Maluluy-on nga Ginabantayan Nila ang Magagmay nga mga Karnero
SA TANAN nga mga sapat nga nagapuyo malapit sa tawo, wala na halos sing kaangay sa mahagop nga mga karnero. Ang kalabanan nga mga sapat may kusog kag kinaugali nga kinahanglanon sa pagpangita sing pagkaon kag sa paglikaw sa mga sapat nga nagakaon sa ila, apang ang karnero tuhay. Mahapos ini masalakay sang mga sapat nga nagapangaon, nga halos walay ikasarang sa pagpangapin sa kaugalingon. Kon wala sing manugbantay, ang karnero mahadlukon kag walay mahimo. Kon mapahilayo sa panong, madali ini madula. Busa ang mahagop nga karnero may daku nga rason nga magbatyag sing pagkasuod sa ila manugbantay. Kon wala sia, diutay ang ila kahigayunan nga makalampuwas. Bangod sini nga mga kinaiya, ginagamit sang Biblia ang karnero sing malaragwayon sa paglaragway sa inosente, ginpintasan, ukon walay inugpangapin nga katawhan.
Sa pagkamatuod, ang mga padya sang manugbantay ginpangabudlayan sing maayo. Indi mahapos ang iya pangabuhi. Nadayag sia sa init kag tugnaw, kag nagaeksperiensia sia sing walay tulog nga mga gab-i. Dapat niya amligan ang panong gikan sa mga sapat nga nagapangaon, sa masami sa kaugalingon niya nga katalagman. Sanglit dapat pirme tipunon sang manugbantay ang panong, ang kalabanan sang tion niya ginahinguyang sa pagpangita sa karnero nga nagtalang ukon nadula. Dapat niya bulngon ang masakiton kag nasamaran. Ang maluya ukon kapoy nga mga kordero dapat kuguson. Yara ang dalayon nga kabalaka sa pagtigayon sing nagakaigo nga suplay sang pagkaon kag tubig. Kinaandan na para sa manugbantay ang magtulog sa bug-os nga gab-i sa latagon agod siguruhon ang kaluwasan sang panong. Gani, ang pagbantay isa gid ka mabudlay nga pangabuhi nga nagakinahanglan sang serbisyo sang isa ka tawo nga maisog, makugi, kag maabtik sa paglubad sa mga problema. Labaw sa tanan, dapat nga may ikasarang sia sa pagpakita sing matuod nga pag-ulikid sa panong nga gintugyan nga atipanon niya.
Pagbantay sa Panong sang Dios
Ginalaragway sang Biblia ang katawhan sang Dios subong mahagop nga mga karnero kag ang nagaatipan sa ila subong mga manugbantay. Si Jehova mismo amo ‘ang manugbantay kag manugtatap sang aton mga kalag.’ (1 Pedro 2:25) Si Jesucristo, ang “maayong manugbantay,” nagpabutyag sang iya handum nga ang karnero makabaton sing maluluy-on nga pag-atipan sang ginsilingan niya si apostol Pedro: ‘Pahalba ang akon mga kordero, tatapa ang akon magagmay nga mga karnero, pahalba ang akon magagmay nga mga karnero.’ (Juan 10:11; 21:15-17) Ang Cristianong mga manugtatap hanuot nga gintangduan sa ‘pagbantay sa kongregasyon sang Dios.’ (Binuhatan 20:28) Kag ang ila hilikuton subong espirituwal nga mga manugbantay nagakinahanglan sing mga kinaiya sang isa ka maayong literal nga manugbantay—kaisog, kakugi, kaabtik sa paglubad sa problema, kag, ilabi na, tinagipusuon nga pag-ulikid para sa kaayuhan sang panong.
Sang mga kaadlawan sang manalagna sang Dios nga si Ezequiel, ang kalabanan sa mga manugbantay nga gintangdo sa pag-atipan sa mga kinahanglanon sang katawhan ni Jehova sa Israel napaslawan sa pagtuman sang ila mga katungdanan. Ang panong sang Dios nag-antos sing daku, kag ang kalabanan sa panong nagbiya sa matuod nga pagsimba. (Ezequiel 34:1-10) Karon, ang klero sang Cristiandad nagalaragway sang ila kaugalingon subong mga manugbantay sang ginatawag kuno nga Cristianong kongregasyon, apang ang pagkamasakiton sini sa espirituwal nagapamatuod nga ang klero kaangay sang malauton nga mga impostor nga nagpatumbaya kag nag-abuso sa katawhan sang si Jesus yari sa duta. Ang relihiosong mga lider sang Cristiandad kaangay sang “sinuhulan nga tawo” nga “wala nagakabalaka sa karnero.” (Juan 10:12, 13) Indi gid sila handa, makasarang, ukon kalipikado sa pagbantay sa panong sang Dios.
