Mga Gulang, Ukuri ang Inyo mga Salabton sa Pagbantay
“Bantayi ang panong sang Dios nga gintugyan sa inyo.”—1 PEDRO 5:2.
DAW ano ka nagakaigo nga ang mga karnero gamiton sa pagsimbulo sa mga tawo nga nahamut-an ni Jehova nga Dios! Ang mga karnero mahagop nga mga sapat nga nagapamati sa tingog sang ila manugbantay kag nagasunod dayon sa iya. Ang tulad-karnero nga katawhan sang Dios nagatugot man sang ila kaugalingon nga pangunahan sang Maayong Manugbantay, si Jesucristo. Kilala nila sia, nagapamati sila sa iya tingog, kag malipayon nga ginabaton nila ang iya pagkapangulo. (Juan 10:11-16) Sa pagkamatuod, kon wala sing maayong manugbantay, ang literal nga mga karnero madali nga mahadlokan kag magdalangdalang. Gani, indi katingalahan nga si Jesucristo naluoy sa mga tawo nga “napilasan kag nag-aplaag subong sang mga karnero nga wala sing manugbantay.”—Mateo 9:36.
2 Si Jehova nga Dios interesado gid sa espirituwal nga kaayohan sang bunayag sing tagipusuon nga mga tawo nga ginatawag sa Kasulatan subong “mga karnero.” Halimbawa, paagi kay manalagna Ezequiel, ginpakamalaut sang Dios ang “mga manugbantay sang Israel,” ang responsable nga mga lalaki nga nagpakaon sang ila kaugalingon apang ginpatumbayaan nila ang mga karnero. Apang wala gintugutan ni Jehova ang mga tulad karnero nga mag-antos nga wala sing paumpaw, kay sia nagsiling: “Pangitaon ko ang nadula, kag pabalikon ko ang gintabog sa malayo, kag bugkusan ko ang nabali, kag pabakuron ko ang masakiton.”—Ezequiel 34:2-16.
3 Ang Maayong Manugbantay, si Jesucristo, nagakabalaka man sa mga tulad karnero. Busa, sa wala pa magkayab sa langit, ginpabutyag ni Jesus ang iya handum nga atipanon sing maayo ang mga karnero. Ginsilingan niya si apostol Pedro, ‘Pakan-a ang akon mga kordero, bantayi ang akon mga karnero, pakan-a ang akon mga karnero.’ (Juan 21:15-17) Kag agod mapasalig ang padayon nga mahigugmaon nga pag-atipan sa mga karnero, ginhatag ni Jesus ang “iban subong mga manugbantay” sa pagpalig-on sang “lawas ni Cristo.”—Efeso 4:11, 12.
4 Sanglit ang Dios kag si Cristo lunsay may daku nga gugma kag kabalaka para sa mga tulad karnero, ang mangin kabulig nga manugbantay sang mga karnero sang Dios isa ka responsable gid nga tulumanon. Sa amo ginpalig-on ni apostol Pablo ang gintangdo sang espiritu nga “mga gulang” sang Efeso nga “bantayan ang kongregasyon sang Dios,” nga ginaatipan ini sing nagakaigo. (Binuhatan 20:17, 28) Gani paano maatipan sing nagakaigo sang gintangdo nga mga gulang ining salabton?
Ang mga Manugbantay Nagabaton sing Pagtuytoy
5 Si apostol Pedro, nga ginpaabot sa pagpakaon sa mga karnero ni Jesus, nagsiling sa mga masigkamanugtatap: “Bantayi ang panong sang Dios nga inyo ginaatipan, indi sa pilit, kundi sa kinabubut-on; indi tungod sa dibunayag nga daug, kundi sa may pagkahanda; indi nga nagapakaginuo sa panublion sang Dios, kundi nagahimo sang inyo kaugalingon nga mga huwaran sa panong.” (1 Pedro 5:1-3) Tan-awon naton kon paano ang mga gulang, nga gintangdo sang balaan nga espiritu, makasunod sini nga laygay.
