Padayon nga Panikasugi ang Teokratikong mga Hilikuton sa Mayo
1 Ang Mayo nagahatag sing mga kahigayunan sa pagpakigbahin sa nanuhaytuhay nga mga hilikuton. Luyag sang madamo nga himuslan ang bakasyon sa eskwelahan kag ang maayo nga paniempo sa pagliwaliwa. Apang, dapat kita magbantay nga indi sini maupangan ang aton teokratikong hilikuton.—Filip. 3:16.
2 Kon may tion kamo, kaangay sang panahon sang bakasyon sa eskwelahan, nahunahuna na bala ninyo ang nahanungod sa pagpakigbahin sing labi pa sa ministeryo? Nasapwan sang madamo nga isa ini ka maayo nga tion sa pag-auxiliary payunir. Sa masami nagbukas ini sang ganhaan sa daku pa nga mga pribilehiyo subong mga regular payunir. Ang mga pamilya makaagom sing tunay nga kalipay sa paghinguyang sang bug-os nga mga adlaw sa ministeryo nga ululupod. Bangod mas malawig ang oras nga masanag pa ang adlaw, mas madamo ang makaani sang mga kapuslanan sang pagpakigbahin sa pagpanaksi sa gab-i.
3 Kamusta ang pagbulig sa isa ka kongregasyon nga nagakinahanglan sing bulig sa pagtuptop sang iya teritoryo? Ayhan may iban sa inyo kongregasyon nga maluyag mag-upod sa imo sa pag-alagad sa isa ukon duha ka semana kon diin mas daku ang kinahanglanon. Kon ang inyo grupo diutay, ayhan ang mga manugbantala sa kaingod nga kongregasyon maluyag sa pag-upod sa inyo. Kon limitado lamang ang kalayuon nga inyo malakbay, mahimo marekomendar sang manugtatap sa sirkito ang isa ka kaingod nga kongregasyon nga magaapresyar sang inyo bulig.
4 Nagaplano bala kamo nga magbakasyon malayo sa puluy-an? Kon amo, nagaplano bala kamo sa pagtambong sa mga miting sa lugar nga pagaduawon ninyo? Ano naman ang tuhoy sa pag-alagad sa latagon upod sang mga kauturan didto? Ang paglakip sa sini sa inyo bakasyon makalilipay gid para sa inyo kag para sa iban. (Roma 1:11, 12) Subong man, makapanaksi bala kamo sing dipormal samtang nagalakbay? Pat-ura nga dalhon ang inyo Biblia kag suplay sang literatura. Gamita ang pila sang inyo tion sa pagliwaliwa sa pagbasa kag sa pagtuon sa Biblia. Dumduma nga bisan nga sa pulupanag-on kinahanglan naton ang bakasyon gikan sa sekular nga mga hilikuton, indi naton luyag nga magpahuway sa pag-alagad kay Jehova.
5 Ang mga gulang dapat mangin alisto sa paghupot sang mga hilikuton sang kongregasyon nga organisado katama. Kon magabakasyon ang bisan sin-o sa mga gulang ukon ministeryal nga mga alagad, dapat himuon ang mga kahimusan nga maatipan sang iban ang ila mga responsabilidad. Ang pagpahibalo sa nagadumala nga manugtatap sing abanse sang mga petsa nga wala ining mga kauturan magabulig sa iya sa paghimo sing nagakaigo nga mga pagbag-o.
6 Huo, ang tion sa pagbakasyon mangin masako gid nga tion. Apang ang mga pagliwaliwa madali nga makatublag sang inyo maayo nga rutina sang pag-alagad sa Ginharian. Gamita sing maayo ang inyo tion sa pagliwaliwa sini nga bulan. Hibalua kon ano ang mas importante nga mga butang kag unaha ini sa inyo iskedyul.—Filip. 1:10.