Mapinalanggaon nga Pagbantay sa Hamili nga mga Karnero ni Jehova

ANG mga gulang namati sing maayo. Naglakbay sila sing mga 50 kilometros halin sa Efeso pakadto sa Mileto agod makabaton sing mga instruksion gikan kay apostol Pablo. Karon nasubuan sila makabati nga amo na ini ang katapusan nga tion nga makita nila sia. Gani nakahibalo sila nga ang mga pulong nga nagasunod importante gid katama: “Tatapa ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap, sa pagbantay sang kongregasyon sang Dios nga ginbakal niya sang dugo sang iya Anak.”​—⁠Binuhatan 20:​25, 28, 38.

Ang malip-ot nga pagpatuhoy ni Pablo sa mga manugbantay pat-od gid nga nagpaalinton sing isa ka manggad sang impormasyon sa taga-Efeso nga mga gulang. Pamilyar sila sa hilikuton nga pagbantay sing mga karnero sa palibot nga kaumhan. Pamilyar man sila sa madamong pagpatuhoy sa mga manugbantay sa Hebreong Kasulatan. Kag nakahibalo sila nga ginpaanggid ni Jehova ang iya kaugalingon sa isa ka Manugbantay sang iya katawhan.​—⁠Isaias 40:​10, 11.

Si Pablo nagpamulong tuhoy sa ila subong “mga manugtatap” sa tunga sang “panong,” kag subong “mga manugbantay” sa “kongregasyon.” Samtang ang termino nga “mga manugtatap” nagapakita kon ano ang ila asaynment, ang tinaga nga “manugbantay” nagalaragway kon paano nila himuon ina nga pagtatap. Huo, ang mga manugtatap magaatipan sa tagsa ka katapo sang kongregasyon sa mahigugmaon nga paagi man nga ang isa ka manugbantay magaatipan sa iya panong sang mga karnero.

Karon, ang pila ka mga gulang may eksperiensia mismo sa pag-atipan sa literal nga mga karnero. Apang ang Biblia madamo sing pagpatuhoy sa mga karnero kag mga manugbantay, ilabi na sa malaragwayon nga kahulugan, amo kon ngaa ang mga pinamulong ni Pablo may dayon nga epekto. Kag daku ang matun-an gikan sa mga sugilanon tuhoy sa mga manugbantay nga ginkahamut-an sang Dios sang unang panahon. Ang ila talalupangdon nga mga halimbawa makabulig sa karon nga mga gulang nga makita kon anong mga kinaiya ang kinahanglan nila nga ipalambo agod bantayan ang kongregasyon sang Dios.

Ang Walay Kahadlok nga Manugbantay nga si David

Kon hunahunaon naton ang mga manugbantay sang panahon sang Biblia, mahimo nga madumduman naton si David, kay nagsugod sia subong manug-atipan sang mga karnero. Ang isa sang unang mga leksion nga matun-an naton gikan sa kabuhi ni David amo nga ang pagkamanugbantay indi isa ka posisyon sang kabantugan. Sa katunayan, sang mag-abot si manalagna Samuel agod haplasan ang anak ni Jesse subong hari sang Israel sa ulihi, ang lamharon nga si David halos nalipatan sang primero. Sa tapos lamang ginsikway ni Jehova ang iya pito ka magulang nga mga lalaki nga ginsambit si David, nga sadto didto sa latagon nga “nagabantay sang mga karnero.” (1 Samuel 16:​10, 11) Apang, ang mga tinuig nga ginhinguyang ni David subong manugbantay naghanda sa iya para sa mabudlay nga hilikuton sang pagbantay sa pungsod sang Israel. “Ginpili [ni Jehova] si David man nga iya alagad kag ginkuha sia sa mga palasudlan sang mga karnero . . . nga mangin manugbantay kay Jacob nga iya katawhan,” siling sang Salmo 78:​70, 71. Sing nagakaigo, si David nagsulat sang matahom kag bantog nga ika-23 nga Salmo, nga nagasugod sa mga tinaga: “Si Jehova ang akon Manugbantay.”

