Paglab-ot sa Madamo Pa Paagi sa Maayong Balita

SAMTANG ginapamensar ko ang mga tawo sa akon pungsod, narealisar ko nga nakilala lamang gali sang madamo ang mga Saksi ni Jehova paagi sa mga balita. Dapat masugilanon ini nga mga tawo, hunahuna ko, agod makilala nila kon sin-o ang mga Saksi ni Jehova kag kon ano gid ang ila ginapatihan. Apang paano ako makabulig? Ang akon bana isa ka Cristianong gulang, kag ginhatagan niya ako sing maalamon nga panuytoy kag mga panugyan.

Nasalapuan namon ang yabi nga ideya sa artikulo nga “Magazines That Give Practical Comfort,” nga ginbalhag sa Enero 8, 1995, nga guwa sang Awake! nga magasin. Tuhoy sa hilikuton sang isa ka Saksi, ang artikulo nagasiling: “Ginakolekta niya ang daan nga mga kopya sang Magmata! nga mga magasin nga nasupot sang iban nga mga Saksi sa ila puluy-an. Pagkatapos sina, ginakadtuan niya ang mga ahensia nga sa banta niya magapakita sing pinasahi nga interes sa pila ka topiko.”

Paagi sa bulig sang akon bana, wala magdugay nakakolekta ako sing ginatos ka kopya sang mga magasin. Gikan sini nakapili ako sing nanuhaytuhay nga topiko nga nagakaigo sa mga tawo nga luyag ko pakig-angutan.

Nagagamit sing mga direksion sa telepono kag sing publiko nga mga rekord, ginlista ko ang mga ospital, mga dormitoryo para sa mga lamharon, kag mga puluy-an para sa mga tigulang. Ginlista ko man ang mga direktor sang punerarya, mga superbisor kag mga manuglaygay sa eskwelahan, mga manugbulong, kag mga opisyales sang mga prisuhan kag mga korte sa kasuguan. Ang akon listahan nagalakip sang mga institusyon para sa mga alkoholiko kag mga giyan sa droga, mga asosasyon para sa mga problema sa palibot, mga inutil kag mga biktima sang inaway, kag para sa pagpanalawsaw tuhoy sa nutrisyon. Wala ko man ginkalimtan ang mga manugdumala sang mga opisina para sa kaayuhan sang tawo, mga serbisyo sa katilingban, kag pamilya.

Ano ang Isiling Ko?

Ang una ko gid nga ginahimo kon nagaduaw amo ang pagpakilala sing maathag kon sin-o ako. Dayon ginasambit ko nga ang akon pagduaw magalawig lamang sing pila ka minuto.

Sa tion nga maatubang ko na ang tawo nga nagadumala, nagasiling ako: “Isa ako sang mga Saksi ni Jehova. Apang, wala ako magkari agod magpakighambal tuhoy sa relihion, nga ayhan indi nagakaigo sa oras sang trabaho.” Masami nga ang kahimtangan nangin relaks. Nian, nagapadayon ako paagi sa pagpasibu sang akon komento sa kahimtangan: “May duha ka rason kon ngaa nagduaw ako. Una, luyag ko magpasalamat sa hilikuton nga ginahimo sang inyo opisina. Ti, indi gid mapasapayanan nga ang isa nagahinguyang sang iya tion kag kusog para sa publiko. Dalayawon gid ini.” Sa madamo nga higayon ang tawo nga ginapalapitan sa sining paagi nagakakibot.

Sa sining tion mahimo gid nga ang tawo nagapalibog kon ano ang ikaduha nga rason sang akon pagduaw. Nagapadayon ako: “Ang ikaduha nga rason sang akon pagduaw amo ini: Gikan sa amon Magmata! nga magasin, nga ginabalhag sa bug-os kalibutan, nagpili ako sing pila ka artikulo nga nagabinagbinag gid tuhoy sa imo trabaho kag sa mga problema may kaangtanan sini. Napat-od ko nga luyag mo mahibaluan kon paano ginatamod sang internasyonal nga balasahon ini nga mga problema. Malipay ako nga ibilin ining mga kopya sa imo.” Masami ako ginapasalamatan sa akon mga pagpanikasog.

