Si Jehova Nagagahom nga May Kaawa

SA BUG-OS nga maragtas madamong tawhanon nga gumalahom ang naggahom nga may dimahinuklugon nga di-pagsapak sa pag-antos sang ila mga sakop. Apang, si Jehova naghatag sing kinatuhayan paagi sa pagpili sing pungsod​—⁠ang Israel​—⁠kag sa paggahom sa sini sing mainawaon.

Samtang ang mga Israelinhon ulipon pa sang dumaan nga Egipto, nabatian ni Jehova ang ila mga pagtu-aw sing bulig. “Sa tanan nila nga kapipit-an ginapiutan sia. . . . Sa iya gugma kag sa iya kaawa gintubos niya sila.” (Isaias 63:9) Ginluwas ni Jehova ang Israel, gin-amanan sila sing milagruso nga pagkaon, kag gintuytuyan sila pasulod sa ila kaugalingon nga duta.

Ang mainawaon nga kinaiya ni Jehova dugang nga nakita sa mga kasuguan nga ginhatag niya sa sining pungsod. Ginsugo niya ang mga Israelinhon nga pakig-angutan sing mainawaon ang mga ilo, balo, kag dumuluong nga mga pumuluyo. Indi nila dapat paghingalitan ang mga may sablag.

Ang Kasuguan nagpatuman nga pakitaan sing kaawa ang mga nagakinahanglan. Ang mga imol makapanaghaw pagkatapos sang ani. Ang mga utang gindula sa tuig sang Inugpahuway (ikapito). Ang tanan nga napanubli nga duta nga ginbaligya ginauli sa tuig sang Paghinugyaw (ika-50). Ang Ancient Israel​—⁠Its Life and Institutions nagareport: “Sa Israel, wala gid magluntad ang sosyal nga mga klase sa moderno nga kahulugan.” “Sa unang mga adlaw sang pumuluyo, ang tanan nga Israelinhon nag-agom sing halos amo man nga talaksan sang pagkabuhi.”​—⁠Levitico 25:​10; Deuteronomio 15:​12-14; 24:​17-22; 27:⁠18.

Pag-ilog sa Kaawa ni Jehova

Ang mga alagad sang Dios gin-inspirar sang iya kaawa. Halimbawa, sa bug-os nga maragtas, ginpatay sang pila ka bag-o naglingkod nga mga hari ang buhi nga mga katapo sang nagligad nga harianon nga dinastiya. Apang wala ini ginhimo sang alagad ni Jehova nga si David. Sang napatay si Hari Saul, gin-amligan ni David si Mefiboset, ang buhi nga apo nga lalaki kag manunubli ni Saul. “Ang hari nagbatyag sing kaawa kay Mefiboset nga anak ni Jonatan nga anak ni Saul.”​—⁠2 Samuel 21:⁠7.

Wala na sing iban pa nga tawo ang nag-ilog sa kaawa ni Jehova kaangay sa ginhimo ni Jesus. Ang madamo sang iya mga milagro ginpahulag bangod sang diosnon nga kaawa. Sang isa ka okasyon ang isa ka aruon nagpakitluoy sa iya: “Kon luyag mo lang, matinluan mo ako.” Naluoy si Jesus kag gintandog sia, nga nagasiling: “Luyag ko. Magmatinlo ka.” (Marcos 1:​40-42) Sa isa pa ka tion daku nga mga kadam-an ang nagsunod kay Jesus. Sa tunga sang kinagula, ginhatagan sing igtalupangod ni Jesus ang duha ka tawo nga bulag, nga nagsinggit: “ ‘Ginuo, maluoy ka sa amon, Anak ni David!’ . . . Napahulag bangod sa kaluoy, gintandog ni Jesus ang ila mga mata, kag sa gilayon nakabaton sila sing panan-aw.”​—⁠Mateo 20:​29-34.

Ang daku nga mga kadam-an wala magpaluya sang mga balatyagon ni Jesus para sa iban. Bangod wala sila makakaon sa pila ka tion, nagsiling sia sang isa ka okasyon: “Nagbatyag ako sing kaluoy sa kadam-an.” Gani ginpakaon niya sila sing milagruso. (Marcos 8:​1-8) Sang naglibot si Jesus, wala lamang sia nagtudlo sa mga kadam-an kundi mapanilagon sa ila mga kinahanglanon. (Mateo 9:​35, 36) Pagkatapos sadto nga paglibot, si Jesus kag ang iya mga disipulo wala na sing matawhay nga tion bisan sa pagkaon. Gani ang report sang Biblia nagasugid sa aton: “Gani naglakat sila sa bangka pakadto sa isa ka duog nga baw-ing nga silahanon lamang. Apang nakita sila sang mga tawo nga naglakat kag madamo ang nakahibalo sini, kag halin sa tanan nga siudad nagdalagan sila didto sing tingob kag nag-una sa ila. Ti, sa pagpanaug, nakita niya ang dakung kadam-an, apang napahulag sia bangod sang kaluoy sa ila, bangod subong sila sang mga karnero nga wala sing manugbantay. Kag nagsugod sia sa pagtudlo sa ila sing madamong butang.”​—⁠Marcos 6:​31-34.