Mga Manugbantay nga Tunay nga Nagakabalaka
Si Jesus nagpahamtang sing himpit nga halimbawa para sa tanan nga magabantay sa panong ni Jehova. Sa tanan nga paagi sia mahigugmaon, malulo, maluluy-on, kag mabuligon sa iya mga disipulo. Naghimo sia sing inisyatibo nga pangitaon ang mga nagakinahanglan. Bisan pa masako si Jesus kag masunson nga kapoy, pirme sia naghinguyang sing tion sa pagpamati sa ila mga problema kag sa paghatag sa ila sing pagpalig-on. Ang iya kahanda nga ihatag ang iya kalag tungod sa ila amo ang katapusan nga pagpakita sing gugma.—Juan 15:13.
Karon, ang tanan nga gintangdo nga mga gulang sa kongregasyon, subong man ang ministeryal nga mga alagad, nagapakig-ambit sa sining responsabilidad sa panong. Gani, bisan ang mahimo nga bentaha sa materyal sa iban nga pungsod wala maghaylo sa kalabanan sining responsable nga mga lalaki sa pagsaylo kag busa biyaan ang mga kongregasyon nga wala sing nagakaigo nga bulig kag pagdumala. Nagakabuhi sa “ital-ital nga tion nga mabudlay atubangon,” ang panong nagakinahanglan sing pagpalig-on kag sing panuytoy. (2 Timoteo 3:1-5) Yara pirme ang katalagman nga ang iban mahulog kay Satanas, nga “kaangay sang nagangurob nga leon, nga nagapangita sing tulukbon.” (1 Pedro 5:8) Labi pa karon sangsa nagligad, kinahanglan nga “laygayan [sang Cristianong mga manugbantay] ang mga matamad, lugpayan ang napung-awan nga mga kalag, sakdagon ang mga maluya.” (1 Tesalonica 5:14) Ang tayuyon nga pagbantay kinahanglanon agod mapunggan nila ang pagpahilayo sang mga maluya sa panong.—1 Timoteo 4:1.
Paano mahibaluan sang manugbantay kon ang karnero nagakinahanglan sing bulig? Ang pila sang mas maathag nga mga tanda amo ang kapaslawan sa pagtambong sa Cristianong mga miting, ditayuyon nga pagpakigbahin sa ministeryo sa latagon, kag ang huyog sa paglikaw nga makig-upod sing suod sa iban. Ang kaluyahon mahimo man mamutikan paagi sa mahalungon nga pagtalupangod sa panimuot sang mga karnero kag sa tono sang ila mga paghambalanay. Mahimo sila nahuyog sa pagmulay sa iban, ayhan nagapakita sing balatyagon sang kaakig. Ang ila mga paghambalanay mahimo nga natuon sing daku sa materyalistiko nga mga paghimud-os sa baylo nga sa espirituwal nga mga tulumuron. Ang kabilugan nga kakulang sing kapagsik, optimismo, kag kalipay mahimo magkahulugan nga ang ila pagtuo nagluya. Ang masubo nga pangguyahon mahimo mangin tanda nga ginaipit sila sang nagapamatok nga mga paryente ukon kalibutanon nga mga abyan. Natalupangdan ining mga tanda, ang manugbantay mahimo makapangabudlay agod mahibaluan kon ano nga sahi sang bulig ang ginakinahanglan.
Kon nagaduaw sa pagbulig sa isa ka masigkatumuluo, ang Cristianong mga manugbantay kinahanglan pirme maghunahuna sang ila pangunang tulumuron. Indi lamang ini isa ka sosyal nga pagduaw upod ang pagsugilanon sa magagmay nga mga butang. Ang tulumuron ni apostol Pablo sa pagduaw sa iya mga kauturan amo ang ‘pagpaambit sa ila sang pila ka espirituwal nga mga hiyas agod palig-unon sila kag agod may pagbayluhanay sing pagpalig-on.’ (Roma 1:11, 12) Agod mahimo ini, kinahanglan ang abanse nga paghanda.
