Ginatinguhaan Mo Bala nga Mangin Hamtong Pareho sang Cristo?

1, 2. Ano nga klase sang pag-uswag ang dapat panikasugan sang tagsa ka Cristiano? Iilustrar.

KON nagapili ang eksperiensiado nga asawa sing preska nga prutas sa tiendahan, wala niya ginapili ang pinakadaku ukon pinakabarato. Sa baylo, ginapangita niya ang mga luto na. Gusto niya ang prutas nga manamit kag mahamot kag madamo sing sustansia. Huo, ginapili niya ang prutas nga gulang ukon luto na.

² Pagkatapos magdedikar ang isa kag magpabawtismo, padayon pa ang iya pag-uswag. Tulumuron niya nga mangin hamtong nga alagad sang Dios. Si apostol Pablo nagsulat nga kinahanglan mag-uswag sa espirituwal ang mga Cristiano sa Efeso. Ginpalig-on niya sila nga manikasog nga ‘makadangat sa nahiusa nga pagtuo kag sibu nga ihibalo tuhoy sa Anak sang Dios, kag mangin hamtong gid nga tawo, kaangay sang bug-os nga kahamtong sang Cristo.’​—Efe. 4:13.

3. Ano ang kahimtangan sang kongregasyon sa Efeso nga pareho sa kahimtangan sang katawhan ni Jehova subong?

³ Sang ginsulatan ni Pablo ang kongregasyon sa Efeso, mga pila na ini ka tuig nga natukod. Madamo nga disipulo didto ang hamtong na sa espirituwal. Pero ang pila kinahanglan pa magpanikasog padulong sa pagkahamtong. Pareho man sa sini ang kahimtangan sang mga Saksi ni Jehova subong. Madamo nga kauturan ang madugay na nga nagaalagad sa Dios kag hamtong na sa espirituwal. Pero ang iban indi pa. Halimbawa, linibo ka bag-uhan ang ginabawtismuhan kada tuig, gani kinahanglan pa nila manikasog nga mangin hamtong. Isa ka bala sa ila?​—Col. 2:6, 7.

PAG-USWAG BILANG CRISTIANO

4, 5. Sa ano magkatuhay ang hamtong nga mga Cristiano, pero sa ano sila magkaanggid? (Tan-awa ang piktyur sa umpisa sini nga artikulo.)

⁴ Kon tan-awon mo sing maayo ang luto nga mga prutas sa tiendahan, makita mo nga indi ini palareho. Pero may mga palatandaan nga luto na ini. Sing kaanggid, ang hamtong nga mga Cristiano mahimo lainlain ang nasyonalidad, ginhalinan, kapagros, edad, kag eksperiensia. Lainlain man gani sila sing personalidad ukon kultura. Pero, tanan sila may mga kinaiya nga nagapakita nga hamtong na sila. Ngaa?

⁵ Ginasunod sang hamtong nga alagad ni Jehova ang halimbawa ni Jesus, nga nagbilin sa aton sing huwaran ‘agod sundon naton sing maayo ang iya mga tikang.’ (1 Ped. 2:21) Ano ang pinakaimportante para kay Jesus? Ang paghigugma kay Jehova sa bug-os nga tagipusuon, kalag, kag hunahuna, kag paghigugma sa isigkatawo subong sang kaugalingon. (Mat. 22:37-39) Ginapanikasugan sang hamtong nga Cristiano nga sundon ini nga laygay. Makita sa iya pagkabuhi nga ginauna niya ang iya kaangtanan kay Jehova kag may masinakripisyuhon sia nga gugma para sa iban.

6, 7. (a) Ano nga mga kinaiya ang nagapakita nga hamtong ang isa ka Cristiano? (b) Ano ang dapat naton ipamangkot sa aton kaugalingon?