Indi lamang ang balatian kag kaimulon sang mga tawo ang nagpahulag kay Jesus kundi ang ila espirituwal nga kahimtangan. Ginhingalitan sila sang ila mga lider, gani si Jesus “napahulag bangod sang kaluoy sa ila.” Ang Griegong tinaga para sa “napahulag bangod sang kaluoy” nagakahulugan sing “pagbatyag sing mainawaon nga kaluoy.” Si Jesus isa gid ka mainawaon nga tawo!

Kaawa sa Mapintas nga Kalibutan

Si Jesucristo amo karon ang Hari sang langitnon nga Ginharian ni Jehova. Subong sa ginhimo niya sa dumaan nga Israel, nagagahom karon ang Dios sa katawhan nga may pagkaawa. “ ‘Pat-od sila nga mangin akon,’ siling ni Jehova sang kasuldadusan, ‘sa adlaw nga magapatubas ako sing isa ka pinasahi nga propiedad. Kag pakitaan ko sila sing kaawa.’ ”​—⁠Malaquias 3:⁠17.

Yadtong luyag nga makabaton sang kaawa ni Jehova dapat mag-ilog sang iya mga dalanon. Matuod, nagakabuhi kita sa kalibutan diin mas interesado ang mga tawo sa pagtipig sa ila estilo sang pagkabuhi sangsa pagbulig sa mga nagakinahanglan. Ang mga tawo nga may gahom masunson nga nagatinguha nga makaganansia samtang ginasakripisyo ang kaluwasan sang mga obrero kag mga bumalakal. Sa 2 Timoteo 3:1-4, ang Biblia nagalaragway sing sibu sang kahimtangan sa moral sang aton panahon nga nagdula sang kaawa sa tagipusuon sang tuman kadamo.

Apang, makakita gihapon kita sing mga kahigayunan sa pagpakita sing kaawa. Makahatag bala kita sing kinahanglanon nga bulig sa aton mga isigkatawo? May nagamasakit bala nga maduaw naton? Mapahalipay bala naton ang mga ginapung-aw, suno sa laygay: ‘Magpamulong sing malinugpayon sa mga kalag nga nalisdan, nga nagasakdag sa maluya’?​—⁠1 Tesalonica 5:⁠14.

Ang kaawa nagabulig man sa aton nga likawan ang mapintas nga reaksion kon magsala ang iban. Kita ginasugo: “Ang tanan nga madinumtanon nga kapaitan kag kaakig kag kasingkal kag sininggitanay kag maparas nga hambal kuhaon gikan sa inyo kaupod sang tanan nga kalainan. Kundi mangin malulo sa isa kag isa, mainawaon sing malum-ok, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.”​—⁠Efeso 4:​31, 32.

Ang kaawa nagabulig sa aton nga likawan ang huyog sa pag-abuso sa gahom. Ang Biblia nagasiling: “Panapti ang inyo kaugalingon sing mahugmay nga pagpalangga sang pagkaawa, pagkalulo, pagkakubos sing hunahuna, pagkalum-ok, kag pagkamabinatason.” (Colosas 3:12) Ang pagkakubos sing hunahuna nagabulig sa aton nga ipahamtang ang aton kaugalingon sa posisyon sadtong sa idalom sang aton pagdumala. Ang pagkamainawaon nagalakip sang pagkamapainubuson kag pagkamakatarunganon sa baylo nga mabudlay pahamut-an. Ang pagkasampaton indi dapat mangin balibad para tamdon ang mga tawo subong mga bahin lamang sang isa ka makina. Subong man, sa pamilya ginadumdom sang mainawaon nga mga bana nga ang ila mga asawa maluya nga mga suludlan. (1 Pedro 3:7) Ang pagpamalandong sa mainawaon nga halimbawa ni Jesus makabulig sa aton sa sini nga tanan.

Sanglit may tudok nga balatyagon si Jesus sa mga tawo sang panahon sang iya ministeryo sa duta, makapat-od kita nga sia sa karon, kag padayon pa nga mangin, isa ka mainawaon nga Gumalahom. Ang Salmo 72 matagnaon nga nagasiling tuhoy sa iya: “Magahukom sia sang mga nasit-an sang katawhan, luwason niya ang mga anak nga lalaki sang imol, kag dugmukon niya ang madaya. Kag may mga sakop sia kutob sa dagat pa dagat, kag kutob sa Suba tubtob sa kaukbungan sang duta. Magakaawa sia sa kubos kag imol, kag luwason niya ang mga kalag sang mga imol.”​—⁠Salmo 72:​4, 8, 13.

Ang Pulong sang Dios nagatagna: “Sa pagkamatarong hukman niya ang mga kubos, kag sa katadlong magahatag sia sing sabdong tungod sa mga mahagop sang duta. . . . Patyon niya ang isa nga malauton.” Pagkatapos ilaragway kon paano bisan ang pila ka mapintas, sapatsapaton nga mga tawo magabalhin sang ila mga dalanon, ang tagna nagapadayon: “Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo kay Jehova subong nga ang mga tubig nagatabon sang dagat.” (Isaias 11:​4-9) Ini nga tagna nagasaad gid sing isa ka bug-os duta nga katilingban sang mga tawo nga nagakilala kay Jehova kag nagailog sang iya mainawaon nga mga dalanon!