni Acab. Sang makita si Jehonadab, si Jehu namangkot: “Matarong bala ang imo tagipusuon sa akon, subong nga ang akon tagipusuon matarong ayon sa imo tagipusuon?” Ang positibo nga sabat ni Jehonadab nagpahulag kay Jehu nga idaho ang iya kamot kag pasakyon si Jehonadab sa iya kangga sa inaway, nga nagasiling: “Upod ka sa akon kag tan-awa ang akon kakugi kay Jehova.” Sing walay langan, ginbaton ni Jehonadab ang pribilehiyo nga ipakita ang iya pagsuporta sa hinaplas nga manuglaglag ni Jehova.​—⁠2 Hari 10:​15-17.

12. Ngaa makatarunganon nga mapangayo ni Jehova ang eksklusibo nga debosyon?

¹² Ang tinagipusuon nga pagsuporta sa matuod nga pagsimba nagakaigo gid, kay si Jehova amo ang Manunuga kag Soberano sa Bug-os nga Uniberso, nga makatarunganon nga nagapatuman kag nagakabagay sang aton eksklusibo nga debosyon. Ginsugo niya ang mga Israelinhon: “Indi ka maghimo nga sa imo sing larawan nga tinigban ukon bisan ano nga kaangay sang bisan anong butang nga yara sa langit sa ibabaw ukon yara sa duta sa idalom ukon yara sa tubig sa idalom sang duta. Indi ka magyaub sa ila ukon mag-alagad sa ila, kay ako si Jehova nga imo Dios isa ka Dios nga nagakinahanglan sing eksklusibo nga debosyon.” (Exodo 20:​4, 5) Ang mga nagalaum nga makalampuwas sa “adlaw ni Jehova” dapat magsimba sa iya sing eksklusibo, nagahimo sini “sa espiritu kag kamatuoran.” (Juan 4:​23, 24) Dapat sila mangin malig-on para sa matuod nga pagsimba, kaangay nanday Elias, Eliseo, kag Jehonadab.

13. Subong nga ang tagipusuon ni Jehonadab yara kay Jehu, sin-o ang mga nagbaton sa Mesianikong Hari, kag paano nila ini ginapakita?

¹³ Sa tapos mapatay ang panimalay ni Acab, si Hari Jehu naghimo sing iban pa nga mga tikang agod makilala ang mga sumilimba ni Baal kag madula ining butig nga pagsimba sa Israel. (2 Hari 10:​18-28) Sa karon, ang langitnon nga si Hari Jesucristo gintangdo nga patyon ang mga kaaway ni Jehova kag bindikahon ang Iya pagkasoberano. Subong nga ang tagipusuon ni Jehonadab dampig kay Jehu, ang “dakung kadam-an” sang “iban nga mga karnero” ni Jesus karon nagabaton sing bug-os tagipusuon kay Cristo subong ang Mesianikong Hari kag nagakooperar upod sa iya espirituwal nga mga kauturan sa duta. (Bugna 7:​9, 10; Juan 10:16) Ginapamatud-an nila ini paagi sa pagkabuhi suno sa matuod nga relihion kag pagpakigbahin sing makugi sa Cristianong ministeryo, nagapaandam sa mga kaaway sang Dios tuhoy sa nagapakari sing madasig nga “adlaw ni Jehova.”​—⁠Mateo 10:​32, 33; Roma 10:​9, 10.

Ang Tumalagsahon nga mga Hitabo sa Unahan!