6 Ginpalig-on ni Pedro ang mga masigkagulang: “Bantayi ang panong sang Dios nga inyo ginaatipan, indi sa pilit, kundi sa kinabubut-on.” Ang may yara pribilehiyo sa pag-alagad subong espirituwal nga mga manugbantay indi dapat maghimo sini sing paganot, nga daw ginapilit sa pag-atipan sa mga karnero. Indi sila dapat magbatyag nga ginapuersa sila, nga subong bala kabudlay gid ukon nga subong bala ginatiklod sila sang iban nga bantayan ang panong. Sa baylo, ang mga gulang dapat mag-alagad nga may handa nga espiritu. (Ipaanggid ang Salmo 110:3.) Kon ang isa ka tawo handa sa paghimo sing maayo para sa iban, masami nga ginahimo niya ini sing bug-os tagipusuon, nagapanikasog kag nagasakripisyo sa pag-alagad para sa ila kaayohan. Ang isa ka handa nga gulang nagahatag sang iya tion kag kusog. Nahibaloan niya nga kon kaisa ang mga karnero mahimo nga magtalang, kag nagahandum sia nga buligan sila, nga ginailog ang kabalaka sang Dios para sa mga tulad karnero. Ti, daku gid ang kabalaka ni Jehova para sa mga Israelinhon nga nagtalang amo kon ngaa sia nagsiling: “Nagsiling ako, ‘Yari ako, yari ako!’ sa pungsod nga wala nagtawag sa akon ngalan”!—Isaias 65:1.
7 Si Pedro nagsiling nga ang pagbantay nga hilikuton dapat himuon “indi tungod sa gugma sa dibunayag nga daug, kundi sa may pagkahanda.” Ang gintangdo nga mga gulang wala nagahandum nga mangin lulan sa mga karnero. Amo sina ang panimuot anay ni apostol Pablo, kay ginsilingan niya ang mga Cristiano sa Tesalonica: “Sa pagkamatuod madumduman ninyo, mga kauturan, ang amon pagpangabudlay kag kasakit. Nagpangabudlay kami sa adlaw kag gab-i, agod nga indi namon mapabug-atan ang bisan sin-o sa inyo, samtang nagwali kami sa inyo sang maayong balita sang Dios.” Ginpahanumdum man niya sila: “Wala kami magtinamad sang kaupod kami ninyo ukon wala kami magkaon sing kalan-on ni bisan sin-o nga wala sing bayad. Sa kabaliskaran, sa kabudlay kag sa kasakit nagpangabudlay kami sa adlaw kag gab-i agod nga indi namon mapabug-atan ang bisan sin-o sa inyo.”—1 Tesalonica 2:9; 2 Tesalonica 3:7, 8.
8 Subong man, ang matutom nga mga manugbantay sang panong sang Dios karon wala sing mahamkunon nagahandum sang yara sa mga karnero ukon nagatinguha sa paghimo sing dimakatarunganon nga daug sa ila kahalitan. (Lucas 12:13-15; Binuhatan 20:33-35) Ginpakita ni Pablo nga ang kalipikado nga mangin mga manugtatap ‘indi dapat dalok sa dibunayag nga daug.’ (Tito 1:7) Sa baylo, dapat sila mag-alagad nga may pagkahanda, may mapagsik nga interes sa ila hilikuton kag nagatinguha sang kaayohan sang mga karnero nga gintugyan sa ila. (Filipos 2:4) Sa sining paagi, ining mga manugbantay nagapakita sing kabalaka para sa mga karnero subong sang ginpakita ni Jehova nga Dios kag sang iya Anak, si Jesucristo.
