Padayon nga Ipahayag ang Makatilingala nga mga Binuhatan ni Jehova

1. Ano ang pila sang makatilingala nga mga binuhatan ni Jehova nga naapresyar mo gid?

¹ Wala sing kaangay ang aton dakung Dios, nga si Jehova! Si David nagsulat: “O GINUO, nga akon Dios, madamo ang makatilingala nga buhat nga imo nahimo, kag ang imo mga hunahuna ayon sa amon; dili sila mapaanggid sa imo.” (Sal. 40:5) Ang makatilingala nga mga binuhatan ni Jehova nagalakip sa pagtuga sa uniberso, sa Mesianikong Ginharian, sa mga buhat sang mahigugmaon nga kaayo sa iya katawhan, kag sa bug-os kalibutan nga kampanya sa pagbantala. (Sal. 17:​7, 8; 139:14; Dan. 2:​44; Mat. 24:14) Ang gugma kay Jehova kag ang apresasyon sa tanan niya nga nahimo amo ang nagapahulag sa aton nga ipahayag sia sa iban. (Sal. 145:​5-7) Sa Marso, Abril, kag Mayo, may kahigayunan kita nga himuon ini sing labi pa.

2. Paano kita makabenepisyo gikan sa pag-auxiliary payunir?

² Subong Auxiliary Payunir: Mapasibu mo bala ang imo iskedyul nga makahinguyang sing 50 ka oras sa ministeryo sa isa ukon kapin pa sa sining espesyal nga mga binulan sang pagpanghikot? Pat-od nga takus gid ang bisan ano nga mga pagpasibu nga himuon mo sa imo rutina. (Efe. 5:16) Nasapwan sang madamo nga nakabulig ang pag-auxiliary payunir agod mag-uswag ang kalidad sang ila ministeryo. Nangin relaks sila sa mga ganhaan kag nagamit pa gid nila ang Biblia. Ang paghinguyang sing dugang pa nga tion sa ministeryo nagpahapos nga matatap nila ang nasapwan nga interesado, kag ang pila nga wala anay nagadumala sing pagtuon sa Biblia nakasugod sini sang mag-auxiliary payunir sila. Bangod ang pag-auxiliary payunir nagadalahig sang pagpanikasog nga buligan ang iban, makalilipay ini nga hilikuton.​​—⁠Bin. 20:35.

3. Paano ang pila nakaauxiliary payunir bisan may mabudlay nga mga kahimtangan?

³ Indi dayon maghinakop nga indi ka makaauxiliary payunir bangod sang imo kahimtangan. Ang isa ka gulang nga nag-auxiliary payunir sang nagligad nga tuig may duha ka anak kag may bug-os tion nga trabaho. Paano ini nahimo sining masako nga utod? Bangod nagatrabaho sia halin sa Lunes tubtob Biernes, nagplano sia nga maghinguyang sing madamo nga oras sa pagbantala kon Sabado kag Domingo, nga nagasugod sa pagbantala sa kalye sing 7:⁠00 s.a. kon Sabado. Ang pila sa kongregasyon nga may kaanggid nga kahimtangan nagpayunir man, kag nagsinakdaganay sila kag nagpalig-unanay. Sa isa pa ka kongregasyon, ang isa ka 99-anyos nga utod nga babayi namat-od nga magpayunir sa Mayo pagkatapos nga gin-agda sang iya bata nga babayi nga updan sia. Ang iban sa kongregasyon nagbulig sa sining tigulang nga utod sa pagpamalaybalay kag sa mga pagtuon sa Biblia paagi sa pagtulod sang iya wheelchair. Nakigbahin man sia sa pagpanaksi paagi sa telepono, pagpanaksi sa kalye, kag pagsulat. Kumbinsido gid sia nga wala niya ini mahimo tungod sa iya kusog kundi sa bulig ni Jehova.​​—⁠Isa. 40:29-​31.

4. Ano nga mga butang ang dapat naton binagbinagon kon nagahimo sing iskedyul sa pag-auxiliary payunir?

⁴ Tilawi nga maghimo sing iskedyul nga sibu sa imo mga kahimtangan. Ang mga sampol nga iskedyul sa sini nga isyu basi makabulig. Nagatrabaho ka bala sing bug-os tion ukon nagaeskwela? Ang isa ka iskedyul nga nagagamit sing maayo sa talipuspusan sang semana mahimo nga praktikal gid sa imo. Kon may problema ka sa panglawas kag indi ka makasarang nga magdugay sa ministeryo, ang isa ka iskedyul nga nagahinguyang sing diutay nga tion kada adlaw mahimo nga amo ang labing maayo. Ihambal sa iban ang imo handum nga mag-auxiliary payunir. Basi himuon man nila ini nga tulumuron.