14. Ano ang nagahulat sa butig nga relihion?

¹⁴ Si Jehu nagpanghikot agod tapuson ang pagsimba kay Baal sa Israel. Sa aton adlaw, paagi sa Daku Pa nga Jehu, si Jesucristo, laglagon sang Dios ang Babilonia nga Daku, ang bug-os kalibutan nga emperyo sang butig nga relihion. Makita naton sa dili madugay ang katumanan sang pinamulong sang isa ka anghel kay manalagna Juan: “Ang napulo ka sungay nga imo nakita, kag ang sapat nga mapintas, ini sila magadumot sa makihilawason nga babayi [ang Babilonia nga Daku] kag magahapay kag magapahubo sa iya, kag kaunon nila ang iya unod kag sunugon sia sing bug-os sa kalayo. Kay ginbutang sang Dios sa ila tagipusuon ang paghimo sang iya hunahuna, ang paghimo sang ila isa ka hunahuna paagi sa paghatag sang ila ginharian sa sapat nga mapintas, tubtob nga matuman ang mga pulong sang Dios.” (Bugna 17:​16, 17; 18:​2-5) Ang “napulo ka sungay” nagalaragway sa militaristiko nga politikal nga mga kagamhanan sa duta. Walay sapayan nga may makihilahion sa espirituwal sila nga kaangtanan sa Babilonia nga Daku, ang iya tion malip-ot na lang. Ang politika sining kalibutan magalaglag sa butig nga relihion, kag ang “sapat nga mapintas”​—⁠ang Nasyones Unidas​—⁠may pangunang papel upod sa “napulo ka sungay” sa paghapay sa iya.⁠b Isa gid ka okasyon para dayawon si Jehova!​—⁠Bugna 19:​1-6.

15. Ano ang matabo kon tinguhaan nga laglagon ang dutan-on nga organisasyon sang Dios?

¹⁵ Pagkatapos sang pagsalakay ni Hari Jehu batok sa pagsimba kay Baal, ginliso sang iya harianon nga panimalay ang igtalupangod sa politikal nga mga kaaway sang Israel. Amo man sini ang himuon ni Hari Jesucristo. Ang politikal nga mga kagamhanan magapabilin pagkatapos malaglag ang kaangay-Baal nga butig nga relihion. Sa idalom sang impluwensia ni Satanas nga Yawa, ining mga kaaway sang pagkasoberano ni Jehova magasalakay sing bug-os sa pagtinguha nga laglagon ang dutan-on nga organisasyon sang Dios. (Ezequiel 38:​14-16) Apang pasalakayon ni Jehova si Hari Jesucristo paagi sa paglaglag sa ila sa Har⁠–​Magedon, “ang inaway sang dakung adlaw sang Dios nga Labing Gamhanan,” nagabug-os sang pagbindikar sa pagkasoberano ni Jehova.​—⁠Bugna 16:​14, 16; 19:​11-21; Ezequiel 38:​18-23.

Nagaalagad nga May Kakugi Kaangay ni Eliseo

16, 17. (a) Paano naton nahibaluan nga si Eliseo makugi tubtob sa katapusan sang iya kabuhi? (b) Ano ang dapat naton himuon sa mga baslay sang kamatuoran?

¹⁶ Tubtob laglagon sang “adlaw ni Jehova” ang bug-os malauton nga sistema sang mga butang ni Satanas, ang mga alagad sang Dios mangin maisugon kag makugi subong ni Eliseo. Luwas sa iya hilikuton subong alagad ni Elias, si Eliseo nag-alagad subong nagaisahanon nga manalagna ni Jehova sa kapin sa 50 ka tuig! Kag si Eliseo makugi tubtob sa katapusan sang iya malawig nga pagkabuhi. Antes gid lang sia mapatay, ginduaw sia sang apo sa tuhod ni Jehu, nga si Hari Joas. Ginsugo sia ni Eliseo nga magpana sa talambuan. Ang pana naghagunos padulong sa iliguon sini, kag si Eliseo nagsiling: “Baslay sang pagluwas ni Jehova, bisan ang baslay sang pagluwas batok sa Siria! Kag daugon mo ang Siria sa Afec tubtob nga mapapas mo sila.” Sa pangabay ni Eliseo, masunod nga ginbuno ni Joas ang duta paagi sa iya baslay. Apang ginhimo niya ini nga kulang sing kakugi, nagbuno sing makatlo ka beses lamang. Nian si Eliseo nagsiling nga, subong resulta, si Joas hatagan lamang sing tatlo ka pagdaug batok sa Siria, kag amo sina ang natabo. (2 Hari 13:​14-19, 25) Wala makig-away sing bug-os si Hari Joas sa mga Siriahanon, “tubtob mapapas [niya] sila.”

