‘Dabok sang Pagkamausisaon sa Tagipusuon kag Hunahuna’

“Indi mapabutyag sang mga tinaga ang kalipay kag kakunyag nga nagabaskog samtang may kalangkag nga ginabasa ko ang Is There a Creator Who Cares About You? Nagapautwas ini sa isa sing handum—indi, sing isa ka kinahanglanon—nga maghibalo sing dugang pa. Salamat sa inyo sa pagdabok sing pagkamausisaon sa akon tagipusuon kag hunahuna.”

AMO sina ang ginbatyag sang isa ka Saksi ni Jehova gikan sa North Carolina, E.U.A., nahanungod sa libro nga ginpaguwa sang Watch Tower Society sa “Dalanon Sang Dios sa Kabuhi” Distrito nga mga Kombension sang 1998/99. Bisan pa kon wala ikaw sing kopya sang libro, talupangda ang iban pa nga komento.

Pila ka adlaw sa tapos mabaton ang iya kopya sa isa ka kombension sa San Diego, California, E.U.A., ang isa ka lalaki nagsulat: “Makapalig-on gid sa pagtuo ini nga libro para sa akon. Ginapuno sini ang akon tagipusuon sing hanuot nga apresasyon para sa mga binuhatan sang pagpanuga ni Jehova. Yari na ako sa pahina 98, kag daw indi ko gusto nga mag-abot ang adlaw nga makalab-ot ako sa katapusan! Subong sina ka makaalayaw ang akon kalipay.”

Ang isa ka babayi gikan sa Sidlangan nagsulat: “Gingamit sang humalambal sa kombension ang ekspresyon nga ‘tumalagsahon nga libro,’ kag bagay gid ina nga ekspresyon sa kaundan sini. Ang isa ka talalupangdon nga bahin amo nga wala ginapilit ang bumalasa nga patihan ang pagluntad sang Dios, apang, ginapresentar sini ang mga katunayan.”

Ang mga katunayan nagalakip sang makawiwili nga mga tukib sang siensia nahanungod sa aton uniberso, sa kabuhi, kag sa aton. Madamo ang nagdayaw sa sini. “Indi ko gid mapabutyag kon daw ano ka tudok ang epekto sining diutay nga libro sa akon,” sulat sang isa ka babayi gikan sa California. “Indi ko mauntat ang pagbasa sa libro samtang ang tagsa ka pahina nagalaragway sing kapin pa nga mga tukib nahanungod sa aton uniberso kag sa kabuhi mismo. Madamo gid ako sing natun-an! Pakabahandion ko ining diutay nga libro kag ipaambit ini sa madamo.”

Ang bahin nga nagpahalipay sa madamo amo ang paagi sang pagsumaryo sang libro sa Biblia, nga nagapadaku sang personalidad sang Manunuga. “Ang kabilugan nga pagtamod sang Biblia, nga ginpresentar sa likod nga bahin sang libro, amo ang isa sa pinakamaayo nga akon nabasahan,” amo ang isa ka kinaandan nga komento. Wala magdugay sa tapos sang una nga kombension sa New York, E.U.A., isa pa ang nagsulat: “Ang bag-o nga ginpaguwa amo ang labing makawiwili nga publikasyon nga inyo nabalhag. Nagdayaw ako sa sientipiko nga mga pamatuod nga may isa ka Manunuga. Ang ginpalip-ot nga sumaryo sang Biblia bastante na agod ipaathag ang mga punto kag agod pukawon ang gana sa pagbasa sing dugang pa.”

Mahangpan nga Siensia

Ang sientipiko nga impormasyon sa una nga mga kapitulo daw mabudlay hangpon, apang yari ang kinaandan nga mga reaksion.

Ang isa ka taga-Canada nga lalaki nagsulat: “Tuhay gid ini sa teknikal nga mga libro nga ang mga awtor sini nagatinguha sa pagpadayaw sa aton sang ila madalom nga mga tinaga. Ang inyo pagkaiskolar tumalagsahon sa paghimo sang mga topiko subong sang pisika, chemistry, DNA, mga chromosome, kag iban pa, nga mahangpan gid namon. Kuntani kamo na lang ang nagsulat sang mga libro sa unibersidad nga akon gintun-an tinuig sang una!”

Ang isa ka propesor sa unibersidad sa pisika nagsulat: “Maathag nga ginapresentar [sini] ang mga hulusayon nga nadalahig nga wala nagasalawid sa teknikal nga detalye. Nagapangatarungan ang libro upod sa bumalasa kag nagabalikwat gikan sa madamong sientipiko. Isa ini ka mapuslanon nga balasahon para sa tanan nga interesado sa ginhalinan sang uniberso kag kabuhi, sientipiko man ukon ordinaryo lamang nga tawo.”

