May Pagtuo Ka Bala Kaangay sang kay Abraham?
“Kon mag-abot ang Anak sang tawo, makakita gid bala sia sing pagtuo sa duta?”—LUCAS 18:8.
1. Ngaa mabudlay huptan nga mabakod ang pagtuo karon?
MABUDLAY huptan nga mabakod ang pagtuo karon. Ginaipit sang kalibutan ang mga Cristiano agod mapahilayo ang ila igtalupangod gikan sa espirituwal nga mga butang. (Lucas 21:34; 1 Juan 2:15, 16) Madamo ang nagapaningkawas nga mabuhi bangod sang mga inaway, mga kalamidad, mga balatian, ukon gutom. (Lucas 21:10, 11) Sa pila ka pungsod, mabaskog ang sekular nga kultura, kag ang bisan sin-o nga nagasunod sa ila pagtuluuhan ginatamod nga dimakatarunganon, kag panatiko pa gani. Dugang pa, madamo nga Cristiano ang ginahingabot tungod sang ila pagtuo. (Mateo 24:9) Ang pamangkot ni Jesus, nga ginpautwas halos 2,000 ka tuig ang nagligad, nagakaigo gid: “Kon mag-abot ang Anak sang tawo, makakita gid bala sia sing pagtuo sa duta?”—Lucas 18:8.
2. (a) Ngaa kinahanglanon gid sang isa ka Cristiano ang mabakod nga pagtuo? (b) Kay sin-o huwaran sang pagtuo ang maayo nga sundon naton?
2 Apang, ang kamatuoran amo nga kinahanglanon gid ang mabakod nga pagtuo kon luyag naton magmadinalag-on sa kabuhi karon kag makabaton sing ginsaad nga kabuhi nga walay katapusan sa palaabuton. Sa pagbalikwat sang ginsiling ni Jehova kay Habacuc, si apostol Pablo nagsulat: “ ‘Ang akon isa nga matarong magakabuhi bangod sa pagtuo,’ kag, ‘kon mag-isol sia, ang akon kalag walay kahamuot sa iya.’ . . . Kon wala sing pagtuo imposible nga mapahamut-an [ang Dios] sing maayo.” (Hebreo 10:38–11:6; Habacuc 2:4) Ginsilingan ni Pablo si Timoteo: “Makig-away ka sing maayong pagpakig-away sang pagtuo, manguyapot sing malig-on sa kabuhi nga walay katapusan nga para sa sini gintawag ka.” (1 Timoteo 6:12) Paano, nian, mahuptan ang di-mationg nga pagtuo? Sa pagbinagbinag sini nga pamangkot, mapuslanon nga hibaluon naton ang tuhoy sa isa ka tawo nga nagkabuhi mga 4,000 ka tuig na ang nagligad, apang ang iya pagtuo ginadayaw gihapon sa tatlo ka dalagku nga relihion—Islam, Judaismo, kag Cristianismo. Ini nga tawo amo si Abraham. Ngaa talalupangdon gid ang iya pagtuo? Mailog bala naton sia karon?
Pagkamatinumanon sa Pagtuytoy Sang Dios
3, 4. Ngaa ginsaylo ni Tera ang iya pamilya gikan sa Ur pakadto sa Haran?
3 Si Abraham (nga gintawag Abram sa panugod) maaga nga ginasambit sing una sa Biblia. Sa Genesis 11:26, aton mabasa: “Si Tera . . . nangin amay ni Abram, ni Nahor kag ni Haran.” Si Tera kag ang iya pamilya nagpuyo sa Ur sang mga Caldeanhon, isa ka mauswagon nga siudad sa bagatnan sang Mesopotamia. Apang, wala sila magpabilin didto. “Ginkuha ni Tera si Abram nga iya anak kag si Lot, nga anak ni Haran, nga iya apo, kag si Sarai [Sara] nga iya umagad, asawa ni Abram nga iya anak, kag naglakat sila upod sa iya gikan sa Ur sang mga Caldeanhon pakadto sa duta sang Canaan. Sang ulihi nag-abot sila sa Haran kag nagpuyo didto.” (Genesis 11:31) Ginsaylo man ni Nahor nga utod ni Abraham ang iya pamilya sa Haran. (Genesis 24:10, 15; 28:1, 2; 29:4) Apang, ngaa naghalin si Tera sa mauswagon nga Ur pakadto sa malayo nga Haran?