Makakilibot kag Makapaladya nga mga Resulta

Sang gingamit ko ini nga paagi, ang kalabanan mainabyanon nga nagpamati sa akon; isa lamang sa 17 ang wala magpamati. Madamo ako sing eksperiensia nga makakilibot kag makapaladya.

Halimbawa, pagkatapos sang apat ka pagtinguha kag mapailubon nga paghulat, nasugilanon ko gid man ang inspektor sang isa ka distrito nga eskwelahan. Masako sia kaayo. Apang, mainabyanon gid sia kag nagpakighambal sa akon sing makadali. Sang manuglakat na ako, nagsiling sia: “Ginaapresyar ko gid ang imo panikasog, kag basahon ko gid sing maayo ang inyo literatura.”

Sa isa pa ka hitabo, nagduaw ako sa korte sang distrito, nakigkita sa punong huwes, nga medyo may edad na nga tawo. Sang pagsulod ko sa iya opisina, nagtungkaaw sia gikan sa pagbasa niya sa iya mga dokumento kag medyo naakig sia.

“Martes sang aga lamang ako nagaopisina, kag sa sina lamang nga tion ako mahimo masugilanon,” maparas nga siling niya.

“Pasayluha ako sa pagkari sa indi nagakaigo nga tion,” sabat ko gilayon kag nagdugang, “Siempre, malipay ako magbalik sa lain nga tion. Apang ang akon pagduaw isa gid ka personal nga bagay.”

Nangin interesado ang huwes. Namangkot sia, sa indi na tanto kaparas nga tingog, kon ano ang akon tuyo. Ginsulit ko nga mabalik na lang ako sa Martes.

“Palihug, magpungko ka,” insister niya, nga nagpakibot gid sa akon. “Ano ang tuyo mo?”

Nagsunod ang masadya nga paghambalanay, kag nangayo sia sing pasaylo bangod sang iya pagkadimainabyanon sang primero bangod masako sia kaayo.

“Nahibaluan mo bala kon ano ang nagustuhan ko sa mga Saksi ni Jehova?” pamangkot sang huwes pagligad sang pila ka tion. “May napasad sing maayo sila nga mga prinsipio nga ila gid ginasunod. Ginhimo ni Hitler ang tanan nga masarangan niya, apang wala gihapon magpakigbahin sa inaway ang mga Saksi.”

Sang ang duha sa amon nagsulod sa isa ka opisina, nakilala kami sang mga sekretarya didto. Nian ang nagadumala nga sekretarya dimainabyanon nga naghambal, “Ang presidente wala gid nagabaton sa bisan anong grupo.”

“Apang batunon niya kami,” sabat ko sing matawhay, “bangod mga Saksi ni Jehova kami. Wala kami sing ipetisyon, kag ang amon pagduaw indi magsobra sa tatlo ka minuto.” Hanuot gid ako nga nangamuyo sing tinagipusuon, “O Jehova, palihug pakamaayuha man ini!”

Ang sekretarya malas-ay nga nagsabat, “O sige, tilawan ko.” Naglakat sia. Pagligad sang mga duha ka minuto, nga daw tuman gid kadugay sa akon, nagbalik sia nga nagasunod ang presidente mismo. Sing wala huluhambal, gingiyahan niya kami pakadto sa iya opisina, nag-agi sa duha pa ka hulot.

Sang nag-istoryahanay na kami, nangin labi sia ka mainabyanon. Kinabubut-on nga ginbaton niya ang pinasahi nga mga isyu sang Magmata! nga magasin sang gintanyag namon ini. Nagpasalamat kami kay Jehova tungod sining kahigayunan nga makahatag sing maayo nga panaksi tuhoy sa katuyuan sang aton hilikuton.

Sa paghinumdom sang madamo makalilipay nga mga eksperiensia, nahangpan ko sing dugang pa ang ginsiling ni apostol Pedro: “Sing pat-od nahantop ko nga ang Dios wala sing ginapasulabi, kundi sa tagsa ka pungsod ang tawo nga nagakahadlok sa iya kag nagahimo sing katarungan kalahamut-an sa iya.” (Binuhatan 10:​34, 35) Kabubut-on sang Dios nga ang mga tawo gikan sa tanan nga ginhalinan, lenguahe, ukon tindog sa katilingban mahatagan sing kahigayunan nga mahibaluan ang iya katuyuan para sa katawhan kag para sa duta.​—⁠Gin-amot.