Matuod Nga Kalipay—Ano ang Yabi?
ANG mga tawo gintuyo nga mangin malipayon. Ngaa makapat-od kita sa sina? Ti, binagbinaga ang ginsuguran sang tawo.
Gintuga ni Jehova nga Dios ang nahaunang mag-asawa nga may ikasarang sa pag-agom sing kalipay. Sanday Adan kag Eva ginbutang sa isa ka paraiso, sa isa ka katamnan sang kalipay nga ginatawag Eden. Gin-amanan sila sang Manunuga sing tanan nga kinahanglanon nga pisikal nga mga butang sang kabuhi. Ang katamnan may “tagsa ka kahoy nga halandumon sa itululok sang isa kag maayo nga kalan-on.” (Genesis 2:9) Sanday Adan kag Eva mapagros, mabaskog, kag matahom—himpit sila kag tunay nga malipayon.
Apang, ano ang yabi sa ila kalipay? Ang ila bala paraiso nga puluy-an ukon ayhan ang ila pisikal nga kahimpitan? Ining mga dulot gikan sa Dios nakaamot sa kalipayan nila sa kabuhi. Apang ang ila kalipay wala nasandig sa sining kitaon nga mga butang. Ang katamnan sang Eden indi lamang isa ka matahom nga parke. Isa ini ka santuaryo, isa ka duog sa pagsimba sa Dios. Ang yabi sa ila dayon nga kalipay amo ang ila ikasarang sa pagpasad kag sa paghupot sing isa ka mahigugmaon nga kaangtanan sa Manunuga. Agod magmalipayon, dapat sila una mangin espirituwal.—Ipaanggid ang Mateo 5:3.
Ang Espirituwalidad Nagadul-ong sa Kalipay
Si Adan may espirituwal nga kaangtanan sang una upod sa Dios. Isa yadto ka mahigugmaon, mapinalanggaon nga kaangtanan kaangay sang kaangtanan sang isa ka anak sa isa ka amay. (Lucas 3:38) Sa katamnan sang Eden, maayo ang kahimtangan nanday Adan kag Eva nga nagtugot sa ila nga mapaayawan ang ila handum sa paghimo sing pagsimba. Paagi sa ila kinabubut-on, mahigugmaon nga pagtuman kay Jehova, magahatag sila sing kadungganan kag kahimayaan sa Dios nga labaw sa mahatag sang mga sapat. Madayaw nila sing intelihente ang Dios tungod sang iya makatilingala nga mga kinaiya kag masakdag ang iya pagkasoberano. Padayon man nila nga mabaton ang mahigugmaon kag mapinalanggaon nga pag-atipan ni Jehova.
Ining paghiusa sa Manunuga kag pagtuman sa iya mga kasuguan naghatag sing matuod nga kalipay sa aton nahaunang mga ginikanan. (Lucas 11:28) Sanday Adan kag Eva wala ginpaabot nga makaeksperiensia sing madamong tinuig sang pagtilawtilaw kon ano ang labing maayo antes matukiban ang yabi sa kalipay. Malipayon sila kutob sang gintuga sila. Bangod may paghidait upod sa Dios kag mapinasakupon sa iya awtoridad, malipayon sila.
Apang, yadto nga kalipay natapos sang ginlapas nila ang Dios. Paagi sa pagrebelde, gin-utod nanday Adan kag Eva ang ila espirituwal nga kaangtanan kay Jehova. Indi na sila mga abyan sang Dios. (Genesis 3:17-19) Subong bala nga kutob sang adlaw nga gintabog sila gikan sa katamnan, gin-utod ni Jehova ang tanan nga komunikasyon upod sa ila. Nadula nila ang ila pagkahimpit, ang paglaum nga magkabuhi sing dayon, kag ang ila katamnan nga puluy-an. (Genesis 3:23) Apang sing mas importante, bangod nadula nila ang ila kaangtanan sa Dios, nadula nila ang yabi sa kalipay.
Ang Aton Ikasarang sa Pagpili
Antes mapatay, ginliton nanday Adan kag Eva sa ila mga anak ang ila tawhanon nga mga kinaiya, ang ila duna nga konsiensia, kag ang ikasarang para sa espirituwalidad. Ang tawhanon nga pamilya wala ginpaubos tubtob sa kahimtangan sang mga sapat. Mahimo kita makapasag-uli sa Manunuga. (2 Corinto 5:18) Subong intelihente nga mga tinuga, ang mga tawo padayon nga may ikasarang sa pagpili kon bala tumanon ang Dios ukon indi. Gin-ilustrar ini madamong siglo sang ulihi sang ginhatag ni Jehova sa bag-ong naporma nga pungsod sang Israel ang pagpili sa kabuhi ukon sa kamatayon. Paagi sa iya humalambal nga si Moises, ang Dios nagsiling: “Ginbutang ko sining adlaw sa atubangan nimo ang kabuhi kag ang kaayuhan, kag ang kamatayon kag ang kalaut.”—Deuteronomio 30:15-18.