4 Mga 2,000 ka tuig halin sa tion ni Abraham, ang matutom nga tawo nga si Esteban, sang nagahambal sa atubangan sang Judiyong Sanhedrin, nagpaathag sining kalatingalahan nga pagsaylo sang pamilya ni Tera. Sia nagsiling: “Ang Dios sang himaya nagpahayag sa aton katigulangan nga si Abraham sang sa Mesopotamia sia, sa wala pa sia magpuyo sa Haran, kag nagsiling sia sa iya, ‘Halin ka sa imo duta kag sa imo kahimataan kag magkadto ka sa duta nga ipakita ko sa imo.’ Nian naghalin sia sa duta sang mga Caldeanhon kag nagpuyo sa Haran.” (Binuhatan 7:2-4) Ginbaton ni Tera ang kabubut-on ni Jehova para kay Abraham sang ginsaylo niya ang iya panimalay sa Haran.
5. Diin nagkadto si Abraham sang mapatay ang iya amay? Ngaa?
5 Ang pamilya ni Tera nagpuyo sa ila bag-o nga siudad. Pagligad sang mga tinuig sang naghambal si Abraham tuhoy sa “akon pungsod,” ang ginpatuhuyan niya amo ang duog sang Haran, indi ang Ur. (Genesis 24:4) Apang, indi ang Haran ang mangin permanente nga puluy-an ni Abraham. Suno kay Esteban, ‘sang mapatay ang amay [ni Abraham], ginpasaylo sia sang Dios sa sining duta nga inyo karon ginapuy-an.’ (Binuhatan 7:4) Bangod matinumanon sa pagtuytoy ni Jehova, si Abraham, nga ginaupdan ni Lot, nagtabok sa Eufrates pakadto sa duta sang Canaan.a
6. Ano ang ginsaad ni Jehova kay Abraham?
6 Ngaa ginpasaylo ni Jehova si Abraham sa Canaan? Ang rason naangot sa mga katuyuan sang Dios para sa sining matutom nga tawo. Si Jehova nagsiling kay Abraham: “Halin ka sa imo duta kag sa imo kahimataan kag sa balay sang imo amay pakadto sa duta nga akon ipakita sa imo; kag himuon ko gikan sa imo ang isa ka daku nga pungsod kag pakamaayuhon ko ikaw kag padakuon ang imo ngalan; kag mangin pagpakamaayo ikaw. Kag pakamaayuhon ko ang mga nagapakamaayo sa imo, kag ang nagapakamalaut sa imo pakamalauton ko, kag ang tanan nga pamilya sang duta pat-od nga magapakamaayo sang ila kaugalingon paagi sa imo.” (Genesis 12:1-3) Si Abraham mangin amay sang isa ka daku nga pungsod nga magaagom sang pag-amlig ni Jehova kag magapanag-iya sa duta sang Canaan. Katahom gid nga saad! Apang dapat anay maghimo si Abraham sing daku nga mga pagbag-o sa iya kabuhi agod mapanubli yadto nga duta.
7. Ano nga mga pagbag-o ang dapat himuon ni Abraham agod mapanubli ang saad ni Jehova?
7 Sang maghalin si Abraham sa Ur, ginbiyaan niya ang isa ka mauswagon nga siudad kag mahimo gid ang mga himata sang iya amay—importante nga kalig-unan sadtong panahon sang mga patriarka. Sang maghalin sia sa Haran, nagpahilayo sia sa panimalay sang iya amay, lakip ang pamilya sang iya utod nga si Nahor, kag nangayaw sa iban nga duta. Sa Canaan, wala sia magpuyo sa sulod sang mga pader sang siudad para sa kalig-unan. Ngaa wala? Wala madugay sa tapos makasulod si Abraham sa duta, si Jehova nagsiling sa iya: “Latasa ang duta sa iya kalabaon kag sa iya kasangkaron, kay ihatag ko ini sa imo.” (Genesis 13:17) Ang 75-anyos nga si Abraham kag ang iya 65-anyos nga asawa, si Sara, nagsunod sa sini nga instruksion. “Bangod sa pagtuo nagpuyo sia sa duta sang saad subong sang sa iban nga duta, kag nagpuyo sa mga tolda.”—Hebreo 11:9; Genesis 12:4.