Ang isa ka lin-ay nga nagakuha sing kurso subong nars nagsiling: “Daw indi ako makapati sang mabuksan ko ang kapitulo 4 kag mabasa ang isa ka ginbalikwat gikan sa libro nga ginagamit namon sa klase! Ginhatag ko ang libro sa amon propesor kag ginsugiran sia nga sa banta ko manamian sia sa impormasyon. Ginpakita ko sa iya ang pahina 54 nahanungod sa utok. Ginbasa niya ini kag nagsiling, ‘Makawiwili ini! Usisaon ko ini.’”

Ang isa ka katapo sang parlamento sa Belgium nagsulat: “Ang nagpainteres kag nagganyat sa akon amo ang sientipiko nga paagi nga nagapadaku nga ang modernong siensia indi supak sa ginapahangop sang Biblia nga pagpati sa isa ka Dios kundi, sa baylo, nagahisantuanay ini. Isa gid ini ka talalupangdon nga pagtamod.”

Pagkilala sa Manunuga sing Maayo Pa

Ang libro nagbulig sa mga tawo sa madamong kadutaan nga makilala ang Dios sing maayo pa kag magsuod pa sa iya. Ang isa ka bumalasa sa Siudad sang Fukuoka, Japan, nagsiling: “Daw subong bala nga nasentro sing sibu ang lente kay Jehova sa nahauna nga tion. Makapakumbinsi sing makadalayaw ang libro. Nakilala ko si Jehova gikan sa pagtamod nga wala ko pa gid mahunahuna tubtob karon.” Ang isa ka lalaki sa El Salvador nagsulat: “Ginpaathag gid ninyo sing maayo kon daw ano ka maluluy-on, mainayuhon, mahinay sa pagpangakig, kag bugana sa mahigugmaon nga kaayo ang Dios. Sa pagkamatuod, amo gid ini ang aton kinahanglanon agod magsuod pa sa iya kag sa iya Anak. Amo ini ang nahauna nga libro nga nagapaathag sang balatyagon ni Jehova kag sang tawhanon nga balatyagon sang iya Anak, si Jesus.” Kag ang isa ka bumalasa sa Zambia nagsiling: “May bag-o na karon nga kahulugan si Jehova sa akon.”

Halangpunon nga nakunyag gid ang mga Saksi ni Jehova nga ipaambit sa iban ang Is There a Creator Who Cares About You? Nagsiling ang isa: “Samtang nagahingapos ako sa pagbasa sa kapitulo 10 [“If the Creator Cares, Why So Much Suffering?”], nakahambal ako nga, ‘Amo gid ini ang libro nga kinahanglan namon sa Japan!’ Luyag ko dumdumon sing maayo ang materyal sa sining kapitulo kag gamiton ini sa pag-alagad sa latagon sing kapin pa.” Ang isa pa ka babayi nagatuon sing Biblia upod sa isa ka bata nga babayi nga nagdaku sa templo sa diin pari ang iya amay. “Nabudlayan sia sa pagbaton sa ideya nga may Manunuga. Wala sing dogmatiko sa paathag sining libro, apang yara ang mga katunayan, gani sa banta ko bisan ang mga Budhista magabasa sini sa gilayon. Nagapabatyag man ini sa aton sang gugma ni Jehova sing labi pa.”

Naghalin sa Inglaterra ini nga komento: “Bag-o ko lang natapos ang Creator nga libro kag manugsugod sa pagbasa sini liwat. Isa gid ini ka dalayawon nga libro! Higugmaon gid sang isa si Jehova kon mabasa ini. Ginhatagan ko sini ang akon kaingod, nga sa tapos mabasa ang duha pa lang ka kapitulo nagsiling, ‘Indi ko ini mauntatan, tuman ini ka makawiwili.’ Napat-od ko nga magabulig ini sa mga tawo nga kilalahon kag higugmaon ang aton Dakung Manunuga.”

Ang isa ka lalaki sa Maryland, E.U.A., nagsiling: “Matuod gid nga nagapanalupsop ini sa akon espirituwalidad! Nagaplano ako nga hatagan sing kopya ang tanan nga tawo nga ginapakig-angutan ko sa trabaho. Nabudlayan ako kon kaisa magsugod sa pagpanaksi sa masako kag edukado nga mga tawo. Paagi sa sining libro may makagalanyat kag epektibo na ako nga pagpalapit.”

Maathag nga may positibo nga resulta ang libro nga Is There a Creator Who Cares About You? sa mga tawo sa bug-os nga duta.

[Ginkuhaan Sang Laragway sa pahina 25]

Panghapin nga retrato sa ibabaw, Eagle Nebula: J. Hester kag P. Scowen (AZ State Univ.), NASA