Ang Lalantawan​—Espirituwal nga Pagkaon sa Nagakaigo nga Tion

¹ Sa halos 114 ka tuig, Ang Lalantawan nagapaandam sa mga bumalasa sini nga magpabilin nga alisto sa espirituwal. Ini nga publikasyon isa ka masaligan nga instrumento nga nagaiwag sang aton dalanon sa madulom nga kalibutan. (Isa. 60:2) Ang kamatuoran sang Pulong sang Dios wala gid nagabalhin, apang ang paghangop naton sa sini labi nga nagaathag samtang ginagamit ini ni Jehova kag ang iban pa nga mga instrumento sa paghatag sa aton sing espirituwal nga “pagkaon sa nagakaigo nga tion.”​—Mat. 24:45; Hulu. 4:18.

² Gamita sing Labing Maayo ang Magasin: Sarang naton mapakita ang aton pagpasalamat para sa espirituwal nga kasanagan nga aton nabaton paagi sa mapagsik nga pagpalig-on sa mga tawo nga basahon Ang Lalantawan. Sa masami, madamong tawo ang nagapang-alag-ag sa pagsuskribe sa nahauna nga pagduaw sa pamalaybalay nga hilikuton ukon kon nagapanaksi sing dipormal. Apang madamo ang nagakuha sing tig-isa ka kopya sang mga magasin sing tayuyon kag maathag nga nanamian sa pagbasa sini. Mahimo apresyahon sini nga mga tawo ang kahigayunan nga makabaton sing suskripsion. Ayhan pakamaayuhon sang iban nga magkuha lang sing mga magasin sa primero, kag nian mahimo ka makabalik sa pagtanyag sing suskripsion kon may ginpakita nga interes.

³ Paano mo mahantop kon may matuod nga interes bisan pa nga ang tagbalay wala magsuskribe sa nahauna nga pagduaw? Samtang ginapaathag mo ang isa ukon duha ka punto sa magasin, talupangda ang reaksion sang tagbalay. Nagapamati bala sia sing maayo? Ginatahod bala niya ang Biblia kag ginasundan ang pagbasa sa mga teksto sa Biblia? Nagasabat bala sia sa imo mga pamangkot? Kon amo, mahimo ka makahimos sing isa ka pagduaw liwat sa sina nga semana kag makasugilanon sing dugang sa sina nga tion. Sa ulihi ayhan magapasugot sia sa pagsuskribe agod mabaton ang mga magasin sing tayuyon.

⁴ Ang bag-ong mga magasin dapat matigayon sang mga manugbantala sa gilayon nga madul-ong ini sa kongregasyon. Kon makabaton ka sing bag-o nga guwa, basaha ini sing maayo. Anong topiko ang ginakabalak-an sing daku sang mga tawo sa inyo lugar? Paghidait kag kalig-unan sa bug-os nga kalibutan? Pangabuhi? Maayo nga gobierno? Palibot? Sing talalupangdon, ginatudlo sang Lalantawan ang katawhan sa isa lamang ka permanente nga solusyon, ang Ginharian sang Dios. (Dan. 2:44; Mat. 6:10) Isa gid ini ka hamili nga dulot gikan sa aton “Dakung Instruktor.”​—Isa. 30:20.

⁵ Ang Mayo nagatan-ay sing ekselente nga kahigayunan sa paghugod sing dugang pa nga tion sa pag-alagad sa latagon. Sanglit may lima ini ka talipuspusan sang semana, madamo ang magaauxiliary payunir. Mangabudlay kita tanan sing lakas kag mapagsik nga palig-unon ang tanan nga masugilanon naton sa Mayo sa pagbasa sang Lalantawan kag Magmata! agod makatigayon sila sing espirituwal nga pagkaon sa nagakaigo nga tion.