Pagtuo Kaangay sang kay Abraham Karon
8. Bangod sang huwaran ni Abraham kag sang iban pa nga dumaan nga mga saksi, ano ang dapat palambuon naton?
8 Si Abraham kag ang iya pamilya ginahingadlan nga lakip sa daku nga “gal-um sang mga saksi” antes sang Cristianong panahon nga ginasambit sa Hebreo kapitulo 11. Bangod sang pagtuo sining una nga mga alagad sang Dios, ginapalig-on ni Pablo ang mga Cristiano nga ‘isikway ang tagsa ka kabug-atan kag ang sala [kakulang sing pagtuo] nga madali makasalawid sa aton.’ (Hebreo 12:1) Huo, ‘madali [kita] masalawid’ sang kakulang sing pagtuo. Apang sang adlaw ni Pablo kag sa aton karon, ang matuod nga mga Cristiano nakapalambo sing mabakod nga pagtuo kaangay sang kay Abraham kag sang iban pa sang dumaan nga mga tion. Nagapatuhoy sa iya kaugalingon kag sa iya mga masigka-Cristiano, si Pablo nagsiling: “Indi kita ang sahi nga nagaisol padulong sa kalaglagan, kundi ang sahi nga may pagtuo padulong sa pagtipig sa kalag.”—Hebreo 10:39.
9, 10. Ano ang pamatuod nga madamo karon ang may pagtuo kaangay sang kay Abraham?
9 Matuod, ang kalibutan indi na subong sang tion anay ni Abraham. Walay sapayan, “Dios ni Abraham” ang ginaalagad gihapon naton, kag wala sia nagabag-o. (Binuhatan 3:13; Malaquias 3:6) Si Jehova takus gihapon nga simbahon karon subong anay sang tion ni Abraham. (Bugna 4:11) Madamo ang nagadedikar sang ila kaugalingon sing bug-os kay Jehova kag, kaangay ni Abraham, ginahimo nila ang bisan anong mga pagbag-o nga kinahanglan sa ila kabuhi agod himuon ang kabubut-on sang Dios. Sang nagligad nga tuig, 316,092 ang naghatag sing dayag nga pamatuod sang ila dedikasyon paagi sa pagpabawtismo sa tubig “sa ngalan sang Amay kag sang Anak kag sang balaan nga espiritu.”—Mateo 28:19.
10 Ang kalabanan sining bag-uhan nga mga Cristiano indi kinahanglan nga mangayaw sa malayo nga kadutaan agod tumanon ang ila dedikasyon. Apang, sa espirituwal nga kahulugan, madamo sa ila ang naglakbay sing malayo nga distansia. Halimbawa, sa Mauritius, si Elsie isa anay ka manugbabaylan. Ginakahadlukan sia sang tanan. Ang isa ka espesyal nga payunir naghimo sing kahimusan nga magtuon sa Biblia upod sa anak nga babayi ni Elsie, kag ginbuksan sini ang dalanon nga si Elsie ‘magliso gikan sa kadudulman pa kapawa.’ (Binuhatan 26:18) Bangod sang interes sang iya anak nga babayi, nagsugot si Elsie nga tun-an Ang Akon Libro sang mga Sugilanon sa Biblia. Ang pagtuon gindumalahan sa iya tatlo ka beses kada semana bangod dapat sia palig-unon pirme. Ang iya pagkaespiritista wala magdala sa iya sing kalipay, kag madamo sia sing personal nga mga problema. Apang, sang ulihi, natapos niya ang malawig nga paglakbay halin sa demonismo padulong sa matuod nga pagsimba. Sa kada tion nga may magpatan-aw sa iya, ginapaathag niya sa ila nga si Jehova lamang ang makaamlig sa ila gikan sa malaut. Si Elsie isa na karon ka bawtismado nga Saksi, kag 14 ka tawo gikan sa iya pamilya kag mga kilala ang nagbaton sing kamatuoran.