5. Ano nga mga tulumuron ang mapahamtang sang mga pamatan-on para sa Marso, Abril, kag Mayo?

⁵ Mga Paagi nga Makapakigbahin ang mga Pamatan-on: Nalipay si Jehova kon ang mga lamharon nagasugid sang iya makatilingala nga mga binuhatan. (Sal. 71:17; Mat. 21:16) Kon lamharon ka kag bawtismado, ayhan makaauxiliary payunir ka sing isa ka bulan ukon kapin pa sa tion sang bakasyon sa eskwelahan. Kon indi ka makaauxiliary payunir, makahimo ka bala sing espesipiko nga mga tulumuron agod madugangan ang imo pagpakigbahin kag mapauswag ang kalidad sang imo ministeryo sa sining mga binulan? Kon nagaupod ka sa imo mga ginikanan sa ministeryo apang indi ka pa di-bawtismado nga manugbantala, karon na ang maayo nga tion sa pagtinguha nga makalipikar. Indi ka dapat magbatyag nga kinahanglan mangin eksperto ka sa pagsabat sa mga pamangkot sa Biblia ukon kinahanglan nga may ihibalo ka kaangay sang bawtismado nga mga adulto. Nahangpan mo bala ang sadsaran nga mga panudlo sang Biblia? Nagatuman ka bala sa mga talaksan sang Biblia sa moral? Luyag mo bala nga makilala bilang isa sang mga Saksi ni Jehova? Kon amo ipakighambal ini sa imo mga ginikanan. Sarang nila mapalapitan ang mga gulang upod sa imo agod mahibaluan nila kon bala nalab-ot mo ang mga kinahanglanon.​​—⁠Tan-awa ang Aton Ministeryo nga libro, pahina 98-9.

6. Paano naton mabuligan ang mga estudyante sa Biblia nga mangin mga manugbantala sang maayong balita?

6 Pagbulig sa Iban nga Magbantala: Basi kalipikado ang mainuswagon nga mga estudyante sa Biblia nga mag-upod sa aton subong mga manugbantala sa masunod nga mga binulan sang pinasahi nga pagpanghikot. Kon may estudyante ka sa Biblia nga nagauswag sing maayo, magpabulig sa imo manugtatap sa pagtinuon sa libro ukon sa manugtatap sa pag-alagad. Ang isa sa ila sarang makaupod sa imo sa pagtuon agod matan-aw niya ang pag-uswag sang estudyante. Kon kalipikado ang estudyante kag luyag mangin manugbantala, mapangabay sang nagadumala nga manugtatap ang duha ka gulang nga sugilanunon ang estudyante upod sa imo. (Tan-awa ang Nobiembre 15, 1988, nga Ang Lalantawan, pahina 17.) Kon maaprobahan ang estudyante, hanasa dayon sia sa ministeryo.

7. Paano mabuligan ang di-regular kag di-aktibo nga mga manugbantala?

⁷ Dapat hatagan sing pinasahi nga igtalupangod sang mga manugtatap sa pagtinuon sa libro ang bisan sin-o nga di-aktibo ukon di-regular sa ila grupo. Agdaha sila sing personal nga manghikot upod sa imo sa ministeryo. Kon madugay nga nangin di-aktibo sila, mas maayo kon sugilanunon anay sila sang duha ka gulang agod mahibaluan kon kalipikado pa sila. (Tan-awa ang “Pamangkot” sa Nobiembre 2000 nga Ang Aton Ministeryo sa Ginharian.) Ang kakugi sang kongregasyon sa sining mga binulan sang pinasahi nga hilikuton mahimo magpahulag sa ila nga himuon liwat ang ministeryo nga mangin regular nga bahin sang ila kabuhi.

8, 9. Ano ang sarang mahimo sang mga gulang agod palambuon ang kapagsik para sa pinasahi nga hilikuton?

⁸ Maghanda Karon Para sa Dugang nga Pagpanghikot: Mga gulang, sugdi na karon nga papagsikon ang kongregasyon nga mag-auxiliary payunir. Daku ang inyo mahimo paagi sa inyo positibo nga mga komento kag maayo nga halimbawa. (1 Ped. 5:3) Pila ang labing mataas nga kadamuon sang nag-auxiliary payunir sa kongregasyon? Sarang bala ini malampasan sini nga tuig? Dapat mangita sing mga paagi ang mga manugtatap sa pagtinuon sa libro kag ang mga kabulig nila agod mapalig-on ang tanan sa grupo nga dugangan ang ila pagpanghikot. Ang mga manugtatap sa pag-alagad sarang makaiskedyul sing dugang nga mga miting para sa pag-alagad sa latagon. Pahibalua sing abanse ang kongregasyon kon ano ang kahimusan. Pat-ura nga ang gin-asayn nga manguna sangkol nga mga manugbantala kag nga ang mga miting para sa pag-alagad magasugod kag magatapos sing husto sa oras. (Tan-awa ang “Pamangkot” sa Septiembre 2001 nga Ang Aton Ministeryo sa Ginharian.) Dapat may kahimusan man ang manugtatap sa pag-alagad nga mangin bastante ang teritoryo, magasin, kag literatura.