Una, analisaha ang indibiduwal, kag tinguhai nga hibaluon kon ano ang iya espirituwal nga kahimtangan. Pagkahibalo sina, hunahunaa kon ano nga sahi sang panuytoy, pagpalig-on, ukon laygay ang labing mapuslanon. Ang Pulong sang Dios, ang Biblia, amo dapat ang pangunang ginahalinan sang impormasyon bangod “gamhanan” ini. (Hebreo 4:12) Ang Lalantawan kag Magmata! mahimo tan-awon para sa mga artikulo nga nagahinun-anon sa espesipiko nga mga kinahanglanon sang karnero nga nagaatubang sing pinasahi nga mga problema. Ang nagapahalipay kag nagapapagsik nga mga eksperiensia sarang makita sa Yearbook of Jehovah’s Witnesses. Ang tulumuron amo ang pagpaambit sing butang nga espirituwal nga ‘maayo para sa kalig-unan sang isa.’—Roma 15:2.
Pagbantay nga Makapalig-on
Ang manugbantay sang isa ka panong sang literal nga mga karnero nakahibalo nga nagadepende sila sa iya pangamlig kag pag-atipan. Ang labing kinaandan nga katalagman amo ang pagtalang, pagbalatian, pagkakapoy, pagkasamad, kag mga sapat nga nagapangaon. Sa kaanggid nga paagi dapat kilalahon sang espirituwal nga manugbantay kag lubaron ang kaanggid nga mga katalagman nga nagapahog sa kaayuhan sang panong. Ang masunod amo ang pila ka tipiko nga mga problema kag ang pila ka panugda kon ano ang mahimo isiling sa pagpaambit sing makapalig-on sa espirituwal nga impormasyon.
(1) Kaangay sang dimabinantayon nga karnero, ang iban nga mga Cristiano nagatalang gikan sa panong sang Dios bangod nasulay sila sang daw inosente kag makalilipay nga mga ganyat. Mahimo sila matublag kag madaldal pa gani palayo bangod sang paghimud-os sang mga tulumuron may kaangtanan sa materyalismo, kalingawan, ukon paglingawlingaw. (Hebreo 2:1) Ina nga mga indibiduwal mahimo pahanumdumon sang pagkadagmit sang panahon, sang kinahanglanon nga magpabilin nga suod sa organisasyon ni Jehova, kag sang importansia sang pag-una sang mga interes sang Ginharian sa kabuhi. (Mateo 6:25-33; Lucas 21:34-36; 1 Timoteo 6:8-10) Ang mabuligon nga laygay makita sa artikulo nga “Keep Your Balance—How?” sa The Watchtower sang Mayo 15, 1984, pahina 8-11.
(2) Ang manugbantay dapat maghatag sing bulig sa karnero nga nagmasakit. Sa kaanggid, dapat buligan sang espirituwal nga mga manugbantay ang mga Cristiano nga nagamasakit sa espirituwal bangod sang negatibo nga mga butang sa ila kabuhi. (Santiago 5:14, 15) Ayhan wala sila sing palamugnan, ayhan may malubha nga problema sa panglawas, ukon ayhan nagaeksperiensia sing mga kabudlayan sa ila pagkabuhi subong pamilya. Ina sila may diutay nga gana para sa espirituwal nga pagkaon ukon sa pagpakig-upod sa katawhan sang Dios. Ini man nagaresulta sa pagpahilayo kag pagluya sang buot. Dapat sila pasaligon nga si Jehova nagaulikid sa ila kag magasakdag sa ila sa mabudlay nga mga tion. (Salmo 55:22; Mateo 18:12-14; 2 Corinto 4:16-18; 1 Pedro 1:6, 7; 5:6, 7) Mabuligon man ang pagrepaso sa artikulo nga “Magtulok sing Matadlong sa Unhan Subong Cristiano,” nga makita sa Ang Lalantawan sang Disiembre 1, 1980, pahina 8-12.
