Ipahayag sing Lapnag ang Pagkahalangdon ni Jehova
1. Ano ang nagapahulag sa aton agod ipahayag sing lapnag ang pagkahalangdon ni Jehova?
1 “Imo, O Jehova, ang pagkadaku kag ang gahom kag ang katahom kag ang pagkahalangdon kag ang pagkadungganon; kay ang tanan nga yara sa mga langit kag sa duta imo.” (1 Cron. 29:11) Ano ang epekto sa aton sang aton gugma kag apresasyon kay Jehova? Nagapahulag ini sa aton nga ‘ipahayag sing lapnag ang pagkahalangdon sang isa nga nagtawag sa aton gikan sa kadudulman pakadto sa iya makatilingala nga kapawa.’ (1 Ped. 2:9) Indi kita mag-untat sa pagsugid sa iban tuhoy sa aton halangdon nga Dios! May pinasahi gid kita nga mga kahigayunan sa pagbantala sang pagkahalangdon ni Jehova sa bulan sang Marso, Abril, kag Mayo.
2. Anong pinasahi nga kampanya ang ginplano sa pagpahibalo sang Memoryal, kag sin-o ang mahimo nga makapakigbahin sa sini?
2 Pinasahi nga Kampanya sa Pagpahibalo sang Memoryal: Sa Lunes, Abril 2, ipadaku naton ang pagkahalangdon ni Jehova paagi sa pagsaulog sang Panihapon sang Ginuo. Isa ka pinasahi nga imbitasyon sa sining importante nga okasyon ang ipanagtag sa bug-os nga kalibutan sa Marso 17 tubtob Abril 2. Ginapalig-on ang tanan nga makigbahin sa sini sing bug-os. Mangin maayo gid ini nga tion para sa mga bag-uhan nga magsugod sa pagbantala sang maayong balita kon kalipikado sila. Kon may mga estudyante ka sa Biblia ukon kabataan nga mahimo kalipikado, sugilanuna ang mga gulang tuhoy sini.
3. Ano ang mahimo naton isiling sa pag-agda sa mga tawo sa Memoryal?
3 Ini nga kampanya kaanggid sa ginhimo may kaangtanan sa “Malapit Na ang Kaluwasan!” Distrito nga mga Kombension. Padal-an sing bastante nga mga imbitasyon ang mga kongregasyon agod nga makakuha sing tig-50 ka kopya ang tagsa ka manugbantala. Hupti nga simple ang imo presentasyon, ayhan masiling ka: “Para sa imo ining imbitasyon tuhoy sa labing importante nga okasyon nga ginahiwat kada tuig. Ginaagda ka gid namon. Yara sa imbitasyon ang mga detalye.” Siempre pa, kon mamangkot ang tagbalay, maghinguyang sing tion sa pagsabat sa sini. Ang artikulo sa apendise tuhoy sa Panihapon sang Ginuo nga masapwan sa pahina 206 sang libro nga Ginatudlo Sang Biblia mahimo nga makabulig sa sini nga bahin. Sa mga talipuspusan sang semana, itanyag naton ang bag-ong mga magasin lakip sa sining pinasahi nga imbitasyon. Irekord ang tanan nga nasapwan nga interesado, kag maghimo sing kahimusan sa pagbalik.
4. Paano ipanagtag ang pinasahi nga mga imbitasyon sa Memoryal?
4 Kon posible, ihatag sing personal sa tagbalay ining pinasahi nga imbitasyon. Kon gamay lang ang inyo teritoryo, irekord ang mga balay nga wala sing tawo kag tinguhai nga balikan. Kon daku ang teritoryo sang inyo kongregasyon, mahimo nga binagbinagon sang mga gulang nga ibilin sing maalamon ang mga imbitasyon sa mga balay nga wala sing tawo. Pat-ura nga ang inyo mga ginaduaw liwat, mga estudyante sa Biblia, mga paryente, mga kaupod sa trabaho, mga kaingod kag iban pa nga mga kakilala mahatagan sang imbitasyon.
5. Ngaa dapat magplano na kita karon sa pag-auxiliary payunir?
5 Pag-auxiliary Payunir: Mahimo bala ninyo mapahayag sing kapin pa ang pagkahalangdon ni Jehova paagi sa pag-auxiliary payunir sa Marso, Abril, kag Mayo? Ang pag-aplay mahimo nga nagakinahanglan sing pila ka pagbag-o sa inyo matag-adlaw nga iskedyul. (Efe. 5:15-17) Mapat-od gid ninyo nga ang pagpanikasog sa paghimo sing kapin pa sa pag-alagad kay Jehova magadala sing kalipay kag pagpakamaayo Niya. (Hulu. 10:22) Bangod nagahilapit na ang panag-on sang Memoryal, karon na ang tion sa pagplano.—Hulu. 21:5.
