Ang Ika-108 Nga Klase sang Gilead Ginpalig-on nga Maghimo sing Sagrado nga Pag-alagad

SA Biblia, ang pagsimba sa Dios masami ginapatuhuyan sang ekspresyon nga “sagrado nga pag-alagad.” Naghalin ini sa Griegong termino nga nagapatuhoy sa paghimo sing pag-alagad sa Dios. (Roma 9:4) Ang 5,562 nga namati sa programa sang gradwasyon sang ika-108 nga klase sang Watchtower Bible School of Gilead nakabati sa mga humalambal nga nagahatag sing praktikal nga laygay nga makabulig sa mga gradwado sa paghimo sing sagrado nga pag-alagad nga kalahamut-an kay Jehova nga Dios.⁠a

Si Theodore Jaracz, nga katapo sang Nagadumala nga Hubon sang mga Saksi ni Jehova, amo ang tsirman. Nagbukas ang programa paagi sa ambahanon numero 52, “Ngalan Sang Amay Namon.” Ang ikaduha nga stanza sini nga ambahanon nagasiling: “Tinguhaan namon pirme mabalaan ngalan mo.” Ginpabutyag gid sini ang tinagipusuon nga handum sang mga estudyante sang manuggradwar nga klase (nga naghalin sa 10 ka pungsod) nga gamiton ang natun-an nila sa 17 ka kadutaan nga padalhan sa ila subong mga misyonero.

Sa iya nagabukas nga pamulongpulong, ginpatalupangod ni Utod Jaracz ang lima ka bulan sang maid-id nga pagtuon sang mga estudyante sa Biblia nga naghanda sa ila para sa pag-alagad sa iban nga mga pungsod. Nakabulig ini sa ila nga ‘pat-uron ang tanan nga butang,’ kon sayuron, usisaon paagi sa kapawa sang Pulong sang Dios ang ila natun-an anay, kag ‘huptan sing malig-on ang maayo.’ (1 Tesalonica 5:21) Ginpalig-on niya sila nga mag-unong kay Jehova, sa iya Pulong, kag sa hilikuton nga para sa amo ginhanas sila. Ano ang magabulig sa ila samtang ginahimo nila ini tanan?

Praktikal nga Laygay sa Paghimo Sing Sagrado nga Pag-alagad

Si Lon Schilling, nga katapo sang Bethel Operations Committee, nagpamulongpulong sa tema nga “Makapasar Bala Kamo sa Pagtilaw Sang Pagkarasonable?” Ginpadaku niya ang pagkaimportante sang pagkarasonable, nga nagapakita sang diosnon nga kaalam. (Santiago 3:17) Ang pagkarasonable nagalakip sing pagpaumod, walay nadampigan, kalmado, pagpatugsiling, kag pagpailob. “Ang rasonable nga mga tawo balanse sa pagpakig-angot sa iban. Wala sila nagapasobra,” siling ni Utod Schilling. Ano ang makabulig sa isa ka misyonero agod mangin rasonable? Amo ang mapainubuson nga pagtamod sa kaugalingon, paghimulos sa mga kahigayunan nga mamati kag makatuon sa iban, kag kahanda nga binagbinagon ang mga pagtamod sang iban apang wala ginakompromiso ang diosnon nga mga prinsipio.​—⁠1 Corinto 9:​19-23.

“Indi Pagkalimti ang Pagkaon!” amo ang makawiwili nga titulo sang masunod nga bahin sang programa, nga ginpresentar ni Samuel Herd, isa pa ka katapo sang Nagadumala nga Hubon. Ginpadaku niya ang pagkaimportante sang maayong espirituwal nga pagkaon agod magpabilin nga mapagros sa paghimo sing sagrado nga pag-alagad. “Ang inyo espirituwal nga hilikuton,” siling ni Utod Herd, “magadugang sa indi madugay sa tion nga sugdan na ninyo ang inyo hilikuton nga pagbantala kag pagpanudlo. Busa, kinahanglan nga dugangan ninyo ang pagkaon sing espirituwal nga kalan-on agod balansehon kag huptan ang inyo kusog.” Ang dalayon nga pagkaon sing espirituwal nga kalan-on makabulig sa isa ka misyonero nga likawan ang espirituwal nga kapung-aw kag kahidlaw. Nagabulig ini agod mangin kontento kag desidido nga magpabilin ang isa sa iya sagrado nga pag-alagad.​—⁠Filipos 4:⁠13.

Si Lawrence Bowen, nga isa ka instruktor sa Gilead, nagpalig-on sa manuggradwar nga mga estudyante nga “Magbalik Kamo sa Pamuno.” Ano ang buot niya silingon? Ginpabuksan niya sa tanan nga nagtambong ang Hulubaton 1:​7, nga nagasiling: “Ang kahadlok kay Jehova amo ang pamuno sang ihibalo.” Ang humalambal nagpaathag: “Ang bisan ano nga nagasikway sa pinakaimportante nga katunayan sang pagluntad ni Jehova indi gid masiling nga matuod nga ihibalo ukon magresulta sa nagakaigo nga paghangop.” Ginpaanggid ni Utod Bowen ang mga detalye sang Pulong sang Dios, ang Biblia, sa mga bahin sang jigsaw puzzle. Kon tingubon ang mga bahin, isa ka laragway ang maporma. Samtang nagadugang ang mga bahin, nagadaku man kag nagaathag ang laragway kag nagadaku man ang apresasyon sang isa ka tawo. Makabulig ini sa tanan sa paghimo sing sagrado nga pag-alagad sa Dios.