⁹ Sang nagligad nga tuig ang mga gulang sa isa ka kongregasyon nagsugod sing makunyagon kag sing abanse sa pagpalig-on sa pag-auxiliary payunir, kag ang pila sa ila nagsumiter sing aplikasyon. May dugang sila nga kahimusan para sa mga miting sa pag-alagad sa latagon​—⁠ang isa sa 5:30 s.a. para sa pagpanaksi sa dalan, ang isa sa 3:⁠00 s.h. para sa sadtong nabuhian na sa eskwelahan, kag ang ikatlo sa 6:​00 s.g. para sa nabuhian na sa trabaho. Dugang pa, tatlo ka miting para sa pag-alagad sa latagon ang ginhimo kon Sabado. Napalig-on ang kongregasyon kag 66 ang nag-auxiliary payunir sang Abril!

10. Paano makahanda ang mga pamilya agod dugangan ang ila pagpanghikot?

¹⁰ Ngaa indi magpain sing tion sa inyo masunod nga pagtuon sang pamilya agod magpahamtang sing realistiko nga mga tulumuron sa nagapakari nga pila ka bulan? Upod ang maayo nga kooperasyon kag pagplano, ang pila ukon ang tanan sa pamilya mahimo makaauxiliary payunir. Kon indi ini posible, magpahamtang sing mga tulumuron nga dugangan ang inyo pagpanghikot paagi sa pagpalawig sang tion sa pag-alagad sangsa kinaandan ukon pagbantala sa iban pa nga okasyon. Ipangamuyo ini subong isa ka pamilya. Makasalig ka nga pakamaayuhon ni Jehova ang imo mga panikasog.​​—⁠1 Juan 3:⁠22.

11. (a) Anong makatilingala nga mga butang ang nahimo sang halad ni Cristo? (b) Ano ang oras kag duog sang lokal nga pagsaulog sang Memoryal?

¹¹ Ang Labing Makatilingala nga Binuhatan Sang Dios: Ang labing daku nga pagpakita sang gugma ni Jehova amo ang dulot sang iya Anak subong gawad para sa aton. (1 Juan 4:​9, 10) Ang halad-gawad nagaaman sing legal nga basihan agod luwason ang katawhan gikan sa sala kag kamatayon. (Roma 3:​23, 24) Ang ginpatulo nga dugo ni Jesus nagpalig-on sang bag-ong katipan, nga nagapaposible sa di-himpit nga mga tawo nga mangin mga anak sang Dios kag may paglaum nga maggahom sa langitnon nga Ginharian. (Jer. 31:31-​34; Mar. 14:24) Sing labing importante, ang himpit nga pagtuman ni Jesus nagpakabalaan sang ngalan ni Jehova. (Deut. 32:⁠4; Hul. 27:11) Sa Domingo, Abril 4, pagtunod sang adlaw, ang Memoryal sang kamatayon ni Cristo saulugon sa bug-os nga kalibutan.

12. Paano makabenepisyo ang mga interesado paagi sa pagtambong sa pagsaulog sang Panihapon sang Ginuo?

¹² Ang pagsaulog sa Panihapon sang Ginuo nagapadaku sang makatilingala nga mga binuhatan ni Jehova. Ang diskurso magapalig-on sang aton apresasyon sa kon ano ang nahimo ni Jehova sa pag-aman sing gawad. Ang mga interesado nga magatambong sarang makakita sang iban pa nga makatilingala nga mga binuhatan sang Dios. Sarang nila makita ang paghiusa kag mainit nga gugma nga gintudlo ni Jehova nga ipakita sang iya katawhan. (Efe. 4:​16, 22-​24; Sant. 3:​17, 18) Ang pagtambong sa sining importante nga okasyon may daku gid nga epekto sa panghunahuna sang isa, gani luyag naton nga mas madamo ang makatambong.​​—⁠2 Cor. 5:​14, 15.

13, 14. Sin-o ang dapat naton agdahon sa Memoryal, kag paano?

