“Bantayi Ninyo ang Panong sang Dios nga Yara sa Inyo Pag-atipan”
“Bantayi ninyo ang panong sang Dios nga yara sa inyo pag-atipan, indi nga napilitan, kundi sing kinabubut-on.”—1 PED. 5:2.
1. Ano ang kahimtangan sang mga Cristiano sang ginsulat ni Pedro ang iya una nga sulat?
GINSULAT ni Pedro ang iya una nga sulat antes ginhingabot ni Nero ang mga Cristiano sa Roma. Luyag niya palig-unon ang iya mga masigkatumuluo. Ang Yawa “nagaluyong,” nga nagatinguha nga tukbon ang mga Cristiano. Agod makabato sa iya, kinahanglan nila nga ‘huptan ang kaligdong’ kag ‘magpaubos sa idalom sang gamhanan nga kamot sang Dios.’ (1 Ped. 5:6, 8) Dapat man sila magpabilin nga nahiusa kag indi ‘mag-atakihay kag magsakitanay,’ kay mahimo nga ‘malaglag nila ang isa kag isa.’—Gal. 5:15.
2, 3. Sin-o ang aton ginapamatukan, kag ano ang aton pagabinagbinagon sa sini kag sa masunod nga artikulo?
2 Amo man sini ang aton kahimtangan. Nagapangita sing kahigayunan ang Yawa nga tukbon kita. (Bug. 12:12) Kag sa indi madugay, magaatubang kita sa “dakung kapipit-an, nga ang subong sini wala pa mahanabo kutob sa ginsuguran sang kalibutan.” (Mat. 24:21) Pareho sang mga Cristiano sang unang siglo, likawan man naton ang pagbangigay. Agod mahimo ini, kon kaisa kinahanglan naton ang bulig sang kalipikado nga mga gulang.
3 Hambalan naton kon paano maapresyar sing labi sang mga gulang ang ila pribilehiyo nga bantayan ‘ang panong sang Dios nga ila ginaatipan.’ (1 Ped. 5:2) Dayon, binagbinagon naton ang nagakaigo nga paagi sa pagbantay. Sa masunod nga artikulo, usisaon naton kon paano mapakita sang kongregasyon ang ‘pagtahod sa mga nagapangabudlay sing lakas kag nagadumala’ sa panong. (1 Tes. 5:12) Ang pagbinagbinag sini makabulig sa aton nga mangin malig-on sa pagpamatok sa aton panguna nga Kaaway, kay nakahibalo kita nga sa iya kita nagapakigdumog.—Efe. 6:12.
Bantayi ang Panong sang Dios
4, 5. Ano dapat ang pagtamod sang mga gulang sa panong? Iilustrar.
4 Ginpalig-on ni Pedro ang mga gulang nga lalaki sang unang siglo nga tamdon ang panong nga gintugyan sa ila suno sa pagtamod sang Dios. (Basaha ang 1 Pedro 5:1, 2.) Bisan ginakabig si Pedro nga haligi sang kongregasyon, wala niya ginpakanubo ang mga gulang. Sa baylo, ginlaygayan niya sila subong masigkagulang. (Gal. 2:9) Pareho ni Pedro, ginapalig-on man sang Nagadumala nga Hubon sa karon ang mga gulang sa kongregasyon nga tinguhaan nga tumanon ang ila mabug-at nga responsibilidad nga atipanon ang panong sang Dios.
5 Ang apostol nagsulat nga ang mga gulang nga lalaki dapat ‘magbantay sang panong sang Dios nga ila ginaatipan.’ Dapat gid nila tandaan nga ang panong iya ni Jehova kag ni Jesucristo. May salabton ang mga gulang kon paano nila ginabantayan ang mga karnero sang Dios. Halimbawa, ginpangabay ka sang imo suod nga abyan nga bantayan anay ang iya kabataan kay may kadtuan sia. Indi mo bala sila pag-atipanon kag pakan-on sing maayo? Kon may magmasakit sa ila, indi mo bala pag-ipadoktor? Sing kaanggid, ang mga gulang dapat ‘magbantay sang kongregasyon sang Dios, nga ginbakal niya paagi sa dugo sang iya Anak.’ (Binu. 20:28) Ginadumdom gid nila nga ang kada karnero ginbakal sang malahalon nga dugo ni Cristo Jesus. Bangod may salabton sila, ginapakaon, ginaamligan, kag ginaatipan sang mga gulang ang panong.