Si Wallace Liverance, ang rehistrador sang Eskwelahan sang Gilead, amo ang naghinakop sang mga serye sang pamulongpulong. Ang iya tema amo ang “Magdulot Sing Pagpasalamat Subong Halad Ninyo sa Dios.” Ginpatalupangod niya ang kasaysayan tuhoy sa pag-ayo ni Jesus sa napulo ka aruon. (Lucas 17:​11-19) Isa lamang ang nagbalik agod dayawon ang Dios kag pasalamatan si Jesus. “Walay duhaduha nga ang iban nakunyag nga nagtinlo sila. Nalipay gid sila sa ila matinlo nga kahimtangan, apang daw subong bala nga interesado lamang sila nga tawgon nga matinlo sang saserdote,” komento ni Utod Liverance. Ang espirituwal nga katinlo nga resulta sang pagtuon sa kamatuoran, upod ang pagkamapinasalamaton, dapat magpahulag sa isa nga pasalamatan ang Dios sa iya kaayo. Ang mga estudyante sang ika-108 nga klase sang Gilead ginpalig-on nga pamalandungan ang tanan nga binuhatan kag kaayo sang Dios agod himuon ang ila pag-alagad kag mga pagsakripisyo nga isa ka tanda sang pagpasalamat sa Dios.​—⁠Salmo 50:​14, 23; 116:​12, 17.

Mga Eksperiensia kag mga Interbyu Kon Paano Ini Himuon

Si Mark Noumair, isa pa ka instruktor sang Gilead, amo ang nagdumala sang masunod nga bahin sang programa. Tuhoy ini sa mga naeksperiensiahan sang klase sa pag-alagad sa latagon sa tion sang ila paghanas. Sa promedyo, nakahinguyang ang mga estudyante sing mga 12 ka tuig sa bug-os tion nga pagministeryo antes mag-eskwela sa Gilead. Samtang nagaeskwela sila, nakasugod sila sing madamo nga pagtuon sa Biblia upod sa mga tawo nga may nanuhaytuhay nga ginhalinan, nga nagapakita nga ang mga estudyante nakahibalo kon paano ‘mangin tanan nga butang sa tanan nga sahi sang tawo.’​—⁠1 Corinto 9:⁠22.

Pagkatapos sang mga eksperiensia sang mga estudyante, gin-interbyu nanday Charles Molohan kag William Samuelson ang pila ka katapo sang pamilya Bethel kag ang nagalakbay nga mga manugtatap nga nakaeskwela sa Gilead. Ang isa sang mga utod nga gin-interbyu, si Robert Pevy, nag-alagad sa Pilipinas sa tapos makagradwar sa ika-51 nga klase sang Gilead. Ginpahanumdom niya ang klase: “Sa kada tion nga may problema, ang tanan nagahatag sang iya mga panugda kon paano lubaron ang problema. Pirme gid nga may yara mas maalam sa imo, isa nga makapanugda sing mas maayo nga ideya. Apang kon usisaon mo ang Biblia kag hibaluon ang pagtamod sang Dios sa mga butang, wala sing bisan sin-o nga makalabaw sa sini. Amo ini pirme ang husto nga sabat.”

Sa pagtapos sang maayong espirituwal nga programa, si John Barr, nga katapo sang Nagadumala nga Hubon, nagpamulongpulong sa tema nga “Maghimo Sing Kalahamut-an nga Sagrado nga Pag-alagad kay Jehova.” Ginpakita niya kon paano mapadayag ang sagrado nga pag-alagad sa pagministeryo sa latagon, agod buligan ang mahagop nga mga indibiduwal nga magsimba sa Dios sa kalahamut-an nga paagi. Sa tapos mabasa ang mga pulong ni Jesus sa Mateo 4:​10, si Utod Barr nagsiling, “Kon si Jehova lamang ang luyag naton simbahon, dapat naton sikwayon ang tanan nga malalangon nga porma sang idolatriya, subong sang pagkamahamkunon, kailigbon sa manggad, kag pagrekomendar sa kaugalingon. Makalilipay gid hunahunaon nga ang aton mga misyonero sa sulod sang mga tinuig halin sang maaga nga bahin sang katuigan 1940 nakatukod sing isa ka maayo gid nga rekord sa sining bahin! Kag sigurado gid kami nga kamo nga mga gradwado sang ika-108 nga klase sang Gilead magasunod sa ila maayong huwaran. Magahimo kamo sing sagrado nga pag-alagad kay Jehova, nga amo lamang ang takus nga magbaton sini.”

Isa yadto ka positibo nga katapusan sang isa ka makapalig-on nga programa. Nian, ginbasa ang mga panamyaw gikan sa bug-os nga kalibutan, ginpanghatag ang mga diploma, kag ginbasa ang sulat gikan sa klase nga nagapabutyag sing apresasyon sa paghanas nga nabaton. Ginlaygayan ang naggradwar nga klase nga ipakita ang kinaiya nga pagkamainunungon sa ila asaynment kag sa pag-alagad kay Jehova. Ang tanan nga nagtambong, lakip ang mga dinapit gikan sa 25 ka pungsod, nagbuylog sa pagtakop sa programa paagi sa ambahanon kag pangamuyo.

[Nota]

[Kahon sa pahina 23]

ESTADISTIKA SANG KLASE

Kadamuon sang pungsod nga gintiglawas: 10

Kadamuon sang pungsod nga ginpadalhan: 17

Kadamuon sang mga estudyante: 46

Promedyo nga edad: 34

Promedyo nga tinuig sa kamatuoran: 16

Promedyo nga tinuig sa bug-os tion nga ministeryo: 12

[Retrato sa pahina 24]

Ika-108 nga Naggradwar nga Klase Sang Watchtower Bible School of Gilead

Sa listahan sa ubos, ang mga idas nanumeruhan halin sa atubangan pa likod, kag ang mga ngalan ginalista halin sa wala pa tuo sa tagsa ka idas.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.