⁶ Pero nahibaluan naton nga ang gugma isa lamang sa mga kinaiya nga ginapatubas sang espiritu nga mapakita sang hamtong nga Cristiano. (Gal. 5:22, 23) Importante man ang iban nga mga kinaiya subong sang kalulo, pagpugong sa kaugalingon, kag pagkamapinasensiahon. Makabulig ini sa iya nga maatubang ang mabudlay nga mga kahimtangan nga wala nagapangakig kag mabatas ang mga kapaslawan nga wala nagakadulaan sing paglaum. Sa iya personal nga pagtuon, padayon niya nga ginausisa ang mga prinsipio sa Kasulatan nga makabulig sa iya nga makilala ang husto kag sala. Gani ang iya mga desisyon nagapakita nga hamtong sia sa espirituwal. Halimbawa, ginapamatian niya ang iya nahanas sa Biblia nga konsiensia. Ang hamtong nga Cristiano mapainubuson bangod ginatamod niya nga mas maayo ang mga dalanon kag talaksan ni Jehova.a Makugi sia nga nagabantala sang maayong balita kag nagabulig para mahiusa ang kongregasyon.

⁷ Bisan ano na kita kadugay sa pag-alagad kay Jehova, ang kada isa sa aton mahimo mamangkot, ‘May ara pa bala ako sing dapat bag-uhon para mailog pa gid si Jesus agod padayon ako nga mag-uswag sa espirituwal?’

“ANG MATIG-A NGA PAGKAON PARA SA HAMTONG NGA MGA TAWO”

8. Ano ang masiling naton parte sa ihibalo kag paghangop ni Jesus sa Kasulatan?

⁸ Nahangpan gid sing maayo ni Jesucristo ang Pulong sang Dios. Bisan 12 anyos pa lang sia, masarangan na niya makig-istorya sa mga manunudlo sa templo parte sa Kasulatan. “Ang tanan nga nagapamati sa iya nahayanghag gid sa iya paghangop kag sa iya mga sabat.” (Luc. 2:46, 47) Sang ulihi, sa iya ministeryo sa duta, napahipos niya ang mga nagapamatok sa iya paagi sa nagakaigo nga paggamit sang Pulong sang Dios.​—Mat. 22:41-46.

9. (a) Ano nga mga batasan sa pagtuon sa Biblia ang importante para sa gusto mag-uswag sa espirituwal? (b) Ano ang katuyuan sang pagtuon sa Biblia?

⁹ Bilang pag-ilog sa halimbawa ni Jesus, ang Cristiano nga gusto mag-uswag sa espirituwal indi kontento sa hapaw lang nga ihibalo sa Biblia. Regular niya ini nga ginatun-an sing maayo, kay narealisar niya nga “ang matig-a nga pagkaon para sa hamtong nga mga tawo.” (Heb. 5:14) Maathag nga luyag sang hamtong nga Cristiano nga makatigayon sing “sibu nga ihibalo tuhoy sa Anak sang Dios.” (Efe. 4:13) Ginabasa mo bala ang Biblia kada adlaw? May iskedyul ka bala sang personal nga pagtuon, kag ginahatagan gid sing tion kada semana ang pangpamilya nga pagsimba? Samtang ginabinagbinag mo ang Pulong sang Dios, mangin alisto sa mga prinsipio sa Kasulatan nga makabulig sa imo nga mahibaluan pa gid ang panghunahuna kag balatyagon ni Jehova. Dayon panikasugi nga iaplikar ang mga prinsipio sa Biblia, kag ibase sa sini ang imo mga desisyon, sa amo nagasuod ka pa gid kay Jehova.

10. Ano ang impluwensia sang ihibalo sa adlaw-adlaw nga pagkabuhi sang isa ka hamtong nga Cristiano?

¹⁰ Nahangpan sang hamtong nga Cristiano nga indi lang ihibalo ang kinahanglan. Magluwas sa iya nahibaluan, daw ano bala kadaku ang iya gugma sa dalanon kag mga prinsipio sang Dios? Makita ini nga gugma kon ang iya prioridad sa kabuhi nahisuno sa kabubut-on ni Jehova imbes nga sa iya kaugalingon nga mga huyog. Dugang pa, pat-od gid nga ginapanikasugan niya nga “ubahon” ang iya daan nga mga panimuot kag paggawi. Samtang ginahimo sang Cristiano ini nga pagbag-o, ginasuklob niya ang bag-o nga personalidad nga kaangay sang personalidad sang Cristo nga “gintuga suno sa kabubut-on sang Dios sa matuod nga pagkamatarong kag pagkamainunungon.” (Basaha ang Efeso 4:22-24.) Ginsulat ang Biblia paagi sa panuytoy sang balaan nga espiritu sang Dios. Samtang nagadalom ang ihibalo kag gugma sang isa ka Cristiano sa mga talaksan sang Biblia, ginatugutan niya nga maimpluwensiahan ang iya tagipusuon kag hunahuna sang balaan nga espiritu. Nagabulig ini nga mag-uswag sia sa espirituwal.

