Maayo Gid nga Tulumuron sa Masunod nga Tuig sang Pag-alagad
1. Ano nga tulumuron ang mahimo naton mapahamtang sa masunod nga tuig sang pag-alagad?
1 Dapat kita magpahamtang sing mga tulumuron kon luyag naton mag-uswag sa aton pag-alagad. Ano nga mga tulumuron ang mapahamtang mo sa masunod nga tuig sang pag-alagad? Ang isa ka maayong tulumuron amo ang pag-auxiliary payunir sing isa ka bulan ukon kapin pa. Sanglit ining makalilipay nga hilikuton kinaandan nga nagakinahanglan sing abanse nga pagplano, karon na ang tion sa pagbinagbinag sa sini. Ngaa indi naton himuon nga tulumuron ang pag-auxiliary payunir?
2. Ano ang mga rason ngaa magaauxiliary payunir kita?
2 Mga Rason sa Pag-auxiliary Payunir: Ang pag-auxiliary payunir makabulig sa aton nga mapahamut-an ang aton langitnon nga Amay “sing labi pa” bangod makahinguyang kita sing kapin nga tion sa ministeryo. (1 Tes. 4:1) Kon pamalandungan naton ang tanan nga nahimo ni Jehova para sa aton, mapahulag ang aton tagipusuon sa pagsugid sa iban tuhoy sa iya. (Sal. 34:1, 2) Ginatalupangod kag ginaapresyar ni Jehova ang aton mga pagsakripisyo sa paghimo sing kapin pa sa ministeryo. (Heb. 6:10) Nalipay kita bangod nahibaluan naton nga nahamut-an gid ni Jehova ang aton mga panikasog.—1 Cron. 29:9.
3, 4. Paano kita makabenepisyo sa pag-auxiliary payunir?
3 Sa masami, kon pirme naton ginahimo ang isa ka butang, mangin mas mahapos kag mangin mas makalilipay ang paghimo sini. Ang paghinguyang sing dugang nga tion sa ministeryo magabulig sa inyo nga makatigayon sing kompiansa sa pagbantala sa pamalaybalay. Mangin mas lantip ka sa pagsugod sang pag-istoryahanay kag sa paggamit sang Biblia. Kon pirme mo ginasugid ang imo pagtuo, labi pa ini nga nagabakod. Madamo sang mga wala sing ginatun-an sa Biblia ang nakasugod sing pagtuon sang nag-auxiliary payunir sila.
4 Mahimo man kita mabuligan sang pag-auxiliary payunir agod indi lamang mangin rutina ang aton pag-alagad. Ang isa anay ka regular payunir nagbatyag nga mas ginhatagan niya sing daku nga igtalupangod ang iya trabaho, amo nga nagdesisyon sia nga mag-auxiliary payunir sing isa ka bulan. Nagsiling sia: “Indi ako makapati nga mapapagsik liwat sang isa lang ka bulan nga pag-auxiliary payunir ang akon pag-alagad! Naghimo ako sing mga kahimusan agod makapadayon sa pag-auxiliary payunir, kag sang ulihi nagregular payunir ako liwat.”
5. Paano naton malandas ang pagbatyag nga indi sangkol sa pagbantala?
5 Paglandas sang mga Balagbag: Mahimo nga nagapangalag-ag ang iban sa pag-auxiliary bangod nagabatyag sila nga indi sila sangkol subong mga manugbantala. Kon amo ini ang nagahawid sa inyo, mabuligan kamo ni Jehova kaangay sang ginhimo niya kay Jeremias. (Jer. 1:6-10) Bisan pa si Moises ‘indi maayo nga manughambal kag nagautol-utol sa paghambal,’ gingamit sia ni Jehova sa pagtuman sang Iya kabubut-on. (Ex. 4:10-12, Maayong Balita nga Biblia) Kon nagabatyag ka nga indi sangkol, mangayo sing bulig kay Jehova.
6. Paano ka makaauxiliary payunir walay sapayan sang sablag sa lawas ukon sang kasakuon?
6 Nagapangalag-ag ka bala sa pag-auxiliary bangod sang di-maayo nga panglawas ukon bangod sang kasakuon? Kon may sablag ka sa lawas, mahimo nga makaauxiliary payunir ka paagi sa pagpanghikot suno sa masarangan mo. Kon masako ka, basi mapaisol mo sa masunod nga bulan ang indi man gid importante nga mga hilikuton. Ang iban nga may bug-os tion nga trabaho nagbakal sing tion agod makaauxiliary payunir paagi sa pagbakasyon sing isa ukon duha ka adlaw.—Col. 4:5.