6. Ano ang responsibilidad sang mga manugbantay sang karnero sang una?
6 Binagbinaga ang responsibilidad sang mga manugbantay sang karnero sang panahon sang Biblia. Nagapatial sila sa adlaw kag nagaantos sang katugnaw sa gab-i para mabantayan ang panong. (Gen. 31:40) Ginarisgo pa gani nila ang ila kabuhi para sa mga karnero. Ginluwas sang bata nga manugbantay nga si David ang iya panong gikan sa talunon nga mga sapat, lakip sa leon kag uso. Tuhoy sa kada isa sini, si David nagsiling: “Gindakup ko sia sa iya bungut, kag ginsakit sia kag ginpatay sia.” (1 Sam. 17:34, 35) Maisog gid sia kay sa iya ginhimo puede sia gus-abon sang sapat! Apang wala sia mag-atras sa pagluwas sang iya karnero.
7. Sa malaragwayon nga paagi, paano masabnit sang mga gulang ang karnero sa baba ni Satanas?
7 Ang mga gulang sa karon dapat man magbantay sa tulad-leon nga pagsalakay sang Yawa. Mahimo ini maglakip sang maisugon nga aksion subong sang malaragwayon nga pagsabnit sang karnero sa baba sang Yawa. Paagi sa malaragwayon nga pagkapot sa bungot sang mapintas nga sapat, sarang maluwas sang mga gulang ang karnero. Puede sila makapangatarungan sa utod nga natiplang sang mga siod ni Satanas. (Basaha ang Judas 22, 23.) Siempre, indi magmadinalag-on ang mga gulang kon wala ang bulig ni Jehova. Mahigugmaon nila nga ginaatipan ang nasamaran nga karnero, ginabugkusan ini, kag ginabanyusan sang makapaayo nga Pulong sang Dios.
8. Sa diin ginatuytuyan sang mga gulang ang panong, kag paano?
8 Ginatuytuyan man sang manugbantay ang panong pakadto sa maayo nga halalban kag ilimnan. Sing kaanggid, ginatuytuyan sang mga gulang ang panong pakadto sa kongregasyon, ginapalig-on nga mangin regular sa mga miting agod mabusog sila kag makahalab sing “pagkaon sa nagakaigo nga tion.” (Mat. 24:45) Mahimo kinahanglan sang mga gulang ang ekstra nga tion agod buligan ang mga nagabalatian sa espirituwal nga batunon ang masustansia nga pagkaon gikan sa Pulong sang Dios. Ang nagtalang nga karnero mahimo nagapanikasog nga magbalik sa panong. Sa baylo nga pahugon, malulo nga ginapaathag sang mga gulang ang mga prinsipio sa Biblia kag ginabuligan sia nga iaplikar ini.
9, 10. Paano atipanon sang mga gulang ang mga nagabalatian sa espirituwal?
9 Kon nagabalatian ka, ano nga sahi sang doktor ang luyag mo? Ang isa bala nga nagadali kag nagareseta lang dayon kay madamo ang nagapila? Ukon ang isa nga nagapamati sa imo, nagapaathag kon ano ang imo ginabatyag, kag nagaisplekar sang mga pamaagi sa pagbulong?
10 Sing kaanggid, mahimo pamatian sang mga gulang ang nagabalatian sa espirituwal kag buligan sia nga mag-ayo, sa amo malaragwayon nga “nagahaplas sa iya sang lana sa ngalan ni Jehova.” (Basaha ang Santiago 5:14, 15.) Kaangay sang balsamo halin sa Galaad [ukon Gilead], ang Pulong sang Dios makapaumpaw sa nagabalatian. (Jer. 8:22; Ezeq. 34:16) Ang pagsunod sa mga prinsipio sang Biblia makabulig sa isa nga mangin aktibo liwat. Daku gid ang mabulig sang mga gulang kon pamatian nila ang mga ginakabalak-an sang nagabalatian nga karnero kag mangamuyo upod sa iya.
Indi nga Napilitan Kundi sing Kinabubut-on
11. Ano ang nagapahulag sa mga gulang nga bantayan ang panong sang Dios sing kinabubut-on?
11 Masunod, ginpahanumdom ni Pedro ang mga gulang kon ano ang dapat kag indi dapat himuon kon nagabantay. Dapat bantayan nila ang panong sang Dios, “indi nga napilitan, kundi sing kinabubut-on.” Ano ang nagapahulag sa mga gulang nga mag-alagad sing kinabubut-on sa ila mga kauturan? Ti, ano abi ang nagpahulag kay Pedro nga bantayan kag pakan-on ang mga karnero ni Jesus? Amo ang iya gugma kag pagpalangga sa Ginuo. (Juan 21:15-17) Bangod sa gugma, ang mga gulang “indi na magkabuhi para sa ila kaugalingon, kundi para sa iya nga napatay para sa ila.” (2 Cor. 5:14, 15) Ini nga gugma, lakip ang gugma sa Dios kag sa ila mga kauturan, amo ang nagapahulag sa mga gulang nga gamiton ang ila kusog, pagkabutang, kag tion sa pag-alagad sa panong. (Mat. 22:37-39) Ginahimo nila ini sing kinabubut-on, indi nga napilitan lang.