11. Ano nga mga pagpasibu ang ginahimo sang mga nagdedikar sang ila kaugalingon kay Jehova?
11 Kalabanan sang mga nagdedikar sang ila kaugalingon agod mag-alagad sa Dios sang nagligad nga tuig wala sing subong sini kadaku nga mga pagbag-o nga dapat himuon. Apang tanan sila patay anay sa espirituwal kag karon buhi na sa espirituwal. (Efeso 2:1) Bisan pa yara gihapon sa kalibutan sa pisikal, indi na sila bahin sini. (Juan 17:15, 16) Kaangay sang hinaplas nga mga Cristiano, nga may ‘pagkabanwahanon sa langit,’ daw “mga dumuluong kag temporaryo nga mga pumuluyo” sila. (Filipos 3:20; 1 Pedro 2:11) Ginpahisanto nila ang ila kabuhi sa mga talaksan sang Dios, nga ginapahulag labaw sa tanan sang gugma sa Dios kag sang gugma sa isigkatawo. (Mateo 22:37-39) Wala nila ginahimud-usan ang makagod, materyalistiko nga mga tulumuron ukon nagabatyag nga dapat matuman ang ila personal nga damgo sa sining kalibutan. Sa baylo, ginapansal nila ang ila mga mata sa ginsaad nga ‘bag-ong mga langit kag bag-ong duta nga puy-an sang pagkamatarong.’—2 Pedro 3:13; 2 Corinto 4:18.
12. Ano nga report sang nagligad nga tuig ang nagahatag sing pamatuod nga sa tion sang presensia ni Jesus nakakita sia sing “pagtuo sa duta”?
12 Sang magsaylo si Abraham sa Canaan, sia lamang kag ang iya pamilya ang didto upod si Jehova nga magasakdag kag magaamlig sa ila. Apang, ining 316,092 ka bag-o mabawtismuhan nga mga Cristiano wala gid nagaisahanon. Matuod, ginasakdag sila kag ginaamligan ni Jehova paagi sa iya espiritu, subong sang ginhimo niya kay Abraham. (Hulubaton 18:10) Apang, dugang pa, ginasakdag niya sila paagi sa isa ka mapagsik, internasyonal nga “pungsod” nga mas madamo sing pumuluyo sangsa pila ka sekular nga mga pungsod karon. (Isaias 66:8) Sang nagligad nga tuig, 5,888,650 nga kataason sang mga banwahanon sina nga pungsod ang naghatag sing pamatuod sa ila aktibo nga pagtuo paagi sa pagpakighambal sa ila mga isigkatawo nahanungod sa mga saad sang Dios. (Marcos 13:10) Nakahinguyang sila sing tumalagsahon nga kadamuon sang 1,186,666,708 ka oras sa sining hilikuton, sa pagpangita sa interesado nga mga tawo. Subong resulta, 4,302,852 ka pagtuon sa Biblia ang gindumalahan sa iban pa nga luyag magpalambo sing pagtuo. Subong dugang pa nga pagpasundayag sang ila kakugi, 698,781 sa sini nga “pungsod” ang nagpayunir, subong bug-os tion ukon sa isa ka bulan ukon kapin pa. (Ang mga detalye sang mga nahimuan sang mga Saksi ni Jehova sang nagligad nga tuig makita sa pahina 12 tubtob 15.) Ining talalupangdon nga rekord isa ka positibo, buhi nga sabat sa pamangkot ni Jesus, “Kon mag-abot ang Anak sang tawo, makakita gid bala sia sing pagtuo sa duta?”
Matutom Walay Sapayan sang mga Pagtilaw
13, 14. Ilaragway ang pila sang mga kabudlayan nga nasumalang ni Abraham kag sang iya pamilya sa Canaan.
13 Ang kahimtangan anay ni Abraham kag sang iya panimalay sa Canaan masami nga mabudlay. Sang isa ka bes, isa ka daku nga tiggulutom ang natabo sa Canaan amo kon ngaa nagdulhog sila pa Egipto. Dugang pa, ang manuggahom sang Egipto kag ang manuggahom sang Gerar (malapit sa Gaza) lunsay nagpakita sing interes kay Sara nga asawa ni Abraham. (Genesis 12:10-20; 20:1-18) Nag-away man ang mga manugbantay sang kahayupan ni Abraham kag ang mga manugbantay sang kahayupan ni Lot, kag amo kon ngaa nabahinbahin ining duha ka panimalay. Mapainumuron nga ginpauna ni Abraham si Lot sa pagpili sing duta, kag ginpili ni Lot nga magpuyo sa Distrito sang Jordan, nga daw kaangay sang Eden sa katambok sang duta kag sa katahom.—Genesis 13:5-13.