6. Ano ang matun-an naton sa eksperiensia sang 90-anyos nga utod nga babayi nga nag-auxiliary payunir sang nagligad nga tuig?
6 Nakahigayon sa pag-auxiliary payunir ang isa ka 90-anyos nga utod nga babayi sang nagligad nga tuig. Nagsiling sia: “Bisan pa nga nanamian gid ako sa pagpanghardin kag luyag ko na gid magpananom, narealisar ko nga dapat ako magpahamtang sing nagakaigo nga mga prioridad. Bangod sang akon handum nga unahon ang mga intereses sang Ginharian, nag-auxiliary payunir ako sang Marso.” Ginpakamaayo bala sia sa iya mga panikasog? Nagsiling sia, “Nagbatyag ako sing kasuod sa kongregasyon, kag amo ini ang nagbuyok sa akon nga mangin suod pa gid kay Jehova.” Mahimo bala naton maanalisar ang aton mga prioridad kag maghimo sing kaangay sini nga mga pagbag-o kon kinahanglanon?
7. Mabudlay gid bala ang pag-auxiliary payunir?
7 Mahimo nga indi man gid mabudlay ang paglab-ot sang kinahanglanon nga 50-oras para sa mga auxiliary payunir subong sang ginahunahuna ninyo. Mapinangamuyuon nga binagbinaga ang inyo mga hilikuton kada adlaw, maghimo sing iskedyul, kag ilakip ini sa inyo teokratikong iskedyul. Nakahibalo gid kamo sang inyo mga kahimtangan. Kon maluya ang inyo panglawas kag madali kamo kapuyon, mahimo kamo makapakigbahin sa ministeryo sing duha ka oras kada adlaw. Kon bug-os tion ang imo trabaho ukon nagaeskwela ka, mahimo ka maka-auxiliary payunir paagi sa pagbantala sa mga gab-i ukon sa mga talipuspusan sang semana.
8. Ano ang ginhimo sang isa ka mag-asawa agod makaauxiliary payunir?
8 Madamo ang nakaauxiliary payunir subong pamilya. Sang nagligad nga mga tuig, nagduhaduha ang isa ka mag-asawa sa pag-aplay bangod sa banta nila indi magtugot ang ila mga kahimtangan sa pag-auxiliary payunir. Ano ang ila ginhimo tuhoy sa sini? “Nangamuyo kami kay Jehova nga buligan kami nga matuman ang madugay na namon ginahandum nga himuon nga duha.” Bangod sang nagakaigo nga pagplano nalab-ot nila ang ila tulumuron. Nagsiling pa sila: “Makalilipay gid ini. Nakatigayon kami nga duha sing madamo nga pagpakamaayo. Ang amon masiling amo, tilawi ninyo ini. Kon nahimo namon ini, masarangan man ninyo ini.”
9. Ano ang sarang ninyo himuon sa masunod nga pagtuon sang pamilya agod mahandaan ang masunod nga mga bulan sang pinasahi nga hilikuton?
9 Ngaa indi kamo maghinguyang sing tion sa inyo masunod nga pagtuon subong pamilya agod binagbinagon kon paano madugangan sang tanan ang ila hilikuton sa masunod nga mga bulan? Bisan pa kon indi makaauxiliary payunir ang bug-os nga pamilya, mahimo nga makaaplay ang isa sa inyo paagi sa bulig kag kooperasyon sang iban nga katapo sang panimalay. Kon indi ini posible, mahimo nga magpahamtang ang inyo pamilya sing mga tulumuron nga maghinguyang pa sing dugang nga tion sa ministeryo sa sining pinasahi nga mga bulan sang hilikuton.
10. Ngaa dapat naton ipakighambal sa iban ang aton handum nga mag-auxiliary payunir sa sining panag-on sang Memoryal?
10 Magbinuligay: Makalalaton ang kapagsik. Ipakighambal ang inyo handum nga mag-auxiliary payunir. Mahimo man ini magpalig-on sa iban nga mag-aplay. Dugang pa, mahimo makapanugda sa inyo ang mga nagpayunir sang nagligad agod mabuligan kamo sa pagpasunod sang inyo mga hilikuton kag iskedyul agod malab-ot ninyo ang inyo tulumuron. (Hulu. 15:22) Kon makaauxiliary payunir kamo, ngaa indi ninyo pag-agdahon ang iban nga manugbantala, ayhan ang iban nga may pareho sa inyo nga mga kahimtangan, nga magbuylog sa inyo sa sining makalilipay nga hilikuton?