12. Tubtob diin handa mag-alagad si Pablo?
12 Tubtob diin dapat handa mag-alagad ang mga gulang? Sa pag-atipan sa mga karnero, ginailog nila si apostol Pablo nga nag-ilog man kay Jesus. (1 Cor. 11:1) Bangod sang mapinalanggaon nga balatyagon sa mga kauturan sa Tesalonica, nalipay si Pablo kag ang iya mga kaupod nga ipaambit sa ila ‘indi lamang ang maayong balita sang Dios, kundi ang ila man kaugalingon nga kalag.’ Malulo sila sa paghimo sini, “subong sang nagabatiti nga iloy nga nagapalangga sang iya kaugalingon nga mga anak.” (1 Tes. 2:7, 8) Nahibaluan ni Pablo kon ano ang ginabatyag sang nagabatiti nga iloy sa iya kabataan. Himuon niya ang tanan para sa ila, lakip na ang pagbugtaw sa tungang gab-i agod magpatiti.
13. Sa ano dapat mangin balanse ang mga gulang?
13 Ang mga gulang dapat mangin balanse sa ila responsibilidad sa pagbantay sa panong kag sa ila pamilya. (1 Tim. 5:8) Hamili nga tion ang ginahinguyang sang mga gulang sa kongregasyon nga magamit kuntani nila sa ila pamilya. Ang isa ka paagi nga mabalanse ini amo ang pag-agda sa iban sa ila Pangpamilya nga Pagsimba. Sa sulod na sang pila ka tuig, ginaagda ni Masanao nga isa ka gulang sa Japan, ang mga utod nga singgol kag ang mga pamilya nga ilo kag balo sa espirituwal sa ila pagtuon. Sang ulihi, ang iban sini sa ila nangin mga gulang man kag gin-ilog nila ang halimbawa ni Masanao.
Isikway ang Di-bunayag nga Pagganar—Bantayi ang Panong sing Malangkagon
14, 15. Ngaa dapat magbantay ang mga gulang batok sa “gugma sa di-bunayag nga pagganar,” kag paano nila mailog si Pablo?
14 Ginpalig-on man ni Pedro ang mga gulang nga bantayan ang panong, “indi tungod sa gugma sa di-bunayag nga pagganar, kundi sing malangkagon.” Kinahanglan ang madamo nga tion sa pagtatap sang hilikuton sang mga gulang, apang wala sila nagapaabot nga bayaran. Nakita ni Pedro nga dapat paandaman ang iya mga masigkagulang sa katalagman nga bantayan ang panong bangod sang “gugma sa di-bunayag nga pagganar.” Ini nga katalagman makita sa masulhay nga pagkabuhi sang relihioso nga mga lider sang “Babilonia nga Daku” samtang nagaantos sa kaimulon ang madamo. (Bug. 18:2, 3) Gani, dapat gid maghalong ang mga gulang batok sa sini nga katalagman.
15 Maayo gid nga halimbawa si Pablo para sa mga gulang. Bisan pa apostol sia kag puede “magpabug-at sang daku nga kagastuhanan” sa mga Cristiano sa Tesalonica, wala sia “magkaon sang kalan-on nga wala bayad gikan kay bisan sin-o.” Sa baylo, ‘nangabudlay sia sing lakas adlaw kag gab-i.’ (2 Tes. 3:8) Maayo gid nga halimbawa parte sa sini ang mga gulang subong, lakip ang mga yara sa nagalakbay nga hilikuton. Bisan ginabaton nila ang kaalwan sang mga kauturan, wala sila “magpabug-at sang daku nga kagastuhanan” sa kay bisan sin-o.—1 Tes. 2:9.
16. Ano ang buot silingon sang pagbantay sa panong sing “malangkagon”?
16 Ginabantayan sang mga gulang ang panong sing “malangkagon.” Makita ini sa ila pagsakripisyo sa pagbulig sa panong. Apang ang mahigugmaon nga mga gulang wala nagapilit sa panong nga alagaron si Jehova ukon nagapalig-on sa ila nga magpaindisanay sa pag-alagad. (Gal. 5:26) Nahangpan sang mga gulang nga lainlain ang personalidad sang kada isa. Nalangkag sila nga magbulig sa mga kauturan nga mag-alagad sing malipayon kay Jehova.