Kaangay ni David, ang mga gulang sa Cristianong kongregasyon dapat mag-alagad subong mapainubuson nga mga kabulig nga manugbantay kag wala nagatinguha sing dinagakaigo nga kabantugan. Subong sang ginsulat ni apostol Pablo kay Timoteo, yadtong nagahimud-os nga malab-ot ining responsabilidad sa pagbantay “nagahandum sing maayong hilikuton,” indi sing kabantugan.​—⁠1 Timoteo 3:⁠1.

Bisan pa ang hilikuton ni David subong literal nga manugbantay kubos, kon kaisa nagkinahanglan ini sing daku nga kaisog. Halimbawa, sang ang mga karnero gikan sa panong sang iya amay gintaban sang isa ka bes sang isa ka leon kag sang isa pa ka bes sang isa ka oso, si David maisog nga nakig-away kag nagpatay sa ila. (1 Samuel 17:​34-36) Isa yadto ka tumalagsahon nga pagpakita sing kaisog kon binagbinagon sang isa nga ang leon mahimo makapatay sang mga sapat nga daku pa sa iya. Kag ang Sirianhon nga kaki nga oso nga nagapuyo anay sa Palestina, nga nagabug-at sing tubtob sa 140 kilos, mahimo makapatay sing usa paagi sa iya isa lamang ka makusog nga pagkamros.

Ang maisog nga pagkabalaka ni David sa mga karnero sang iya amay isa ka maayong halimbawa para sa mga manugbantay sa Cristianong kongregasyon. Si apostol Pablo nagpaandam sa mga gulang sa Efeso tuhoy sa “mga lobo nga mapintas” nga “indi magatratar sa panong sing mapinalanggaon.” (Binuhatan 20:29) Sa modernong panahon man, magautwas ang mga okasyon nga ang Cristianong mga gulang dapat magpakita sing kaisog agod mabantayan ang espirituwal nga kaayuhan sang mga karnero ni Jehova.

Samtang ang mga karnero dapat amligan sing maisugon, dapat man sila tratahon nga may daku nga pagpalangga, bilang pag-ilog sa mahigugmaon nga manugbantay nga si David kag sa Maayong Manugbantay, nga si Jesucristo. (Juan 10:11) Nakahibalo nga ang panong iya ni Jehova, ang mga gulang indi gid dapat magmapintas sa mga karnero, “nga nagapakaginuo sa mga palanublion sang Dios.”​—⁠1 Pedro 5:​2, 3; Mateo 11:​28-30; 20:​25-27.

Paghatag sing Husay

Si patriarka Jacob isa pa ka kilala nga manugbantay. Ginkabig niya ang iya kaugalingon nga personal nga responsable para sa tagsa ka indibiduwal nga karnero nga gintugyan sa iya. Gani matutom nga gin-atipan niya ang mga panong sang iya ugangan nga lalaki, nga si Laban, nga pagligad sang 20 ka tuig nga pag-alagad niya, si Jacob nakasiling: “Ang imo mga obeha kag ang imo mga kanding nga babayi wala mahar-asi, kag ang mga karnero nga lalaki sang imo panong wala ako makakaon. Ang ginkusnit sang mga sapat wala ko pagdalha sa imo. Ako nagbayad sang nadula. Ang kinawat sa adlaw ukon sa gab-i, sa akon kamot ginkinahanglan mo ini.”​—⁠Genesis 31:​38, 39.