7. Ngaa mapuslanon nga ipangamuyo ang pag-auxiliary payunir?
7 Kon Ano ang Dapat Himuon: Ipangamuyo ang imo handum. Pangabaya si Jehova nga pakamaayuhon ang imo mga panikasog agod mapasangkad ang imo ministeryo. (Roma 12:11, 12) Mabuligan ka niya sa pagdesisyon sing maalamon tuhoy sa pagpasibu sang imo iskedyul. (Sant. 1:5) Kon wala ka sing handum, pangabaya si Jehova nga buligan ka nga mangin malipayon sa pagbantala.—Luc. 10:1, 17.
8. Paano makabulig sa imo ang pag-aplikar sang Hulubaton 15:22 agod makaauxiliary payunir?
8 Hinun-anuni subong pamilya ang tulumuron nga pag-auxiliary payunir. (Hulu. 15:22) Ayhan makaauxiliary payunir ang isa ka katapo sang pamilya sa bulig sang iban nga katapo. Isugid sa iban sa kongregasyon ang imo handum nga magpayunir, ilabi na sa may pareho sa imo sing mga kahimtangan. Mahimo nga mapalig-on ka ukon sila nga mag-auxiliary payunir.
9. Ano nga mga bulan ang mahimo mo pilian sa pag-auxiliary payunir?
9 Samtang ginarepaso mo ang imo iskedyul sa pagministeryo para sa masunod nga tuig sang pag-alagad, binagbinaga kon san-o ka makaauxiliary payunir. Kon bug-os tion ang imo trabaho ukon nagaeskwela ka, mahimo mo mabinagbinag ang mga bulan nga may piesta opisyal ukon may lima ka Sabado ukon lima ka Domingo. Halimbawa, ang Septiembre, Disiembre, Marso, kag Agosto may lima ka Sabado kag Domingo. Ang bulan sang Mayo may lima ka Sabado, kag ang Hunyo may lima ka Domingo. Kon may sablag ka sa lawas, binagbinaga ang mga bulan nga may maayo nga paniempo. Mahimo mo man planuhon nga magpayunir sa tion sang pagduaw sang manugtatap sang sirkito sa inyo kongregasyon. Sa iya pagduaw, makapribilehiyo ka sa pagtambong sa una nga bahin sang miting nga hiwaton upod sa mga regular payunir. Sanglit ang Memoryal matuon sa Marso 22, 2008, ang Marso, Abril, kag Mayo maayo gid nga bulan agod mag-auxiliary payunir. Kon makapili ka na sing bulan ukon mga bulan sa pag-auxiliary payunir, ang paghimo sang iskedyul makabulig sa imo agod malab-ot ang ginapatuman nga oras.
10. Ano ang puede himuon kon indi mo gid man masarangan nga mag-auxiliary payunir?
10 Kon indi ka man makaauxiliary payunir sa masunod nga tuig sang pag-alagad, mahimo mo gihapon mahuptan ang kakugi sa pagbantala. Ipadayon ang paghimo sang imo bug-os masarangan sa ministeryo, nga nagasalig nga nahamuot si Jehova sa imo bug-os kalag nga panikasog sa paghatag sa iya sang imo bug-os nga masarangan. (Gal. 6:4) Mangin masinakdagon, kag palig-una ang mga makasarang sa pag-auxiliary payunir. Mahimo mo mapahisuno ang imo iskedyul sa pagpakigbahin sa ministeryo agod madugangan mo bisan isa lang ka adlaw kada semana ang pag-upod sa mga magapayunir.
11. Ngaa dapat kita magbatyag sing pagkahilingagawon?
11 Nagabatyag sing pagkahilingagawon ang mga alagad ni Jehova. Kinahanglan matapos ang pagbantala sing maayong balita. Kabuhi ang nadalahig, kag malip-ot na lang ang tion nga nabilin. (1 Cor. 7:29-31) Ang gugma sa Dios kag sa isigkatawo amo ang magapahulag sa aton nga himuon ang aton bug-os nga masarangan sa ministeryo. Upod ang panikasog kag ang maayong pagplano, mahimo kita makaauxiliary payunir bisan isa lang ka bulan sa masunod nga tuig sang pag-alagad. Isa gid ini ka maayo nga tulumuron!