Iangot ang mga Tract sa Iban nga Literatura
1 Sa tanan nga mga magasin nga ginbalhag karon, Ang Lalantawan kag Magmata! lamang ang makabulig sa sinsero nga mga bumalasa sa pagsapo sang banas padulong sa kabuhi nga walay katapusan. Samtang nagapakigsugilanon ka sa mga tawo sa Mayo, ipakita sa ila ang pinakabag-o nga mga magasin ukon ang isa sang mga brosyur sang Sosiedad. Ang iban mahimo nga magapakita sing diutay nga interes sa primero. Sa sinang mga kahimtangan, ayhan ipaathag mo anay ang isa ukon duha ka punto sa tract; nian kon ang tagbalay nagapakita sing dugang nga interes, iangot ang tract sa magasin ukon brosyur nga gamiton mo.
2 Mahimo ka makasiling:
◼ “Madamong tawo ang magaugyon nga sa karon nga kalibutan, mas madamo ang problema sangsa solusyon. Nakahibalo ka bala nga madamo sa aton pinakamabug-at nga mga problema karon ang gintagna sa Biblia?” Nian mahimo mo mabuksan ang pahina 4 kag 5 sang tract nga Ini Bala nga Kalibutan Makalampuwas? kag mapaathag ang pila sang mga problema.
3 Kon ginagamit mo ang Mayo 1 nga Lalantawan kag ang tagbalay nagpakita sing interes sa ginbasa mo gikan sa tract, mabuksan mo ang artikulo nga “Kahilwayan sa Pagpahayag ni Jesucristo” kag mapaathag kon paano lubaron ni Jesucristo ang tanan nga mga problema sang tawo sa dili madugay. Ukon, kon ginagamit ang Mayo 15 nga guwa sarang mo magamit ang artikulo “Daw Ano Bala ka Masaligan ang mga Tagna sang Biblia?”
4 Kon Mayo 8 nga “Magmata!” ang ginapadaku, magamit mo ang introduksion sa parapo 2 sining artikulo kag nian idugang:
◼ “Madamo ang nagapalibog kon bala ang pagpanghikot sang relihion upod sa siensia ang sabat.” Nian basaha ang nagakaigo nga mga punto sa artikulo nga “Relihion kag Siensia—Indi Maayo nga Magkaupod.”
5 Kon nagagamit sang “Toloka!” nga brosyur, mahimo mo gamiton ang tuhay nga pagpalapit:
◼ “Madamo nga tawo ang nagapalibog kon ano ang matabo sa aton kon kita mapatay. Ang iban nagasiling nga nagakadto kita sa langit ukon sa impierno; ang iban indi makasiguro. Ang sabat sang Biblia makapasalig gid.” Nian mapaathag mo ang mga bahin sang tract nga Ano ang Paglaum sang Napatay nga mga Hinigugma? Mahimo ka makapadayon paagi sa pagbukas sang pahina 16 kag 17 sang brosyur kon ang tagbalay nagapakita sing interes.
6 Madamo ang nagmadinalag-on sa paggamit sang tract nga Kabuhi sa Mahidaiton nga Bag-ong Kalibutan. Sarang mo pamangkuton ang tagbalay kon maluyag sia magpuyo sa idalom sang mga kahimtangan nga ginalaragway sa tract. Sa tapos sia makasabat, ipaathag kon paano magaluntad inang mahidaiton nga bag-ong kalibutan. Nian gamita ang Mayo 1 nga Lalantawan sa paagi nga ginpanugda sang parapo 3 sining artikulo.
7 Kon ikaw isa ka bag-o nga manugbantala, walay duhaduha nga apresyahon mo ining simple nga pagpalapit. Ngaa indi magkuha sing suplay sang tract nga Ini Bala nga Kalibutan Makalampuwas? kag sunda ang mga panugda sa pahina 2.
8 Kadungganan naton nga dalhon ang mensahe sang kaluwasan sa puluy-an sang katawhan. Sa pagpangita naton sa ‘mga takus,’ gamiton naton sing maayo ang mga tract kag iangot ini sa iban nga literatura kon may interes nga nakita.—Mat. 10:13.