Mangin Makugi sa Maayo!

¹ Samtang nagapasulod kita sa panahon sang Memoryal sa 2003, madamo kita sing rason nga ‘magmakugi sa maayo.’ (1 Ped. 3:13) Ang nagapanguna nga rason amo ang halad gawad ni Jesucristo. (Mat. 20:28; Juan 3:16) Tuhoy sa sini, si apostol Pedro nagsulat: “Indi paagi sa madinulunton nga mga butang, paagi sa pilak ukon bulawan, nga ginluwas kamo gikan sa inyo wala sing pulos nga paggawi. . . . Kundi paagi sa hamili nga dugo, subong sang kordero nga wala sing kasawayan kag wala sing dagta, kay Cristo mismo.” (1 Ped. 1:​18, 19) Ang pagpasalamat sa sining pinasahi nga pagpabutyag sing gugma nagapahulag sa aton nga mangin masako sa paghimo sing maayo, nagakilala nga si Jesus “naghatag sang iya kaugalingon tungod sa aton agod maluwas niya kita gikan sa tanan nga sahi sang pagkamalinapason kag tinluan para sa iya kaugalingon ang katawhan nga pinasahi nga iya, makugi sa maayong mga buhat.”​—⁠Tito 2:14; 2 Cor. 5:​14, 15.

² Kon ginahimo naton ang kalahamut-an sa Dios, may maayo kita nga kaangtanan sa iya kag mapaidalom sa iya mahigugmaon nga pag-atipan. Si Pedro dugang nga nagsiling: “Sia nga nagahigugma sang kabuhi kag makakita sing mga adlaw nga maayo, . . . talikdan niya ang malain kag himuon ang maayo; pangitaon niya ang paghidait kag sakdagon ini. Kay ang mga mata ni Jehova nagatamod sa mga matarong, kag ang iya mga dulunggan bukas sa ila pangamuyo.” (1 Ped. 3:10-12) Sa sining ital-ital nga tion, daw ano nga pagpakamaayo nga mahibaluan nga ginabantayan kita ni Jehova kag handa sia manghikot para sa aton, “agod amligan [kita] subong sang tawotawo sang iya mata.”​​—⁠Deut. 32:10; 2 Cron. 16:9.

³ Walay sapayan sang mga pagtilaw, ang unang mga Cristiano nga ginsulatan ni Pedro nagahingalayo sa kakugi nga indi mapalong, kag ginproklamar nila ang maayong balita tubtob sa ila masarangan. (1 Ped. 1:⁠6; 4:12) Matuod man ini sa katawhan sang Dios karon. Bisan pa nagakabuhi kita sa “makahalanguyos nga mga tion nga mabudlay pakigbagayan,” ang apresasyon sa kaayo ni Jehova magapahulag sa aton nga himuon sing makugi ang kabubut-on sang Dios. (2 Tim. 3:⁠1; Sal. 145:⁠7) Binagbinagon naton ang pila ka maayong mga buhat diin mangin masako kita sa sining panag-on sang Memoryal.

⁴ Agdaha ang Iban sa Memoryal: Ang isa ka paagi nga mapakita naton ang aton apresasyon sa di-kinaandan nga dulot sang gawad amo ang pagtambong sa tuigan nga pagsaulog sang kamatayon ni Jesus, nga hiwaton sini nga tuig sa Mierkoles, Abril 16, pagtunod sang adlaw. (Luc. 22:​19, 20) Sang nagligad nga tuig, upod sa 94,600 ka kongregasyon nga nagreport sa bug-os nga duta, may kabilugan kita nga tumalambong nga 15,597,746! Sobra ini sing 220,000 ka tumalambong sangsa nagligad nga tuig.

⁵ Pila ayhan ang magatambong sini nga tuig? Depende ini sa aton maukod nga mga panikasog nga palig-unon ang iban nga magtipon upod sa aton. Sugdi ini paagi sa paglista sang tanan nga luyag mo agdahon. Ang nagapanguna sa imo listahan dapat amo ang katapo sang imo pamilya. Kon may di-tumuluo ikaw nga tiayon, ipabutyag ang imo tinagipusuon nga handum nga makatambong sia upod sa imo. Ang isa ka di-tumuluo nga bana nagsiling nga nagtambong sia sa Memoryal sang nagligad nga tuig bangod nakita niya kon daw ano ka importante sa iya asawa ang iya pagtambong. Ang masunod sa imo listahan mahimo amo ang imo mga paryente, mga kaingod, mga kaupod sa trabaho, ukon mga kabutho. Pat-ura nga maagda mo ang imo mga estudyante sa Biblia.