(3) Ang manugbantay dapat magbantay sa mga karnero nga ginlapyo. Ang iban nagbatas sing matutom sa pag-alagad kay Jehova sa mga tinuig. Ginsumpong nila ang madamong pagtilaw kag kabudlayan. Karon nagapakita sila sing tanda nga ginakapoy sa paghimo sing maayo kag mahimo gani magapabutyag sing mga pangduhaduha nahanungod sa pagkakinahanglanon sang tul-id nga pagbantala nga hilikuton. Kinahanglan papagsikon liwat ang ila espiritu, bag-uhon liwat ang ila apresasyon sa mga kalipay kag mga pagpakamaayo nga nagagikan sa bug-os tagipusuon nga pag-alagad sa Dios bilang pag-ilog kay Jesucristo. (Galacia 6:9, 10; Hebreo 12:1-3) Ayhan mahimo sila mabuligan sa pagtan-aw nga ginaapresyar ni Jehova ang ila matutom nga pag-alagad kag mapabakod sila para sa palaabuton nga mga hilikuton sa kadayawan niya. (Isaias 40:29, 30; Hebreo 6:10-12) Ayhan mapuslanon nga pakig-ambitan ang mga panghunahuna gikan sa artikulo nga “Indi Mag-untat sa Paghimo sing Maayo,” nga nagguwa sa Ang Lalantawan sang Hulyo 15, 1988, pahina 9-14.
(4) Kaangay sang karnero nga nasamaran, ang iban nga mga Cristiano nasaklaw sang ginahantop nila nga makasalandad nga paggawi. Apang, kon mapinatawaron kita sa iban, ang aton langitnon nga Amay magahatag sa aton sing kinahanglanon nga kapatawaran. (Colosas 3:12-14; 1 Pedro 4:8) Ang iban nga mga kauturan nga lalaki ukon babayi mahimo nga nakabaton sing laygay ukon disiplina nga sa banta nila dimakatarunganon. Apang, kita tanan mahimo makabenepisyo sa espirituwal nga laygay kag disiplina, kag makalulugpay mahibaluan nga si Jehova nagadisiplina sang mga ginahigugma niya. (Hebreo 12:4-11) Bangod wala sila ginhatagan sing mga pribilehiyo sa pag-alagad nga sa banta nila kalipikado sila, ang iban nagtugot sang kaakig nga mangin kabangdanan sang kasuayon sa tunga nila kag sang kongregasyon. Apang kon magpahilayo kita sa organisasyon ni Jehova, wala na sing lugar pa nga kaladtuan para sa kaluwasan kag matuod nga kalipay. (Ipaanggid ang Juan 6:66-69.) Ang mapuslanon nga impormasyon may kaangtanan sa sini sarang makita sa artikulo nga “Paghupot sa Aton Cristianong Pagkaisa,” nga makita sa Ang Lalantawan sang Agosto 15, 1988, pahina 28-30.
(5) Ang mga karnero dapat amligan gikan sa mga sapat nga nagapangaon. Sa kaanggid nga paagi, ang iban mahimo pamatukan kag pahugon sang ditumuluo nga mga paryente ukon mga katrabaho. Ang ila integridad mahimo nga mapaidalom sa pagsalakay sa idalom sang mga pag-ipit nga ginahimo agod buhinan ang ila pag-alagad sa Dios ukon untatan ang pagpakigbahin sa Cristianong ministeryo. Apang, ginapabakod sila kon buligan sila sa paghangop nga ang pagpamatok mapaabot kag sa pagkamatuod isa sang mga pamatuod nga kita matuod nga mga disipulo ni Jesucristo. (Mateo 5:11, 12; 10:32-39; 24:9; 2 Timoteo 3:12) Mapuslanon nga ipakita nga kon magmatutom sila, indi sila pagbayaan ni Jehova kag ang ila pagbatas padyaan. (2 Corinto 4:7-9; Santiago 1:2-4, 12; 1 Pedro 5:8-10) Ang artikulo nga natig-uluhan sing “Malipayon nga Nagabatas Walay Sapayan sang Paghingabot” sa Ang Lalantawan sang Oktubre 15, 1982, pahina 14-21, nagahatag sing dugang pa nga pagpalig-on.
