Ang Bag-ong Libro nga Nagapahalipay sa Minilyon
ANG isa ka bahin sa “Mga Mahigugmaon sang Kahilwayan” nga mga Kombension nga nagsugod sang nagligad nga Hulyo amo ang pamulongpulong “Ang Pinakabantog nga Tawo nga Nagkabuhi.” Ang talalupangdon nga punto sini amo ang pagpaguwa sang libro nga may amo man sini nga titulo. Kapin sa anum ka milyon ka tawo sa bug-os nga kalibutan ang nakatambong na sa sining serye sang mga kombension kag nakapamati sa pamulongpulong, nga mabasa sa ginpasimple nga dagway sa naunang duha ka artikulo sining magasin.
Kapin sa 12 milyones ka kopya sang libro nga Ang Pinakabantog nga Tawo nga Nagkabuhi ang gin-imprinta sa mga 60 ka hambal. Matigayon ini bisan sa mga hambal nga Albanian, Croatian, Hungario, Macedonianhon, Polaco, Ruso, Serbiano, kag Sloveniano sa Nasidlangan nga Europa. Ang kapin sa 74,000 nga nagtambong sa pito ka kombension sa Unyon Sobyet nalipay labi na sa pagbaton sini sa Ruso nga hambal.
Ginhalinan sang Libro
Ang materyal sang libro nagguwa anay sa serye sang 147 ka alagisod nga guwa sang Ang Lalantawan, sugod sang Oktubre 1, 1985 (Abril 1, 1985 sa The Watchtower), nga guwa. Madamong bumalasa ang nagkasubo sang natapos ini sang Hunyo 1, 1991 nga guwa. Si Melissa, isa ka 12-anyos sa Italya, may luha sa iya mga mata sang ginbasa niya ang katapusan nga sugilanon sa Ang Lalantawan. “Sang gab-i antes sang amon kombension,” siling niya, “nangamuyo ako kay Jehova nga nagapangabay sing isa ka libro nahanungod sa kabuhi ni Jesus. Sang ginpresentar ang libro, nagpalakpak ako sing mabaskog.”
Ang materyal nga ginserye sa Ang Lalantawan gin-edit kag ginhimo nga isa ka bag-o kag may matahom nga laragway nga 448 ka pahina nga libro nga may 133 ka kapitulo. Ginhimo ang panikasog nga ihatag ang tanan nga pamulongpulong nga ginhatag ni Jesus kag ang tanan nga ginrekord nga hitabo sang iya kabuhi sa duta, lakip ang tanan niya nga mga ilustrasyon kag mga milagro. Tubtob mahimo, gin-asoy ang tanan sing pasunod suno sa hitabo. Sa katapusan sang kada kapitulo, may listahan sang mga teksto sa Biblia diin ginpasad ang kapitulo.
Ang isa mahimo magahunahuna, ‘Ti, nabasa ko na ang libro bangod nabasa ko ang mga serye sa Ang Lalantawan.’ Apang nabaton sang mga bumalasa sang Lalantawan ang sugilanon nahanungod sa kabuhi ni Jesus sa magagmay nga bahin nga ginpresentar sa mga artikulo nga nagguwa kada duha ka semana sa panag-on nga kapin sa anum ka tuig. Bisan pa ang mga artikulo impormatibo kag sa serye nga dagway, handurawa ang kalipay sang pagbasa sa bug-os nga sugilanon sa malip-ot nga tion kag sang pagtan-aw sa bug-os nga laragway sang pinakabantog nga tawo nga nagkabuhi!
Makapabakod sang Pagtuo
“Natapos ko ang pagbasa sang publikasyon sa duha ka semana,” siling sang isa ka babayi nga taga-Washington, D.C. “Samtang nagabasa, ang mga luha nagailig sa akon mga mata. Nagadulog ako sa pagbasa kag nagapangamuyo kag nagahibi. Nagbatyag ako nga daw yara sa tupad ni Jesus, nagaantos kaupod niya. Bisan pagligad sang isa ka semana nga nabasa ko ang libro, nagatulo gihapon ang luha sa akon mga mata kon madumduman ko ang akon nabasa. Nagbatyag ako nga nagsuod sing labi pa kay Jehova tungod sang paghatag niya sa iya Anak.”
“Natapos ko ang libro nahanungod kay Jesus karon nga adlaw,” sulat sang isa ka babayi nga taga-Pittsburgh, Pennsylvania, E.U.A. “Matahom ini. May luha sa akon mga mata samtang ginabasa ko ang katapusan nga pila ka kapitulo. Ang pagtapos gilayon sang libro maayo gid. Indi ko gid malaragway kon ano ang akon balatyagon nahanungod sini—lamang nga nanamian gid ako sini!”