⁶ Pagkatapos mo lista, mag-iskedyul sang tion nga maagda mo sila sing personal. Gamita ang naimprinta nga imbitasyon sa Memoryal. Agod mabuligan ang mga tawo nga madumduman kon san-o kag kon diin hiwaton ang pagsaulog, isulat sing mahipid ang tion kag duog sang Memoryal sa idalom sang imbitasyon. Samtang nagapalapit ang Abril 16, pahanumduma yadtong yara sa imo listahan, sing personal ukon paagi sa telepono. Buligan naton ang madamo nga makatambong sa sining labing sagrado nga okasyon.

⁷ Buligi ang mga Nagatambong sa Memoryal: Ang gab-i sang Memoryal makakulunyag pirme nga okasyon. May kahigayunan kita nga abiabihon ang mga indibiduwal nga wala nagatambong sa aton mga miting. Tinguhai nga mag-abot sing temprano kag magpabilin sing madugay pagkatapos, kon ginatugot sang lokal nga mga kahimtangan. Magmatumato sa pagpangilala sa mga bag-uhan nga nagatambong. Mangin mainabyanon kag maabiabihon.​​—⁠Roma 12:13.

⁸ Sarang bala mabuligan ang iban nga nagtambong sa Memoryal nga mag-uswag sa espirituwal paagi sa pagtuon sing Biblia sa ila puluy-an? Panikasugi nga makuha ang mga ngalan kag mga direksion sang bisan sin-o nga mga bisita nga wala pa maduaw sining karon agod padayon mo sila nga mabuligan. Upod ang mahigugmaon nga bulig, mahimo ang pila sa ila magauswag tubtob mangin kalipikado subong di-bawtismado nga mga manugbantala antes sang Memoryal sa masunod nga tuig. Kon nagaduaw liwat sa mga nagtambong sa Memoryal, agdaha sila sa pinasahi nga pamulongpulong sa Abril 27.

⁹ Makaauxiliary Payunir Ka Bala sa Sining Tingadlaw? Kada tuig ginapahulag kita sang aton kakugi kay Jehova nga manikasog sing bug-os sa ministeryo sa mga bulan sang pinasahi nga teokratikong hilikuton. Sa Pilipinas sang nagligad nga tuig, 9,515 ang nag-auxiliary payunir sang Marso, 15,458 sang Abril, kag 12,652 sang Mayo. Sa sulod sining tatlo ka bulan, nakahinguyang sila sing 1,528,501 ka oras sa ministeryo kag naghiwat sing promedyo nga 13,836 ka pagtuon sa Biblia. Ang nahiusa nga mga panikasog sang bug-os nga kongregasyon nga ibantala ang maayong balita sing makugi sa panahon sang Memoryal makapatubas sing maayong mga resulta.

¹⁰ Ang isa ka kongregasyon nga may 107 ka manugbantala kag 9 ka regular payunir nagreport nga may “tumalagsahon sila nga bulan” sang nagligad nga Abril, nga may 53 ka auxiliary payunir, lakip ang tanan nga gulang kag ministeryal nga mga alagad. Paano ginpapagsik sang mga gulang ang pag-auxiliary payunir sina nga bulan? Temprano pa sila nagsugod, nagapalig-on sa tanan kon posible nga magpalista. Ang mga miting sa pag-alagad sa latagon ginhiwat sa nagkalainlain nga tion sa bug-os nga adlaw agod matatapan ang tanan sa kongregasyon. Ginhatagan sing pinasahi nga igtalupangod ang pagpanaksi sa telepono, ilabi na para sa mga may sablag.

¹¹ Ang isa ka 86-anyos nga utod nga babayi nga indi makalakat bangod sang mga problema sa panglawas, nag-auxiliary payunir. Nagasugod sa aga, nagapanaksi sia sing duha ka oras paagi sa telepono samtang nagapungko sa lamesa sa kusina, nagapahuway sing pila ka oras, kag nagapanaksi liwat sa telepono. Ang isa ka babayi nga iya nasugilanon namatyan sang iya bana kag duha ka solterito sang nagligad nga duha ka tuig kag indi niya mahangpan kon ngaa ginatugutan sang Dios nga matabo ining malaut nga mga butang. Isa ka maid-id nga panaksi ang nahatag, kag nasugdan ang isa ka pagtuon sa Biblia. Ang pagpanaksi sa telepono kon gab-i kag sa iban nga tion isa ka epektibo nga paagi agod mapakig-angutan ang mga tawo nga nagapuyo sa mga bilding ukon mga duog nga indi mapanaksihan. Sarang man makontak sang mga manugbantala ang mga tawo nga wala sa puluy-an kon adlaw.