9 Si Pedro nagsiling man nga ang mga gulang nga magabantay sa katawhan ni Jehova “indi nagapakaginuo sa panublion sang Dios, kundi nagahimo sang ila kaugalingon nga mga huwaran sa panong.” Ang isa ka mahigugmaon nga manugbantay nagahalong nga wala niya ginaabusuhan ang iya awtoridad paagi sa pagpakita sing pagkasuperyor kag nagapakaginuo sa mga karnero. Ang isa ka bugalon nga espiritu indi Cristiano kag dapat likawan sang tanan nga nagahandum sa pagpahamuot kay Jehova. Ang Hulubaton 21:4 nagasiling: “Ang matinaastaason nga panulok kag ang bugalon nga tagipusuon, ang suga sang malauton, ini sila sala.” Kag ginsilingan ni Jesus ang iya mga sumulunod: “Nahibaloan ninyo nga ang mga manuggahom sang mga pungsod nagapakaginuo sa ila kag ang ila mga kadalagkuan nagagamit sing pagbulut-an sa ila. Indi mangin subong sini sa inyo; kundi ang bisan sin-o sa inyo nga buot mangin daku mangin alagad ninyo, kag ang bisan sin-o sa inyo nga buot mangin nahauna mangin ulipon ninyo.” (Mateo 20:25-27) Sa pagkamatuod, dapat dumdumon sang mga gulang nga ang panong mga karnero sang Dios kag indi dapat pintasan.
10 Sa mga manugbantay sang adlaw ni Ezequiel nga nag-alagad sa ila lamang kaugalingon, si Jehova nagsiling: “Ang mga balatianon wala ninyo pagpabakura, ang masakiton wala ninyo pag-ayoha, ang mga bali wala ninyo pagbugkusi, ang mga tinabog wala ninyo pagpabalika, ang mga nadula wala ninyo pagpangitaa, kundi sa pakusog kag sa kapintas naggahom kamo sa ila.” Ang Dios nagsiling pa nga ang mapintas nga mga manugbantay ‘nagdis-og sa tanan nga balatianon tubtob nga nag-aplaag sila.’ (Ezequiel 34:4, 20, 21) Apang indi subong sina sa mahigugmaon nga mga manugbantay sang “panong sang Dios” karon. Wala nila ginapadayaw ang ila awtoridad kag nagahalong sila nga indi masandad ang bisan sin-o sa mga karnero. (Ipaanggid ang Marcos 9:42.) Sa baylo, ina nga mga gulang nagaaman sing mahigugmaon nga bulig kag pagpalig-on. Dugang pa, mapangamuyuon nga nagasandig sila kay Jehova kag nagapangabudlay sila sing lakas nga mangin maayong mga huwaran “sa paghambal, sa paggawi, sa gugma, sa pagtuo, sa pagkaputli.” (1 Timoteo 4:12) Busa, ang mga karnero kontento kag nagabatyag sing kalig-onan, bangod ginaatipan sila sang mahigugmaon kag mahinadlukon sa Dios nga mga manugbantay.
Mga Katalagman nga Ginaatubang sang mga Karnero
11 Ang tulad-karnero nga mga tawo karon dapat magbatyag sing kalig-onan, nga ginapasalig sang maayong pagbantay sang mga gulang sa pag-amlig sa panong. (Isaias 32:1, 2) Labi na nga amo sini bangod ang mga Cristiano nagaatubang sing madamo nga katalagman sa sining “makahalanguyos nga mga tion” nga nagatanda sang “katapusan nga mga adlaw.” (2 Timoteo 3:1-5) Ang salmista nga si David nag-atubang man sing mga katalagman, apang sia nakasiling: “Si Jehova ang akon Manugbantay. . . . Bisan nagalatas ako sa nalupyakan sang landong sang kamatayon, wala ako sing kahadlokan nga malaut, kay ikaw kaupod nakon.” (Salmo 23:1-4) Ang modernong-adlaw nga mga manugbantay sang panong sang Dios dapat mag-atipan sing maayo sa mga karnero agod nga, kaangay ni David, magabatyag man ining mga tulad karnero nga malapit gid kay Jehova. Dapat man sila makabatyag sing kalig-onan subong bahin sang organisasyon sang Dios.