¹⁷ Apang, may kakugi nga kaangay ni Eliseo, ang hinaplas nga nagkalabilin padayon nga nagapakig-away batok sa butig nga pagsimba. Ang ila kaupdanan nga may dutan-on nga mga paglaum nagahimo man sini. Dugang pa, ang tanan nga nagalaum nga makalampuwas sa “adlaw ni Jehova” nagadumdom gid sang pinamulong sang makugi nga si Elias tuhoy sa paghampak sa duta. Dalhon naton ang mga baslay sang kamatuoran kag makugi nga ipana ini​—⁠sa liwat kag liwat​—⁠huo, tubtob magasiling si Jehova nga ang aton hilikuton paagi sini natapos na.

18. Paano kita dapat maghulag sa ginasiling sang 2 Pedro 3:​11, 12?

¹⁸ Tapuson sa dili madugay sang “adlaw ni Jehova” ang karon malauton nga sistema sang mga butang. Busa ang makapalig-on nga mga pinamulong ni apostol Pedro magapahulag sa aton. “Sanglit ini tanan nga butang tunawon sa among bagay,” siling ni Pedro, “ano bala nga sari sang mga tawo dapat mangin amo kamo sa balaan nga mga paggawi kag sa mga buhat sang diosnon nga debosyon, nga nagahulat kag nagadumdom pirme sang presensia sang adlaw ni Jehova!” (2 Pedro 3:​11, 12) Kon ang tanan nga bahin sining sistema tunawon paagi sa kalayo sang kaakig sang Dios nga ipabutyag paagi kay Jesucristo, yadto lamang ang may rekord sang matadlong nga paggawi kag diosnon nga debosyon ang makalampuwas. Ang moral kag espirituwal nga kaputli kinahanglanon. Amo man ang gugma para sa mga isigkatawo, nga ginapakita paagi sa paghulag sa ila mga kinahanglanon, labi na sa espirituwal nga paagi sa kalalangan sang aton Cristianong ministeryo.

19. Ano ang dapat naton himuon agod makalampuwas sa “adlaw ni Jehova”?

¹⁹ Ang imo bala mga pulong kag mga buhat nagapakilala sa imo subong isa ka matutom kag makugi nga alagad sang Dios? Kon amo, mabinagbinag mo ang paglaum nga makalampuwas sa “adlaw ni Jehova” pasulod sa ginsaad nga bag-ong kalibutan sang Dios. Huo, mahimo nimo maagom ang kaluwasan kon magahimo ka sing maayo sa espirituwal nga mga kauturan ni Cristo bangod mga sumulunod niya sila, subong sang Sunemnon nga mag-asawa nga nagsapupo kay Eliseo. Agod maluwas dapat ka mangin kaangay ni Naaman, nga mapainubuson nga nagbaton sang sugo sang Dios kag nangin sumilimba ni Jehova. Kon nalangkag ka nga magkabuhi sing dayon sa paraiso nga duta, dapat mo ipakita ang tinagipusuon nga pagsuporta sa matuod nga pagsimba, subong sang ginhimo ni Jehonadab. Nian mangin yara ka sa tunga sang matutom nga mga alagad ni Jehova, nga makaeksperiensia sa dili madugay sang katumanan sang pinamulong ni Jesus: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob sa pagtukod sang kalibutan.”​—⁠Mateo 25:⁠34.

[Mga footnote]

Paano Mo Sabton?

◻ Ano ang pila ka kinaiya nga kinahanglanon agod makalampuwas sa “adlaw ni Jehova”?

◻ Anong halimbawa ang ginhatag sang Sunaminhon nga mag-asawa sang adlaw ni Eliseo?

◻ Anong leksion ang matun-an naton gikan kay Naaman?

◻ Paano naton mailog ang halimbawa ni Jehonadab?

◻ Paano kita dapat maapektuhan sang 2 Pedro 3:​11, 12?