Mga Manugbantay—Himua ang Inyo mga Salabton
Ang mga kinahanglanon sang panong sang Dios madamo, kag ang nagakaigo nga pagbantay isa ka mabudlay nga hilikuton. Busa ang Cristianong mga manugbantay dapat mangin maluluy-on, tunay nga mainulikdon, kag interesado sa pagbulig. Ang pagpailob kag paghantop importante. Samtang ang pila ka indibiduwal nagakinahanglan sing laygay kag paandam, ang iban pa nakabenepisyo sing labi gikan sa pagpalig-on. Ang pila ka personal nga pagduaw mahimo nga nagakaigo na sa pila ka hitabo, samtang sa iban pa ang regular nga pagtuon sa Biblia mahimo nga kinahanglanon. Sa tagsa ka kaso ang pangunang tulumuron amo ang pagpaambit sang makapalig-on sa espirituwal nga panuytoy ukon mahigugmaon nga laygay nga magapahulag sa indibiduwal nga sugdan ang maayong batasan sa pagtuon, mangin ukon padayon nga tayuyon sa pagtambong sa mga miting sa kongregasyon, kag aktibo nga makigbahin sa Cristianong ministeryo. Amo ini ang pangunang mga paagi sa pagbulig sa mga masigkatumuluo kag sa pagbulig sa ila nga buksan ang dalanon para sa hilway nga pag-ilig sang balaan nga espiritu ni Jehova.
Ang mga manugbantay nga nagaaman sina nga sahi sang suporta nagahimo sing labing hamili nga pag-alagad tungod sa panong sang Dios. (Tan-awa ang The Watchtower sang Nobiembre 15, 1985, pahina 23-7.) Ang ginahimo sang espirituwal nga mga manugbantay ginaapresyar sing daku sang panong. Sa tapos matigayon ina nga bulig, ang isa ka ulo sang pamilya nagsiling: ‘Pagkatapos sang 22 ka tuig sa kamatuoran, naganyat kami sa kalibutan sang materyalismo. Masunson nga luyag namon magtambong sa mga miting, apang daw indi namon ini mahimo. Indi gid man kami bagay sa sistema ni Satanas, gani bug-os kami nga nahamulag, napain. Naghimo ini sa amon nga nabang-awan kag napung-awan. Nagakinahanglan kami sing mga pulong sang pagpalig-on. Sang ginduaw kami sang isa ka gulang, malipayon namon nga ginbaton ang aman sang isa ka pagtuon sa Biblia sa amon puluy-an. Karon kami tanan nakabalik sa malig-on nga organisasyon ni Jehova. Indi ko mapabutyag ang kalipay nga nabatyagan ko!’
May daku gid nga kasadya kon ang aton nagtalang ukon nagluya nga mga utod nga lalaki kag babayi mapapagsik kag mapaaktibo liwat sa espirituwal. (Lucas 15:4-7) Ang tuyo ni Jehova sa iya katawhan matuman kon sila mahiusa “kaangay sang panong sa toril.” (Miqueas 2:12) Sa sining malig-on nga duog, sila ‘nakasapo sing kapahuwayan sa ila mga kalag’ sa bulig sang Maayong Manugbantay, si Jesucristo. (Mateo 11:28-30) Ang nahiusa nga bug-os kalibutan nga panong nagabaton sing panuytoy, lugpay, kag pangamlig upod ang bugana nga espirituwal nga pagkaon.
Karon, paagi sa sining hilikuton sa pagbantay, ginapahimo ni Jehova ang mahigugmaon nga hilikuton nga nahisanto sa iya anay saad: “Ako gid magapangita sa akon karnero kag magaatipan sa ila. . . . Luwason ko sila sa tanan nga duog diin nag-aplaag sila . . . Pahalbon ko sila sa maayo nga halalban . . . Pangitaon ko ang nadula, . . . kag bugkusan ang nabali kag pabakuron ang masakiton.” (Ezequiel 34:11-16) Daw ano nga lugpay ang mahibaluan nga si Jehova amo ang aton Manugbantay!—Salmo 23:1-4.
Bangod sang balaan nga mga aman sa pagbantay sa panong sang Dios, subong mga alagad ni Jehova mapaambitan naton ang mga balatyagon ni David, nga nagsiling: “Sa kalinong magahigda ako kag magatulog, kay ikaw lamang, O Jehova, ang nagapapuyo sa akon sa kalig-unan.” (Salmo 4:8) Huo, ang katawhan ni Jehova nagabatyag nga may kalig-unan sa iya mahigugmaon nga pag-atipan kag nagapasalamat nga ang Cristianong mga gulang maluluy-on nga nagabantay sa magagmay nga karnero.
[Picture Credit Line sa pahina 20, 21]
Potter’s Complete Bible Encyclopedia