Ang Cristianong mga manugtatap nagapakita sing daku pa nga pagkabalaka sa mga karnero nga “ginbakal [sang Manugbantay sang aton mga kalag, nga si Jehova nga Dios] sang dugo sang iya Anak.” (Binuhatan 20:28; 1 Pedro 2:25; 5:⁠4) Ginpadaku ni Pablo ining mabug-at nga responsabilidad sang ginpahanumdom niya ang Hebreong mga Cristiano nga ang mga lalaki nga nagapanguna sa kongregasyon “nagapulaw tungod sa inyo mga kalag subong nga sila ang magahatag sing husay.”​—⁠Hebreo 13:⁠17.

Ang halimbawa ni Jacob nagapakita man nga ang hilikuton sang isa ka manugbantay wala sing limite nga tion. Isa ini ka adlaw-gab-i nga hilikuton kag nagakinahanglan sa masami sing sakripisyo sa kaugalingon. Nagsiling sia kay Laban: “Subong ako sini nga sa adlaw ginhagas ako sang init kag sa gab-i sang tugnaw, kag ang akon katulugon nalagyo sa akon mga mata.”​—⁠Genesis 31:⁠40.

Matuod gid ini sa madamong mahigugmaon nga Cristianong mga gulang karon, subong sang ginapakita sa masunod nga eksperiensia. Ang isa ka utod nga lalaki ginsulod sa inten­sive ­care ­unit sang isa ka ospital pagkatapos nga ang pagkuha sang tumor sa utok nagresulta sa mga komplikasyon. Ang iya pamilya naghimos nga mangin yara sa tupad niya sa ospital sa adlaw kag gab-i. Agod makahatag sing kinahanglanon nga moral nga supurta kag pagpalig-on, ginpasibu sang isa sang lokal nga mga gulang ang iya masako nga iskedyul agod maduaw niya ang masakiton kag ang iya pamilya kada adlaw. Apang, bangod sang rutina sang maid-id nga pagbulong sang ospital, indi pirme posible para sa iya nga makaduaw sa adlaw. Nagkahulugan ini nga ang gulang masunson nga yara sa ospital sing gab-i na katama. Apang malipayon sia nga nagkadto didto kada gab-i. “Nahangpan ko nga dapat ako magduaw sa oras nga nagakaigo para sa pasyente, indi sa oras nga kombeniente para sa akon,” siling sang gulang. Sang nag-ayoayo na ang utod kag ginsaylo sa iban nga lugar sa ospital, ginpadayon sang gulang ang iya makapalig-on nga pagduaw adlaw-adlaw.

Kon Ano ang Natun-an ni Moises Subong Manugbantay

Ang Biblia nagalaragway kay Moises subong “tama gid ka mapainubuson labi pa sa tanan nga tawo nga yara sa kadaygan sang duta.” (Numeros 12:⁠3) Apang, ginapakita sang rekord nga indi pirme amo sini ang natabo. Sang lamharon pa, napatay niya ang isa ka Egiptohanon bangod sang pagbakol sa isa ka masigka-Israelinhon. (Exodo 2:​11, 12) Indi gid ini buhat sang isa ka tawo nga mapainubuson! Apang, gingamit sang ulihi sang Dios si Moises sa pagpanguna sa pungsod nga minilyon ang kadamuon sa kamingawan pasulod sa Ginsaad nga Duta. Sing maathag, nian, si Moises nagkinahanglan sing dugang nga paghanas.

Samtang nakabaton na si Moises sing sekular nga paghanas “sang tanan nga kaalam sang mga taga-Egipto,” labi ang ginkinahanglan para mabantayan niya ang panong ni Jehova. (Binuhatan 7:22) Ano ining dugang pa nga paghanas? Ti, sa 40 ka tuig gintugutan sang Dios si Moises nga mag-alagad subong kubos nga manugbantay sa duta sang Midian. Samtang ginabantayan niya ang mga panong sang iya ugangan nga lalaki, nga si Jetro, napalambo ni Moises ang maayong mga kinaiya subong sang pagpailob, pagkalum-ok, pagpaubos, pagbatas, pagkalulo, kag pagpugong sa kaugalingon. Natun-an man niya ang maghulat kay Jehova. Huo, ang pagbantay sa literal nga mga karnero naghimo kay Moises nga mangin isa ka sangkol nga manugbantay sang pungsod sang Israel.​—⁠Exodo 2:15–3:1; Binuhatan 7:​29, 30.