Indi Subong Nagapakaginuo sa Panong Kundi Mangin mga Halimbawa
17, 18. (a) Ngaa may mga tion nga nabudlayan ang mga apostoles sa paghangop sang panudlo ni Jesus parte sa pagkamapainubuson? (b) Anong kaanggid nga kahimtangan ang mahimo matabo man sa aton?
17 Subong sang aton ginbinagbinag, dapat dumdumon sang mga gulang nga ang panong nga ila ginabantayan indi ila kundi iya sang Dios. Nagahalong gid sila nga ‘indi magpakaginuo sa mga palanublion gikan sa Dios.’ (Basaha ang 1 Pedro 5:3.) May mga tion nga sayop ang motibo sang mga apostoles ni Jesus sa pagtigayon sing mga palangakuan. Kaangay sang mga nagagahom sa mga pungsod, luyag man nila ang mataas nga posisyon.—Basaha ang Marcos 10:42-45.
18 Sa karon, dapat usisaon sang mga utod ang ila motibo kon ngaa “nagatinguha [sila] sa palangakuan sang manugtatap.” (1 Tim. 3:1) Mahimo pamangkuton sang mga gulang ang ila kaugalingon kon bala ginahandum nila ang awtoridad ukon pagkaprominente pareho sa pila ka apostoles. Kinahanglan gid nga pakigbatuan nila ang huyog nga maggahom sa iban kay bisan gani ang mga apostoles naimpluwensiahan sini nga huyog.
19. Ano ang dapat dumdumon sang mga gulang kon nagaamlig sa panong?
19 May mga tion nga kinahanglan sang mga gulang nga mangin malig-on, ilabi na kon nagaamlig sa panong gikan sa “mapiguson nga mga lobo.” (Binu. 20:28-30) Ginsilingan ni Pablo si Tito nga padayon nga “maglaygay kag magsabdong nga may bug-os nga awtoridad.” (Tito 2:15) Apang kon ginahimo ini, ginatinguhaan sang mga gulang nga hatagan sing dignidad ang ila ginalaygayan. Nahibaluan nila nga magatudok sa tagipusuon sang ila ginalaygayan kag mapahulag ini nga sundon ang husto nga dalanon kon mangin malulo sila sa paglaygay sa baylo nga mangakig.
20. Paano mailog sang mga gulang ang maayong halimbawa ni Jesus?
20 Ang maayong halimbawa ni Cristo nagapahulag sa mga gulang nga higugmaon ang panong. (Juan 13:12-15) Nalipay kita samtang ginabasa naton kon paano sia nagatudlo sa iya mga disipulo sa pagbantala kag paghimo sing disipulo. Ang iya pagkamapainubuson nagtandog sa tagipusuon sang iya mga disipulo, amo nga napahulag sila nga ‘magpaubos sang hunahuna kag kabigon ang iban nga labaw sa ila.’ (Fil. 2:3) Ginailog man sang mga gulang subong ang halimbawa ni Jesus kag gusto nila nga mangin “mga halimbawa sa panong.”
21. Ano nga padya ang mapaabot sang mga gulang?
21 Sa katapusan sang laygay ni Pedro sa mga gulang nga lalaki ginsambit niya ang isa ka saad sa palaabuton. (Basaha ang 1 Pedro 5:4.) Ang hinaplas nga mga manugtatap ‘makabaton sang wala nagakalaya nga purongpurong sang himaya’ upod kay Cristo sa langit. Ang kabulig nga mga manugbantay sang “iban nga mga karnero” may pribilehiyo nga bantayan ang panong sang Dios sa duta sa idalom sang paggahom sang “puno nga manugbantay.” (Juan 10:16) Binagbinagon sang masunod nga artikulo kon paano masakdag sang mga katapo sang kongregasyon ang mga gintangdo nga manugdumala.
Repaso
• Ngaa nagakaigo nga laygayan ni Pedro ang iya mga masigkagulang nga bantayan ang panong sang Dios nga ila ginaatipan?
• Paano atipanon sang mga gulang ang nagabalatian sa espirituwal?
• Ano ang nagapahulag sa mga gulang nga bantayan ang panong sang Dios nga ila ginaatipan?
[Retrato sa pahina 21]
Kaangay sang mga manugbantay sang una, dapat amligan sang mga gulang ang “karnero” nga ila ginaatipan