Ang matahom nga mga laragway sa libro dugang nga nagatandog sang balatyagon, subong sang ginsiling sang isa ka mainapresyahon nga bumalasa: “Ang pamatyag ko daw nabatian ko sila nga nagahibi tungod sang bata nga napatay (kapitulo 47) ukon nga nahibaluan naton kon ano ang ginahunahuna ni Jesus sang gintandog sia sang isa ka babayi nga may nagaagay nga dugo kag gin-ayo (kapitulo 46). Ang ekspresyon sa ila mga guya tuman ka matuod nga mabatyagan mo ang kasakit . . . . Sa baylo nga ang pagbasa isa ka hilikuton, ginahimo ini sining libro nga daw kalingawan ukon pagpahunayhunay pagligad sang isa ka adlaw. Ang pagbinagbinag sang libro sa mga panimuot kag mga balatyagon indi lamang nagasugid kon ano ang ginhimo ni Jesus kundi nagahatag sing ideya sa kon ano ang ginhunahuna kag ginbatyag niya.”
Lainlain nga Kapuslanan
Ginsugdan sang madamo nga gamiton ang libro sa ila pamilya nga pagtuon sa Biblia. “Tatlo ang amon magagmay nga kabataan,” sulat sang taga-Silverton, Oregon, E.U.A. nga mga ginikanan, “kag bagay ining libro para sa amon ‘kada gab-i nga pagtuon sang pamilya.’ Sa pagkamatuod, nagakaigo gid nga tun-an naton sing maayo ang ginhalinan sang aton mahigugmaon nga Hari, nga si Cristo Jesus.
Isa ka tin-edyer sa Hapon ang nagsiling: “Ginabasahan kami sang amon amay samtang nagapahuway kami pagkatapos sang panihapon. Subong isa ka pamilya, nagabasa kami halin sa ginsuguran, apang namat-od ako nga basahon ang isa ka kapitulo sa isa ka libro halin sa likod antes magtulog. Apang, tuman gid ini ka magalanyat sa bagay nga masunson ala-una na sa aga nga mamutikan ko ang oras.”
Madamo ang natingala sa kon pila kadamo nga detalye ang ginalakip sa mga sugilanon. “Natun-an ko ang madamong butang nga wala ko mahibalui,” sulat sang isa ka Saksi. Isa ka sulat halin sa California, E.U.A., ang nagsiling: “Kami sang akon asawa yara sa kamatuoran sa sobra sa 35 ka tuig, kag makasiling kami sing bunayag nga amo lang ini nga publikasyon namon ang tuman ka makagalanyat.”
Ang libro nagabulig sa pagdula sang kabutigan nga ang mga Saksi ni Jehova wala nagapati kay Jesus. Ang isa ka mapasalamaton nga bumalasa nagkomento sa sining paagi: “Indi ko gid ini mabutang, kay amo ini ang pinakadaku nga sabat sa pagkawalay hinalung-ong sang mga nagasiling nga ang katawhan ni Jehova wala nagapati ukon nagapadungog kay Jesucristo. Ang himuon naton karon amo ang pagpahamtang sa ila kamot sining sabat sa ila pagkawalay hinalung-ong.”
Pat-od gid nga ining libro may importante nga duog sa ministeryo sang mga Saksi ni Jehova. “Ginhatag ko ang isa ka kopya sa isa ka babayi nga ginatun-an ko sing Biblia,” sulat sang isa ka Saksi, “kag ang epekto sini sa iya daw isa ka milagro. Isa ka tuig na sia nga nagatuon, kag nabudlayan ako nga pakadtuon sia sa mga miting.” Pagkatapos nabasa sang estudyante ang 45 ka kapitulo sang bag-ong libro, ang Saksi nagsiling, “ginsilingan niya ako nga makadto sia sa miting sa Domingo bangod tion na para sa iya ang maghimo sing tindog.”
Hamili nga mga Bahin
Sa katunayan, Ang Pinakabantog nga Tawo nga Nagkabuhi nagahatag sing komentaryo tuhoy sa Mga Ebanghelyo. Ginhatag ang mga paathag sa madamong butang nga ginsiling kag gintudlo ni Jesus, gani ang libro sarang magamit subong isa ka hamili nga kagamitan sa pagpanalawsaw, kay nahisanto gid ini sa mga sugilanon sa Biblia.
Ang pinasahi gid sa sini amo nga tanan halos ginsugid sing pasunod. Ang pagbukad sa mga pahina nga ginadumdom ini isa gid ka daku nga bulig sa paghibalo kon san-o, sa lakat sang ministeryo ni Jesus, natabo sang pila ka hitabo. Ang mga bumalasa sang Mga Ebanghelyo masunson nakasugata sang daw pagsumpakilay. Ang bag-ong libro, nga wala gid man nagatalupangod sini, nagapahisanto sini sa presentasyon.
Subong mga Cristiano, indi naton luyag nga patumbayaan ang maayong pagtuon sa kabuhi sang aton matutom nga Huwaran, si Jesucristo. Busa, binagbinagon naton sing maayo ang mga sugilanon sa Ebanghelyo paagi sa bulig sang bag-ong libro nga Ang Pinakabantog nga Tawo nga Nagkabuhi.