Indi bala nga amo gid ini ang mga kinaiya nga ginakinahanglan sang isa ka gulang agod maatipan ang katawhan sang Dios karon? Huo, kay ginpahanumdom ni Pablo si Timoteo nga “ang ulipon sang Ginuo . . . dapat magmalulo sa tanan, sampaton sa pagpanudlo, mapainumuron, nagasaway nga may pagpaubos sang mga kasumpong niya.”​—⁠2 Timoteo 2:​24, 25.

Mahimo nga may mga tion nga ang isa ka gulang magabatyag nga nabang-awan sa iya kaugalingon bangod nabudlayan sia sa pagpalambo sini nga mga kinaiya sing bug-os. Apang, indi sia dapat mag-untat. Kaangay ni Moises, mahimo nga nagakinahanglan sing malawig nga tion agod mapalambo sing bug-os ang mga kinaiya nga ginakinahanglan para sa isa nga mangin maayo nga manugbantay. Apang, sa ulihi, inang hanuot nga panikasog pagapadyaan.​—⁠Ipaanggid ang 1 Pedro 5:⁠10.

Subong isa ka gulang, ayhan wala ka gingamit sing bug-os subong sang iban. Mahimo ayhan, nga kaangay ni Moises, si Jehova nagatugot sa imo sa pagpalambo sang pila ka importante nga mga kinaiya sing bug-os pa? Indi pagkalimti nga si Jehova “nagaulikid sa imo.” Apang, dapat man naton dumdumon ang kinahanglanon nga ‘magpangwagkus kita sing pagpaubos sa pag-alagad sa isa kag isa, kay ang Dios nagasumpong sang mga bugalon apang nagabugay sa mga mapainubuson.’ (1 Pedro 5:​5-7) Kon ginagamit mo ang imo kaugalingon kag ginabaton ang paghanas nga ginatugot ni Jehova, mangin mas mapuslanon ikaw sa iya, kaangay ni Moises.

Ang Tanan nga mga Karnero ni Jehova Hamili

Ang masaligan, mahigugmaon nga mga manugbantay sang panahon sang Biblia may salabton sa tagsa ka indibiduwal nga karnero. Dapat nga amo man ini sa espirituwal nga mga manugbantay. Maathag ini gikan sa pinamulong ni Pablo: “Tatapa . . . ang bug-os nga panong.” (Binuhatan 20:28) Sin-o ang nalakip sa “bug-os nga panong”?

Si Jesus naghatag sing ilustrasyon nahanungod sa isa ka lalaki nga may isa ka gatos ka karnero apang gilayon nga ginpangita ang isa nga nagtalang agod pabalikon ini sa panong. (Mateo 18:​12-14; Lucas 15:​3-7) Sa kaanggid nga paagi ang manugtatap dapat magkabalaka sa tagsa ka katapo sang kongregasyon. Ang pagkadiaktibo sa ministeryo ukon sa pagtambong sa Cristianong mga miting wala nagakahulugan nga ang karnero indi na bahin sang panong. Nagapabilin sia nga bahin sang “bug-os nga panong” nga sa ila ang mga gulang dapat “maghatag sing husay” kay Jehova.

Ang isa ka hubon sang mga gulang nabalaka gid nga ang pila nga nakig-upod anay sa kongregasyon nangin diaktibo. Ang listahan sining mga indibiduwal ginhanda, kag ginhimo ang pinasahi nga panikasog agod duawon sila kag buligan sila nga magbalik sa toril ni Jehova. Daku gid ang pasalamat sa Dios sining mga gulang nga sa sulod sang duha ka tuig kag tunga, nabuligan nila ang kapin sa 30 ka tawo nga mangin aktibo liwat sa pag-alagad kay Jehova. Ang isa sang mga nabuligan mga 17 ka tuig nga diaktibo!