14 Nian, nadalahig si Lot sa isa ka inaway sa ulot sang hari sang malayo nga Elam kag sang iya mga kaalyado kag sang mga hari sang lima ka siudad sa Nalupyakan sang Sidim. Nalutos sang dumuluong nga mga hari ang lokal nga mga hari kag nag-ati sing madamo nga butang, lakip si Lot kag ang iya mga pagkabutang. Sang mabatian ni Abraham ang natabo, walay kahadlok nga ginlagas niya ang dumuluong nga mga hari kag ginbawi si Lot kag ang iya panimalay, pati ang mga pagkabutang sang lokal nga mga hari. (Genesis 14:1-16) Apang, indi ini ang pinakamabudlay nga naeksperiensiahan ni Lot sa Canaan. Bangod sang pila ka rason nagpuyo sia sa Sodoma, walay sapayan sang imoral nga reputasyon sang siudad.b (2 Pedro 2:6-8) Sang ginpaandaman sang duha ka anghel nga ang siudad pagalaglagon, nalagyo si Lot upod sa iya asawa kag duha ka anak nga babayi. Apang, ang asawa ni Lot wala magsapak sa espesipiko nga instruksion sang mga anghel kag, subong resulta, nangin asin sia. Si Lot kag ang iya duha ka anak nga babayi nagpuyo sa isa ka lungib sa Zoar sing pila ka tion. (Genesis 19:1-30) Mahimo nga natublag gid sa sini si Abraham, labi na bangod si Lot nagkadto sa Canaan subong bahin sang panimalay ni Abraham.
15. Walay sapayan sang mga problema nga nasumalang ni Abraham samtang nagapuyo sa mga tolda sa iban nga duta, anong negatibo nga panghunahuna ang mahimo gid ginlikawan niya?
15 Naghunahuna ayhan si Abraham nga kuntani sia kag si Lot nagpabilin na lang sa kalig-unan sang Ur upod sa mga himata sang iya amay ukon sa Haran upod sa iya utod nga si Nahor? Naghandum ayhan sia nga kuntani nagpuyo na lang sia sa sulod sang pader sang siudad agod may kalig-unan sa baylo nga sa mga tolda? Ginduhaduhaan ayhan niya ang pagkamaalamon sang mga sakripisyo nga iya ginhimo subong isa ka manlulugayaw sa iban nga duta? Nagpatuhoy kay Abraham kag sa iya pamilya, si apostol Pablo nagsiling: “Kon matuod nga ginapanumdom nila sing padayon yadtong duog nga ila ginhalinan, may kahigayunan sila kuntani sa pagbalik.” (Hebreo 11:15) Apang, wala sila magbalik. Walay sapayan sang mga kabudlayan, nagpabilin sila sa duog nga ginpapuy-an sa ila ni Jehova.
Pagbatas Karon
16, 17. (a) Ano nga mga kabudlayan ang ginaatubang karon sang madamo nga Cristiano? (b) Anong positibo nga panimuot ang ginahuptan sang mga Cristiano? Ngaa?
16 Kaanggid man nga pagbatas ang makita sa mga Cristiano karon. Bisan pa ang pag-alagad sa Dios nagapahalipay sa ila sing daku, ang kabuhi indi mahapos para sa matuod nga mga Cristiano sa sining katapusan nga mga adlaw. Walay sapayan nga nagapuyo sila sa isa ka espirituwal nga paraiso, nagaantos sila sing mabudlay nga pangabuhi kaangay sang ila mga isigkatawo. (Isaias 11:6-9) Madamo ang nangin inosente nga mga biktima sa mga inaway sang mga pungsod kag ang iban pa nagaantos sing daku nga kaimulon nga indi sila ang balasulon. Dugang pa, ginabatas nila ang mga problema bangod nga sila indi popular nga mga minoriya lamang. Sa madamo nga kadutaan ginabantala nila ang maayong balita walay sapayan sang di-pagsapak sang kalabanan. Sa iban pa, ginaantos nila ang malimbungon nga mga pagsalakay sang mga “nagapahito sing kalainan paagi sa kasuguan” kag “ginapakamalaut bisan ang dugo sang walay sala.” (Salmo 94:20, 21) Bisan sa kadutaan diin ang mga Cristiano wala ginasalakay kag diin ginadayaw sila sang iban bangod sang ila mataas nga mga talaksan, nagapanikasog gid sila nga mangin tuhay sa ila mga kabutho kag mga kaupod sa trabaho—halos kaangay ni Abraham, nga nagpuyo sa mga tolda samtang ang kalabanan nga mga tawo sa palibot niya nagpuyo sa mga siudad. Huo, indi mahapos ang magkabuhi sa kalibutan apang “indi bahin” sini.—Juan 17:14.