GINTINGOB SANG PAGHIUSA

11. Ano ang naeksperiensiahan ni Jesus sa pagpakig-angot niya sa iya pamilya kag mga disipulo?

¹¹ Sang nagkabuhi si Jesus subong himpit nga tawo sa duta, napalibutan sia sang indi himpit nga mga tawo. Ginpadaku sia sang indi himpit nga mga ginikanan, kag tinuig sia nga nag-istar sa puluy-an upod sa indi himpit niya nga pamilya. Bisan ang suod niya nga mga sumulunod naimpluwensiahan sang mga kinaiya subong sang bugal kag pagkamaiyaiyahon nga lapnag sadto. Halimbawa, sang gab-i antes ginpatay si Jesus, ‘nagbaisay sila kon sin-o ang pinakamataas sa ila.’ (Luc. 22:24) Pero nagasalig si Jesus nga ang iya indi himpit nga mga sumulunod magauswag sa espirituwal kag mahiusa bilang kongregasyon. Sa sina man nga gab-i, nangamuyo si Jesus nga mahiusa ang iya mga apostoles, nga nagapangabay sa iya langitnon nga Amay: “[Kabay nga] sila tanan mangin isa, subong nga ikaw, Amay, nahiusa sa akon kag ako nahiusa sa imo, agod mahiusa man sila sa aton, . . . agod mangin isa sila subong nga kita isa.”​—Juan 17:21, 22.

12, 13. (a) Paano ginpadaku sang Efeso 4:15, 16 nga dapat kita magbulig para mahiusa ang kongregasyon? (b) Paano nabatuan sang isa ka utod ang iya kaluyahon kag natun-an nga dapat sia magbulig para sa paghiusa?

¹² Ang hamtong nga alagad ni Jehova nagabulig para mahiusa ang kongregasyon. (Basaha ang Efeso 4:1-6, 15, 16.) Tulumuron naton nga ang katawhan sang Dios mahiusa kag ang tanan nga miembro nagabuligay. Suno sa Pulong ni Jehova, kinahanglan naton ang pagpaubos para may paghiusa. Ang hamtong nga utod mapainubuson nga nagabulig para sa paghiusa, bisan pa makita niya ang pagkadihimpit sang iban. Ano ang imo reaksion kon nakasala ang isa ka utod sa kongregasyon? Paano kon sa imo sia nakasala? Indi mo na bala sia pag-istoryahon? Ukon tinguhaan mo bala nga mangin maayo liwat ang inyo kaangtanan? Gusto sang hamtong nga Cristiano nga masolbar ang problema sa baylo nga mangin problema sia sang iban.

¹³ Binagbinaga ang halimbawa sang utod nga lalaki nga si Uwe. Sang una, nagakaapektuhan sia sang pagkadihimpit sang mga kauturan. Dayon, gingamit niya ang Biblia kag ang Insight on the Scriptures para tun-an ang kabuhi ni David. Ngaa si David? Si Uwe nagpaathag: “Nakita ni David ang supak sa Kasulatan nga mga batasan sang iban nga alagad sang Dios. Halimbawa, gintinguhaan sia nga patyon ni Hari Saul, ang iban gusto sia batuhon, kag bisan ang iya asawa nagyaguta sa iya. (1 Sam. 19:9-11; 30:1-6; 2 Sam. 6:14-22) Pero wala gintugutan ni David nga magtahaw ang iya gugma kay Jehova bangod sang paggawi sang iban. Maluluy-on man si David, isa ka kinaiya nga kinahanglan ko palambuon. Ang akon natun-an nagpabag-o sang akon pagtamod sa pagkadihimpit sang mga kauturan. Wala ko na ginadumdom ang mga sala sang iban. Sa baylo, ginatinguhaan ko nga makabulig para mahiusa ang kongregasyon.” Tulumuron mo man bala nga makabulig para mahiusa ang kongregasyon?