Ang kabug-aton sining responsabilidad dugang nga ginapatudok sa mga manugtatap bangod sang katunayan nga ang mga karnero “ginbakal sang dugo sang Anak [sang Dios].” (Binuhatan 20:28) Wala na sing mataas pa nga bili ang mahimo ibayad para sa sining hamili nga mga karnero. Kag hunahunaa ang tanan nga tion kag panikasog nga ginahinguyang sa ministeryo sa pagpangita kag sa pagbulig sa tagsa ka katulad-karnero nga tawo! Indi bala dapat himuon man ang kaanggid nga panikasog agod huptan ang tanan sa ila sa sulod sang toril sang Dios? Sa pagkamatuod, ang tagsa ka karnero sa kongregasyon hamili.

Bisan nga ang isa ka katapo sang karnero nakahimo sing daku nga sala, ang responsabilidad sang mga gulang wala nagabag-o. Padayon sila nga mangin mabinalak-on nga mga manugbantay, mapinalanggaon kag malulo nga nagapanikasog nga luwason ang nakasala kon mahimo. (Galacia 6:​1, 2) Sing masubo, sa pila ka hitabo makita nga ang isa ka katapo sang kongregasyon kulang sing diosnon nga kasubo tungod sa daku nga sala nga nahimo. Nian ang mahigugmaon nga mga manugbantay may Makasulatanhon nga responsabilidad nga amligan ang iban pa nga panong batok sining makalalaton nga impluwensia.​—⁠1 Corinto 5:​3-7, 11-13.

Walay sapayan, si Jehova nga Dios nagapahamtang sing himpit nga halimbawa sang pagpakita sing kaluoy sa nagtalang nga karnero. Ang aton mainawaon nga Manugbantay nagasiling: “Pangitaon ko ang nadula, kag pabalikon ko ang gintabog sa malayo, kag bugkusan ang nabali kag pabakuron ang masakiton.” (Ezequiel 34:​15, 16; Jeremias 31:10) Bilang pag-ilog sa sining maayo nga halimbawa, ginhimo ang mahigugmaon nga kahimusan para duawon sang modernong-adlaw nga mga espirituwal nga manugbantay ang mga tawo nga na­disfellowship, nga mahimo na karon magahulag sa ila bulig. Ining maluluy-on nga mga panikasog sa pagpabalik sa nadula nga mga karnero nagbunga sing maayo. Ang isa ka napasag-uli nga utod nga babayi nagsiling: “Sang nagduaw ang mga gulang, amo yadto ang pagpalig-on nga ginkinahanglan ko agod makabalik.”

Walay duhaduha nga ang pinamulong ni Pablo sa taga-Efeso nga mga gulang sa Mileto puno sing kahulugan​—⁠para sa ila kag para sa mga manugtatap karon. Ang pagpatuhoy niya sa mga manugbantay isa ka pahanumdom sa makagalanyat nga mga kinaiya nga dapat makita sa mga manugtatap​—⁠mga kinaiya subong sang pagpaubos kag kaisog, kaangay sang ginpakita sang manugbantay-hari nga si David; ang personal nga pagbatyag sing responsabilidad kag maamligon nga pag-ulikid, nga makita sa adlaw-gab-i nga pag-alagad ni Jacob; kag ang kahanda sa pagbaton sing dugang nga paghanas sing mapailubon, kaangay sang ginpakita ni Moises. Sa pagkamatuod, ining mga halimbawa sa Biblia magabulig sa mga gulang sa kongregasyon sa pagpalambo kag sa pagpakita sing mga kinaiya nga ginakinahanglan agod mapinalanggaon nila nga ‘mabantayan ang kongregasyon sang Dios, nga ginbakal niya sang dugo sang iya Anak.’