¹³ Pag-agda sa Iban nga Magtambong: Magsugod na sa paghanda paagi sa paghimo sing listahan sang imo mga agdahon. Dapat nalakip sa imo listahan ang indi Saksi nga mga katapo sang pamilya, mga kaingod, mga kilala sa trabaho ukon sa eskwelahan, ang mga ginatun-an sa Biblia sadto kag karon, kag ang tanan mo nga ginaduaw liwat. Ang mga manugtatap sa pagtinuon sa libro dapat maglakip sa ila listahan sang bisan sin-o nga di-aktibo nga mga manugbantala.

¹⁴ Gamita ang gin-imprinta nga mga imbitasyon sa Memoryal, kag makinilyaha ukon isulat sing maathag sa sini ang tion kag duog sang Memoryal. Ukon ayhan luyag mo nga gamiton ang imbitasyon nga makita sa nalikod nga panghapin sang Marso 15, 2004, nga Ang Lalantawan ukon ang Marso 22, 2004 nga Awake! Samtang nagahilapit ang Abril 4, pahanumduma yadtong yara sa imo listahan, sing personal man ukon sa telepono.

15. Paano naton mapakita ang pagkamaabiabihon sa gab-i sang Memoryal?

¹⁵ Sa Memoryal: Tinguhai nga mag-abot sing temprano sa gab-i sang Memoryal. Ipakita ang pagkamaabiabihon paagi sa pagtamyaw sa mga bag-uhan. (Roma 12:13) May pinasahi ka nga responsabilidad sa mga bisita nga imo gin-agda. Pabatyaga sila nga ginaabiabi, kag ipakilala sila sa iban sa kongregasyon. Ayhan mabuligan mo sila nga makapungko malapit sa imo. Kag kon wala sila sing Biblia ukon libro sang ambahanon, patupara sila sa imo ukon sa iban pa. Pagkatapos sang pagsaulog, tinguhai nga sabta ang mga pamangkot nila. Kon ang iban amo pa lang nakatambong, pamangkuta sila kon luyag nila nga makatuon sing dugang pa sa Pulong sang Dios kag sa iya katuyuan. Tanyagi sila sang pagtuon sa Biblia sa puluy-an.

16. Ano ang sarang mahimo agod buligan ang mga nagtambong sa Memoryal nga mag-uswag sa espirituwal?

¹⁶ Padayon nga Buligi Yadtong Nagtambong: Sa mga semana pagkatapos sang Memoryal, yadtong mga nagtambong mahimo nagakinahanglan sing dugang nga bulig. Nagalakip ini sa sadtong regular nga nagatambong anay sa mga miting apang malaka na lang karon nagapakig-angot sa kongregasyon. Ang mga gulang dapat mangin alisto nga indi sila mapasapayanan, nga nagatinguha nga hibaluon kon ngaa nag-untat sila sa pag-uswag sa espirituwal. Ipatudok sa ila ang pagkahilingagawon sang tion. (1 Ped. 4:7) Buligi ang tanan nga makita ang benepisyo sang pagtuman sa laygay sang Kasulatan nga magtipon sing regular upod sa katawhan sang Dios.​​—⁠Heb. 10:​24, 25.

17. Ngaa dapat kita magpadayon sa pagsugid tuhoy sa makatilingala nga mga binuhatan ni Jehova?

¹⁷ Tuman ka makatilingala ang mga binuhatan ni Jehova nga bisan magkabuhi kita sing dayon, indi gihapon naton ini mahangpan. (Job 42:​2, 3; Man. 3:11) Busa, indi kita mawad-an sang mga butang agod dayawon sia. Sarang naton mapakita ang aton apresasyon sa makatilingala nga mga binuhatan ni Jehova sa sining panahon sang Memoryal paagi sa paghimo sing pinasahi nga panikasog nga pasangkaron ang aton ministeryo.

[Tsart sa pahina 5]

Makaauxiliary Payunir Ka Bala nga Nagagamit Sang Isa Sining mga Iskedyul?

Marso Do L* Ma* M* Hu B Sa Bulan Kabilugan

Kada Adlaw 2 1 1 1 1 1 5 51

Duha ka Adlaw 0 5 0 5 0 0 0 50

Abril Do L Ma M Hu* B* Sa Bulan Kabilugan

Kada Adlaw 2 1 1 1 1 1 5 50

Duha ka Adlaw 0 0 0 0 5 5 0 50

Mayo Do* L* Ma M Hu B Sa* Bulan Kabilugan

Kada Adlaw 2 1 1 1 1 1 4 51

Duha ka Adlaw 0 5 0 0 0 0 5 50

*Lima sa isa ka bulan