Pagbantala Sing Kamatuoran Sa Adlaw-adlaw Bilang Pag-ilog Kay Jesus

¹ Si Jesus may espesipiko nga hilikuton sang nagkari sia sa duta sa ‘pagpanaksi sa kamatuoran.’ (Juan 18:37) Ini nga hilikuton kaangay sang pagkaon sa iya. (Juan 4:34) Si Lucas nagreport nga si Jesus padayon nga ‘nagtudlo adlaw-adlaw sa templo.’ Wala madugay antes sia napatay, nakasiling sia sa iya Amay: “Ginhimaya ko ikaw sa duta, sang natapos ko ang buluhaton nga nahatag mo sa akon nga himuon.”​—⁠Juan 17:⁠4.

² Kon ang aton tagipusuon napun-an sing apresasyon tungod sa tanan nga ginhimo ni Jehova, mapahulag man kita sa pagpamulong tuhoy sa iya sa adlaw-adlaw. Mangin kaangay kita sang mga disipulo ni Jesus nga masidla nga nagsiling: “Indi kami makauntat sa pagpamulong tuhoy sa mga butang nga amon nakita kag nabatian.” (Binu. 4:20) Ang ila pagpamulong tuhoy kay Jehova dalayon, kay ang rekord nagasiling nga “sa adlaw-adlaw . . . nagpadayon sila sing walay untat.” (Binu. 5:42) Dapat naton pamangkuton ang aton kaugalingon, ‘Manug-ilog bala ako sang akon Manunudlo, si Jesus?’

³ Pagbantala nga May Pagkahilingagawon: Si Jesus nagtagna nga kon ang mensahe sang Ginharian nabantala na sa bug-os nga duta, “ugaling magaabot ang katapusan.” (Mat. 24:14) Dapat ini magpatudok sa aton sang pagkaimportante kag pagkahilingagawon sang aton hilikuton. Sanglit malapit na ang katapusan, ang tion nga nabilin sa pagtapos sini nga hilikuton diutay na lang!

4 Ginapakita sang report nga ginapadasig ni Jehova ang hilikuton sa pagtipon. (Isa. 60:22) Sa madamong kadutaan, ang mga tawo nagadugok sa kamatuoran, nga nagasiling: “Magaupod kami sa inyo, kay nabatian namon nga ang Dios nagaupod sa inyo.” (Zac. 8:23) Ang mga pinamulong ni Jesus matuod: “Ang alanyon bugana, apang pila lamang ang mga manugpangabudlay . . . Makitluoy kamo sa Agalon sang alanyon nga magpadala sing dugang nga mga manugpangabudlay sa iya alanyon.”​—⁠Mat. 9:​37, 38.

5 Ibantala ang Kamatuoran Adlaw-adlaw: Kada adlaw dapat kita mangita sing mga paagi nga mapaambit ang kamatuoran sa iban. Mateleponohan mo bala ang isa ka abyan? Ukon masulatan sia? Kamusta naman ang pagtanyag sing tract sa tindera kon nagapamalaklon ka? Mahimo nga may iban pa nga mga kahigayunan nga mapaambit naton ang aton paglaum sa iban.

⁶ Kada adlaw dapat naton ilugon ang panimuot ni Jesus, nga nagpaathag kon ngaa ginpadala sia sa duta: “Dapat ko ipahayag ang maayong balita sang ginharian sang Dios.” (Luc. 4:43) Kon luyag naton nga mangin kaangay sang aton Manunudlo, luyag naton nga amo man sini ang aton himuon​—⁠Luc. 6:⁠40.