¹² Naghinakop ang mga gulang sa ila report nga nagasiling: “May makalilipay kami nga tion kag ginaapresyar namon ang mga pribilehiyo kag mga pagpakamaayo nga ginhatag ni Jehova sa kada isa sa amon.” Upod ang maayo nga pagplano, matigayon man sang inyo kongregasyon ini nga mga pagpakamaayo.

¹³ Panikasugi ang 100-Porsiento nga Pagpakigbahin sa Ministeryo: Ang aton gugma sa Dios kag sa isigkatawo magapahulag sa aton nga baklon ang tion kada bulan agod makapakig-ambit sing maayong balita sa iban. (Mat. 22:37-​39) Ang mga manugtatap sang Pagtinuon Sang Kongregasyon sa Libro kag ang ila mga assistant dapat manikasog nga buligan yadtong sa ila grupo nga makigbahin sa ministeryo kada bulan. Ang isa ka maayo nga paagi agod mahimo ini amo ang abanse nga paghanda sing mga kahimusan agod maupdan sa ministeryo ang kada isa sa grupo. Sa baylo nga hulaton ang katapusan sang bulan agod himuon ini, magsugod sing temprano. Magahatag ini sa imo sing dugang nga kahigayunan agod makahatag sing mahigugmaon nga bulig.

¹⁴ May maluya na bala ukon masakiton nga mga manugbantala sa inyo grupo sang pagtinuon sa libro nga nabudlayan makigbahin sa ministeryo? Kon ang pila yara sa balay-alaypan ukon yara sa ila puluy-an, makatarunganon lamang nga mangin limitado ang ila kahigayunan sa pagpanaksi. Apang paagi sa paghimulos sang ila limitado nga mga kahigayunan nga ipabanaag ang ila kapawa, mahimo nila mapahulag yadtong makakita sang ila maayong mga buhat nga mangin interesado gid sa kamatuoran. (Mat. 5:16) Dapat pat-uron sang mga manugtatap sang pagtinuon sa libro nga nahangpan nila nga sarang sila makareport sang ila hilikuton sa pagbantala sing tig-15 minutos. Ang pagreport sang tion nga ila ginhinguyang sa pagbantala nagapalig-on sa sining matutom nga mga manugbantala, kag nagahatag ini sa ila sing daku nga kaayawan. Nagabulig man ini sa pagpat-od nga sibu ang bug-os kalibutan nga report sang mga hilikuton sang katawhan sang Dios.

¹⁵ Mga Pamatan-on nga Masako sa Paghimo Sing Maayo! Daw ano ka makapaumpaw nga makita ang Cristianong mga pamatan-on nga nagagamit sang ila kusog kag enerhiya sa pag-alagad kay Jehova! (Hulu. 20:29) Kon pamatan-on ka, paano mo mapasundayag ang imo kakugi kay Jehova sa sining pinasahi nga mga bulan sang pagpanghikot?

¹⁶ Kon indi pa ikaw di-bawtismado nga manugbantala sa kongregasyon, sarang mo bala malab-ot ining pinasahi nga pribilehiyo? Pamangkuta ang imo kaugalingon sing mga masunod: ‘May sadsaran bala ako nga ihibalo sa Biblia? Luyag ko bala nga makigbahin sa pag-alagad sa Ginharian? Huwaran bala ako sa akon paggawi? Mapabutyag ko bala ang akon pagtuo paagi sa pagsugid sa iban tuhoy sa maayong balita? Tinagipusuon gid bala ang paghimo ko sini?’ Kon huo ang imo sabat sa sining mga pamangkot, nian makighambal sa imo mga ginikanan tuhoy sa imo handum nga mangin manugbantala. Sarang mapalapitan sang imo mga ginikanan ang isa ka gulang nga katapo sang komite sa pag-alagad.