Bisan sa karon, linibo ka tuig pagkatapos nadula ang orihinal nga Paraiso, kita nga mga tawo may ikasarang gihapon sa paghimo sing husto nga pagpili. May yara kita nagapanghikot nga konsiensia kag sadsaran nga ikasarang sa pagtuman sa mga kasuguan sang Dios. Ang Biblia nagapamulong tuhoy sa “pagkatawo namon sa sulod” kag sa pagkatawo “sa sulod.” (2 Corinto 4:16; Roma 7:22) Ining mga ekspresyon nagapatuhoy sa aton tanan duna nga ikasarang nga mapabanaag ang personalidad sang Dios, nga makahunahuna suno sa iya mga paghunahuna, nga mangin espirituwal.
May kaangtanan sa aton moral nga kinaugali kag konsiensia, si apostol Pablo nagsulat: “Kon san-o nga ang mga tawo sang mga pungsod nga walay kasuguan nagahimo sa kinaugali sang mga butang sang kasuguan, ining mga tawo, walay sapayan nga walay kasuguan, kasuguan sa ila kaugalingon. Sila mismo amo ang mga nagpasundayag nga ang kahulugan sang kasuguan masulat sa ila mga tagipusuon, samtang ang ila konsiensia nagapanaksi upod sa ila kag, sa ulot sang ila kaugalingon nga mga panghunahuna, ginasumbong ukon ginapasaylo pa gani sila.”—Roma 2:14, 15.
Diosnon nga Kaalam kag Pagkamatinumanon—Ang Yabi
Apang ang isa mahimo mamangkot, ‘Kon kita tanan may kinaugali nga huyog sa pagsimba sa Dios kag, subong resulta, sa pag-agom sing matuod nga kalipay, ngaa ang kasubo lapnag katama?’ Ini bangod agod magmalipayon, ang kada isa sa aton dapat magtubo sa espirituwal. Walay sapayan nga orihinal nga gintuga sa larawan sang Dios, ang tawo nahamulag sa iya Manunuga. (Efeso 4:17, 18) Gani, ang kada isa sa aton dapat maghimo sing pat-od nga mga tikang sa pagtukod kag sa paghupot sing espirituwal nga kaangtanan upod sa Dios. Ini nga kaangtanan indi magaluntad sing awtomatiko.
Ginbalay ni Jesus ang duha ka importante nga prinsipio sa pagtubo sang espirituwalidad. Ang isa amo ang pagtigayon sing sibu nga ihibalo tuhoy sa Dios, kag ang isa pa amo ang pagpasakop sing matinumanon sa iya kabubut-on. (Juan 17:3) Nagabalikwat sang Pulong sang Dios, si Jesus nagsiling: “Nasulat na, ‘Ang tawo mabuhi, indi sa tinapay lamang, kundi sa tagsa ka pulong nga nagaguwa sa baba ni Jehova.’ ” (Mateo 4:4) Sa isa pa ka okasyon, si Jesus nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Indi na kinahanglan nga maghinguyang kita sing madamong dekada sa pagtilawtilaw agod masapwan ang kalipay. Ang eksperiensia indi ang yabi sa kalipay. Sa baylo, ang diosnon nga kaalam kag pagkamatinumanon lamang sa aton Manunuga ang makadul-ong sa matuod nga kalipay sa kabuhi.—Salmo 19:7, 8; Manugwali 12:13.
Sing maathag, ang kalipay nga maagom paagi sa paggamit sing diosnon nga kaalam kag pagtigayon sing maayo nga tindog sa atubangan sang Dios malab-ot naton. (Binuhatan 17:26, 27) Ang ihibalo tuhoy kay Jehova kag sa iya katuyuan matigayon sang tanan. May binilyon ka kopya sa madamong pinulungan, ang Biblia amo gihapon ang napanagtag sing pinakalapnag nga libro sa kalibutan. Ang Biblia makabulig sa imo nga mangin abyan sang Dios kag maagom ang matuod nga kalipay, kay ang Kasulatan nagasugid sa aton nga “malipayon ang katawhan nga ang ila Dios amo si Jehova!”—Salmo 144:15.
[Kahon sa pahina 6]
Mga Tikang Padulong Sa Kalipay
1. Hangpa kag palambua ang espirituwalidad. Si Jesus nagsiling: “Malipayon ang mga nagapamati sang pulong sang Dios kag nagatuman sini!”—Lucas 11:28.
2. Kilalaha nga ang kahamuot sang Dios mas importante sangsa manggad ukon mga luho. Si Pablo nagsulat: “Ang matuod, isa ini ka paagi sang daku nga daug, ining diosnon nga debosyon upod ang pagkanaayawan sa kaugalingon. . . . Gani, kon may pagkaon kag panapton, mangin kontento na kita sa sining mga butang.”—1 Timoteo 6:6-8.
3. Panikasugi nga palambuon kag sundon ang nahanas-sa-Biblia nga konsiensia.—Roma 2:14, 15.
4. Mamat-od nga tumanon si Jehova nga Dios, busa kalipikado nga mangin isa sang iya katawhan. Si David anay nagsulat: “Malipayon ang katawhan nga ang ila Dios amo si Jehova!”—Salmo 144:15.
[Kapsion sa pahina 7]
“Malipayon ang mga mahunahunaon sa ila espirituwal nga kinahanglanon.”—Mateo 5:3