Mga Pamatan-on—Malantipon nga Tuytuyi ang Inyo mga Tikang
1 Ang aton Amay, nga si Jehova, personal nga interesado sa espirituwal nga pag-uswag sang mga pamatan-on. Paagi sa maalamon nga pagpamati sa iya mahigugmaon nga mga sugo, ginatugutan sang mga pamatan-on si Jehova sa pag-aman sing malantipon nga panuytoy para sa ila mga tikang.—Hulu. 16:9.
2 Si Cristo Jesus nagpahamtang sing halimbawa sang pamatan-on sia subong isa nga nakatigayon sing kahamuot sang Dios kag sang mga tawo. (Luc. 2:52) Sa edad nga 12, kilala si Jesus tungod sang iya handum nga masugiran ang iban nahanungod kay Jehova. (Luc. 2:46, 47) Ang mga pamatan-on karon nagapakita man sing kaanggid nga handum nga ipaathag sa iban ang ila pagtuo.—w90 7/1 p. 29-30; w87 12/1 p. 21.
3 Ano ang inyo mahimo nga mga lamharon karon ‘agod padunggan si Jehova sang inyo mga pagkabutang’? (Hulu. 3:9) Ngaa indi pagdugangan ang tion nga masami ninyo ginahinguyang sa hilikuton nga pagbantala kag pagtudlo sang maayong balita, ayhan bisan subong auxiliary payunir? Magahatag ini sa inyo sing kahigayunan nga makaupod sa pag-alagad sa latagon ang mas madamo pa nga lainlain nga mga manugbantala. Makasugod kamo karon mismo paagi sa pag-agda sa isa ukon duha ka eksperiensiado nga manugbantala nga magpangabudlay kaupod ninyo sining talipuspusan sang semana.
4 Ang mga ginikanan sarang makahatag sing daku nga pagpalig-on kag bulig sa ila mga kabataan paagi sa paggamit sing mga sesyon sa pag-ensayo dugang sa pag-upod sa ila sa ministeryo. Ang iban nga mga hamtong sa kongregasyon makahimo sing inisyatibo paagi sa pagpaupod sa mga pamatan-on sa pamalaybalay nga pag-alagad kag sa pagduaw liwat kag pagtuon sa Biblia nga hilikuton. Ang suod nga pagpakig-upod sa sinang mabakod sa espirituwal nga mga manugbantala magapalig-on sa mga pamatan-on kag magabulig sa ila nga “magpadayon sa pagkahamtong.”—Heb. 6:1.
5 Ginahandaan bala ninyo nga mga pamatan-on sing maayo ang mga asaynment nga pribilehiyo ninyo nga ihatag sa Teokratikong Eskwelahan sa Pagministro? May regular nga iskedyul bala kamo sa pagbasa kag sa personal nga pagtuon subong man sa pagpamalandong? Ginahandaan bala ninyo sing maayo ang mga miting agod mahangpan ninyo sing bug-os ang materyal kag handa sa paghatag sing mga komento? Ginatandaan bala ninyo ang mapuslanon nga mga punto nga ginapabutyag sa mga miting kag ginatinguhaan nga gamiton ang mga panugda sa Ang Aton Ministeryo sa Ginharian?
6 Indi pagpaligara ang mga kahigayunan nga makapakigbahin sa pagtinlo sang Kingdom Hall kag makabulig sa mga tigulang ukon may sablag nga mga kauturan nga lalaki kag babayi sa mga ulubrahon ukon sa iban pa praktikal nga mga paagi. Indi pagpatumbayai ang inyo regular nga amot sa pagbulig atipan sang mga galastuhon sa Kingdom Hall kag sang bug-os kalibutan nga hilikuton sang Sosiedad.
7 Kon ‘magpadayon [kita] sa pagbantay suno sa pulong ni Jehova’ kag magpatuytoy sa iya sang aton mga tikang, tuytuyan niya kita padulong sa kalipay kag sa dugang nga mga pribilehiyo sa pag-alagad.—Sal. 119:9.