MGA ABYAN NGA NAGAHIMO SANG KABUBUT-ON SANG DIOS

14. Ano nga sahi sang mga tawo ang ginpili ni Jesus nga mangin abyan niya?

¹⁴ Mainabyanon si Jesucristo sa mga tawo. Komportable nga nakig-upod sa iya ang tanan nga klase sang tawo​—lalaki, babayi, pamatan-on, tigulang, kag bisan kabataan. Pero ginpili ni Jesus ang iya suod nga mga abyan. Nagsiling sia sa iya matutom nga mga apostoles: “Mga abyan ko kamo kon ginahimo ninyo ang ginasugo ko sa inyo.” (Juan 15:14) Ginpili niya ina nga mga abyan halin sa mga mainunungon nga nagasunod sa iya kag bug-os tagipusuon nga nagaalagad kay Jehova. Ginapili mo man bala ang imo suod nga mga abyan halin sa mga nagaalagad sing bug-os kay Jehova? Ngaa importante ini?

15. Paano makabenepisyo ang mga pamatan-on sa ila pagpakig-upod sa hamtong nga mga Cristiano?

¹⁵ Madamo nga prutas ang madali maluto kon mainitan sang adlaw. Gani madali ka man maghamtong kon mainit ang pagpalanggaanay sang mga kauturan. Mahimo isa ikaw ka pamatan-on nga nagahunahuna kon ano ang himuon mo sa imo kabuhi. Maalamon gid nga makig-upod ka sa madugay na nga mga alagad ni Jehova kag nakabulig sa paghiusa sang kongregasyon! Sa sulod sang mga tinuig, mahimo may mga problema man sila nga naeksperiensiahan kag kabudlayan sa pag-alagad sa Dios. Makabulig sila sa imo sa pagpili sing pinakamaayo nga pagkabuhi. Ang mapinalanggaon kag makapalig-on nga pagpakig-upod sa sini nga mga kauturan makabulig sa imo nga maghimo sing maalamon nga mga desisyon kag mag-uswag para mangin hamtong.​—Basaha ang Hebreo 5:14.

16. Paano nabuligan sang hamtong nga mga Cristiano sa kongregasyon ang pamatan-on nga utod?

¹⁶ Halimbawa, nadumduman sang utod nga babayi nga si Helga nga sang manuggradweyt na sia sa hayskul, nagasugiray sila sang iya mga klasmeyt sang ila mga tulumuron. Madamo sa ila ang gusto mag-eskwela sa unibersidad kay nagalaum sila nga magmadinalag-on. Ginsugid ni Helga ang iya kahimtangan sa mga abyan niya sa kongregasyon. “Madamo sa ila ang mas magulang sa akon,” siling niya, “kag nabuligan gid nila ako. Ginpalig-on nila ako nga mag-alagad sing bug-os tion. Gani lima ka tuig ako nga nakapayunir. Nalipay ako nga gin-alagad ko si Jehova sing bug-os sang pamatan-on pa ako. Wala gid ako sing ginhinulsulan.”

17, 18. Paano naton mahatag ang aton pinakamaayo kay Jehova?

¹⁷ Ang pagsunod naton sa halimbawa ni Jesus makabulig sa aton nga mag-uswag bilang Cristiano. Magasuod pa gid kita kay Jehova, kag magadugang ang aton handum nga alagaron sia sa bug-os naton nga masarangan. Mahatag sang alagad sang Dios ang iya pinakamaayo kay Jehova kon mangin hamtong na sia sa espirituwal bilang Cristiano. Ginpalig-on ni Jesus ang iya mga sumulunod: “Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.”​—Mat. 5:16.

¹⁸ Natun-an naton nga ang hamtong nga Cristiano makabulig sing daku sa kongregasyon. Kag ang iya pagkahamtong sa espirituwal makita sa kon paano niya ginagamit ang iya konsiensia nga ginhatag sang Dios. Paano kita mabuligan sang aton konsiensia sa paghimo sing maalamon nga mga desisyon? Kag paano naton matahod ang nabase sa konsiensia nga mga desisyon sang aton mga kauturan? Binagbinagon naton ini sa masunod nga artikulo.