12 Ang isa ka katalagman nga gikan sa amo dapat amligan ang panong sang Dios amo ang huyog karon padulong sa wala sing prinsipio kag imoral nga paggawi. Bangod sang mga porma karon sang kalingawan, paagi sa telebisyon ukon sa iban nga paagi, madamo nga tawo ang nagpalambo sing estilo sang pagkabuhi nga direkta nga nagasumpakil sa mga talaksan sang Pulong sang Dios. Sa karon, ang panimuot sining kalibutan nga bisan ano lang puede, dapat nga pamatokan sang Makasulatanhon nga laygay nga ginaaman sa sulod sang kongregasyon. Gani dapat nga mahibaloan gid sang mga manugbantay sang panong ang ginatudlo sang Biblia tuhoy sa moralidad. Dugang pa, dapat nila ipahanumdom pirme sa mga karnero ang ila salabton nga magpabilin nga matinlo para sa pag-alagad kay Jehova.—Tito 2:13, 14.
13 May yara man mga katalagman gikan sa mga apostata. Dumduma nga sang nagligad nga 19 ka siglo, ang “didiosnon nga mga tawo” nga dimatuod nga mga manunudlo nakasulod sa kongregasyon. Sila ang makatalagam nga “mga bato nga natago sa idalom sang tubig,” dimatuod nga mga manugbantay nga nagpakaon sang ila kaugalingon, sapatsapaton nga mga tawo nga nagtuga sing pagbinahinbahin kag kulang sing espirituwalidad. Ang sulat ni Judas nagahatag sing maayong laygay nga makabulig sa mga gulang, kag sa tanan nga matutom, sa “pagpakig-away sing lakas para sa pagtuo.” (Judas 3, 4, 12, 19) Sa wala sing duhaduha, ang mga gulang dapat magtindog sing malig-on batok kay bisan sin-o nga nagatinguha sa pagtuga sing mga pagbinahinbahin, kay si Pablo nagsulat: “Tandai ninyo ang ginabangdan sang mga pagbinahinbahin kag mga kasandaran batok sa panudlo nga inyo naton-an, kag likawi sila.” (Roma 16:17) Busa ang mga manugbantay may salabton nga amligan ang panong gikan sa ila sini ukon sa iban pa nga ‘mga lobo nga nagapanapot sang panapton sang karnero.’—Mateo 7:15.
Pagbulig sa mga Karnero sa Iban Pa nga mga Paagi
14 Ang pagbantay sa “panong sang Dios” mahimo magkinahanglan nga buligan ang mga karnero sa nanuhaytuhay nga mga palaligban nga mahimo mag-utwas sa sulod sang kongregasyon. Kon kaisa, ang mga karnero mahimo makigsuay sa mga masigkakarnero. Bangod sang diutay nga mga kabangdanan, mahimo nga indi sila magpakita sing konsiderasyon sa isa kag isa. Ining mga indibiduwal mahimo nga magpasipalahay pa batok sa isa kag isa kag sa ulihi mag-untat sa pagpakig-upod sa ila mga kaupod anay sa pag-alagad kay Jehova, sa ila daku nga kahalitan sa espirituwal.—Hulubaton 18:1.
15 Ang espirituwal nga mga manugbantay dapat gid mangin alisto sa pagbulig sa sina nga mga masigkatumuluo. Halimbawa, mahimo nga dapat ipakita sang mga gulang nga sayop gid ang magpasipalahay sa isa kag isa kag nga ang tanan nga matutom nga mga Cristiano dapat magpangabudlay sa pagtipig sang paghiusa sang kongregasyon. (Levitico 19:16-18; Salmo 133:1-3; 1 Corinto 1:10) Ang mga gulang mahimo nga makabulig paagi sa pagpatalupangod sang paandam ni Pablo: “Kon magkinagtanay kag magkinaunay kamo, mag-andam nga indi kamo malaglag ang isa sang isa.”—Galacia 5:13-15; Santiago 3:13-18.
