Buligi ang Iban sa Pagtuon sang Kamatuoran
1 Si Jesus nagkari sa duta agod magpanaksi sa kamatuoran. Ginhanas niya ang iya mga disipulo agod mangin mga manunudlo. Ginpaanggid niya sila sa ‘publiko nga mga instruktor’ nga may makuhaan sing daku nga bahandi. (Mat. 13:52) Ang mga disipulo ni Jesus karon nagagamit sing naimprinta nga mga publikasyon agod mapadasig ang pagbantala sang Ginharian nga hilikuton. Halimbawa, may yara kita nanuhaytuhay nga mga brosyur sa pagbulig sa iban nga mangin mga disipulo. Paano naton gamiton ining hamili nga mga instrumento?
2 Sa pagsugod sang paghambalanay nga nagadul-ong sa pagtanyag sing brosyur nga “Toloka! Ginahimo Ko nga Bag-o ang Tanan nga Butang,” mahimo kamo mamangkot:
◼ “Napaligban mo na bala kon ngaa walay sapayan sang tanan nga mga panikasog sang tawo, ang paglaum para sa palaabuton daw madulom? [Pasabta sia.] Ginapaathag sang Biblia kon ngaa tama kadamo nga mga panikasog ang napaslawan.” Basaha ang Salmo 146:3, 4. Buksi ang parapo 43 sang brosyur kag basaha ang nahaunang tatlo ka dinalan. Nian ipaathag ang panguluhan sang paghidait sang Dios gikan sa parapo 43 kag 44, nga ginlaragway sa panghapin sa atubangan kag sa likod sang Toloka! nga brosyur.
3 Yari ang isa ka paagi nga mahimo ninyo magamit ang brosyur nga “Nagaulikid Gid Bala ang Dios sa Aton?”:
◼ “Madamong tawo ang nagpakiana sining mga pamangkot sa panghapin sini nga brosyur. [Basaha ang mga pamangkot.] Sanglit ang isa ka mahigugmaon nga Dios wala nagasakdag sang maayo kag malain sing dungan, ano ang imo panghunahuna nahanungod sa iya saad diri sa Isaias 65:21, 22?” Kon ginpakita ang interes, buksi ang pahina 26 kag 27, parapo 19-22, kag ipaathag kon ano ang pagahimuon sang Ginharian sang Dios.
4 Kon nagatanyag sing brosyur nga “Ano ang Katuyuan sang Kabuhi?,” mahimo ka makasiling:
◼ “Para sa madamo, ang kabuhi daw wala sing katuyuan. Ano sa banta mo ang ginakinahanglan agod mangin mas makahulugan ang kabuhi? [Pasabta ang tagbalay.] Ginapakita sang Biblia nga naghanda ang Dios sing maayo pa nga mga butang para sa aton. Tan-awa ang ginasiling niya sa Bugna 21:4, 5.” Kon nagakaigo, padayuna ang paghambalanay paagi sa mga punto gikan sa bahin 8 sang brosyur sa pahina 29 kag 30.
5 Nagagamit sang brosyur nga “Agoma ang Kabuhi sa Duta sing Dayon!,” ang isa ka batan-on nga manugbantala mahimo makapamangkot:
◼ “Luyag mo bala magpuyo sa isa ka paraiso nga duta kaangay sini? [Ipakita ang panghapin sa atubangan kag sa likod, kag pakumentuha sia.] Ang amon pamilya nagapaabot nga magkabuhi didto bangod sang ginasiling sang Biblia diri sa Juan 17:3.” Nian mahimo matanyag ang brosyur.
6 Kon magagamit kamo sing iban pa nga mga brosyur sa inyo ministeryo sini nga bulan, mahimo ninyo masunod ang inyo mga presentasyon sa mga panugda sa ibabaw. Hinumduma nga mangin malip-ot kag positibo agod mapukaw ang interes sang mga tagbalay.
7 Si Jehova naghatag sa aton sing kamatuoran. Dapat naton ini ipaambit sa iban, sa naimprinta nga dagway kag sa aton pagpakigsugilanon. Sa sining paagi mapamatud-an kita nga mangin publiko nga mga instruktor para sa kaayuhan sang iban.—Mat. 28:19, 20.