11. Paano mapalig-on sang mga gulang ang kapagsik sa pag-auxiliary payunir sa masunod nga mga bulan?
11 Madamo nga gulang ang naghimo sing kinahanglanon nga mga kahimusan agod nga makapakigbahin sa sining pinasahi nga porma sang pag-alagad. (Heb. 13:7) Makapalig-on gid ini sa kongregasyon! Mapadayag man sang mga gulang ang kapagsik paagi sa ila pagpakigsugilanon sa iban. Ang pila ka mainayuhon nga mga pulong sang pagpalig-on ukon pila ka praktikal nga mga panugda mahimo nga amo gid ang kinahanglan sang iban agod mapahulag sa pag-auxiliary payunir. Mahimo nga himuson sang manugtatap sang pag-alagad ang dugang pa nga mga miting para sa pag-alagad sa latagon agod makapakigbahin ang tanan sa grupo nga pagpanaksi, ayhan pagkatapos sang trabaho ukon klase. Ini nga mga kahimusan dapat pirme ipahibalo. Pat-uron man niya nga may bastante nga teritoryo kag literatura.
12. Ano ang sarang mo mahimo kon indi ka makaauxiliary payunir?
12 Bisan pa indi ka makaauxiliary payunir bangod sang imo mga kahimtangan, mahimo mo mapalig-on ang mga nag-aplay, kag mahimo mo sila ipangamuyo. (Hulu. 25:11; Col. 4:12) Ayhan mahimo mo madugangan sing isa ka adlaw kada semana ang pag-upod sa ila sa ministeryo ukon magua sing mas madugaydugay sangsa kinaandan nga ginahimo mo.
13. Ano nga tulumuron ang ginpahamtang sa Pilipinas, kag paano makabulig ang inyo kongregasyon agod malab-ot ini?
13 Ang Tulumuron nga 25,000 ka Auxiliary Payunir sa Abril: Ang pinakamataas nga nag-auxiliary payunir sa sanga sa Pilipinas sa bulan sang Abril nakalab-ot sing 22,410 sang 1997. Busa, ang aton tulumuron sa sini nga Abril amo ang 25,000 ka auxiliary payunir. Malab-ot naton ini kon mag-auxiliary payunir ang 1 sa kada 6 ka manugbantala sa tagsa ka kongregasyon. Siempre pa, mahimo nga mas madamo ang makaauxiliary payunir sa pila ka kongregasyon. Ini nga tulumuron mahapos malab-ot sang kalabanan nga kongregasyon. Hunahunaa ang makakulunyag nga epekto sini sa inyo kongregasyon kag ang positibo nga epekto sini sa inyo pagbantala sa inyo teritoryo!
14. Ngaa maayo gid nga bulan ang Abril sa pag-auxiliary payunir?
14 Ngaa maayo gid nga bulan ang Abril sa pag-auxiliary payunir? Hiwaton ang Memoryal sa pamuno sang bulan, nga nagahatag sa aton sing madamong kahigayunan sa pagduaw liwat sa mga nagtambong. Itanyag naton ang mga magasin, nga may tulumuron nga makapahamtang sing Ginatudlo Sang Biblia nga libro sa mga pagduaw liwat kag makasugod sing mga pagtuon sa Biblia. Busa, ang pag-auxiliary payunir sa Abril magahatag sing madamo nga kahigayunan agod makasugod sing mga pagtuon sa Biblia. Diri sa aton, mas malawig ang adlaw kag kinaandan nga maayo ang paniempo sa sini nga tion. Dugang pa, ang bulan sang Abril may lima ka Domingo kag isa ka piesta opisyal, nga nagapahapos sa mga nagatrabaho kag sa mga nagaeskwela nga mag-aplay.
15. Ngaa dapat kita magbatyag sing pagkahilingagawon samtang nagahilapit ining panag-on sang Memoryal?
15 Ang tagsa ka pagligad sang panag-on sang Memoryal nagapakita nga nagahilapit na gid kita sa katapusan sang sistema sang mga butang. Malip-ot na lang ang nabilin nga tion sang aton pagsugid sa iban tuhoy sa aton halangdon nga Dios. (1 Cor. 7:29) Kon magligad na ining panag-on sang Memoryal, ining hamili nga kahigayunan sa pagdayaw sa aton langitnon nga Amay mawasi na sing dayon. Kabay pa nga handaan na naton ini karon agod mahimo naton sing bug-os ang aton masarangan sa bulan sang Marso, Abril, kag Mayo sa pagpahayag sing lapnag sa pagkahalangdon ni Jehova!
[Kahon sa pahina 4]
Malab-ot Ayhan Naton ang 25,000 ka Auxiliary Payunir sa Abril?
◼ Analisaha ang imo mga prioridad
◼ Binagbinaga ang mga tulumuron subong pamilya
◼ Ipakighambal sa iban ang imo mga plano