16 Mga gulang, dumduma nga ang Yawa nagaluyong “kaangay sang nagangurob nga leon, nga nagapangita sang iya tulukbon.” (1 Pedro 5:8) Ang tanan nga matuod nga mga Cristiano may pagpakig-away, indi batok sa unod kag dugo, kundi batok sa kusog sang malaut nga mga espiritu. (Efeso 6:10-13) Sa pagkamatuod indi luyag sang matutom nga mga manugbantay nga makuha ni Satanas ang mga karnero. Gani kon ang pila sa mga karnero magsugod sa pagwasi sang Cristianong mga miting, tinguhaan sang mainulikdon nga mga gulang nga mahibaloan ang kabangdanan kag maghatag sing nagakaigo espirituwal nga bulig. Dapat mahibaloan sang mga manugbantay ang dagway sang panong kag mangin alisto sa indi maayo nga mga huyog sa kongregasyon. (Hulubaton 27:23) Kon matalupangdan nila ang huyog sa pagpatumbaya sang pag-alagad sa latagon, ang pagpasapayan sa personal nga pagtuon, ukon ang sobra nga pagkawili sa kalingawan ukon materyalistiko nga mga paghimud-os, dapat tinguhaan sining responsable nga mga lalaki nga remedyohan ang kahimtangan. Bilang pag-ilog kay Jehova kag sa Maayong Manugbantay, si Jesucristo, ang mga gulang nga nagaatipan sa “panong sang Dios” nagakaigo nga nagahatag sing personal nga bulig ukon, kon kaisa, nagaaman sing ginakinahanglan nga laygay sa mga miting. (Galacia 6:1) Sa sini kag sa iban pa nga mga paagi, ang mahigugmaon nga mga gulang nagahatag sing pamatuod nga ila ginaukuran ang ila mga salabton sa pagbantay.—Binuhatan 20:28.
Ang Pagbantay Isa ka Serioso nga Butang
17 Ang pagbantay sa “panong sang Dios” subong isa ka gulang isa ka mabudlay nga hilikuton. Ang mataas nga mga talaksan nga dapat lab-uton agod makalipikar para sa pribilehiyo maathag nga nabalay sa 1 Timoteo 3:1-7, Tito 1:5-9, kag 1 Pedro 5:1-4. Ang bisan sin-o lang nga utod nga lalaki indi makaalagad sa sining ikasarang, kay ang espirituwal nga mga lalaki lamang ang makaabaga sing nagakaigo sining salabton. (1 Corinto 2:6-16) Madamo nga lalaki nga wala karon nagaalagad subong mga gulang ang mahimo makalipikar para sa sining pribilehiyo, apang dapat nila anay ‘lab-uton ang katungdanan sang pagkamanugtatap.’ Dapat sila mangin mapisan nga mga estudyante sang Pulong sang Dios agod nga makatigayon sila sing madalom nga paghangop sini. Sa pagkamatuod, dapat nila ipakita ang ila kaugalingon nga takus irekomendar bangod nalab-ot nila ang Makasulatanhon nga mga kinahanglanon agod matangdo subong mga gulang, nagakabagay nga mga manugbantay sang “panong sang Dios.”
18 Ang nagaalagad sa idalom ni Jehova nga Dios amo ang ulo sang Cristianong kongregasyon, ang Maayong Manugbantay, si Jesucristo. (Juan 10:11; 1 Corinto 11:3; Efeso 5:22, 23) Kag nahamuot gid si Jesus nga may yara sia kabulig nga mga manugbantay sang panong nga nagakaigo nga nagapanguna kag nagaamlig sa mga karnero! Nalab-ot sining espirituwal nga mga lalaki ang mataas nga mga kalipikasyon sang Kasulatan para sa Cristianong mga gulang. Dugang pa, may yara man sila daku nga kabalaka para sa mga karnero subong sang ginpakita ni apostol Pablo, nga nagsulat: “Wala labot sining mga butang [mga kabudlayan kag mga kasakit], nagapalibog sa akon adlaw-adlaw ang paghimud-os tungod sa tanan nga kongregasyon. Sin-o bala ang maluya, kag ako indi maluya? Sin-o bala ang ginpasandad, kag wala ako nagasingkal?” (2 Corinto 11:23-29) Madamo ang nalakbayan ni Pablo, kag sa adlaw-adlaw nakaeksperiensia sia sing “paghimud-os tungod sa tanan nga kongregasyon,” pareho man sang nagalakbay nga mga manugtatap karon. Subong man, ang gintangdo nga mga gulang sa tagsa ka kongregasyon nagaeksperiensia sing paghimud-os tungod sa mga karnero sa sulod sang panong nga gintugyan sa ila subong espirituwal nga mga manugbantay.
