Iluga ang Pagkawalay Pinasulabi ni Jehova

¹ Si Jehova interesado sa mga tawo. Walay pinasulabi niya nga ginabaton ang bisan sin-o nga nagahimo sang iya kabubut-on. (Binu. 10:​34, 35) Sang nagbantala si Jesus sa mga tawo, wala man sia sing ginpasulabi. (Luc. 20:21) Dapat naton ilugon ang ila halimbawa, kaangay sang ginhimo ni Pablo, nga nagsulat: “May isa lamang ka Ginuo sa tanan, nga manggaranon sa tanan nga mga nagapanawag sa iya.”​—⁠Roma 10:⁠12.

² Ang pagbantala sing maayong balita sang Ginharian sang Dios sa tanan nga masugilanon naton nagahatag sing himaya sa Dios. Dapat naton padayon nga ipaambit ining makalilipay nga mensahe sa iban, bisan ano man ang ila rasa, tindog sa katilingban, edukasyon, ukon pinansial nga kahimtangan. (Roma 10:​11-13) Nagakahulugan ini sang pagbantala sa mga magapamati​—⁠mga lalaki, mga babayi, mga bata, kag mga tigulang. Kinahanglan naton duawon ang tanan nga ganhaan agod hatagan ang tagsa ka tagbalay sing kahigayunan nga mabatian ang kamatuoran.

³ Mangin Interesado sa Tanan: Ang aton tulumuron amo ang pakig-angutan ang tanan nga masarangan naton. Nagadumdom sini, ang iban nga mga manugbantala nangin madinalag-on sa pagpanaksi sa mga tawo sa mga opisina sang mga doktor, mga ospital, mga nursing home, kag mga sentro sang rehabilitasyon. Dugang pa, ang mga manugbantala nagpanaksi sa mga nagadumala sing punerarya, mga superbisor kag mga manuglaygay sang eskwelahan, kag mga huwes. Kon nagapakigsugilanon sa mga opisyales, nagakaigo nga ipabutyag ang pagpasalamat sa ila bangod sang mabuligon nga mga serbisyo nga ginahimo nila sa komunidad. Mangin matinahuron, kag magpili sing suno-sa-tion nga mga artikulo nga nagahinun-anon ilabi na sang ila trabaho kag sang mga problema may kaangtanan sini.

⁴ Sa isa ka halimbawa nasugilanon sang isa ka utod nga babayi ang huwes sa iya opisina. Pagkatapos sang mapagsik nga paghambalanay, ang huwes boluntaryo nga nagkomento: “Nahibaluan mo bala kon ano ang akon naluyagan sa mga Saksi ni Jehova? May mabakod sila nga mga prinsipio nga gikan sini wala sila nagatalikod.” Isa ka maayo nga panaksi ang nahatag sa sining impluwensiado nga tawo.

⁵ Indi naton mabasa ang mga tagipusuon sang mga tawo. Apang, paagi sa pagpakighambal sa tanan nga masugilanon naton, ginapakita naton ang aton pagtuo sa ikasarang sang Dios sa pagtuytoy sang aton hilikuton. Dugang pa, nagahatag ini sa mga tawo sing pribilehiyo nga mabatian kag maghulag sa mensahe sang paglaum. (1 Tim. 2:​3, 4) Gamiton naton ang aton tion sing maalamon kag panikasugan nga ilugon ang pagkawalay pinasulabi ni Jehova paagi sa paglab-ot sa tanan nga tawo nga masarangan naton sing maayong balita.​—⁠Roma 2:​11; Efe. 5:​1, 2.