17 Ginahinulsulan bala naton, kon amo, ang aton dedikasyon sa Dios? Nagahandum bala kita nga kuntani nagpabilin kita nga bahin sang kalibutan, kaangay sang tanan nga iban pa? Nagapanganduhoy bala kita bangod sang mga sakripisyo nga nahimo naton sa pag-alagad kay Jehova? Wala gid! Sa baylo nga mahidlaw sa gintalikdan naton, ginakilala naton nga ang bisan ano nga mahimo ginsakripisyo naton wala sa kamalingkingan kon ipaanggid sa mga pagpakamaayo nga ginaagom naton karon kag sa mga agumon pa naton sa palaabuton. (Lucas 9:62; Filipos 3:8) Luwas pa, malipayon bala ang mga tawo sa kalibutan? Ang kamatuoran amo, madamo sa ila ang nagapangita sing mga sabat nga yara na sa aton. Nagaantos sila bangod wala nila ginasunod ang panuytoy nga ginasunod naton gikan sa Dios paagi sa mga pahina sang Biblia. (Salmo 119:105) Kag madamo sa ila ang nagakalangkag sa sahi sang Cristianong paghiliupod kag makalilipay nga pag-updanay nga ginaagom naton upod sa mga masigkatumuluo.—Salmo 133:1; Colosas 3:14.
18. Ano ang resulta kon ang mga Cristiano magpakita sing kaisog kaangay sang kay Abraham?
18 Matuod, kon kaisa dapat kita magmaisog kaangay ni Abraham sang ginlagas niya ang mga nagbihag kay Lot. Apang kon matabo man ini, ginapakamaayo ni Jehova ang mangin resulta sini. Halimbawa, nagdaku gid ang pagdinumtanay sa Naaminhan nga Irlandiya bangod sang kasingki nga ginhimo sang mga sekta, gani kinahanglan ang kaisog agod mangin neutral. Apang, ginsunod sang matutom nga mga Cristiano ang ginsiling ni Jehova kay Josue: “Magpakaisog ka kag magpakabakod. Dili ka mahadlok ukon mahangawa, kay si Jehova nga imo Dios nagaupod sa imo bisan diin ka makadto.” (Josue 1:9; Salmo 27:14) Sa pagligad sang mga tinuig, subong resulta sang ila walay kahadlok nga panindugan gintahod sila, kag karon hilway sila nga nagabantala sa tanan nga komunidad sa sina nga pungsod.
19. Sa ano malipayon ang mga Cristiano, kag ano nga palaabuton ang masinaligon nga ginapaabot nila kon ginasunod nila ang panuytoy ni Jehova?
19 Indi gid kita magduhaduha nga bisan ano man nga kahimtangan ang ginaatubang naton, kon sundon naton ang panuytoy ni Jehova, ang hingapusan nga resulta mangin sa iya himaya kag sa aton kaayuhan. Walay sapayan sang mga hangkat kag mga sakripisyo, wala na sing iban pa nga butang nga handumon naton kundi ang mag-alagad kay Jehova, nga nagakalipay sa pagpakig-upod sa aton Cristianong mga kauturan kag masinaligon nga nagapaabot sa dayon nga palaabuton nga ginsaad sang Dios.
[Mga footnote]
a Mahimo gid nga gin-adoptar ni Abraham ang iya hinablos nga si Lot sang ang amay ni Lot, nga utod ni Abraham, napatay.—Genesis 11:27, 28; 12:5.
b Ang iban nagasiling nga si Lot nagpuyo sa isa ka siudad para sa daku pa nga kalig-unan sa tapos mabihag sang apat ka hari.
Nadumduman Mo Bala?
◻ Ngaa kinahanglanon ang mabakod nga pagtuo?
◻ Paano ginpakita ni Abraham nga mabakod ang iya pagtuo?
◻ Paano ang dedikasyon ginaupdan sang mga pagbag-o sa kabuhi sang isa?
◻ Ngaa malipayon kita sa pag-alagad sa Dios walay sapayan sang bisan anong mga problema nga mahimo ginaatubang naton?
[Mga retrato sa pahina 7]
Handa si Abraham nga himuon ang daku nga mga pagbag-o sa iya kabuhi agod mapanubli ang saad
[Mga retrato sa pahina 9]
Ginapakita sang pamatuod nga si Jesus nakakita sing “pagtuo sa duta” sa tion sang iya presensia