19 Ang pagbantay sa “panong sang Dios” isa ka mabudlay nga hilikuton, apang labing makapaladya. Busa, mga manugbantay sang panong, andami sing maayo ang inyo hamili nga pribilehiyo. Atipana sing maayo ang mga karnero sang Dios. Kag kabay nga ang tanan nga tulad karnero magkooperar sing bug-os sa kabulig nga mga manugbantay nga gintangdo sang balaan nga espiritu. “Tumana ang mga nagapangulo sa inyo kag magpasakop sa ila,” laygay ni Pablo, “kay nagapulaw sila tungod sa inyo mga kalag subong nga sila ang magahatag sing husay.” (Hebreo 13:17) Samtang ang tanan nga nahugod sing bug-os tagipusuon kay Jehova nahiusa nga nagapangabudlay, dakung espirituwal nga mga pagpakamaayo kag mga kaayohan ang padayon nga magaresulta gikan sa matutom nga pag-alagad sang Cristianong mga gulang nga nagaukod sa ila mga salabton sa pagbantay.
Mapaathag Mo Bala?
◻ Ngaa dapat mag-alagad sing kinabubut-on ang espirituwal nga mga manugbantay?
◻ Ngaa dapat nga ang mga gulang wala sing gugma sa dibunayag nga daug?
◻ Ngaa sayop para sa mga gulang nga magpakaginuo sa panong sang Dios?
◻ Ngaa dapat mangin huwaran ang mga manugtatap sa panong?
◻ Ano ang pila sang mga katalagman nga gikan sa amo dapat amligan sang mga manugbantay ang “panong sang Dios”?
[Mga Pamangkot sa Pagtinuon]
1. Ngaa nagakaigo gid nga ang mga karnero gamiton sa pagsimbulo sa mga tawo nga nahamut-an sang Dios?
2. Paano gintamod ni Jehova ang mga tulad karnero nga nag-antos sa idalom sang indi mahigugmaon nga “mga manugbantay sang Israel”?
3. Paano si Jesucristo nagpakita sing kabalaka para sa mga karnero?
4. Ginpalig-on ni apostol Pablo ang gintangdo sang espiritu nga “mga gulang” sa paghimo sing ano?
5. Ano ang ginlaygay ni Pedro sa mga masigkamanugtatap?
6. Ano dapat ang panimuot sang mga gulang sa pag-alagad sa “panong sang Dios”?
7, 8. (a) Ano ang kahulugan sang pagbantay nga wala sing gugma sa dibunayag nga daug? (b) Ang pag-alagad nga may pagkahanda nagakahulugan sing ano?
9. Ngaa ang isa ka Cristianong manugbantay ‘indi magpakaginuo sa panublion sang Dios’?
10. (a) Ano ang ginhimo sang pila ka manugbantay sang katawhan sang adlaw ni Ezequiel? (b) Paano ang matutom nga mga manugtatap maayong mga huwaran sa panong?
11. Ngaa atipanon sing maayo sang modernong adlaw nga mga manugbantay ang panong sang Dios agod magbatyag sing kalig-onan ang mga karnero?
12. Gikan sa ano nga huyog karon dapat amligan ang mga karnero, kag paano makabulig ang mga gulang sa sini?
13. (a) Batok sa anong katalagman ang sulat ni Judas nagahatag sing maayong laygay? (b) Ano dapat ang mangin tindog sang mga gulang tuhoy sa mga apostata?
14, 15. Paano ang mga gulang makabulig sa mga masigkatumuluo nga wala nagapakita sing konsiderasyon sa isa kag isa?
16. Ano ang dapat himuon sang mga gulang kon makatalupangod sila sing indi maayo nga mga huyog sa kongregasyon?
17. Ano ang ginakinahanglan agod makalipikar subong isa ka gulang?
18. Ano ang ginbatyag ni Pablo nahanungod sa mga kongregasyon, kag amo man bala ang ginabatyag sang iban?
19. Ano ang mangin resulta kon iaplikar ang Hebreo 13:17 kag ang mga gulang magpadayon sa pag-ukod sa ila mga salabton sa pagbantay?