Tatapa ang mga Napahamtang nga Magasin kag Brosyur
1 Ginlaygayan ni Jesus ang iya mga sumulunod nga maghimo sing mga disipulo. (Mat. 28:19) Wala ina nagakahulugan sang pagpahamtang lamang sing literatura; dapat kita magbalik agod mahatag ang dugang nga espirituwal nga bulig para sa mga nagapakita sing interes.
2 Kon ginpatalupangod naton ang isa ka artikulo sa isa sang aton mga magasin sa aton una nga pagduaw, maayo nga hambalan ang amo gihapon nga topiko sa pagbalik naton:
◼ “Sang nagligad ko nga pagduaw, ginpakita ko sa imo ang isa ka artikulo sa Ang Lalantawan (ukon Magmata!) nga nagbulig sa aton nga maapresyar ang kinahanglanon nga tan-awon ang Biblia. Ang katuyuan sang Dios nga isa ka mas maayo nga palaabuton para sa katawhan nasentro sa iya Ginharian nga panguluhan. Ang Miqueas 4:3, 4 nagasugid sa aton nga tapuson sini nga Ginharian ang tanan nga mga inaway.” Sa tapos mabasa ang kasulatan, ipakilala ang “Toloka!” nga brosyur, kag ipakita ang ilustrasyon sa panghapin. Binagbinaga ang nahaunang parapo kag ang mga kasulatan nga ginsitar, nagapakita nga ang Miqueas 4:3, 4 isa sa sini. Maghimos sing isa ka pagduaw liwat agod mapadayon ang paghinun-anon sa parapo 2.
3 Kon daw diutay lamang ang interes sang tagbalay ukon wala sia sing tion sa pagpakigsugilanon, ayhan madugang mo na lang ang iya ngalan sa imo ginadul-ungan sing magasin:
◼ “Sanglit nagpakita ka sing interes sa mga magasin nga ginbilin ko sa imo sang nagligad, sa banta ko maluyagan mo ang ulihi nga mga guwa. Nagapati ako nga mawili gid ikaw sa sining artikulo.” Ipakita ang isa ka artikulo nga sa banta mo makagalanyat sa iya. Manaad nga magbalik dala ang masunod nga mga guwa.
4 Kon ang tagbalay nagabasa sing mga magasin kag nagapakita sing apresasyon sa sini, ayhan mamat-od ka sa pagtanyag sing suskripsion.
◼ “Sanglit daw naluyagan mo Ang Lalantawan, nalipay ako sa pagdul-ong sang pinakaulihi nga mga guwa pag-abot gid sini. Kon luyag mo, mahimos ko nga mapadala ini sa imo sing tayuyon paagi sa koreo agod sigurado ka nga matigayon ang tagsa ka guwa.”
5 Kon nakapahamtang ka sing brosyur apang wala sing kahigayunan nga mapasundayag ang kahimusan sa pagtuon, planuha nga himuon ina sa pagduaw liwat.
Halimbawa, kon nabilin mo ang “Government” nga brosyur, pangabaya ang tagbalay nga kuhaon ang iya kopya kag magsiling:
◼ “Talupangda ang ginasiling sini sa pahina 3 tuhoy sa tema sang mensahe nga ginbantala ni Jesus sang yari sia sa duta.” Nian basaha ang nahaunang parapo. Agdaha sia nga basahon ang parapo 2 kag 3, kag pamangkuta sia kon ano ang ginahunahuna niya nga kinahanglan niya nga himuon agod makatuon sing dugang pa. Nian magsiling: “Luyag ko magbalik kag hambalan kon ngaa dapat naton tamdon ang panguluhan sang Dios subong ang aton lamang nga paglaum.”
6 Lainlain ang aton mga brosyur. Pangitaa ang makawiwili nga mga punto sa isa nga ginaplano mo nga gamiton. Magabulig ini sa imo sa pagpalig-on sa mga sinsero nga matun-an ang dugang pa nahanungod sa mga butang nga ginsugo ni Jesus.—Mat. 28:20.