¹⁷ Kon manugbantala ka na sing maayong balita, mahimuslan mo bala ang tion nga wala sing klase agod makapakigbahin sing dugang sa ministeryo? Paagi sa maayo nga iskedyul kag bulig gikan sa ila mga ginikanan kag sa iban, madamo sang bawtismado nga mga pamatan-on ang nakaauxiliary payunir sa bakasyon kon tig-ilinit. Kon indi ini posible, nian mangin determinado nga dugangan ang imo pagpakigbahin sa ministeryo sa latagon. Magpahamtang sing tulumuron sa imo kaugalingon. Dugang sa oras nga imo lalambuton, magpahamtang sing tulumuron may kaangtanan sa kalidad sang imo ministeryo. Ayhan mapanikasugan mo nga makapakig-ambit sing isa ka kasulatan sa tagsa ka ganhaan, mapauswag ang kalidad sang imo mga pagduaw liwat, makasugod sing pagtuon sa Biblia, ukon mapasangkad ang imo ministeryo sa paglakip sing pagpanaksi sa telepono ukon iban pa nga sahi sang pag-alagad. Ano naman ang tulumuron nga iupod sini nga tuig sa Memoryal ang isa mo ka kaingod, kabutho, ukon paryente? Ang pagpakigbahin sing bug-os sa teokratikong mga hilikuton mangin makapaladya kag pat-od gid nga makapalig-on sa iban sa kongregasyon.​​—⁠1 Tes. 5:⁠11.

¹⁸ Buligi nga Mag-uswag ang mga Bag-uhan: Sang nagligad nga tuig sang pag-alagad, ang promedyo nga 97,456 ka pagtuon sa Biblia sa puluy-an ang ginhiwat kada bulan sa Pilipinas. Sa ulihi, madamo sining mga estudyante ang magauswag tubtob sa punto sang dedikasyon kag bawtismo. Apang, antes nila malab-ot ini nga tulumuron, kinahanglan buligan naton sila nga makalipikar subong mga manugbantala sang maayong balita. Importante ini nga tikang sa pagtudlo sa mga bag-uhan nga mangin mga sumulunod ni Jesucristo. (Mat. 9:⁠9; Luc. 6:40) May estudyante ka bala sa Biblia nga handa na sa paghimo sini nga tikang?

¹⁹ Kon indi ka sigurado sa pag-uswag sang imo estudyante, mangayo sing bulig sa imo manugtatap sang pagtinuon sa libro ukon manugtatap sa pag-alagad. Ayhan maagda mo sia nga mag-upod sa pagtuon. Ining mga kauturan may mabuligon nga eksperiensia nga magamit sa paghibalo sang espirituwal nga pag-uswag sang estudyante. Mahimo nga may mga panugda sila nga makabulig sa estudyante nga magpadayon sa pag-uswag sa espirituwal.

²⁰ Kon magpabutyag sing interes ang imo estudyante nga mangin di-bawtismado nga manugbantala kag sa banta mo kalipikado sia, pahibalua ang nagadumala nga manugtatap. Tangduan niya ang duha ka gulang nga hambalon ka kag ang imo estudyante kon bala kalipikado sia, nga nagagamit sing impormasyon sa pahina 98-⁠9 sang Aton Ministeryo nga libro. (Tan-awa Ang Lalantawan, Nobiembre 15, 1988, pahina 17.) Kon naaprobahan ang estudyante nga mangin manugbantala, dapat hanason mo sia gilayon. Kon makareport na sia, pahibaluon ang kongregasyon nga ang estudyante di-bawtismado na nga manugbantala. Ginalauman naton nga linibo sang bag-o nga mga manugbantala, lamharon man kag tigulang, ang makalab-ot sa sining importante nga kahimtangan sa sining pinasahi nga mga bulan sang pagpanghikot.

²¹ Ang Pagplano Nagabulig sa Paghimo Sing Labing Maayo: Ang abanse nga pagplano magabulig sa kadalag-an sang aton teokratikong mga hilikuton sa sining panahon sang Memoryal. (Hulu. 21:⁠5) Madamo sing mga butang nga dapat atipanon sang mga gulang.

²² Agod mabuligan ang kongregasyon nga mas madamo sing hinimuan sa ministeryo sa latagon, dapat maghimo sing mga kahimusan ang mga gulang nga maghiwat sing mga miting para sa pag-alagad sa latagon sa bug-os nga semana kag sa talipuspusan sang semana. Ang manugtatap sa pag-alagad amo ang dapat manguna sa paghimo sining mga kahimusan. Sarang bala mahimo ang dugang nga mga miting sing mas temprano sa aga, sa medyo hapon na, ukon sa temprano sang gab-i? Dapat pahibaluon ang kongregasyon sa sining mga kahimusan. Mas maayo pa gid kon ibutang ining iskedyul sa information board.

