Gamita ang mga ‘Tract’ sa Pagsugod sing mga Paghambalanay
1 Wala ka bala nagaugyon nga ang epektibo nga pagpanaksi nasandig sing daku sa imo inisyatibo sa pagsugod sing mga paghambalanay? Ang hangkat amo ang paghambal sing butang nga nagaganyat sa interes sang isa ka tawo kag ang pahambalon sia. Apang paano ini himuon sing epektibo?
2 Nasapwan sang madamong manugbantala nga paagi sa pila ka pinili-sing-maayo nga mga pulong, ang pagtanyag sing isa sang aton mga tract nga pasad sa Biblia makasugod sang mga paghambalanay. Ang mga titulo matahom, kag ang mga laragway maduagon kag makagalanyat. Ang tract indi magapalas-ay sa tawo, nagahatag sing impresyon nga may madamo nga impormasyon nga dapat basahon. Apang, ang malip-ot nga mga mensahe sa mga tract makawiwili kag magamit padulong sa isa ka pagtuon sa Biblia.
3 Amo sini ang personal nga balatyagon sang isa ka Saksi: “Sa sining masako nga kalibutan, ang mga tawo masunson nga indi luyag sa paghinguyang sing daku nga tion sa pagbasa, apang ang mga tract iguigo lang ang kalawigon sa paghatag sing importante nga mensahe apang indi tuman kalawig nga magapatalikod sa mga tawo antes pa gani nila ini makita. Ginbasa ko ang madamo sang mga tract, kag natun-an ko sang ulihi ang kamatuoran.” Indi pagpakadiutaya ang gahom sang Pulong sang Dios subong sang ginpaathag sa sining malip-ot, naimprinta nga mga mensahe.—Heb. 4:12.
4 Apat ka Mahapos nga Tikang: Madamo ang nagmadinalag-on sa paggamit sing simple nga paagi. (1) Ipakita sa tawo ang pila sang mga tract kag pamangkuta sia kon diin ang isa nga makawiwili sa iya. (2) Kon makapili na sia, pamangkuta sia sing isa ka nahanda-sing-maayo nga pamangkot nga nagapatalupangod sang pangunang punto sa tract. (3) Sa pagsabat sa pamangkot, basaha ang nagakaigo nga parapo ukon kasulatan gikan sa tract. (4) Kon maayo ang reaksion, padayuna ang pagbinagbinag sa kaundan sang tract ukon ipaathag ang isa ka leksion sa Ginapatuman nga brosyur ukon ang isa ka kapitulo sa Ihibalo nga libro nga nagahatag sing dugang pa nga mga komento. Sa sining paagi magadul-ong ini sa isa ka pagtuon sa Biblia. Ang masunod nga mga panugda magabulig sa imo sa paghanda kon ano ang ihambal nga nagagamit sang apat sang mga tract.
5 Ang tig-ulo sang tract nga “Sin-o Gid ang Nagagahom sa Kalibutan?” mahimo ipamangkot.
◼ Kon bilang sabat sa sini ang tawo nga ginapamangkot mo magasiling sing “Dios” ukon “ambot,” basaha ang pangunang duha ka dinalan sa pahina 2 kag ang nahaunang parapo sa pahina 3. Ipatalupangod ang 1 Juan 5:19 kag Bugna 12:9. Nagaduhaduha man sia ukon indi sa pagluntad ni Satanas nga Yawa ukon nagakilala sang impluwensia niya sa kalibutan, magamit mo ang pangatarungan nga masapwan sa subtitulo nga “Ideya Gikan sa mga Kahimtangan sa Kalibutan” sa pagpadayon sang paghambalanay. Kon interesado sia, ipaathag kon diin maghalin ang Yawa, nga nagagamit sang mga punto sa pahina 3 kag 4 sang tract.
6 Ang tract nga “Ano ang Paglaum sang Napatay nga mga Hinigugma?” mahimo gilayon nga makapukaw sang interes. Mahimo nga sugdan mo ang paghambalanay paagi sa pagpamangkot:
◼ “Sa banta mo makita pa bala naton liwat ang aton napatay nga mga hinigugma?” Sa tapos nga makasabat sia, ipakita ang ikaduha nga parapo sa pahina 4 sang tract kag basaha ang Juan 5:28, 29. Nian ipaathag nga nagabulig ini nga mahangpan ang impormasyon sa ubos sang nahaunang subtitulo sa tract. Magpanugda nga hambalan ninyo ini.
7 Ang “Magkalipay sa Pagkabuhi Subong Pamilya” nga tract may bug-os uniberso nga ganyat sa mga pamilya. Nagagamit sini, makasiling ka:
◼ “Ayhan magaugyon ka nga ang pamilya ginasalakay karon. Ano sa banta mo ang sarang himuon agod mapabakod ang higot sang pamilya?” Sa tapos nga makasabat sia, ipatalupangod sa iya ang mga punto sa nahaunang parapo sa pahina 6. Magpili sing isa sa mga kasulatan nga ginbalikwat sa pahina 4 kag 5 sang tract, kag ipaathag ang kahulugan sini. Nian magtanyag sing isa ka wala bayad nga pagtuon sa Biblia sa puluy-an.
8 Ang tract nga “Kon Ngaa Imo Masaligan ang Biblia” mahimo magamit sa sining presentasyon:
◼ “Kalabanan nga tawo nakabati na sang sugilanon tuhoy kanday Cain kag Abel, nga mabasa sa nahauna nga tulun-an sang Biblia. Ang sugilanon sa Genesis nagasambit man sang asawa ni Cain. Napamangkot mo na bala kon diin sia naghalin?” Gamita ang katapusan nga parapo sang pahina 2 sang tract sa paghatag sing sabat. Ipaathag nga ginabinagbinag man sang tract ang importante nga mga komento sang Biblia tuhoy sa kon ano ang yara sa palaabuton. Sugod sa ikatlo nga parapo sa pahina 5, padayuna ang paghambalanay, nga nagagamit sang nagasakdag nga mga kasulatan.
9 Ang pagpanagtag sing mga tract sa Biblia madugay na napamatud-an nga epektibo nga paagi sa pagtanyag sing maayong balita. Bangod mahapos ini dalhon bisan diin man ikaw magkadto, magamit mo ini sing epektibo sa imo pamalaybalay nga hilikuton kag kon nagapanaksi sing di-pormal. Ang mga tract may importante nga papel sa pagtuman sang aton ministeryo. Pat-ura nga magdala sing nanuhaytuhay, kag gamiton ini sing hilway sa pagsugod sing mga paghambalanay.—Col. 4:17.