²³ Dapat pat-uron sang mga gulang nga ang mga kahimusan para sa Memoryal nahanda sing abanse antes sang Abril 16. Nagalakip ini sang pagpahituhog sa paggamit sa Kingdom Hall upod sa iban nga kongregasyon nga mahimo magatipon man sa sini, pagpaninlo sa Kingdom Hall, pagpili sing mga attendant kag mga serbidor, kag pagtigayon sing mga emblema. Dapat pahibaluon ang kongregasyon sang tion kag lokasyon sang Memoryal kag sang bisan ano nga pagbag-o sa iskedyul sang mga miting sa sina nga semana. Ang maukod nga pag-atipan sa sini nga mga butang magahimo sa pagsaulog nga mangin “nagakaigo kag suno sa kahimusan.”​—⁠1 Cor. 14:40.

²⁴ Ayhan luyag sang mga ulo sang pamilya nga gamiton ang pila ka tinion sa ila pagtuon sang pamilya agod hambalan kon paano makapakigbahin ang pamilya sa dugang nga hilikuton sa sining panahon sang Memoryal. Makaauxiliary payunir bala ang bug-os mo nga pamilya? Ukon sarang bala masakdag sang pamilya ang isa ukon kapin pa nga katapo agod mahimo ini? Kon indi ini posible, magpahamtang sing espesipiko nga mga tulumuron subong pamilya agod maghinguyang sing dugang nga tion sa ministeryo. May mas bata bala nga katapo sang pamilya nga, upod sa diutay nga pagpalig-on kag pagbulig, makalipikar nga mangin di-bawtismado nga manugbantala? Pila ang maagda sang imo pamilya nga makatambong sa Memoryal sini nga tuig? Ang maayo nga pagplano magadala sing madamo nga pagpakamaayo kag kalipay sa inyo pamilya.

²⁵ Panginpusli Gid ang Nabilin nga Tion: Sang magsulat sa unang-siglo nga mga Cristiano, ginpahanumdom sila ni apostol Pedro sang pagkahilingagawon sang mga tion bangod malapit na ang katapusan sang Judiyong sistema. (1 Ped. 4:⁠7) Ginapakita man karon sang tanan nga pamatuod nga malapit na ang katapusan sang bug-os kalibutan nga sistema sang mga butang. Kada adlaw, dapat ipakita sang aton pagkabuhi ini nga pagpati. Subong makugi nga mga alagad ni Jehova, dapat nasentro ang aton igtalupangod sa hilingagawon nga hilikuton sang pagbantala sing maayong balita.​​—⁠Tito 2:​13, 14.

²⁶ Karon na ang tion sa pagpakita sing kakugi kag pagpanghikot! Pamalandungi kon ano ang nahimo ni Jehova para sa imo, sa imo pamilya, kag sa kongregasyon. Bisan pa indi gid kita makabayad sa madamo nga mga benepisyo nga iya ginhatag sa aton, mahatag naton kay Jehova ang aton bug-os kalag nga pagsimba. (Sal. 116:12-​14) Ang makugi naton nga mga panikasog pagapadyaan ni Jehova sing mga pagpakamaayo. (Hulu. 10:22) Kabay nga kita tanan mangin “makugihon sa maayo” sa sining pinasahi nga tion sang dugang nga hilikuton, “agod sa tanan nga butang mahimaya ang Dios paagi kay Jesucristo.”​—⁠1 Ped. 3:13; 4:11.

[Kahon sa pahina 3]

Bug-os Kalibutan nga Tumalambong sa Memoryal

1999 14,088,751

2000 14,872,086

2001 15,374,986

2002 15,597,746

[Kahon sa pahina 4]

Sin-o ang Imo Agdahon sa Memoryal?

□ Katapo sang pamilya kag mga paryente

□ Mga kaingod kag mga kakilala

□ Mga kaupod sa trabaho kag mga kabutho

□ Mga ginaduaw liwat kag mga estudyante sa Biblia

[Kahon sa pahina 5]

Buligi ang mga Nagatambong sa Memoryal

□ Abiabiha sila

□ Duawa sila liwat

□ Tanyagi sila sing pagtuon sa Biblia

□ Agdaha sila sa pinasahi nga pamulongpulong

[Kahon sa pahina 6]

Ano ang Imo mga Tulumuron sa Panahon Sang Memoryal?

□ Magtambong ang imo gin-agda sa Memoryal

□ Mangin kalipikado nga manugbantala sang maayong balita

□ Maghinguyang sing pila ka oras sa ministeryo

□ Mag-uswag sa isa ka bahin sang ministeryo

□ Mag-auxiliary payunir